Ka Leo o ka Lahui, Volume II, Number 684, 14 April 1893 — Ke Hookui Nei. [ARTICLE]

Ke Hookui Nei.

Ma kekahi ahiahi aku nei, oiai au e kali ana i ke kaa hapaumi ma ke kihi o ka Pa Aupuni ma ke Alanui Moi, ua pii mai o Mr. Emaluka a ku iho la ma kahi he 2 paha kapuai mai ia'u aku. I keia manawa e heluhelu ana u i ka nupepa. Ua hoomaka mai la oia e kamailio ia'u penei: "E Keoni, aole anei ou manao he mea maikai ka hoohui aina?" Ia manawa. pane aku la au iaia me kuu hoomau no nae i ka nana ana i ka nupepa. "He kanaka kue au i ka hoohui aina a e nana pono mai oe i keia hae (Hae Hawaii) e kau nei ma ko'u umauma he hoike maopopo ia o ko'u kue ia mea he hoohui aina." Ua ku mumule iho la oia, no kekahi minute a oi aku paha, a ua hoomau aku la no hoi au i ko'u heluhelu ana i ka nupepa. Pane hou mai la oia; "O ke kanaka nana kena nupepa, oia o Mr. R. W. Wilikoki" Ua loli ae nei kona kulana, a aole he maopopo ia makou o kona manao i keia manawa. Pane aku la au iaia, aole ou nana aku no kona kula, aka e hoomanao oe e Mr. Emaluka, he hoo kahi wale no o'u aoao e ku nei, a e kupaa ana hoi au maluna oia kahua me ka nana ole ae mao a maanei a hiki i ka hopena, ina no ka nele a loaa paha ka mea a ka lahui e makemake nei. Ua ike no oe he hookahi no o'u aoao mai mua mai (oia ka aoao o ka Lahui). Ae ua ike au. he hookahi no ou aoao. a ua kupaa oe ma ia aooao. Pehea ana la kou manao no ke kuokoa o ko kakou noho ana. Ua oi aku ke kuokoa oo ka noho ana o ke kanaka i ke ano aupuni kahiko (Aupuni Moi) mamua o keia manawa. I keia manawa hiki mai la ke kaa Hapaumi a kau aku la au a haalele aku la au iaia e noho ana no i hamohamo. Jno. K Prendergast. (Kapamawaho). Honolulu, Apr 13, 1893.