Ka Leo o ka Lahui, Volume II, Number 692, 26 April 1893 — Page 4

KA LEO O KA LAHUI.

"E Mau ke Ea o ka Aina i ka Pono."

 

KA LEO.

JOHN E. BUSH,

HONOLULU APERILA 26, 1893

 

KA MOOLELO

O

HIIAKAIKAPOLIOPELE.

 

I HOOPONOPONOIA

 

MAI KA POE KAHIKO MAI A ME KA POE I HOOPAA I NA MOOLELO A ME NA KAAO KAHIKO O HAWAII NEI.

 

            Huli iho keia nana i na hoa oia nei, o ko laua holo no ma kai, kani hou aku no ke oli aia nei penei.

Aloha ko’u hoa i Puali

I ka wai o Pohakea, he luna o Kanehoa

He lae ino o Maunauna

O Lihue ke hele ia, honi i ke ala mauu

I ke ala o ke kupukupu

E lino ana e ka Waikoloa

E ka makani he Waiopua la

Kuu pua, me he pua la i kuu maka

Ka oni i ka haku onohi, ka wai la liu

I kuu maka la, e uwe au—e

            A pau keia aia nei, o ke ano o keia mele, he mele ano inaina no ke kaikuaana no ka make ana o ke aikane aia nei, oia hoi o Hopoe, ka mea aia nei i kauoha ai i ke keikuaena e malama, aole hoi hoi o Pele i malama i ka ia nei kauoha ka ke kaikaina, pau no o Hopoe i ka ai ia, a me ka moku lehua aia nei, oia ka lua o ka ia nei kauoha aloe nae i koe ia mau mea, ua pau no i ka ai ia, nolaila kela mele i mele mua ia ae la, alaila, manao hoi keia, he pule na ia nei ka Pele mea i hoomalu mai ai, oia hoi ke kane e holo ae la ma kai, oia hoi o Lohiau, no ka mea, aole keia i hoole i kana kauoha, ke malama nei no keia, aole i hoopa aku ia ia, me ke manao no nae o Hiiakaikapoliopele aia a hiki i Hawaii  a ike ma na maka o Pele, alaila, lilo mua no ia ia nei ka hoomae o ke kane, pela ko ia nei manao iloko iho, alaila, e Kapae ae keia i ka olelo a Pele a pela io no paha, a mahope aku ua ko io no ia manao ana oia nei.

            Iluna no keia o Pohakea, nana aku keia i Hawaii, e hee mai ana ka wahine i ka pue wai o Hilo, a me na kanaka, ua ua iho la e ka ua a kahe ka wai, ha-i ka pue-wai, oia ka na mea a pau e hee nei, me he hee ana la no ka nalu o kai, alaila, hapai ae keia i keia mele penei:

A makani Kuamu lehua ko uka,

Ke hoowaawaa ae la,

E ua i Hanakahi—e

Ke ua la, ua mai la Hilo

A moku kahawai piha aku la

Na hale lehua o kai e

            I Pohakea no keia e noho nei, nana aku no keia e a mai ana no ke ahi a Pele i Puna, hapai hou no keia i keia mele penei:

Aia no ke ’kua la iuka

Ke ho’a la i ka papa e enaena

A pulelo mai ka ohia o ka lua

Maewa ke poo puu newa i ka makani

I ka hoonaue ia e ka awaawa—e

            A pau ka ia nei mele ana, alaila, huli aku keia nana ia Kauai, aloha ae keia i ke kaikoeke ia Kahuanui i ka lele mai o ke ao, alaiala, uwe aku keia ma ke meie penei:

A luna au o I’ohakaea

Kilohi aku kuu make ia lalo

Me he wai la e haale mai ana

Na lehua o Kawaikini i Waialeale,

Ke haale iho nei kuu waimaka e hanini

E ahe wale mai ana no

Ka lau o ke aloha la o ka moe—e.

Aole i pau.

 

            Ke hoike pu ia aku nei ka lohe i na poe Iawe pepa a pau, o KA LEO, a me ka OIAIO, i ka wa e nele ai ka loaa ana aku o ka pepa ia oukou, a hoike koke mai i ka lohe i keia Keena, a me ka hakalia ole, i hiki ke hoolawa hou ia aku kou iini.

MA KE KAUOHA.

 

HE MAU NANEHAI NO KA NAAUAO.

 

Imua o na opio o e au a Liliuokalani.

Nanehai 3. I na paha e kapaeia na Kanawai mau o ka Poai Lani o ke ao holookoa; alaila ihea la e waiho ai ka honua nei?

            Nanehai 5. Heaha la ka mea e moe ai (upoi ai) na maka i ka wa e pule ai?

            Nanehai 6. O ka hiona i ike ia ma ka moeuhane, he mau hoakaka anei ia o ke ola uhane o ke ao maluna ma ka Lani?

            [Ma ka loaa pono o ka haina, e kapaeia ai kekahi Nanehai, mai ka hoolaha mau ana].

 

E Nana e na Keonimana i Keia

E WEHE IA ANA!

E WEHE IA ANA!!

Ke Ala hou Ana o na Kahiko Nani Like Ole

MA KAHI

O

N. S. SACHS.

104 Alanui Papu, Honolulu.

 

Eia ma ko’u Halekuai e ike ai na mea a pau.

e Punawai Pipii Ano Hou

I kahikoia me na Pua Nani Like ole o kela a me keia ano.

Na Lipine Ano Hou Loa

Na Lihilihi Panio.

Like ole o na Ano he nui.

Na kahiko nani i kinikohu ia, i a ka wehi o na Opio. Eia la ke ahu

Alala kunni nei, hele mai hookahi, heie mai elua, hele mai a pau Eia ka nani la, ke alohi nei i ka papa o Maukele

Na ka anoi e wae, elike me ke koi-i kei a ka puuwai.

:N. S. SACHS:

mar31 674-tld.                        104 Alanui Papu, Honolulu.

 

HEIAU O NA PAIKINI!

 

Kihi o Alanui Papu me Hotele.

Wehe Aiwaiwa Ana o na Waiwai Hou Loa

 

Ma ke ku ana mai nei o ka MOKUAHI AUSTRALIA a me ka MOKUKIAPA C. D. BRYANT;

            Ua loaa mai la’u he 117 PAHU UKANA me na Waiwai hou o na ano hou loa. Ile nani e ha i e ai na pua o ke Kula, i ka ua mea o ka nui hewahewa o na Waiwai i wae ponoia a’u me ka maiau nui.

            Ke konoia aku nei e hele mai e nana i keia mau Waiwai Hou Loa.

 

HEMAU WAIWAI HOU WALE NO MA NA WAHI A PAU O LOKO NEI O KO’U HALEKUAI.

            He heluna nui o na Kamaa Wahine, Kane a me na Keiki. O ka’u mau Kumukuai e kulike ana ia me kou makemake.

            Ke huli ae hoi ma ke kahiko Lole Aahu o na Aahu o na Wahine. He nani mekalapua okoa no ia ike mua ole ia ma keia Kulanakauhale, ma na Lole hiki he Holoi ia o na Waihooluu.

            E komo mai e nana i ka makou mau Waiwai Hou Loa, a ke hooia aku nei @ ia oukou. Owau ke Alakai o na Kumukuai haahaa loa.

S EHRLICH,

Kihi o Alanui Papu me Hotele.

 

HE KUAI HOOKELAKELA NUI!

Hele mai Hookahi, a i ole Hele mai no a Pau Loa.

MA KA HALE KUAI ALAKAI O

B.F. Ehlers & Co.—Painapa.

HELU 99 Alanui Papu.

 

Oili Pulelo PAINAPA e kela i Kaupoko o Hanalei; aka i hewa no nae i ka lele mua i ka hooulu i ka la ino.

Oiai he manawa ilihune keia no ka aina nei, no ka mea ke wawalo mai nei na leo pilikia o ka lehulehu mai o a o, a ke kuai hoonoho mai nei hoi kekahi mau hale kuai e hoao ana e kuiai kekahi i kekahi, nolaila ke komo pu aku nei au ma ia hana maikai, no ka mea

 

He Kawai a Na’u Lele a Opu.

            He mau makahiki loihi i hala ae nei, akahi okoa kuu uluhua i kea hi o o Kamaile a me ke Kawelu o Lanihuli, a i mea no hoi e hookoia ai kela olelo kaulana a kahiko

 

Ohi Hapuku ka I’a o Kapaau.

            Eia ma Ko’u Halekuai nei ma Papale Kamlii o na ano a pau, ua Lako Lole o na Hapuu o oukou o na paikini a pau, mai ke nui a ka ukuieie, na Lako Lole o na Lede a me na Keonimana o kea no hou, loa i ike mua ole ia ma Hawaii nei, na Mamalu o na waihoolulu a pau, a pela aku, a pela aku

 

E Kuai ia aku ana no ke Kumpaa.

Nolaila mai hoohala i ka ike ana ia kaua.

            E hoomaka ana keia kuai hookelakela mai a ma keia mua aku. Na Ka oioi mau no ka loaa, oloolo aku no ihope, nele.

575. tf-dly.      B. F. EHLERS & CO.