Ka Leo o ka Lahui, Volume II, Number 660, 13 March 1893 — KA LEO KAHEA AKU I NA HAWAII ALOHA AINA. [ARTICLE]

KA LEO KAHEA AKU I NA HAWAII ALOHA AINA.

E ka Lahui Hawaii; e hoolohe mai. eia ka Leo o ke ola! ko oukou leo, oia ka leo o ke Akua; a oia hoi KA LEO O KA LAHUI. E liuliu, e hoeueu, e hookanaka mai kakou mai puni i ka pelo mai a kahi nupepa ake e hoolilo i ko oukou Aina, mai puni i na alakai a

na wahi kahunapule hookamani kokua pakaha Aina, a hookahuli Aupuni; me ka piha o ko laua mau waha i na huaolelo kuamuamu a hailiili i ke kanaka Hawaii ponoi a ke Akua i hana mai ai ka mea kupono ole i ke ano o ke kahunapule. Ka poe kahu i haalele i na hipa o ko ke Akua pahipa: a eia ke lilo nei i na hana hooikaika hoolaha nupepa, e ake ana e hoopouli i ko ka Lahui Hawaii noonoo; a e koi ana, e hoolilo oukou i ko oukou one hanau, no ka waiwai pau wale a me ke dala popopo!— He poe Kahunapule i haalele i ke Aloha o Karisto a me ke aloha i ka Lahui Hawaii, Ka Aina hoi a me ka noho Alii o Hawaii. E makaala i ka poe e hele mai ana me na aahu huluhipa loloa! aka he ilio hihiu hae nae maloko o lakou! O nahu mai lakou, a moku oukou. Ua ike oukou i keia poe e nahu ana i na hipa noho malie hewa ole o ka Lahui Hawaii! Ua nahu mua i ka A.D. 1887, a ua eha ka Lahui Hawaii, ua nahu hou i ka 1893, iho nei, a ke ena nei ka Lahui Hawaii i keia la, aole i ola keia eha. E ka Laui Hawaii aloha, e mau ka hoomanawanui a me ka lokahi a hiki aku kakou i ke oioina hoomaha o ka lanakila.