Ka Leo o ka Lahui, Volume II, Number 776, 25 September 1893 — NA OULI O KA MANAWA. [ARTICLE]

NA OULI O KA MANAWA.

Ma ka Poaha o ka pule i hala, ua ike ia e ka lehulehu kekahi ouli kupanaha, a o ua ouli la oia no ka pulou ana o ka Hae Amerika, o ke Kanikela Generala Severance e noho nei ma Hawaii nei. Oiai hoi. o keia ouli, o ka pulou ana o ka Hae maluna iho o ka pahu Hae, he mea ano nui a hiki mai oiai, o ka hae oia no ke poo o ke Aupuni. O ka mea i maa ia kakou ka la hui Hawaii. he hoailona make ia, penei e maopopo ai. i ke au e noho Moi ana o Kamehameha IV a me V ua ike la na ouli o keia ano, a ua koho koke aku no ka lahui. e make ana, a ua make io no. O keia hoi, ua maopopo e hoopau ia ana oia, oiai hoi, ma ka Poaha nei i haalele aku ai ka mokuahi Alameda ia Kaleponi, a holo mai no Hawaii nei, a aa maluna ona ke Komisina a me ke Kanikela Generala a o laua na pani hakahaka ma kahi o na Luna Aupuni i hoopauia, e noho nei i Hawaii nei. Ma keia ouli, ua lanakila o Hawaii, ua hala na la o ka inea a me ke kupilikii, a ua ike ia aku na opua e hoike ana o Hawaii no Hawaii.