Ka Leo o ka Lahui, Volume II, Number 694, 28 April 1893 — IMUA E HAWAII NO KA PONO O KO KAKOU AINA MAKUAHINE. [ARTICLE]

IMUA E HAWAII NO KA PONO O KO KAKOU AINA MAKUAHINE.

Kuu aina hanau e, Nou au e mele nei. Mr. Lunahooponopono. Aloha oe: — E kala mai ia'u no kahi kaawale o kou mau kolammu, no'u iho, aole au i hoonaauao ia ma na kula kiekie, aka, ua konoia mai ko'u lunaikehala, e pane ma ka mea hiki ia'u ke kamailio, oiai o'u mau hoa makaainana e nune ana iloko o na olelo like ole. Ua noho iho au a ua uluhia e na manao hoohuoi, no ka mea, eia kakou ke nee aku nei i kahi e hooko ia ai o na imi e ku nei iloko o kela a me keia puuwai pakahi, kahi hoi a kakou e puana mau aku ai, ua nalohia a o Hawaii, a i ole, ua loaa hou ke kuokoa ia Hawaii. Ke kuokoa o Hawaii, oia kekahi kahua a'u i makemake ai e kuka aku i o'u mau hoa oiwi, ka io o kuu mau io, a me ka iwi o kuu mau iwi, o ka loaa ana ia kakou o ka inoa kuokoa, oia kekahi o na makana kiekie i haawi ia mai e noho kakou ma ke ano he aupuni kuokoa, he moi kuokoa. a he lahukanaka kuokoa, i kakoo pono ia mai e Amerika, Enelani. Farani, Geremania a me Sepania, ua like ia me ka metala hanohano e kau nei iluna o ka umauma o kela a me keia Hawaii pakahi, i lanakila ai hoi ka kakou kaena ana, he Hawaii au mailuna a lalo, aka ea, e aa anei kakou e kiloi aku i keia momi i loaa mai me ke kumukuai ole, a e hulali ae malalo o ko kakou mau wawae, a e hookahuli hoi i ka leo aloha o ko kakou moi Kauikeaouli ka olelo ana'e.

Ua pau ke ea o ka aina i ka pono Auwe! mea e i kuu manao, aka, e heluhelu me ke akahele, ua hana ke Akua ia kakou ma kona ano, he uhane ike, akamai a noonoo, nolaila, e awaiaulu ia kakou maluna o ke kaupaona kupono, oiai ua like keia mau la e nee nei me he makani heleuluulu'la, a me he waikahe la ka puai mai o na lele maluna o ka poe i kapa ia he naauao; e kapa wale ana i kona hoa lahui, he hupo ka ae ole e hoohui aina. Kahaha ea, he hoailona anei ia o ka hupo, oia kekahi hana naauao a ke kanaka aloha aina e pulama a e kakoo i ka pono no ke kuokoa o kona aina, pela o Napoliona i pane aku ai i kona mau wahi kona uuku, imua e kakoo no ka pono o ko oukou aina, a owai la ke kanaka e nele ke aloha i kona aina hanau, i na paha oia e kipaku ia mai ka aina aku no kahi i maopopo ole a e haalele hoi i kana wahine a me kana mau keiki lehulehu, a kaawale aku mawaho o na kai poi nalu akea e haawi mai i na kilohi hope maluna o ka punana ana i hookahua ai, kahi hoi e kipa mau ai ka pumehana o ke aloha, aole e nele ke kulu o kona waimaka, e ala mai no na hoomanao ana o kona mau la opio a kanaka makua e ani peahi mai no na welelau aloha o kona aina na kula uliuli. na kahwai owe malie, na mauna kilakila, aka, he mea makehewa ua hoomanao ana ae, ua nalohia ka aina mai kona mau maka aku, ua hala ka wa. Pela anei kakou e makemake ai ia Hawaii e kipaku mailoko aku o ko kakou mau lima ponoi, oiai kakou he poe keiki i hanauia mai eia? O ka uku anei ia o kona hiipoi ana ia kakou e hoohalike me Iuda, a e keha ai hoi ka kakou olelo ana ae. He aina makuahine, auwe o keaha la ka mea maikai, o ka ili ulaula paha me ka inoa keokeo [Amerika] a i ole, o ka ili ulaula paha me ka inoa kuokoa, ke o mau nei keia mele iwaena o keia lahui, ke kono mai nei ia kakou e himeni ae me ka puana like ana. Paa kuu manao aloha, Paa mau, paa mau, Paa kuu manao aloha, I ka aina hanau o'u Aola ai e kipi. no no no Aole kumakaia He aloha oia mau &c. He wahine au, a he Moiwahine ko'u, ke makee nei i kona pono, ke kuokoa, a me kona nohoalii, o ka moi ka mea e nani ai ka lahuikanaka ka mea e hanohano ai ka moi i na aole ka mooi, mahea kona lahui kanaka? ua ike kakou i na leo aloha o ko kakou Moi, e hea ana me kona leo nahenahe a iloko o na pepeiao o Amerika, a i kona mau makaainana, he mea e ka walohia o ka naau, he hoomanao ae nona, ma kela la poina ole, ke kaili ana i na poo Moi, aole no i poina iloko o ka puuwai oka poe makee alii, oiai oia i hehi mua ai na lepo o Manokalanipo, e haawi ma i na leo hoolana i kona lahui aloha. E Hawaii holomua, ka mea i ka-

paia ka hoku o ka Pakipika e nana 1 O oe ka ia e Liliuokalani Ka hiwahiwa a ka Lahui, He wehi he mamo he 'lii kiekie, He pua no Keohokalole. Chor. Ka Lani e Lolokulani Aloha oe aloha nui Ka leo keia ou makaainana O Manokalanipo. 2. Ua ike Hawaii he moku no, Kalani. Ua lohe Maui o Kama, Hanohano Kakuhihewa i ka noho a Kalani, Ua wehi Kauai o Mano, 3. Ua hano Hawaii a puni na moku, Ua noheia e ke Queen. O Vitoria ko Pelekane e O oe ko Hawaii nei. 4. E ala Kauai moku Kailila, Eia ka Lani a kakou, Lokahi ka manao a paa i ka pono Ka makia ia o Liliu. 5. He mau leo aloha keia e Kalani Ke alii kapu ku kilakila. Ka puana o Lolokuoliliuonamoku Kou inoa ia e o mai oe. Nolaila, e o'u mau hoa lahui, iloko o ka hamumu o ke aheahe malie eia na nunu keokeo ke maalo nei ma na ipuka ou e Hawaii. e nihi ka helena mai hoopa, mai pulale i ka ike a ka maka. Ke hooki nei au i ka inu ana o ka'u maka peni maanei me ke aloha. Na Kekahi Wahine Hawaii.