Ka Leo o ka Lahui, Volume II, Number 671, 28 March 1893 — Page 3

KA LEO O KA LAHUI.

"E Mau ke Ea o ka Aina i ka Pono."

KA HOOPII

A KA

MOIWAHINE.

Ua waiho mai nei o Liliuokalani i keia Hihia

Imua o ka Lahui Amerika.

Imua o ka Lahui Amerika

Mai a Liliuokalani Mai.

KA MOIWAHINE I HOOPAU O KO

HAWAII PAEAINA.

Ka hoike a ka Moiwahine mai Kona pii ana ae a noho i ke Kalaunu, a hiki i ka manawa o keia hana nui i hanaia no ka hoopau ana Iaia – Hoakaka i ke ano o ke noi ana aku a Kona Lahui Iaia i Kumukanawai Hou – E hanaia e like me ko Kaleponi – Ka Ninau e pili ana i ke kipe – Hoao ana e kapaeia ka hookaheia ana o ke koko – Aole oiaio o na olelo e pili ana i ka Maluhia ole o ke Ola a me ka Waiwai ma keia Pae Aina – Olelo Nane o ka Iliohae, ke Keiki Hipa a me ka Hoopono.

     Aole hoi e manaoia o ka hana hookahuli aupuni, he keiki ia i hanau ia iloko o ka hora hookahi.  Aole loa pela!  He pua ia no kekahi laau i kanu ia a hohonu loa iloko o ka lepo aloha o Hawaii, e ka lima o kekahi poai Kalaiaina Kuewa Aea wale.  O na manao ano kahaha a me ka puiwa no Ko’u makemake e kukala i Kumukanawai hou aole he oiaio oia.  I hoike no keia, he mea pono loa.  No’u ke huli aku i hope i ka la A’u i pii ae ai iluna o ka Noho Kalaunu o Hawaii.  He la ia i piha me ke kaumaha kuhohonu.  Oiai he hookahi wale no O’u kaikunane; o Ko’u poe enemi hoi ua olelo hoomeamea wale mai no lakou, he oia mau ka pumehana o ko kakou noho aloha ana.  O ka moolelo o ka holo ana o Ko’u Kaikunane i hoio ai i Kaleponi, ke oia mau nei no ka makamaka oia huakai poina ole maloko o ka makou mau papa hoomanao.  I ka manawa i loaa mai ai o ka lohe no Kona hoi mai, a ua hoike ia na hoailona o ka makee Alii me ke kupaa o ka Lahui holookoa mahope Ona, ua kukuluia he mau pio a pela aku.  Ua hoomakaukau Au i na palapala kono no ke kono ana ina kanaka koikoi a pau o ka aina e noho ana ma Honolulu no kekahi Aha Hula Nui no ka hookipa aloha ana mai Iaia.

     I ka hope loa, ua ike ia aku la ka moku Manuwa Kalekona i ka hora 10 o ke kakahiaka me na I – a e ku ia ana e na koa, a o ke kino wailua o Ko’u Kaikunane i aloha nui ia, kana i hoihoi mai, a ma kahi o na manao hauoli, ua kanu koke ia iho la ma ia wahi na manao kuhohonu o ke kaumaha me ka lihaliha paumako mai o a o ka aina.  O Ko’u manao maoli ia manawa oia no Ko’u kapae ana Ia’u no Ko’u kaumaha pilikino.  Aka, ua loaa mai la Ia’u he kauoha paa mai Ko’u Aha Kuhina mai, e hooko kokeia me ka hookaulua ole Ko’u hoohiki ana e malama i ke Kumukanawai, a ua hoike pu ia mai la no ka manawa no ka hooko ana aku i keia hana oia ka hora 1:30 oia la no.

     O Ko’u manao maoli no aole he pilikia loa o ka awiwi loa ana i ka hooko ana i keia hana, o Ka’u kane nae hoi ka mea i hookawale ia mai ke ao ana mai Ia’u mamuli o kona make ana.

     Ua ao mai la oia Ia’u e hooko aku i keia kauoha a ua hana Aupela.

                                                                        Aole i pau.

NA LETA.

     Aole o makou makemake e lawe i ke koikoi o na hala no na manao i hoopuka ia malalo o keia poo e ko makou poe kakau manao.

E MAKAALA KAKOU IA KAKOU IHO.

E KA LEO O KA LAHUI

Aloha ee:

     E oluolu oe a me kou Lunahooponopono e ae mai i keia manao e hoike ae i kau nupepa a hai mai imua o kou poe heluhelu e like ma na mea i hoike ia ma ke poo manao i hoike ia ae la maluna, “e i ana e makaala kakou ia kakou iho” oia hoi na mea e pili ana i na hana pono ole a ka poe kipi i olelo ia a ohumu ia iloko o ko lakou manao, ko lakou mau manao pahele a lakou e hana nei, me ka manao e hue i na inoa o ka poe e lawe nei i ka nupepa puka la Kuokoa me ka manao e lawe aihue i na inoa o ka poe e lawe nei i ua nupepa puka la Kuokoa ala, nolaila, o keia lawe ana i ka inoa a me na luna o ua nupepa ala e hoopaa ana i na inoa iloko o ka lakou mau buke, a oia mana aole he wahi kohu iki, ole loa no, oiai, o ka mana i loaa ai i ke kanaka a mau tausani kanaka paha me ko lakou mau lima ponoi e kakau ai, oia ka mana i ike ia iloko o na aupuni malamalama, a pela ma Hawaii nei.

     Nolaila e na makamaka a me na hoaloha o ka nupepa KA OIAIO a me KA LEO a me ka Holomua, eia ka pane a ka mea e kakau nei, mai puni oukou i na leo nahenahe o kahi lunamaka-

ainana o Hana a he wahi kahunapule hookano hoi, a hookamani nui e hana i keia hana Umiapuaa i kona mau hoa kanaka o ke koko hookahi i hanau ia iloko o ka lepo momona o Hawaii nei a me kona poo kahunapule ma ka oihana.

     Nolaila o keia mau hana o keia Iosepa a me kona mau haku Mikanelo a ke kapa aku nei au i kela, “He Iuda Isekaliota ka mea hana i kumakaia ka Haku me na apana kala he iwakalua.

     Nolaila, o keia mau hana ana a lakou he mau hana kue a hilahila ole i ka lawe wale, pakaha wale i na inoa o ka poe e lawe wale nei i ua nupepa ala; nolaila ma keia hana ana a lakou aole i ku i ka pono, ke ola, a me ka pomaikai o keia lahui, nolaila ke kau leo aku nei au imua o oukou e na makamaka a me na hoaloha.

     Mai puni oukou i na hana o keia ano a lakou e manao nei e lawe i ko mau inoa o ka poe e lawe nei i ua nupepa ala, a ina ka e loaa ekolu tausani inoa, alaila ua mana iho ka lakou ma keia mau hana pahele alunu makee i ka aina a me ka hale lewa o na mamo a Zema, nona keia lepo, keia ewe; a me ka mana o Hawaii Akea, Maui o Kama, Lanai a Keaea, Molokai nui a Hina, Oahu o Kakuhihewa a me Kauai o Manokalanipo, huli mai nana alawa i keia, a heluhelu hoi i keia manao maloko o keia nupepa KA LEO O KA LAHUI, a kakoo mai hoi oe a paa e Kauai o Manokalanipo ke hele aku ua poe hoopunipuni nei imua o oukou me na pepa loloa, eia ka pane a ka mea kakau, e ana i ko oukou mau lima i ke kala, e aua mai i ko oukou mau inoa, mai hoopa, mai lawelawe, a mai puni oukou i na dala kipe e kuai ia aku ai ko oukou mau inoa.

     A nolaila o ko kakou puni ana i keia mau hana pahele a ka poe nana i lawe mai i ka naauao ia Hawaii nei iloko o ka la 12 o April A.D. 1820 maluna o keia Paemoku o ko kakou ae ana keia oia ko kakou malu, poino a me ka hulihia o ko kakou aina aloha, nolaila, ma keia wahi, he kuli ka make, a he lohe ke ola.

                                    Kou Oiaio

                                         J.H. Kaneuluhonua.

     Honolulu, March 27, 1893.

KA BANA LAHUI HAWAII

     E malama ia ana he puhi ohe ma keia ahiahi (Poalua), ma ka Hotele Hawaii, e hoomaka ana ma ka hora 7:30, malalo o ka noho alakai ana a Mr. J. Libornio.  Eia iho na le mele:

1.. MARCH . . . . . .  . . . . . . Volunteer . . . . . . . . . . . . . .Boettger

2.  OVERTURE . . . . . . . . . .French Comedy . . . . . . . . .K. Beler

3.  MAZURKA . . . . . . . . . . H.N. Band . . . . . . . . . . . . . Libornio

4.  SOLO SAXOPHONE . . ,Q. Liliuokalani . . . . . . . . .        “

SONGS:     Lei Ohaoha.  Hooma-u.     Aloha Aina Hula.

5. FANTASIA . . . . . . . . . . . Maritana . . . . . . . . . . Hund

                                Clarinet Solo.

6. POLKA.  Through the Air (new) . . . . . . . . . . . . . Damm

                                 Piccolo Solo.

7. GAVOTTE . . . . . . Loving Hearts (new) . . .Arr. Tobani
8.  MARCH . . . . . . . .Kaiulani . . . . . . . . . . . . .Libornio

HAWAII PONOI.

     Ua haawiia aku ma ka lima o Pika Polapola kekahi mau Buke kakau inoa o ka Hui Hawaii Aloha Aina, no Pauoa a me Auwaiolimu a hiki loa i ke Alanui Beritania, oia kekahi Luna malalo aku o Jas. Keawe, no ka mea he Apana nui keia, a he kanaka hoi keia i ikeia kona hoopono a ua hooikaika io no oia no keia hana.

ALOHA AINA.

     Ua loaa mai ia makou he lono ma ke Telepono ma ke awakea o ka Poalima Maraki 24.

     Ua loaa aku la ma ka lima o ka Luna Alanui o Koolauloa kekahi mau Palapala Hoohui Aina; ua koi aku la oia e kakauinoa mai lakou ma ua Palapala ala; Ia manawa ua hoike mai na puuwai aloha aina o ua mau pali hulilua ala, i ka manao aloha no ko lakou aina; ua haalele makou i keia hana i keia manawa, a koe aku 4 kanaka, no ka pilikia loa o ka ohana o keia poe ko lakou kumu i kakauinoa ai.  E hana ana keia poe kanaka i Affidavid.  Me na olelo hoike i kakauia a hoohikiia no ke kumu o ko lakou kakauinoa ana.  Aole na o lakau makemake i ka hoohuiaina.

     Nui ka mahalo ia kakou no ka hoike ana i ko kakou aloha no ko kakou aina hanaui Paaia i paa ke aloha me ka manao lana no ka Lenakila o Hawaii.

     Ke hoike pu ia aku nei ka lohe i na poe lawe pepa a pau, o KA LEO, a me ka OIAIO, i ka wa e hele ai ka loaa ana aku o ka pepa ia oukou, e hoike koke mai i ka lohe i keia Keena, me ka hakalia ole, i hiki ke hoolawa hou ia aku kou imi.

                                                                                    MA KE KAUOHA.

     Ua hiki kino ae keia mau Lede koikoi o ka aina nei ma ka hala wai a ka Hui Aloha Aina a na Lede o keia kulanakauhale, Mrs. Jas. Campbell, Mrs. S. Parker, Mrs. E. Macfarlane, Mrs. S.C. Allen, Mrs. Foster, Mrs. Pratt, Mrs. C.O. Berger, Mrs. C.A. Brown, a me ke kahi poe Lede Hanohano e ae o ka aina hanau nei.  Eia na Luna nui Mrs. E. Macfarlane Peresidena, Mrs. James Campbell Hope Peresidena, Mrs. Giffard Puuku, Mrs. Kahalewai Kakauolelo.  He mau Peresidena Hanohano a Hope Peresidena Hanohano kekahi i koho ia.  Apopo puka pau loa aku.

HE UMI (10) APANA AINA HOME

MAIKAI NO KE KUAI.

     Aia he Umi apana aina Home maikai loa no ke kuai aku e waiho ia ma Kalia Waikiki, Oahu, mawaena o kahi o Hon. Chas. L. Hopkins a me Mr. Macfarlane a i keia mamua o ka aina o G.W. Keaweamahi.

     A oia no na apana aina pa hale nani loa i koe iloko o ke kulanakauhale nei.

     He oluolu loa ke kumukuai.  He maikai ke kuleana.  Na ka mea kuai mai e uku no na Palapala.

     No na mea i koe e ninau ia William C. Aohi Honolulu, Maraki 27, 1893.                 tf

Na Leta e Waiho nei Maloko o ka Haleleta

a hiki i Feberuari 28, 1893.

PAUOA.

Mrs. Kaaekuahiwi,

   “    Kamaka,

Jane Kaheleiki,

W. P. Hoa Kepookela

LELEO

Kmoa-opio,

Kuahua Kamiki,

Mele Kamaka,

KAPALAMA

Kainaina,

J. Mahiai,

Annie Davis,

Malaea Keoki

Joseph Maliekai,

Kane Waiopua,

John Spencer,

Kuhao,

Pilialoha.

AUWAIOLIMU.

Mataio,

Kumakalehua,

Kaluakini,

Kawahapaa.

KULAOKAHUA.

Mrs. Emily John.

NA ALANUI,

Eleneke,           S.K. Kawaiwai,    Mrs. Kaumano.

PAWAA.

     Emale, Noa Kupau, Kolohai, S. Kamahalo, Paulo Kaaua, M. Siuid, Dan’l K. Kaeo, Malaea.

APUA.

     Henry Keoni, Waialeale, Moke Kekaalua, Kalehua.

KAUKA

YONG KAM PUNG

(APANA.)

Helu 81 Alanui Maunakea.

KAUKA LOEA O KA AINA PUA

     Ua hiki ke hoola ia kela a me keia ano ma’i, mai ko na kane, wahine a me ko na keiki liilii.  O na mai ha-no a me na ma’i e pili ana i ka maka, pau pu ia i ke ola.  O na ma’i koko inoino a me ka hooulu hou ana i na wahi poino o ka puu wai a me ke kino, e hoola ia no me ka maalahi.  Pela me na ma’i hu’i koko maloo, ua hiki ke hoola ia me ke oki ole.  Ke hoike ia aku nei oia ke ola ianei me ka oluolu pu o kahi auhau.

     E KIPA mai e ka poe i hooluuluuia me na haawina pilihua a ka ma’i, a na’u oukou e hooluolu uku.

     KAUKA YONG KAM PUNG.

mar.29 – 2monsd

HOOLAHA A KA LUNA HOOKO KAUOHA I KA POE AIE.

     Imua o ka Aha Kaapuni o ka Apana Kaapuni Akahi, ma ka Hooponopono Palapala Hooilina.  Ma ka Palapala Hooilina a Maria O’Sullivan i make.  O ka mea nona ka moa malalo nei, ke hoolaha aku nei, ua hookohuia oia i Luna Hooko Kauoha no ka Palapala Hooilina a kauoha hope loa a Maria O’Sullivan i make ma Honolulu.  A ma keia ke hoike aku nei oia i ka poe he mau ale ko Maria O’Sullivan ia lakou, e waiho koke mai iaia i ka lakou mau kopi i hooiaioia ma na bila ale pololei ma ka Halekuai o E.O. Hall & Son (Mikaholo) iloko o eono malama mai keia la aku, a e hoole loa ia hoi na koi ke hala keia manawa.

ABERAHAM FERNANDEZ,

Luna Hooko Kauoha o ka Palapala Hooilina o Maria O’Sullivan i make.  Hanaia i keia la 20 o Maraki, 1893.

mar27tfd.