Ka Leo o ka Lahui, Volume II, Number 650, 27 February 1893 — Page 1

KA LEO O KA LAHUI.

"E Mau ke Ea o ka Aina i ka Pono."

Buke II.               HONOLULU, FEBRUARI 27, 1893.                 Helu 650

 

HE MOOLELO KAILI PUUWAI

NO

SENIA LUTERA

 

Ka Ui Puuwai Mabala

o

ENELANI KAHIKO.

 

A I OIE

 

He Nanea Hooheno no kekahi Kauna Wahine Opio me kana mau Aloha Ekolu.

(Kakauia no Ka Leo.)

 

       Ua lilo ko'u mau noonoo ana no na mea o keia ao, wahi hou a Codona a hoomau hou mai la.

       A i keia po hoi, he keu a ke ano e, akahi no au a noonoo mai no ka make.

       Ia'u i noho mai nei ma ka piona, a himeni mai nei hoi i kela mele kahiko, ua alakai ia aku la ko'u noonoo no na mea pohihihi e hiki mai ana maluna o'u ma kekahi o keia mau la iho.

       Ua ulu pu mai la no hoi na hoomanao ana iloko o'u, no ka hoaloha pilipaa o ke au i aui aku la, i kaili ia aku no kela ao nani mao.

       O ka makamua keia o ka ulu honua o kekahi o ko'u mau noonoo ana no lakou, me he la o ko na lani makemake no ia.

       Ua hookuu ino iho oia i kona hanu, i ka pau ana o kela mau mamala olelo maluna ae, me ka hoomau no nae o kona mau maka i ka nana ana i na hoku o ka lani, oiai nn minoaka ana o ke kaumaha e hekau ana maluna o kona mau papalina, a puana ae la i keia mau huaolelo:

E na kiai o ke kulu aumoe

Ua hiki anei ia oukou ke wanana mai i ko'u hopena?

A e ke ahe lau makani

Aia anei ilaila ko'u hopena?

       O keia mau olelo a pau a ke alii Codona, ua komo kuli polipo aku la ia iloko o ka waihona noonoo lokoino o kona hoaloha a me kana wahine, ka mea hoi i huli kue aku ia a i na hota iho mamua.

       O ka laua hana wale no ia manawa, oia no ka uumi malie ana iho i ko laua leo uwe no ka mea, ua hoomaopopo iho la ko laua naau kakauha, i ke kulana keonimana o ke 'lii Codona, a komo iho la ka hilahila iloko o laua, no ka laua mea i hoolala mua ai i ola honua,

       Ua noho iho la ua alii Codona nei ma ka aoao akau o Sir Laionela, a lalau aku la i kona lima me ka pane ana aku i keia mau huaolelo ku i ke aloha:

       I noho kakou a i make emo oie au e kuu hoaloha maikai, alaila e waiho aku no  auanei au i kuu aloha, kuu lei haule ole hoi o na kau he nui.

       Ua hooponopono au i na mea a pau, i hakalia wale no i ka anela manawaino o ke aloha ole i ke kii mai i nei kino a kaili kohana aku mai ka ola pulama ana; alaila o kuu waiwai no a pau, e ili pau no auanei ko'u waiwai a pau maluna o kuu mea aloha.

       A o kana mea wale no i koe e hana ai, oia ka imi ana i ka mea nana e malama a hooponopono i kona waiwai, a ua ike no au, aohe mea kupono e ae nana e malama ia mau pono, hookahi wale iho no o oe e kuu hoaloha.

       Nolaila, a i hiki mai auanei i ka manawa o ke kanikau, a me ke kaumaha, o ! e kuu hoaloha, e oluolu anei oe e malama maikai iaia ? no ka mea, he mea nui oia ia'u.

       Ua ike oia i ke kaumaha a me ka luuluu o keia ola ana, a pela pu no-hoi me a'u; ua like keia ola ana ia'u, ke hoike ae i ka mea oiaio, me he la, ua oi aku ka oluolu, ina e kii koke mai na lima aloha ole o ka make a kaili aku i ko'u hanu, mai keia ao mauleule aku.

 

HE NANEA KAMAHAO

- NO -

MAIKA

 

KE KEIKI

Hapa Ilikini a Hawaii hoi.

 

KE KANAKA MUA LOA NANA I PANA KE AKUA BEA A NA ILIKINI I MAKA'U LOA AI -- A O KA WELI HOI O NA ILI KEOREO -- A ME KA LUKU IA ANA O KELA HUI KEAKA A LI.

 

Hiu a wela, lawe a lilo, ke keiki

Hapa Ilikini, elua  i ka manawa

hookahi. na hana powa. a

me ka makeana o na hoa-

hanao Conegokena, ka

mare ana o Maika.

a me na hana

hoomaino-

ino.

 

       I ka ike ana o Keohookapalai, oia hoi ka inoa hooheno a Maika i kapa aku ai no kana lei Poni-moi, i ke ku aku o keia makai ma ka puka ponoi o ka rumi, ua pii ae la ka lia maeele o ka makau a puni kona nui kino, aole hoi e hiki iaia ke puka ae hookahi huaolelo.

       He mau minute loihi ko laua noho nana ana i kekahi me kekahi, ua ninau aku o Maika piha eu:

       O oe anei ke kaikamahine hanai a kapena Sula?

       Ae, a i ke aha la ? wahi a ua ui nei.

       Ka ! i hoouna ia mai nei au no ke kii ana mai e hopu ia oe, mamuli o kou loaa pono ana ia kapena Sula iloko o kekahi rumi o keia hale, e walea ana me Maika i ka lai o Mana, ua lohe pono aku la anei oe ?

       Aole i pane mai ka ui Keohookapalai i keia ninau a ka makai; aka, o ka leo uwe kapalii kana i panai mai ai.

       Mai uwe leo nui ae oe; aka, eia mai ka make la, ia wa i onou aku ai ua makai kolohe nei, i ka hao hoopaa lawehala imua o ka ui.

       Me ke kuakoko o ka huhu a me ka inaina, ua lalau mai la na lima o ka ui a kaili aku la mai ka makai aku, a kiola loa aku la iwaho o ka pukaaniani, me ka pane ana mai i ka makai, aole au e neeu aku ana mai keia rumi aku a hiki i ko hoi wale ana.

       I ke lohe ana o Maika i keia mau olelo a kana aloha, ua akaka ae la oia a pane mai la me ke apo ana mai i ka ai:

       E kuu lei Keohookapalai, owau no keia o ko ipo aloha, ko hoa i alo ai i ke kula laula o Aohikea, ke hoomaopopo mai la no anei oe i ka'u mau olelo?

       Ua noho mumule iho ua nohea nei no kekahi mau minute, me kona hakilo pono ana mai i na helehelena o keia kanaka e noho nei ma kona aoao me kau nalu ana iloko iho ona:

       He oiaio, o na helehelena o kuu aloha aia no ia maluna ou; aka, pehea la i loii ae ai kona ili mai ka ula-iliahi a ke keokeo.

       No kekahi mau sekona mahope iho, ua hoomaopopo pono iho la ua ui nei, o kana eha koni no keia, mamuli o kona ike pono ana aku i kekahi hapa o ka lauoho o ua hapa Ilikini nei, ua helelei ke pena i pena ia ai.

       Nolaila, me ka naau hoi i hoopiha ia i ke aloha wela, ua lele hooponopono ole aku la oia maluna ona, me ka manao e huai paa i na ai a ke oolea.

       Aka, ua kaohi aku la o Maika me ka puana ana aku i keia mele:

Umiia ia iho ko makewai

A hala ae ka makani ino

Oiai eia no ia nei kekahi

Ke ili aku wi ko niho.

       E kuu aloha, wahi a ka ui, ua hemo lanakila anei oe mai kou mau enemi mai?

       Aole.

       Pehea ka oe i hemo mai nei?

       Me keia mau hiohiona au e ike mai la maluna o'u, e kuu aloha.

 

HUI ALAHAO A ME AINA O OAHU.

Papa Manawa

Mai a Mahope o Okatoba 1, 1892.

NA KAA

 

Haalele ia Honolulu  6:15             8:45             1:45             4:35

Hoaa i Honouliuli     7:20             9:57             2:57             5:35

Haalele ia    "           7:30             10:13     3:35             5:42

Hoea i Honolulu        8:35             11:55     4:55             5:30

NO KULANAKAUHALE MOMI IHO.

Haalele ia Honolulu                5:10 P. M.

Hiki i Kaulanakauhale Momi  5:48

Haalele ia     "                   "     6:55 A. M.

       Poaono wale no

       Koe ka Lapule

       Koe Ka Poaono.

                     Sept. 28 tf-dly.

 

HOOLAHA AINA.

       E ike auanei na kanaka a pau ma keia Hoolaha, owau o S. K. Kila Opio, e noho ana ma Honolulu.   Mokupuni o Oahu, he hoike aku nei au  ma ke akea owau wale no ka pilikoko pili loa i na aina o Kila (k) Kepola (w) a me Ku (k) i make e waiho la ma Kahuku Kau, Mokupuni o Hawaii:  O ka mea a mau mea i kuai a hoolimalima paha i keia mau aina, aole i mana ia hana ana, ina he mea a mau mea paha e paa nei i ua mau apana aina nei, e hoike koke mai ia'u, a i ole e kipaku no au ia lakou.

S. K. KILA OPIO.

Honolulu, Feb 17 1893.

4ts-wkly.

 

OLELO HOOLAHA.

       E ike auanei na kanaka a pau ma keia, ke papa loa ia aku nei na mea a pau, aole e hele maluna o na aina o Kahikinui a me Auwahi i lilo mai ia maua malalo o ke kuai a me ka hoolimalima a lawe aihue i na manu Pelehu.  Pikake a me na ano manu e ae apau loa e hele ala maluna o ua mau aina nei.  A ma keia hoolaha aku i uku makana he $25 i ka mea a mau mea paha nana e hoike mai ia maua, a hookolokolo, a hoopai ia e ke kanawai no ka lawe aihue i kekahi o ua mau an e manu nei, e hoike mai ma ko maua Hale Kuai ma Wailuku.  Ua kapu pu ia no hoi na kanaka a pau, aole e hele maluna o ko maua @ aina kula no ka lawe ana i na Bipi, Lio a mau Holoholona e ae, me ke moi mua ole mai ia maua a i ko maua Luna paha, oia o Frank Freitas e noho ala maluna o ka aina.

A. ENOS & CO.

Wailuku, Maui, Feb. 9th, 189@.

feb9 3msw.