Ka Leo o ka Lahui, Volume II, Number 631, 27 January 1893 — Page 1

KA LEO O KA LAHUI.

"E Mau ke Ea o ka Aina i ka Pono."

 

 

Buke II. HONOLULU IANUARI 27, 1893. Helu 631

 

HE NANEA KAMAHAO

NO

MAIKA

KE KEIKI:

Hapa Ilikini a

Hawaii hoi.

 

KE KANAKA MUA LOA NANA I PANA KE AKUA BEA A NA ILIKINI I MAKA’U LOA AI—A O KA WELI HOI O NA ILI KEOKEO—A ME KA LUKU IA ANA O KELA HUI KEAKA A LI.

 

Hiu a wela, lawe a lilo, ke keiki

Hapa ilikini, elua i ka manawa

hookahi, na hana powa, a

me ka make ana o na hoa-

hanau Conegokena, ka

mare ana o Maika

a me na hana

hoomaino-

ino.

 

            Ia manawa i puiwa ae ai oia no kona piha maka’u me kona manaolana eia no i ke kino maoli, eia ka auanei he moeuhane, a no ke ano pau ole no kona makehiamoe, na haule hou aku la no oia hiamoe, aole nae i liuliu ia haule ana aku ana e hiamoe ua hoopuiwa loa ia oia mamuli o kona hoala ia ana aku e keia mau mea, a i kona puoho ana ze, ua lele koke ae la kona hauli, i ka owaka ana ae o kona mau maka a ike aku la oia i keia mau kanaka elua me ka laua mau pu panapana i hele a kokoke e pili pu i kona mau papalina me ko laua hoopuka like ana mai i keia mau mamala olelo e holo ai a kekahi mea kino oia a kau i ke kani ai.

            Ma ke dala, ma ka lawe ia o kou ola mahea oe e lawe ai?

            Ma ke dala! ma ke dala au!! e ola hoi au ia olua, no ka mea he nui loa ka’u dala, a no ke ano lohi loa o kana nanao ana iho i ke dala ua pane hou mai la ua mau powa nei.

            Wikiwiki oe e lohi nei, mahope oe ki koke ia e maua.

            Ma ke dala! ma ke dala!! e ola hoi au ia olua, no ke pilikiliki loa o na eke o keia koloka ka mea e hemo koke ole ae nei o kuu mau lima.

            Aole i pau pono ae keia mau olelo a Maika, Bang! Bang!! elike me kekahi mau kumu laau i oki ia aku a hina e kekahi mea, pela okoa iho la no ua mau powa nei i hina aku ai no ka haule ana aku iloko o ka make mau loa.

            E komo iho ana paha iloko ou e kuu makamaka heluhelu ka hoohuoi no ka make ana o keia mau powa ia Maika i ka wa a kona mau lima e nanao ana i ke dala, a o ke kumu i lohi loa ai o kona nanao, oia no kona hoopololei ana ae i ka waha o kana mau pu panapana i ka puuwai o ua mau powa la, a i kona ike ana ua poloiei, ua hoomaka koke ae la oia e ki maloko ae o na eke o kona koloka a puka pu ae la kona mau eke a kapoo aku la ua mau poka la iloko o na puuwai o ua mau powa la.

            I ka ike ana o Maika ua pakele oia mai na lima lokoino mai o na powa, o kona pekupeku koke ae la no ia i kona wahi kekake e kau ana no ka awiwi ana e hiki koke imua o Kapena Sula, no ka hahai ana aku iaia no kana mau mea hou e pili ana no kana huakai i pii ai i uka o ka luahuna.

            Oiai oia e hoi ana a i kona hoo kokoke ana aku e hiki i ka hale o Kapena Sula, ua hoopuiwa loa ia oia i kona ike ana aku i kekahi mea i ka holo ana mai a halakau ae la maluna o kekahi kekake ana e aloha ana mahope aku ona, a i kona huli ana ae e nana pono ia ua mea la, mamua nae o ka hiki ana iaia ke huli ae e nana pono i ua mea ia, ua paa e mai la kona kani a-i i ke apo ia e kekahi lima palupalu me ka pane ana mai i keia mau huaolelo e hoonaueue ai i na mea paahana o ka puuwai t ua Hapa Ilikini la.

            He keu no hoi kou aloha ole ia’u oiai au e kaohi aku ana ia oe no ka pii ana iuka o ka luahuna, oia nae paha, no kou makemake no paha e haina ia’u e like me ka ilio ke kali aku ia oe i keia po ka manawa hoi a ka ua e haluku, a oia hoi keia mau wahilalani mele malalo iho nei.

            O ka ua ko luna me ka uwila

            O Maika ko lalo me ka ulua.

            I ko Maika wa i lohe ai i keia mau huaolelo, ua hoomanao koke ae la oia no ka sweet hearts, oia hoi o Kaehakonialoko

Aole i pau.

 

HE MOOLELO KAILI PUUWAI

NO

SENIA LUTERA

 

Ka Ui Puuwai Mabala

:O:

ENELANI KAHIKO.

 

A I OI E

He Nanea Hooheno

no kekahi Kauna

Wahine Opio me

kana mau Aloha

Ekolu.

(Kakauia no Ka Leo.)

 

MOKUNA XXVI.

Ua like no hoi me ia, a o ke ano puanuanu hoi! Ua hoopunipuni anei ka ike a ko’u mau maka ia’u? E na lani, he oiaio anei na kahoaka o ka manawa? A e kuu aloha, o oe io anei ia? Ua kuhihewa no paha au; no ke mea, ua piha ae nei na makahiki elua o ka waiho ana o ka’u mea i aloha ai iloko o ka opu a na ole o ka honua!

 

            Na na ulia o ke au pomaikai o ka manawa, i hoohui hou ae i na opua elua he alo a he alo—na mea eina i komo io ke aloha kupouli ia laua iho i na la i hala a hiki ia manawa—a o ka makamua loa iloko o na hoehaeha ana a ke aloha ia laua, no keia mau makahiki elua, ua hui hou ae la ko laua mau maka ia kahi hookahi!

            Ua ku malie iho la ua Senia nei i kahi hookahi me he kii mabala ‘la ka naue ole, oiai no nae kona mau maka elua e haka pono ana maluna o na helehelena waian..hea o ke kanaka ana i aloha ai, ka mea hoi nona na hoomanao poina ole ana a kona noonoo wahine i ka po a me ke ao, kona wa e ala ai a me kona wa e moe ai.

            Ua hookau iho oia i kona lima maluna o kona puuwai, me he la e kaohi iho ana i ke kupaka ana a ke aloha e hana mao ole ana iloko ona; a akaka e mai hoi oia i kana aloha.

            O e na lani! ua kamaaina loa ia’u kela mau helehelena aloha! Ua nui ka manawa a’u i honi ai i kona mau lehelehe i puia i ke ala a me ke onaona, a me kona umauma lahalaha hoi, kahi a nei poo i hoomaha ai i na hora o ka anoai e uilani ana.

            A oia ka ikaika hoohana o ke aloha e hoouluulu ana iloko ona, me he la e hoohaule iho ana i kahi ikaika uuku i loaa iaia, ua aneane oia e kiola okoa aku i kona nui kino iloko o na lima o kana aloha e hoike aku hoi iaia, oia mau no na hoomanao ana a kona puuwai nona, iloko o keia manawa loihi o ko laua kaawale ana.

            A no ke kaeaea Laionela hoi, ua ku malie iho oia, me he la akahi no oia a ala mai kekahi moeuhane ae, me kona hoolele pau ana aku i ka ike a kona mau maka maluna o na helehelena nani kamahao o kana aloha, a ua kahuli ae la kona helehelena a haikea.

            No ka manawa pokole ua manao iho la oia, ua ala mai ka mea ana i aloha ai mai ka luakupapau mai, a hoike mai la iaia imua o kona maka, a iloko no hoi kona ma hewa, o Senia hookahi ka mea ana i aloha ai iloko o kona ola ana.

            Aole loa oia i poina iki iaia, a aole no hoi he hiki iaia ke hoopoina, a o ka mea mua i komo mai iloko ona oia kona puili ana aku i keia wahine nani iloko o kona mau lima.

            Aka nae, ua hoi keke mai ia kona noonoo maikai, a i iho la oia iloko ona, o keia wahine nani, me kona huihui ane like me ka mabala, aele no ia o kana aloha i haule a hoi iho no hoi, o ke kaikamahine ui opio i aneane e lilo wahine mare nana, ua make oia, no elua makahiki kona hiolani ana iloko o ka home loa o ka ohana Lutera, me kona mau kupuna i hala e aku ma hela ao.

            A hoi iho no hoi, ua ike au me ko’u mau maka ponoi i ka ho o ia ana o kona kino lepo iloko o ka pahu, a owau pu no hoi kekahi i ukali aku ma kona huakai hope loa a waiho aku ia kona kino lepo mawaena o kona ohana.

            Auwe, he oiaio ua make oia, a pehea ia ko’u noonoo i hoonawaliwali ia ai, a ae aku hoi i ko’u naau e alakai hewa ia, e keia akaku e ku mai nei, oiai keia mau noonoo e uluku ana iloko ona, aia no kona maka ke haka pono ala maluna o ka oiwi nani o Senia.

Aole i pau.

 

OLELEO HOOLAHA.

            E ike auanei na mea a pau, ke papa loa ia aku nei lakou, aole e hoaie wale aku i kuu wahine mare ia Mrs. Keliinohola, oiai, ua haalele kumu ole mai oia ia’u. O ke poe e hoolohe ole ana maluna no o lakou ke poho.

MR. KELIINOHOLA.

Halekoa, Ianuari 13, 1893.

jan16 tf.

 

NO KE KUAI

            1—He Pa-Hale ma Alanui Sherida o 11 80-100 eka. Uku Hoolimalima $315 no ka makahiki.

            2—He Pa-Hale ma ke Alanui Aupuni ma ke Awawa o Pauoa 1 37-100. Uku hoolimalima $100 o k a Makahiki.

            3—He Pa-Hale ma Alanui Liliha, kokoke i ke Alanui Kula.

            4—Hookahi Mahele Kuleana i ka Hui o Paleluahine. Awawa o Manoa. He 513 ka nui o na eka aina ma o ka Hui ma keia Awawa, a ua mahelehele ia hoi iloko o 33 Kuleana. He 15½ eka aina ka nui o ka mahele kuleana hookahi.

            5—He ekolu e pana aina taro ma Hauula; Koolauloa, Oahu, 1 15-100 eka.

E ninau ia

J. M. MONSARRAT.

(Maunakea)

jan13 tf.

 

Kauka Yong Kam

Pung.

(APANA.

 

Helu 53, Alanui Maunakea.

Ke Kauka Loea o ka

Aina Pua!

 

Ua hiki ke hoola ia kela a me keia ane

ma'i, mai ko na kane, wahine a me

na keiki liilii. O na ma'i ha-no

na hiki loa ia ke hoola ia me

ka maalahi. A o na ma'i

e pili ana i ka maka

pau pu ia i ke

ola. Ke

hoike ia aku nei,

ia aku nei.

eia ke ola ia nei, me

ka oluolu pu o kahi

auhau. Ka poo pilikia hanau

keiki a hele nui paha o ke koko,

a paa a lohi paha ka hanau ana, paa

paha o ka waiu, e hele nui mai i o'u ne

=> E KIPA mai e ka poe i hooluuluu ia me na haawina pilihuaa ka ma'i, a na'u oukou e honluulu aku.

KAUKA YONG KAM PUNG.

Honolulu Dec. 5, 1892. 2m @