Ka Leo o ka Lahui, Volume II, Number 666, 21 March 1893 — Page 1

KA LEO O KA LAHUI.

"E Mau ke Ea o ka Aina i ka Pono."

Buke II.     HONOLULU  MARAKI 21, 1893.     HELU 666

HE MOOLELO KAILI PUUWAI

---NO---

SENIA LUTERA

Ka Ui Puuwai Mabala

---:O:---

ENELANI KAHIKO.

 A I OLE

He Nanea Hooheno

no kekahi Kauna

Wahine Opio me

kana mau Aloha

Ekolu.

(Kakauia no Ka Leo.)

MOKUNA XXXII.

 

Iloko o keia mau leo uwe kaumaha o ua Laionela nei, aole loa he wahi leo pane i panai mai, a me ka naau i hookupouliia i ke aloha, ua hina aku la oia iluna o ka ao one, a waiho oni ole aku la me he la ua make.

Oiai oia e waiho ana iloko o keia noonoo kupouli, aia hoi lohe koiuiu aku la oia i kekahi leo himeni, a hoomaopopo iho la oia aole ia he leo no kekahi mea okoa, aka, no kana senia aloha no ia, e hoona ana hoi i kona aloha, imua o na aheahe lau makani.

I ka hookuu ana iho o ua ui nei i kona leo himeni i ka nahenahe kupilikii, lohe aku la o Laionela i ka nehe mai o kekahi kapuai iluna o ke one, a hoopuni ae la hoi ke kahi lima palupalu i kona a-i me ka mau no o kona lohe ana i ka leo himeni o kana aloha.

I ka hookuu ana iho o ka leo himeni o ua nohea nei, ua honi iho la oia i kana Laionela aloha, me ka puana ana iho i keia mau leo hawanawana:

Aole e hiki ia'u ke hoomanawai e ike mai ia oe e hoehaeha ia ana.  O e Laionela! aole e hiki ia'u ke hoomanawanui!

Ma ka leo uwe o ka piha hauoli ua ku koke ae la oia iluna me ke apo pu ana aku i ka a i o kana aloha, a haawi aka la i na honi he nui ma kona papalina nohea.

E hookuu mai oe ia'u e hele! e Laionela, ma ka inoa o na lani e hookuu mai oe ia'u a hele!me kona hooikaika ana ae e hemo mai kana mau puliki ana.  E hele au.  Aole e hiki ia'u ke noho ma kou wahi e noho nei:

Aka, aole au e ae aku ia oe e hele, ma ko'u wahi e noho ai malaila pu oe, aole no hoi oe e hemo aku ana mai ka'u mau puliki paa ana aku.

Ua kuhi au he aloha oe ia'u.  eia ka aole, ina oe he aloha ia'u ina ua hookuu a hoolohe mai oe i ka'u mau olelo i hoike mua aku nei ia oe.  He lokoino kau mau hana ia'u.

Lokoino! wahi a Laionela, lokoino ia oe? auwe e kuu mea nui, e make mua nei kino mamua o ko'u hana ana aku i kekahi mea e ehaeha ai oe.

Ina hoi ha pela e waiho malie mai oe ia'u, wahi ana me ka leo hawanawana, me kona mau lehelehe i hele a haikea, ina he aloha io oe a'u e Laionela, alaila e haalele mai oe ia'u a e hele aku mai o'u aku nei.

Ua hehee iho la kona mau lima ma kona aoao, a nana aku la me ke pahaohao nui, no kona lohe mau ana aku i keia mau olelo i hoopuka mau ia mai mai ka waha mai o ka mea ana i hoomana ai me he akua la.

Ano e no hoi oe e Senia, he i mai hoi oe he aloha oe ia'u, eia ka pela iho la ka ke ano o kou aloha. o ke kipaku mai ia'u e hele.

He aloha io no au ia oe, awhi ana i pane mai ai me ka leo uwe, a hookahi kumu o ko'u kipaku ana aku ia oe, oia hoi no kou pono a me ko'u pu, no keia koke iho.  No keaha la oe e ike ole mai nei i ke kaona o kau mau olelo.

Ae, ke ano ike aku la au i ke ano io maoli o ka'u mea e olelo mai nei, wahi a Laionela me ka ehaeha o kona puuwai, e ake ana hoi o kona haule iho a make ia manawa ma ke kapuai o ka mea ana i aloha ai.

Ke hauoli nei au, no kou hai ana mai ia'u i ka mae oiaio, a ke manaolana nei au e hoomama ia no ke kaumaha o kou puuwai a hiki i ko kaua wa e hui hou ai.

Me keia mau huaolelo, ua haawi aku la oia i kona lima, a namunamu malie ae la i keia mau wahi huaolelo:

Aloha oe e Laionela kuu moi, kuu aloha; mai manao kuhihewa oe o keia haalele ana o'u ia oe. no ko'u aloha ole ia, o ke kumu oia no ko'u aloha ia oe a oi aku mamua o ko'u ola pohoi iho, nolaila au e haalele nei i ka kaua pili aloha ana.

O, e Laionela, ua hooholo no ke Akua e hookaawale ia kaua, a na kona lokomaikai no auanei e hoohui hou.

 

 

HE NANEA KAMAHAO

---NO---

MAIKA

KE KEIKI

Hapa Ilikini a

Hawaii hoi.

KE KANAKA MUA LOA NANA

I PANA KE AKUA BEA A

NA ILIKINI I MAKA'U LOA

AI---A O KA WELI HOI O

NA ILI KEOKEO---A ME KA

LUKU IA ANA O KELA HUI

KEAKA A LI.

 

Hiu a wela, lawe a lilo, ke keiki

Hapa Ilikini, elua i ka manawa

hookahi. na hana powa, a

me ka makeana o na hoa-

hanau Conegokena, ka

mare ana o Maika

a me an hana

hoomaino-

ino.

 

Aohe o'u mea pilikia o ko'u noho ana ianei, a eia kekahi mea a'u e hahai aku ai ia oe o kaua walo no ia wa i hawanawana mai ai ua kaikamahine nei me ka loha ole aku o kapena Sula ma.

Ua paa iho nei au i ka hoopalau me Maika, a pehea la kou manao no keia kane a'u?

O na hiki, ua hiki, aohe paha ia he kane, he ola, laki maoli oe i ka lilo ana o keia keiki i kane nau aole au i ike i kekahi keiki e like me keia keiki ka oluolu, a he keonimana maopopo oia.

O kekahi mea no hoi ia a'u i hele mai nei, me kuu manao la, aole oia i hoopalau me kekahi mea e aku, eia ka hoi ua hei mua ae nei i kau kipuka ili, manao nei hoi au e noi aku i kona oluolu i kane na kekahi kaikaina ou, aohe hoi e hiki ua lilo mua ae nei ia oe, heaha auanei ua lilo aela no hoi ia oe, na oukou like ae la no hoi ke kane a ahea olua mare?

Aole i maopopo ko maua manawa e mare ai, i keia kakahiaka iho la no i paa ai maua i ka hoopalau.

Ina hoi na pela e kuka pu kakou no ko olua la e hoohui ia ai ma ka berita o ka mare.  Aia paha i ka mea i holo i kou manao.

Ia wa i huli ae ai ua lunakanawai la a ninau aku la ia kapena Sula.

Pehea la kou manao ana no ka la e mare ia ai o na keiki a kaua?

O ko'u mea i manao ai i ka la pau o keia mahina, oia hoi he ekolu pule i koe.

Ina hoi ha me ia ua hiki, a pehea ko olua manao e a'u mau keiki, wahi a ka lunakanawai i ninau aku ai ia Makia me kana ehakoni.

Heaha auanei hoi, aia no hoi paha i ka mea a ko olua noonoo e hooholo ai, wahi a ua mau opio la i pane mai ai, me na minoaka o ka hauoli e hekau iho ana maluna o ko laua mau papalina no ka hooko koke ia ana o ko laua iini a laua hoi e lia maju nei.

I ka holo ana o keia mau mea a pau, ua hoomaka iho la o kepane Sula, ka lunakanawai a me ka Ilamuku e komo pu e kokua i ka hoomakaukau ana no ua mea pono o ka la e mare ia ai o Maika ma.

I ke kokoke ana mai i ka la e mare ia ai o Maika ma. ua kono ia aku la na poe hanohano o ke kulanakauhale e hele mai.  I ka hiki ana i ka la e mare ia ai o ua mau opio nei. ua piha ku'i mai kahi o kapena Sula me na poe koikoi o ka aina a me ka poe o ke kulana haahaa, e ake loa ana kekahi poe e ike lihi aku i na helehelena o ka inoa kaulana a lakou e lohe wale ai i kana mau hana kaulana, a ua meha pu iho la ke anaina i ka ike ana i ka manamana kuhikuhi o ka manawa e nee ae  ana i ka hora o ua mau opio la e ku mai ai imua o ka berita maemae o ka mare.

Ua hooeehia loa ia na mea a pau i ka ike ana aku i ka oili ana mai o keia mau mea e hele malie mai ana, a ua manao kekahi poe he anela mai ka lani mai ka mea nona ka inoa e kaulana a lakou i lohe wale ai, ma o ko lakou ike ana aku i ua heiki la me kekahi aahu i kinohinohi ia me ke gula me ke daimana e e l@he ana hoi kona lauoho nani e like me ka hulali o ka la ka olinolino i ka maka o na mea a pau, a i ka leha ana aku hoi o ko lakou lena ike maluna o ke kaikamahine, nana na hana kolohe iloko o ka hale hookolokolo a makou i lohe wale ai.

Auwe! wahi a ke anaina i puana mai ai, he moeuhane anei keia, a i ole he akaku paha ka makou mea e ike nei, aole, he kino maoli no auwe no hoi ka nani e-----aohe ui a makou e hoohalike ae ai a puni ke ao holookoa, no ka mea, e aahu ana ua kaikamahine la me kekahi aahu nani.

Auhea oe e kuu mea heluhelu, e uwila ana ka paea ia laua nei i ka po o ka la apopo. Mamina wale.

Aole i pau.

 

HUI ALAHAO A ME AINA.

O OAHU.

Papa Manawa

Mai a Mahope o Okatoba 1, 1892

NA KAA

                                                A. M. A.M.   P. M.   P. M.

Haalele ia Honolulu               6:15*   8:45     1:45     4:35

Hoea i Honouliuli                    7:20*   9:57     2:57     5:35

Haalele ia          "                7:30*   10:13   3:45     5:42

Hoea i Honolulu                      8:35*   11:55   4:55     6:50+

NO KULANAKAUHALE MOMI IHO.

Haalele ia Honolulu               5:10I   P.M.

Hiki i Kulanakauhale Momi    5:48I

Haalele ia        "           "           6:55*   A.M.

+ Poaono wale no

* Koe ka Lapule

I Koe ka Poaono

Sept. 28

HOOLAHA AINA.

E ike auanei na kanaka a pau ma keia Hoolaha, owau o S. K. Kila Opio, e noho ana ma Honolulu, Mokupuni o Oahu, ke hoike aku nei au ma ke akea owau wale no ka pilikia pili loa i na aina o Kila (k) Kepola (w) a me Ku (k) i make e waiho la ma Kahuku Kau, Mokupuni o Hawaii.  O ka mea a pau mea i kuai a hoolimalima paha i keia mau aina, aole i mana ia kana ana, ina he mea a mau mea paka e paa nei i ua mau apana aina nei, e hoike koke mai ia'u, a i ole e kipaku no ua ia lakou.

S. K. KILA OPIO.

Honolulu, Feb. 17 1893.

Elia Kaululaau.

Kauka Hana Niho.

Ua hiki ke huki ma Niho me ka eha ole iloko o ka manawa pokole loa.  He loea me ka noeau ma ka Hoopi'ia ana i ka niho me ke Gula Kala a mea e ae paha.  He akamai lua ole i ka Hana ana i na Niho Kui o na ano a pau.

He Mikioi ka Holoi ana ma Niho.

He pa'a nehe kona mau lima ma Kana mau mea Hana Niho o na ano Hou loa i loaa mai nei.  He oluolu no ke kukai olelo ana no kona ukuhana.

O ke kanaka Hawaii hookahi wale no keia mailoko ae o ka huina o 40,000 kanaka i loaa ka Laikini Hana Niho; mai ka Papa Kauka Hana Niho mai o ke Aupuni Hawaii, mamuli o ka ike ana o na Hoa o na Papa Ola i kona akamai maoli ma keia Oihana ano nui.

E ikeia kakou Hoa Kanaka o kipa hewa ke aloha ia lakou nei ae.

Keena Hana maluna ae o ka Hale Hana Pu i ke kihi o Alanui Moi a me Betala Puka komo e pii ai iluna o ke Keena ma Al. Moi.