Ka Leo o ka Lahui, Volume II, Number 863, 26 Ianuali 1894 — HE MOOLELO KAAO HAWAII NO LAUKAIEIE. Ke Kino Kamahao Iloko O KA Punohu Ua-Koko. Ke Kahulileole'a o ka Kuluaumoe o na Pali o Waipio Hawaii. [ARTICLE]

HE MOOLELO KAAO HAWAII NO LAUKAIEIE.

Ke Kino Kamahao Iloko O KA Punohu Ua-Koko.

Ke Kahulileole'a o ke Kuluaumoe o na Pali o Waipio Hawaii.

Unuhiia e Mose Manu no "KA LEO." Ua alualu hele ae la ko uka poe e imi ana i kahi i pae ai o ua mau pu nei, aole nae he wahi mea a loaa iki. Ma keia wahi kaua e ka mea heluhelu e nana ae ai i ua niuhi nei o ke kailoa, ka mea nana i hehiku iho nei na ale a o ka moana. I keia wa ana e noho nei iluna o Kalanipuu, ua eleu koke ae la oia no luna o Haupu, a mai laila oia kahi i ku aku ai kilo aku ma ka huli ma kona ma kona ma ka aoao komohana hema o Kauai; malaila oia i ike aku ai i ka puapua mai a ke ao naulu o Niihau, a kau pu mai la no hoi imua ona na halialia ana no ka mea i hele mai ai ma keia huakai; ua hiki hoi wahi ana i hookanaaho ae ai, aole oe e pakele ana i kuu mana ina o oe kena. No keia haupu honua ana o ua kamahele nei, ua haalele koke iho la oia ia wahi, ua heke luna o ke ao lewa, nolaila ua pili pono keia mele. O oe no paha ia e ka lau o ke aloha Oia no paha ke kau mai kei ka halia Ke ano aloha i hiki mai ai. Iaia nei i haalele aku la ia luna o Haupu, he wa pokole loa, hele ana keia i ke one o Luhi ma Waimea, oia kana i olelo iho ai, luhi kuu kino luhi ia iala; a hala keia one hooluhi ia ianei mahope, ua kaukoe aku la keia no Mana, malaila oia i ike aku ai i kekahi kaikaikamahine ui launa ole me ke kilakila o kona kulana a pau ma ka nana aku o ko ia nei kiionohi, e holoholo mai ana ma ke ano paani lealea iluna o ke one kani o Nohili, me kona mau hoa he lehulehu wale, a oia ka ia nei i haka pono aku ai me ka noonoo nui ana i kana mea e hana aku ai. Nolaila, ua hoike ae la oia, i ko- na kino kanaka maoli me kona ku-

lana o ke kanaka maikai, i huipuia me kana hana akamai he hoohihia i ka naau o kana mea e makemake ai, a he make ka hopena. He hana ia ua kamaaina ia Makanikeoe, a pela no hoi i keia lahui a mahope aku e hoakaka aku ana au i ka moolelo o Makanikeoe, ka mea i kaulana kuu aina oiwi, ka makani kaili aloha o Kipahulu. I keia wa a Makanikeoe i hoike ae ai iaia iho me ka holoholo ana ae ma kahakai o Mana me kona hookuu ana ae i ua ipu kamahao nei ana he aloha, he mea oiaio, aole i hala he minute ma ia hope iho, ua komo pono aku la o Honoalele o Maolioli o ka hale a ke aloha i loko o ua kaikamahine la, nona ke one kani o Nohili, a ke kapalili la kona ake niau. Ma keia ano i loaa i ua kaikamahine la, ua kaawale koke aku la kona mau manao mua, a ke hiupalaka ia mai la oia e ke keiki o Hawaii imiloa a oia ka kaua e ka mea heluhelu e hoomanao ae ai i na la i hala, hanaio paha auanei ka ua ia Kohala, i ka eueu o Hawaii, alia hoi kaua e pulale ae, e nana aku kaua ia mua, a ke ninau iho la paha oe e ka mea heluhelu i ka inoa o ua kaikamahine la o Mana, ae, oia o Kaohaiula, he kaikamahine papa no ia kaha i olelo ia; aloha Mana i Kaaiuahiole, a nona hoi keia puana ana. Aia i Mana ko lei nani I ka ohai o Papiohuli,