Ka Leo o ka Lahui, Volume II, Number 659, 10 Malaki 1893 — Page 1

KA LEO O KA LAHUI.

"E Mau ke Ea o ka Aina i ka Pono."

 

HE MOOLELO KAILI PUUWAI

NO

SENIA LUTERA

Ka Ui Puuwai Mabala

o

ENELANI KAHIKO.

A I OI E

He Nanea Hooheno no kekahi Kauna Wahine Opio me kana mau Aloha Ekolu.

(Kakauia no Ka Leo.)

MOKUNA XXXI.

He moeuhane anei keia a'u e ike nei, a i ole ia, na ka hoku anei o ka lewa lani i hoopuhili mai i ko'u noonoo kanaka? E hai mai ia'u, e kuu mea i aloha ai, a e kuu Moi hoi, he moeuhane anei?

            E hai mai ia'u, e Laionela maikai wahi a ka ui Senia, me kona hapai malie ana ae i kona poo iluna a nana pono aku la i na maka o kona hoa. E hai mai ia'u no kau wahine mare. Ua ano akakuu iki mai la hoi na manao ano e iloko o'u, a na hiki loa ia'u ke hoolohe malie aku me ka hauoli. He ui anei oia? A he aloha no anei ia oe?

            Ae, he ui no oia, wahi a Laionela a he maemae a hemolele e like me ka maemae o kana wahi bebe kamakahi. He mau maka kona e like me ko ka violeta, a he lauoho hoi kona e like ko ke gula maemae loa, a aia maluna o kona mau hiohiona ke ano oluolu o kona leo ke puana He ui ano okoa no kona a o kou ui hoi he oi loa aku ia aole ou lua, a'u i ike ai ka nani.

            E hoomaikai ia na Lani no kona like olo ana me a'u! wahi a Senia me ka leo uwe no ka mea aole oia e hiki ke aihue aku i ka'u kane mai ia'u aku e like la me a'u i kana! Owai la kona inoa e Laionela; e hai mai i kona inoa ia'u, i hiki ai ia'u ke hele aku a mihi akua no ka'u hewa i hana aku ai iaia?

            O Iulia kona inoa, wahi a Laionela, me kona haka pono ana aku i na hiona e h@kau aku ana maluna ona, ina oia e lohe pono mai ana, o ka inoa ia o kana aikane aloha; a me kona hoino ana iho iaia iho, no ka nui o keia mau hana hoopilihua a hookaumaha ana i kana aloha, a ua oi aku ka maikai o kona make, mamua o kona haawi ana aku iaia ia na ehaeha.

            Ua hoholo aela he eha walania i ka puuwai o ka ui Senia, i kona ike a lohe maopopo ana aole he mea okoa loa aku kana i powa ai me ka lokoino, aka o kana aikane aloha no ka; nolaila, pale hou aku la oia i na lima o Laionela, e apo ana ma kona a-i, a uwe ae la oia me ka ehaeha nui: a oia hoi ka Laionela i hooheno aku ai me keia mau wahi lalani mele:

            Auhe wale oe ka'u aloha

            Hoa hele o ka ua me ka makani

            Alo aku kaua o ke koekoe

            Na po kehau o kahilinai

            Aole no wau i mahui mua

            E wehe mai ana oe i ka pili

            Ua hiki no ia'u ke kaena

            He loaa ilihune kuu pokii.

            E na Lani aloha! e nana mai maluna o'u nei, kekahi o kau mau kauwa hewa loa!

            O keia hewa a'u i hana iho nei, ua oi loa aku ia mamua o ka mea hiki ke huikala ia, aka e hoao no au e mihi a e hoihoi hou i ka waiwai, a ka mea hale ole!

            O e Laionela, he hoaloha au i oi aku mamua ou, no ka mea e kaili mai no auanei oe i ka wahine a kou ho@loho maikai loa mai iaia mai, me ka manao hou ole e hoihoi hou aku iaia, aka no'u nei, aole loa au e ae e hana i kekahi hana ekaeka oia ano maluna o ko'u hoaloha maikai e hoihoi aku no au i kana kane iaia! A oi loa aku hoi, i ke keiki uuku a'u i pahaha ai, iaia me me ka hoonele ana aku me ka makuakane ole.

            E nana mai ia'u nei, e Laionela, a e hoomaopopo iho owai la au i kau ike. A na kou puuwai ponoi no auanei e hawanawana aku ia oe, owau no nei kau aloha mua, a o kuu hoaloha a aikane aloha loa o Iulia oia no ka'u wahine mare!

            Ua ka manawa mua loa akahi no a wehe ia ae ka alu o na maka o ua Laioneia nei, a me ke ano kulana ana aku i hope, a nana aku ana hoi i ka wahine nani ana i kuhihewa ai, me he la he akua lapu kana i ike ai. Ua uwe aela oia.

            Senia! E kuu Akua, o Senia keia kuu aloha, i hoi hou mai ka luakupapau mai. Ka hopena hoi o na poe a pau.

 

            O ke awakea Poaha a me ke awakea La Sabati na la ae ia o ko uka nei poe, e holo makaikai aku iluna o ka mokukaua Nania nolaila, ma kahi o ka Poalima a a makou ihoike mua aku ai, o ka Poaha ka pololei.

 

HE NANEA KAMAHAO

NO

MAIKA

KE KEIKI

Hapa Ilikini a Hawaii hoi.

KE KANAKA MUA LOA NANA I PANA KE AKUA BEA A NA ILIKINI I MAKA'U LOA AI—A O KA WELI HOI O NA ILI KEOKOE—A ME KA LUKU IA ANA O KELA HUI KEAKA A LI.

Hiu a wela, lawe a lilo, ke keiki Hapa Ilikini, e@ i ka manawa hookahi. na hana powa, a me ka make ana o na hoahanau Conegokena, ka mare ana o Maika a me na hana hoomainoino.

            Ke nonoi aku nei au i kou oluolu e ka lunakanawai e kali iki hoi kau olelo hoopai @ maua, @ nonoi ae hoi au i ka mea mana loa, e kala mai ia maua mamuli hoi o keia hewa i hoohauhili ia mai maluna o maua.

            Ke lana nei ko'u manao, ma ia noi ana a'u e akaka ai ka mea hewa o maua paha a o lakou nei ae paha.

            Ua oluolu keia aha e kali iki i ka hoopuka ana i ka olelo hoopai e like me kau noi no ekolu hora.

            Ua hoomaikai koke aku la ua wahi makai nei, a me kali ole aku no hookahi minute, ua kukuli iho la oia ma ka aoao o ka pakaukau a ka wahine e moe ana, a hoomohala aku la i kona lima iwaho, a hoomaka aku la e pule.

            I ka wa a ua wahi makai nei e pule ana, eia na mea a pau ke akaaka hoohenehene aku nei iaia, no kona pule ana e hoola hou i ke kino make o ka wahine.

            Aka nae, oiai lakou e hauwalaau ana, ua hoopuiwa ia ae la lakou i ko lakou lohe ana aku i ke po-ha ana e o ka leo akaaka mai ke kino make mai o ka wahine, me ke kahea pu ana ae:

            E hookuu! e hookuu ae kou lima e ka makai e hoomaneoneo nei ma kuu poaeae.

            Aole, aole, aole loa au e hookuu ana i kuu mau lima mai kou mau poaeae mai, a hiki i kou wa e hahai mai ai i ka mea oiaio, a i ole e mihi mai paha oe imua o keia aha no keia mau hana apuka au imua o ko makou alo, wahi a kahi makai.

            E hookuu, e hookuu ae oe i kou lfma, ua hewa ua no keia mau haka apuka a'u imua o oukou.

            I ka lohe ana o kahi makai i ka huaolelo mihi a ka wahine, ua hookuu aku la oia me ka hooho pua ana ae:

            A hahana, loaa pono ke kolohe! ke mihi nei hoi e mihi ai, me keia mau olelo ana, ua ninau aku la oia i ka lunakanawai.

            Pehea kau manao e ka lunakanawai, e hoao ana no anei oe e kau mai i kau olelo hoopai maluna o maua.

            Aole, aole loa au e hookau aku ana i ka'u olelo hoopai maluna o olua, aka e hookuu lanakila aku au ia olua a me Maika pu, mailoko ae o keia mau hana apuka a Conegokena ma, a o ko lakou hewa ka'u e hookolokolo ae i keia manawa.

            I ka lohe ana o kapena Sula. i keia mau olelo a ka lunakanawai ua hele koke aku la oia me kahi makai a lulu lima pu aku la me Maika apuka, @kuikui lima nui aku la no kahi a @ Ilamuku e noho ana.

            Ia lakou i kaalo aku ai ma ke alo o ka Ilamuku, ua hoopa aku la kahi makai i ka wawae o ka Ilamuku.

            I ka ike o ka Ilamuku i keia mau hana kolohe a kahi makai, ua lele aku la oia me ka hikiwawe loa e peku i ua wahi makai nei, aka me ka hikiwawe a me ka piha eleu o ka uwila, ua miki aku la o Keohookapalai a ma ka wawae ana i peku mai ai, a kaikai ae la iluna, aia hoi iloko oia sekona kookahi no, ua hina iho la oia ilalo, me ka hoopuka pu an@ ae i na huaolelo ino.

            Ua huli mai la kahi makai i hohope, i ka a ka Ilamuku e lo@ ana i ka eha, a pane mai la:

            E noho malie kou waha po'i moa e na lapuwale, o ninau auanei nei lima i ko waha.

            Ua pii pa umi ae ka inaina o ka Ilamuku i keia wa i ko ka manawa mua, mamuli o ka noke mai o ke anaina i ka aka hoohenehene iaia, a ua aneane oia e lele maoli aku maluna o kahi makai, aka ua poha e mai la ka leo o ka lunakanawai penei:

            Aole ana anei e hiki ia oukou e keia poe ke hahai mai i ka mea pololei, no ka mea o keia hewa a oukou i hana ai, ua kupono loa no ko oukou kani a-i @ lewalewa ai iluna o ka @

            Aole i pau.

 

HUI ALAHAO A ME AINA O OAHU.

Papa Manawa

Mai a Mahope o Okatoba 1, 1892

NA KAA

A. M. A. P. M. P. M.

Haalele ia Honolulu 6:15* 8:45 1:45 4:35

Hoea i Honouliuli 7:20* 9:57 2:57 5:35

Haalele ia " 7:30* 10:13 3:45 5:42

Hoea i Honolulu 8:35* 11:55 4:55 6:50t

NO KULANAKAUHALE MOMI IHO.

Haalele ia Honolulu 5:10ll P. M.

Hiki i Kulanakauhale Momi 5:48ll

Haalele ia " " 6:55* A. M

            t Poaono wale no

            * Koe ka Lapule

            ll Koe ka Poaono.

Sept. 28 tf-dly.

 

HOOLAHA AINA.

            E ike auanei na kanaka a pau ma keia Hoolaha, owau o S. K. Kila Opio, e noho ana ma Honolulu, Mokupuni o Oahu, ke hoike aku nei au ma ke akea owau wale no ka pilikoko pili loa i na aina o Kila (k) Kepola (w) a me Ku (k) i make e waiho la ma Kahuku Kau, Mokupuni o Hawaii. O ka mea a mau @ paha i keia mau aina, aole i mana ia hana ana, ina he mea a mau mea paha e paa nei i ua mau apana aina nei, e hoike koke mai ia'u, a i ole e kipaku no au ia lakou.

            S. K. KILA OPIO.

            Honolulu. Feb 17 1893.

            4ts-wkly.

 

OLELO HOOLAHA.

            E ike auanei na kanaka a pau ma keia, ke papa loa ia aku nei na mea a pau, aole e hele maluna o na aina o Kahikinui a me Auwahi i lilo mai ia maua malalo o ke kuai a me ka hoolimalima a lawe aihue i na manu Pelehu. Pikake a me na ano manu e ae apau loa e hele ala maluna o ua mau aina nei. A ma keia hoolaha ke ae aku nei maua e haawi aku i uku makana he $25 i ka mea a mau mea paha nana e hoike mai ia maua, a hookolokolo a hoopai ia e ke kanawai no ka lawe aihue i kekahi o ua mau a@ manu nei, e hoike mai ma ko maua Hale Kuai ma Wailuku. Ua kapu pu ia no hoi na kanaka a pau, aole e hele maluna o ko maua mau aina kula no ka lawe ana i na Bipi, Lio a mau Holoholona e ae, me ke noi mua ole mai ia maua a i ko maua Luna paha, oia o Frank Fr@tas e noho ala maluna o ka aina.

            A. ENOS & CO.

            Wailuku, Maui, Feb. 9th, 1893

            feb@w.