Ka Leo o ka Lahui, Volume II, Number 691, 25 April 1893 — KA MOOLELO O HIIAKAIKAPOLIOPELE. [ARTICLE]

KA MOOLELO O HIIAKAIKAPOLIOPELE.

I HOOPONOPONOIA

MAI KA POE KAHIKO MAI A ME KA POE I HOOPAA I NA MOOLELO A ME NA KAAO KAHIKO O HAWAII NEI.

O ke awawa nui auanei e moe ana a iho i Koolau la, o Nuuanu ia, mai pae olua malaila, o Honolulu o kai, holo no olua, a ka ulu niu nui e ku ana la, o Waikiki ia, o Leahi ka lae mauna aku. Mai pae olua ilaila, holo no olua A huli auanei olua ma kela aoao o ka lae, he ulu niu no malaila, o Waialae ia, ka loko nui iloko o ke kuono la, o Maunalua ia. ka lae loihi la o Kawaihoa ia. Mai pae olua ma ia wahi, holo oo olua, a ma kela huli aku o ka lae, ke awawa e moe ana a iho i Koolau la, o Makapuu ia. A o Wawamalu ia, ilaila olua e pae ai a hiki aku au, alaila holo kakou. Ua maikai ia kauoha i kona mau hoa, ae mai la laua. Ia wa, haalele lakou ia Waianae, holo no hoi laua la ma ka waa, hele no hoi keia mauka, e hele ana ma Pohakea, nana aku keia i ke kula o Lualualei, hele ka la a li-liu me he mea la e ai ana i ke kula o Lualualei, alaila, hapai ae la o Hiiakaikapoliopele i keia mau wahi lalani mele penei:

Wela i ka la a wela i ka la Ua wela i ka la ke kula o Lualualei Ua nau ia e ka la ua okaoka Ua haule ka papa auwae O ka la i na kukulu Ka imu niho a ka la i ke kula Na ka la no i kahu a enaena Aohe wahi puka hoomaha A ka wawae e hoomaha aku ai I ka luna o Pohakea E uwe kaua hoi—e A pau ia oli ana aia nei, i mai o Wahineomao. heaha hoi anei kau alnha ana mai ia maua, ua hele no oe ma uka ma ke ala maloo, ke holo ae la no hoi laua la ma kai ke pii nei no hoi keia ma uka. Kani hou aku no ke oli aia nei ma uka penei: A Waikonene i ke alanui Ka piina i Komoaula Ka la wela i ka umauma Like Kauhuhu ka pali o Pohakea Waha ka ilio i ke kua o Puhamaioo Ke hoohaehae ae la ka naulu Moku kahawai niha ka pali O Puhawai ua hakaka kipikipi Ke Kaiaulu me ke kanaka Ua kuikui wale a haena na ihu Ua ka wale i ka upe Ka la wela o Lualualei, He lei aloha no olua - e A pau ia mele ana aia nei; ke pii la no keia, a aneane e kau keia iluna o Pohakea, aloha iho la keia ia Pohakea ma ke mele penei. A luna au o Pohakea

Ea ke poo o Kamaoha iluna He lalo o Luakini, ke kokolo ae la Ma ka poli o Kanehoa Hoohoa i na keiki make anu O Kaiwieli e ua anu au - e Maikai Lihue, he kauaaina aloha -e A pau ia mele ana aia nei, kau loa aku loa keia iluna o Pohakea. Aole i pau. —: — Ke hoike pu ia aku nei ka lohe i na poe lawe pepa a pau, o KA LEO, a me ka OIAIO, i ka wa e nele ai ka loaa ana aku o ka pepa ia oukou, e hoike koke mai i ka lohe i keia Keena, me ka hakalia ole, i hiki ke hoolawa hou ia aku kou iini. MA KE KAUOHA.