Ka Leo o ka Lahui, Volume II, Number 673, 30 March 1893 — Page 3

KA LEO O KA LAHUI.

"E Mau ke Ea o ka Aina i ka Pono."

 

kai no Wasinetona, oiai ua maopopo aole he hana i koe ma Wasinetona: ada, eia i ke one hanau nei ka hana.  No ia au i waiho aku ai i kona lokomakai a me na anoai lealea a ake ike i na nani oia kaahele ana, a hoomanao ae la i ke kumuhana a me ke aloha o ka aina, ka lahui, ke ‘lii a me ka ohana.  Ua hiki mai hoi au me keia mau mea hou ano nui, a hoolaha, a pela au e puana ae nei e hoihoi hou ia ana no ko kakou mau pono aupuni a pau e ka hooopono o na Amerika i hoeueu ia e ko ke Akua manao aloha i ka lahui hewa ole.  Aloha oukou.

 

--------

Ka Hui Hawaii Aloha Aina ana

Lede.

--------

NA LUNA NUI O KA HUI.

     Mrs. F.W. Macfarlane, [Emalia Makapolena], Peresidena; Mrs. Jas. Campbell [Kuaihelani], a me Mrs. C.O. Berger na Hope Peresidena, Mrs, J. P. Kahalewai [Kaluimaemae] Kakauolelo, Mrs. W.M. Giffard, Puuku.

NA PERESIDENA HANOHANO.

NA LEDE:---

Mele Poka                 wahine T.R. Foster

Kahalewai Kamaki     “” Keoni Kamaki

Kulamanu Alani          “” Samuela Alani

Kekaaniau Palaika       “” F.S. Pratt

Kahalelaukoa Baraunu  “”  C.A. Brown

Hope Kakauolelo Hanohano Vitoria Ward.

KOMITE HOOKO.

NA LEDE:----

Emalia Makapolena, Aima Nawahi  Kahuila Wilikoki, Lilia Aholo, Mee Gay, Kieke Kaae, Haliaka Hairama, Meleana Lemona, A. A. Haalelea, C.O. Berger, Lala Mahelona, Leihulu Keohokalole, Marie Kahai, Mine Alderlich.

KOMITE WAIWAI.

Kema Meekapu, Kini Have, Fane Norrie, Lahilahi Webb, Amelia Joy, Makanoe Kaaepa, Lize Doiron, C. Sharatt, Malupo, a me Lokalia Holo.

 

     O ke kumu o ko makou pai ana ina inoa o na Lede maluna ae ma ka inoa Hawaii i  maopopo pono ai ina mea a pau i ike ole i ka olelo haole na Luna Nui o keia Hui a oukou e ka aoao palupalu.  O ka KA LEO O KA LAHUI  e noi ae nei i na mana Lani, oia pu kekahi me oukou.  O ko oukou nawaliwali ma ona la e ikaika ai a papahi oukou i ka Lei o ka Lanakila.

     He hana hanohano a kilakila keia a kela a me keia wahine Hawaii e hana ai, a he hana kamahao loa hoi i okomo ia aku iloko o ka moolelo o keia Aina, a i waena hoi o na moolelo kaulana o ke Ao Holookoa.

     Ke kono ia aku nei na Lede puuwai aloha aina oiaio e hele mai i ka halawai o ke awakea o keia la (Poakolu) ma Ariona Hale.

     I mua e na Makuahine oiaio o Hawaii, a hoihoi hou ia mai ka Ea o ko oukou Aina kona Kuokoa, a oukou e hooili aku ai maluna o ka oukou mau kamaiki, a me ka lakou mau pua aku.  A e welo mau ka Hae nani o Hawaii.

     “E ola o Hawaii i ke Akua.”

---------

PAKELE KE OLA O SERRNO

E. BIHOPA.

--------

     Ma ke awakea o ka Poakahi nei, ma ke kihi o na Alanui Nuuanu a me Moi, mawaena o ka hora 4-5 oia auina la.  E ku ana o Sereno E. Bihopa ma ka huina o na Alanui i oleloia maluna ae e kali ana no ka hiki mai o ke kaa Haapaumi; I ka manawa i hiki mai ai o ke kaa e pii ana no Nuuanu, ua hele aku o Sereno E. Bihopa e kau iluna o ke kaa, ia manawa ua hookui aku oia me ke kaa Hapaumi a hina iho la ilalo o kona poo a me kekahi hapa o kona pauku kino, malalo o ke

kaa Hapaumi.

      Ua ku koke ke kaa mamuli o ka ike koke ana o ke kalaiwa i keia pilikia, a ua holo koke aku kekahi mau kanaka Hawaii e haawi ina lima kokua ia Sereno E. Bihopa, mamua o ka hiki ana aku o keia mau lima kokua, ua hemo mai la o Sereno E. Bihopa iwaho a ku aela iluna lalau iho la i kona papale a me kona mamalu a kau aku la no luna o ke kaa hapaumi no kona home.

     A, wahi a ke keonimana nana i hoike mai ia makou, ua menemene loa lakou e ku ana malaila i ko lakou ike ana i ke poo o Sereno E. Bihopa malalo o ke kaa hapaumi e kokoke ana i ka huila mua.

     He laau hahau keia ia oe e Sereno E. Bihopa mai ke Akua mai, e ao mai ana ia oe e waiho a e auamo i Kona Kea me ka naau oiaio, a i hua ole ae oe i ka hua i ku i ka mihi, o ke koi koe a Ioane i hoakaka ai, ua makaukau malalo o kou kumulaau hua ole e Sereno E. Bihopa, no ke kua ana a kiloi aku iloko o ka enaena o ka luahi pio ole.  E ukuia no kela a me keia kanaka no kana hana i hana ai, ina he hana maikai loaa no ka uku maikai, a ina he hana ino e like me ka mea e ike ia nei e ka lehulehu no na hana pakaha me ka lima nui, a me ka naau alunu i hele a piha me na manao ino o Sereno E. Bihopa a me kona poai (Mikanele) i keia lahui kanaka oluolu me ka puuwai i hoopiha mau ia i ke aloha no nei mea he hoakanaka.  Ai hoike no ia mau hana aloha, ua apo aku na li@ a me na makaainana me ka puuwai hamama a hookipa mai la ina makua o Sereno E. Bihopa a me kekahi mau keiki mikanele eae e noho nei i keia manawa, a hanai ia aku la i ke Kalo, Uala, Moa, Maia, Puaa a pela aku e Na’lii a me na makaainana i hala e aku.

--------

     Aole hookahi kanaka i ike ia me ka lipine Hoohui Aina ma kona kino ma ka la inehinei.  Mahalo a nui.

HOOPUNIPUNI.

--------

     Ma ka nupepa Avelakaika o ka Poakahi nei, ua kapa mai ia makou i ka hoopunipuni, no ka hoopau ia ana o kela poe kanaka Hawaii aloha aina i ae ole ai e kakau i ko lakou poe inoa malalo o ka pepa hoohui aina e kailewa hele ia nei iwaena o na limahana Haw@ e noho hana nei malalo o na keena aupuni like ole malalo o ke Aupuni Kuloko.

     O keia poe i hoopauia ai aia ia malalo o ke keena o na Hana Hou i noho poo ia e Rovela, a i hookohuia aku e Rovela no he Pukiki elele ka luna hana o keia poe kanaka a me kekahi poe Pukiki e ae e hana ana ma keia papa hana.

     Ina makemake oe e Kakela o ka Avelakaika e ike pono i ka oiaio, e maki pololei mai oe a hiki i ke keena o KA LEO, a nana e lawe aku ia oe e kuhikuhi i keia poe aloha aina i kakau ole malalo o ko palapala hanaiahuhu au e painuu mau nei ua hoohui ia ka aina a pela aku.

     O ko hoole ana mai i ka pololei o keia oia kou hoopunipuni ino loa.  No ko oukou hilahila paha i ka hoopau o oukou i kanaka Hawaii mai ka hana mai, malalo o keia ano hana ekaeka a ku maoli no i ka lapuwale.  O na kanaka Hawaii i hoopau ia mai ai no ke aloha i ko lakou aina e ko poai hapai pu i ka la 17 o Ianuari, ua oi ae ko lakou hanohano, a ke hele nei lakou me ka haaheo ma na alanui me ka hilahila ole, oiai ua hana lakou i ka mea oi ae mamua o na mea a paa, oia ke aloha, ka mea no hoi a ko mau makua e palolo mai ai ka waha: e aloha oukou na kanaka Hawaii  i ko oukou hoalauna e like me kou aloha ia oe iho.  Pehea la oe i haalele ai i keia haawina, a o ka hoopunipuni ka mea paanaau loa ia oe.  E pono e heluhelu mau oe i ka Baibala.

--------

Halawai Nui.

--------

A na Lede Aloha Aina.

---------

     E malama ana ka Hui Hawaii Aloha Aina a na Lede he halawai nui ma ka hora 2 P.M o keia auina la [Poaha] ma ka Ariona Hale.

     E ala e na wahina Hawaii Aloha Aina Oiaio a pau a e hele mai i keia Halawai, oiai ua hiki mai nei ke Komisina James H. Blount.  He hana nui no ka pono a me ka pomaikai o kakou.

     E hele mai i 10,000 a oi aku e hele mai no a pau loa na wahine a me na kaikamahine Aloha Aina.

--------

     Ma ke kakahiaka o nehinei, ua loaa ka lohe i ke kulanakauhale nei, eia ae ka mokuahi Amerika mawaho ae o Makapuu; a ua liuliu ea la ko ka aina nei poe o keia ka Manuwa Rush o na Eleele Amerika e ala e liuliu e makaukau e na Hawaii Aloha Aina a pau; eia la ua hiki mai.

 

HAULE HOU NO!

     Ua hele aku o Henry Castle ma ke ano he kakau Nupepa e hoohuahualau i ke komisina J.H. Blount, a ua pane ia mai oia aole oia i hoouna ia mai nei e hele mai e hoohuahualau ia e na kakau Nupepa o Hawaii nei, aka, ua hele mai oia e imi i ka oiaio o na mea i hanaia ma Hawaii nei, a e ike i ka manao o ka Lahui Hawaii a me na kupa aloha aina e ae.

--------

NUHOU KULOKO,

-------

     I ka hora 2 o ka Poakolu nei, ua hiu aku la ka mokuahi Auseteralia, no ka ipuka Gula o Kaleponi ka pahu hopu.

-------

     E like me ka lohe i hoike ia mai he halawai ka na Lede o ka Poakolu, pela makou i hoopuka aku ai, ua hoike hou ia mai aole he pololei oia lohe.   Ma ke awakea hora 2 o keia la (Poaha) oia ka pololei.

--------

     Ua ike iho la oukou e ka Lahui Hawaii ma ka la inehinei, ina hana ma ke alanui Papu.  Na oukou e wae owai la ko oukou mau makamaka, mai hele hou e hoowaiwai ia lakou.

---------

     Ua hoounaia mai hookahi Hae Hawaii hou loa no makou i keia la, a ua kaa ae makou mamua o ko makou Hale me ka naau i piha i ke aloha no ko kakoa Hae Hawaii, a ua haaheo makou no keia makaoi kelakela i loaa mai ia makou.

--------

HALAWAI

MAKAAI-

NANA

NUI.

-------

MA KE KUEA O

KA PA’LII

------

     Ke kahea ia aku nei na hoa makaainana aloha aina a pau loa, na kane na wahine me na keiki o Hawaii Aloha, e hele mai ma ke Kuea o ka Pa Alii, i ka hora 7 o keia ahiahi Poaha; Mar. 30, no ka hoolohe ana i kekahi Olel   Hooholo ano nui e pili ana i ka makemake o ka Lahui Hawaii, no ka hoomau ana i ke Kuokoa o ko kakou aina aloha i makee nui ia.

     Oiai, ua hiki mai nei ke Komisina a ke Aupuni o Amerika i hoouna mai nei, oia o Mr. James H. Blount, e ake ana e lohe pono i ko kakou makemake maoli.

     Ano ka manawa e ka Lahui Hawaii!  E hele mai he Umi Tausani!!  E hele mai a pau loa!!!---

                                                               J. NAWAHI.

                                                               J. E. BUSH.

                                                         J.A. CUMMINS.

Honolulu , Mar. 30 1893.

 

AHA MELENUI

--------

Aha Mele Nui.

-------

     E wehe ia ana he Aha Mele Nui ma ka Luakini o Kawaiahao, ke hiki aku i ka Poaha, Maraki 30, i ka Hora 7:30 P.M.

     A ma keia Aha Mele, e huai @au mai ai na Keiki o ka Puali Puhi Ohe Lahui Hawaii; i ko lakou mau kileo kani kapalili, a me ka leo hoene o ka lakou mau hokeo kani kaili puuwai.

     Nolaila, ke konoia aku nei ka lehulehu e naue nui ae, i ike kumaka i ka po lea o Halalii, aole hoi o lakou wale, aka, o ka loea hookani ohe kau aoao kekahi o ka mokukaua Bosetona.

     *UKU KOMO he 50 Keneta.  E loaa no na Tikiki ma kahi o Karamu, Haka a me Makanani, a ma ka lima kekahi o na Komite, a ma ka puka no hoi kekahi.

                                                                               DAVID L. NAONE,

                                                                               Aha Mele Noeau.

Maraki 28, 1893.                                              mar29 2ts.

---------

KAUKA

Yong Kam Pung

[APANA.]

Helu 81 Alanui Maunakea.

--------

KAUKA LOEA O KA AINA PUA

--------

      Ua hiki ke hoola ia kela a me keia ano ma’i, mai ko na kane wahine a me ko na keiki liilii.  O na mai ha-no a me na ma’i e pili ana i ka maka, pau pu ia i ke ola.  O na ma’i koko inoino a me ka hooulu hou ana i na wahi poino o ka puu wai a me ke kino, e hoola ia no me ka maalahi.  Pela me na ma’i hu’i koko maloo, ua hiki ke hoola ia me ke oki ole.  Ke hoike ia aku nei eia ke ola ianei me ka oluolu pu o kahi auhau.

     *E KIPA mai e ka poe i hooluuluuia me na haawina pilihua a ka ma’i, a na’u oukou e hooluolu uku,

                    KAUKA YONG KAM PUNG.

                   mar.29—2monsd

--------

HOOLAHA A KA LUNA HOOKO

KAUOHA I KA POE AIE.

--------

     Imua o ka Aha Kaapuni o ka Apana Kaapuni Akahi, ma ka Hooponopono Palapala Hooilina.  Ma ka Palapala Hooilina a Maria O’Sullivan i make.  O ka mea nona ka inoa malalo nei, ke hoolaha aku nei, ua hookokuia oia i Luna Hooko Kauoha no ka Palapala Hooilina a kauoha hope loa a Maria O’Sullivan i make ma Honolulu.  A ma keia ke hoike aku nei oia i ka poe he mau aie ko Maria O’Sullivan ia lakou, e waiho koke mai iaia i ka lakou mau koi i hooiaioia ma na bila aie pololei ma ka Halekuai o E. O. Hall & Son (Mikah@lo) iloko o eono malama mai keia la aku, a e hoole loa ia hoi na koi ke hala keia manawa.

 ABERAHAM FERNANDEZ.

Luna Hooko Kauoha o ka Palapala Hooilina o Maria O’Sullivan i make.

     Ha@ia i keia la 20 o Maraki, 189@.

      mar27 @ki.