Ka Leo o ka Lahui, Volume II, Number 642, 15 Pepeluali 1893 — Page 2
| This text was transcribed by: | Kehau Chrisman |
| This work is dedicated to: | Kehau Chrisman |
KA LEO O KA LAHUI.
"E Mau ke Ea o ka Aina i ka Pono."
KA LEO O KA LAHUI.
---------
JOSEPH NAWAHI,
Lunahooponopono a me Puuku.
-----------------------
POAKOLU, FEBERUARI 15, 1893
--------------------------
Hoolaha a ka Lunahooponopono.
--------------
Mai keia la aku, ua lilo holookoa ae nei na nupepa KA LEO O KA LAHUI a me “Ka Oiaio,” malalo o ka’u hooponopono ana. Nolaila o na kauoha pepa a pau, na hookaa dala ana no ka pepa, na kaku manao ana mai, a pela aku, e hoouna ia mai ma ko’u inoa ponoi, me na hua V. P. i kauia ma ka kihi hema malalo o ka wa-hi leta.
JOSEPH NAWAHI.
Lunahooponopono a Puuku no na nupepa i oleloia maluna ae.
Honolulu, Feberuari 8 th , 1893.
-----------------------
Ka Moiwahine Liliuokalani.
-------------
He oia mau no ke ola o ka Moiwahine kaeaea o Hawaii, ka mea hoi a Kona lahui aloha i kapa aku ai me ka makahehi: “Ka Puuwai Hao Kila Makeneti.” Nani no ka pilipaa ana o ka ka lahui aloha, mahope o ke Alii i mohai i Kona ola no ka pono o kona lahuikanaka. Ke ku mai nei ka la 17 o Ianuari a hooia mai i ke kupaa o ke Alii mahope o Kona lahui ponoi, aole hoi mamuli o ka onoonou ia, aka, mai Kona puuwai Alii ae no. Eia no Oia i ka olu kohai o Wasinetona, i ke Kapitala o Amerika. He oia mau no ka mohala, me he pua la no ka Melekule; o ka ala kupaoa ka hanu o ke Alii.
-------------------------
E Hoolohe mai e ka
Lahui Hawaii.
----------
Ua hoike pono ia mai ia makou, aia he mau buke pa’ihakahaka ia ma ka lima o na poe luna aupuni o Hilo, o Kohala, o Kauai; e koi ana i na kane, me na wahine e kakau inoa aku, no ka hoohui ana aku ia Hawaii nei me Amerika; me na olelo pahele, ku i ka hana maalea. O ka makou e hoonaauao aku nei, mai puni e kakau inoa me ko oukou hoomaopopo ole i na hopena o ia mea.
Aole i kauohaia na luna aupuni e hana ia mea; oiai, o ka mea i kanohaia ia lakou, o ka noohiki oihana ana o na poe luna aupuni. Oia wale no.
----------------------
AOLE PELA KA OIAIO.
------------
Ua hoike aku nei hoi o Kakina, ma ka nupepa Examiner o Kaleponi; penei:--
“He nui wale o lakou [na poe Hawaii] iloko o ka Hale Ahaolelo, i makemake e hele mai ia makou e kue aku i ka Moiwahaine no na dala he 50 pakahi.”
A@@@le hoi oia i hoike ae owai @@@ na inoa eia poe?
Ke manaoio nei makou he mau olelo oiaio ole kela a Kakina; a ina e hiki iaia ke hoike ae i na inoa oia poe Hawaii i ake e loaa na dala he 50, no ke kumakaia ana, a kue ana paha i ka Moiwahine; alaila, e loaa koke ana ua poe la; o lakou no; aole he poe e ae.
Ina e hiki e kekahi Hawaii Ponoi e hana pela; alaila, hookahi ana mea i hana’i; oia no kona hoowalewale ia e Kakina ma.
E nana i ka lakou mau hana o ka A. D. 1887 i hoao ai e lawe i ke ola o ka Moi Kalakaua.
Ua loheia he mau dala mahuahua, he $5,000 paha i lilo aku i na powa, i mea ka e koe mai ai kona ola?
Nawai ia hana? No ka poe Hawaii oiaio anei? Aole loa! Na lakou no.
--------------------
O F. S. Pratt no ke Kanikela
Nui o Hawaii ma Kapalakiko.
--------------
Ua loaa aku ia F. S. Pratt (Palaika), ko kakou Kanikela Nui ma Kaleponi, he mau palapala kauoha Pili Aupuni, mai ke Aupuni Kuloko aku.
O kekahi o keia mau palapala, mai ia Peresidena Dole aku, e hoike aku ana i ke kulana o ke Aupuni. A e hooia pu aku ana i ka hoomau ana aku iaia e noho i Kanikela Nui malaila. Ua kauoha ia oia e hoike i na Kanikela e ae eha maloko o kona mau palena no ka loli ana o ke kulana o ke aupuni.
O ka lua o na palapala, mai ke Kuhina Waiwai, P.D. Jones aku, e kauoha aku ana iaia e hoike koke aku i ka hale hana dala ma Wasinetona; e hoopau i ko lakou hana ana i na Keneta 400,000, a me na Hapaumi 400,000, a me na Kenikeni 100,000.
Elike me kekahi kauoha i loaa aku ia lakou mamua aku nei, no ka hana ana i 400,000 Keneta, i 400,000 Hapaumi, i 100,000 Kenikeni, me ke kii o ka Moiwahine Liliuokalani maluna o keia mau apana dala. Ua hooko koke ia keia kauoha. Ua hoikeia mai, aole no i nui loa ka hana i hanaia, e lilo ai i mea e hoopaapaaia ai. Ua hoike pu ae no hoi o F. S. Pratt no ka pomaikai o ka p@e malihini e manao ana e holo mai ana no Honolulu, i ka maluhia a me ka poino ole e kau aku ana maluna o lakou.
-----------------------------
NA KA MEA HALA OLE E
NOU MUA I KA POHAKU.
----------------
O ka Karisto rule ana keia, i pane aku ai i na poe Iudaio, e pili ana no ka ninau hailuku i kekahi wahine moekolohe i lawe ia mai imua ona,
Na kela pane ana a Karisto, opa-pu aku i na poe Iudaio hookamani, mai ko lakou mau manao hookohukohu maalea, me ke poe malama kanawai la.
Pela no i keia mau la, eia kekahi poe i manao ia lakou iho, he poe ano haipule, ke aku nei, e kamailio akea, e kukala akea, e hoike akea ae i ko hai mau hewa, i mea e hoowahawaha ia ai oia; aka nae, ua kuhihewa oia, aole i ike kekahi poe i kona mau kee a me na hewa ona.
O keia mau hana ana pela, he kuhihewa nona iho; a o ka poe e nana aku ana ia kanaka; he hoopailua lakou iaia.
Ua loheia, ua noho pono ole kekahi o keia poe, me kekahi mau wahine, me ka hiki e hooiaio ia ia mau mea; aka, heaha la ka kakou mea e ike nei? eia, o lakou ia e hele nei e ae, a e @uhikuhi aku; o mea, a o mea, ka mea hana hewa!—Ea! pehea hoi kou hewa iho?—
----------------------
KO KA LAHUI HAWAII KULANA
MAOLI.
----------------
O ke kulana o ke aupuni Hawaii he kulana hiki ole ke hoopaapaaia kona oiaio, mai kahiko mai; maia na kupuna mua loa mai i noho mua ia Hawaii nei.
O na hoao ana e hao wale ae, a e kaili honua wale, a e pakaha wale, he mau hana ia no loko mai o ka manao ole i ko hai pono, mamuli o ka manao akea kaulike.
He mea hiki ole i ka naauao akahai, o keia au Karistiano ke alakai ia i ka hoole maoli ana i ke kulana o ka Lahui Hawaii, ma na ano a pau loa, maluna o ka pono i Hawaii.
Ke ikea nei ka puka maoli ana ae o na olelo, ma ka waha o kekahi poe haole, e olelo ana; aole kuleana o na kamaaina o ka aina, maloko o ka hooponopono ana no Hawaii, No ke aha? E ae anei na haole, e hele aku kakou, a komo, a noho maluna o ko lakou aina, a haawi mai i na pono ia kakou e like me ko lakou?
O ko lakou ala koke mai no ia a kipaku loa ia kakou ke hana kakou pela. Aole loa lakou e kakali i hookahi minute o ke ahonui, e like me ko ka Lahui Hawaii ahonui.
He mea anei e hiki ai ia kakou ka poe Hawaii e paulele aku, o ko lakou kahua, he kaulike, he hoopono, a he pololei, e like me na mea e hanaia nei i keia wa?
O ka manao mau o ka lahui Hawaii, he kaulike, he hai manuli o na hana pono i kuhikuhiia e hana; aole he alunu wale aku. He oi aku ka makee o ka Hawaii i ka oiaio o na hana, mamua o kekahi @oe o ka lahui e, e noho nei.
--------------------------------
O ke Kuhina P D. Jones, ma o ke Komite Waiwai he hoike e pili ana i haawina no na hoolilo o na Komisina a ke aupuni Kuloko i Wakinekona ame kekahi haawina liilii e ae.
------------------------
O KUIKAWA.
---------------
E MAHALO ANA IA
-------------
KAKINA
------------
ME KE KUIKAHI ELAU PU
O KA 1889.
--------------------
I kou’u hoomaopopo ana iho i na manao pai nuu a ka mea i kapaia, o Kuikawa ua ike makou, ua hanauia oia mamua loa aku o ka hanaia ana o ka Honua nei.
O Solomona ka lua ole o ka naauao; ka ike, ke akamai i hoikeia, aole he mea mamua aku, aole hoi mahope aku nei: Eia ka hoi o Kakina aenei ka oiaio!—
Pehea na hana a Kakina ma o ka 1887? Oiai o ka lua ole ona hana powa! Helu ekahi ia o ke aloha i ka Moi Kalakaua la?
Ua lohe paha oe i ka manaoia e powa i ke ola o ka Moi no na apana dala $5,000?—
Ua lohe paha oe i ka lilo ana oia mau dala i na poe powa, i mea e pakele ai kona ola ea?
Ua hoomaopopo anei oe i kela hana lapuwale i imihala ia ai o Gibbison (Kuhina o ka Moi Kalakaua) e kela wahime hoopunipuni? Owai na loio no ia hihia? O Kakina hoi kekahi!—
Ua hoopuka ae nei oe i ko@ hoino a hoowahawaha ia A. Rosa a me J. E. Bush no ke aha? No ko laua hoole ana i ke kuikahi elelaupu a Kakina ea?
Ua oi ae ka pono e ae aku i ka o na pomaikai, ma ka hana a hooko ana, i na mea ino. e pilikia ai ka lahui, mamua o ka hoole ana?
O ka hooholoia ana o kela Kanawai a Mc Kenley. he hewa anei ia no Bush a me Rosa?
O ke Akua ka mea nana i hana na mea apau loa; aole mea e hanaia. aole mea hiki wale mai me ko ke Akua ike ole.
O ka lako, ka hanohano a me ka waiwai o ke ia ao, aia lakou iloko o ko ke Akua mana. O ka nele ka ilihune, a me na popilikia, ua ike ke Akua ia mau mea; Nana no e hoonui i ka waiwai ma kekahi aina; a e hoonele hoi i kekahi aina; Na ke Akua e hookemo, i na dala apau o kekahi aina, lahui, Aupuni paha iloko o ke eke palanehe, o kona mana, a lawe aku a pau loa ma kekahi aina okoa: Aole e hiki i ka mana o ko ke kanaka noonoo a me kona ike ke hoihoi hou mai, me ko ke Akua ike ole.
He nui na kanaka i oi aku ko lakou ike a me ka nauao i ko Kakina; aka, auhea lakou i keia wa? Ua hala, ua make aku.
Ke hoomaopopo nei makou @@ pau no kou aloha i kou Aina hanau a ua lilo e no oe he kupa no ka aina malihini.
O makou nae, ua mau loa ka paa ana o ke aloha Aina, aloha Lahui, a me ke aloha Moi.
ALOHAAINA,
------------------------
HAIPULE MAU MA KAUMAKA-
PILI.
------------
Ua like makou ma ka nupepa Avalataisa o ke kakahiaka onehinei, i kekahi manao a makou i kahaha loa ai, e olelo ana: Ua uluhua ka lehulehu i ka lohe mau i kela bele e kani mau nei ma ka halepule o Kaumakapili, i na wanaao a pau, mawaena o ka hora 4 a me ka hora 4:30. E kahea ana i na kanaka Hawaii hapauea, mai na wahine a me na kane, a koakoa ae ma keia halawai haipule kakahiaka, no ke noi ana ma ka pule e hoihoi hou ae i ka Moiwahine Liliuokalani iluna o ka noho Moi o Hawaii.
A ke manao nei keia poe e hele me kekahi palapala hoopii i kaku i noa ia, a waiho aku ma ka lima o ka Ilamuku Ashley, no ka hoopau ana i keia halawai kakahiaka, ma ke ano, ua lilo he mea hoouluhua ia lakou, mamuli o ka hoopuoho ia ana o na poe he lehulehu wale e noho ana ma ia apana, ma ke kani ana o ka bele.
He hoike ana mai auanei ia oia nupepa Mikanele ia kakou, he mea maikai ole ka pule i ke Akua ma na Lani Kiekie Loa, oia wale no ke Akua oiaio hookahi. Ua ape aku kakou i keia haawina maikai, me ka manaoio ana maluna oia kahua, a hiki i keia la a kakou e lohe la i ka leo o ka bele e kahea ana i na kanaka manaoio o Hawaii nei. E ala e hele maloko o ka heiau o Iehova ke Akua Mana hookahi wale no.
Nolaila, ke manao nei makou, o keia hana a na kanaka Hawaii, he hana kaulana a he mea ku i ka mahaloia. ko lakou hoopii pololei ana i ko lakou mau leo pule imua o ke Akua.
Ua hele aku no kekahi poe e papa i keia hana, a ua pane ia mai, e hoomau ana lakou i ka malama ana i keia halawai a hiki i ka ike ia ana o ka hopena o keia hana i hana ia iho nei, mamuli o ka hooholo ana mai o na mana nui a kakou i noho kuikahi pu ai.
Ke lana nei ko makou manao, aole e ae ana ka Peresidena Dole, a me kekahi poe Karistiano oiaio e ae i keia hana hoohaiki.
--------------------------
Ua hoi hou mai nei o C. St@@@@@ me kana pahu oiaio, mai kona k@@hele ana aku nei ma na ku@@@. Ua loaa mai nei he pahu hou @@ kela mokuahi aku nei, a me he mea la, e hoonanea hou ia ana @@ ke kulanakauhale nei e @@@ wahi mea hoowalewale.