Ka Leo o ka Lahui, Volume II, Number 646, 21 February 1893 — He Pule no ke Ea o ka Aina. [ARTICLE]

He Pule no ke Ea o ka Aina.

E kulou e ka Lahui Hawaii aloha, E hoomana aku e na mea ola apau; E pule a e nonoi me ka haahaa E mihi me ka naau walania, Imua o ke alo o ko kakou Hoola Ka puuhonua o ko ke ao nei apau, Ke kaiahala o ko kakou mau hewa Ka hoopakele o ka poe i hoopilikiaia Oia ko kakou alakai no ka pomaikai A he Lamaku hoiia no ka poe haipule Ka mea hookahi nana e hoomama mai Ka naau luuluu o Kana poe Kauwa E ala e na Haipule Oiaio o ka Aina hanau E hoolana i ko oukou mau manao no ka pono E pepelu i ko oukou mau kuli me ka oiaio A e nonoi me ka manaoio ikaika

Iaia e maha ai ka poe i hookaumaha ia A e lanakila mau loa ka poe i hoehaeha ia E hookeai no ke Ea o ko oukou Aina Makuahine A me ke ola o ko oukou Lahui I mau ai ka Noho Alii o Hawaii A me kou Moiwahine maluna o ke Kalaunu E haliu aku ko oukou mau maka i na Lani A e hoomanao i Kona mana Kahikolu aloha E hoonani aku i ke Akua Kiekie Loa Ma Kona wahi Hoano Kapu Ihiihi E malama a e hoomalu me ka maluhia E lokahi me ka puuwai akahai. Iloko o Kona lokomaikai palena ole E loaa ai ia kakou ka maha mau A e lanakila hou ai oe e Hawaii Kou Moi a me kou Lahui kanaka I ka paulele ana aku maluna Ona Ka Mea i kaulia ia maluna o ke Kea A kahe maila Kona koko hala ole No Kona aloha i ko ke ao nei apau Amene. Miss Kekoaohiwaikalani. Puahaulani Hale Honolulu, Feb. 20. 1893.