Ka Leo o ka Lahui, Volume II, Number 643, 16 Pepeluali 1893 — HE WEHI NO LILIULANI. [ARTICLE]

HE WEHI NO LILIULANI.

He inoa keia nou e Liliu No ka wohi kapu o Hawaii Kulia i ka pono ko aupuni Ma ka paepae o ka mea Mana Loa I mau ka pono i ko lahui Ma ka aekai o ka Pakipika E hoi e Liliu i kou kapu E noho i ka Ihi o ke Kalaunu Ua poni ia oe me ka maemae I makua nui hoi no ka lehulehu Ke lana nei no kahi manao E i aku ka pono a hiki mai Ke hii ia mai la e ke Kiakolu Me ka hae lanakila ou e Kalani Kohia i paa kou manao I ku ai ko makaia Kulia ka pule a ke Kahuna O Kane Kanaloa mailuna mai He noi aloha ia Kihawahine E maliu mai oe i ka leo uwalo Eia ko liko ko pulapula Milimili a Hawaii o Keawe Kakoo mai o Maui o Kama I ka pono nui o Liliuokalani E ike e ka lani me ka opua I ka hana a ka opu lokoino Palea ia ka manao lili Ka manao haakei me ka lokoino Ke i mai nei a o Haumea E ola o Hawaii a mau loa O Liliuokalani no ka Hooilina Ke poo hoi o ka noho Kalaunu Kukulu paa ia ko Makia Onipaa i ka piko o Kakuhihewa Haina ka inoa ua lanakila O Liliu o Wewehilani i ke Kapu. He inoa keia no Wewehilani Ke Kuiai hoi o ka Pakipika Ke Aliiwahine o Hawaii nei Ke hai mai nei ka Hokuloa Ke alakai o ka malamalama Ke i mai nei ka pae opua Eia Poloula ka Hokualii Nana i kaohi ko aupuni I paa a paa e Kumuhonua I mau ka noho'na o ko pulapula Ko kaku ai o ke ao nei Oia ka uwalo ia oukou Na kini o ka la me kaulana E lana ka manao e ka lahui E lokahi like na puuwai E haliu like ae i ka Mana Lani I na Kolukahi o ke ola mau I like ka noho ana me ke au mua Me ke au ia Kalani Kapuaiwa A loaa mai nei i nei Lani O ke Kahiwauli ka Onohilani Ka onohi i kokoni ai o ka eha I loku ai o ka maka i ka puu kai Akahi a ola Hawaii nui Ua loaa ka Mohai a me ka Alana O ka leo ka-ua me ke aloha E kali a hiki mai ka Elele O ka wahaole o ke aupuni Mai punihei mai oukou I ka poe anunu kohuole Makee i ka pono o Hawaii Nana i poi ou kupuna A loaa mai hoi oukou E na hanauna moo nihoawa Haina ka inoa o ka lanakila O Liliu o Wewehilaniikekapu Puuwai Aloha.