Ka Leo o ka Lahui, Volume II, Number 623, 16 Ianuali 1893 — HALAWAI MAKAAINANA! [ARTICLE]
HALAWAI MAKAAINANA!
O ka halawai e malamaia ana ma ke Alo iho o ka Hale Mele Hou, e malama ia ana no ia e ka aoao e kakoo ana i ke aupuni, a ke poloai ia aku nei na makaainana o ka Moiwahine e akoakoa ae e lohe i ka leo o na alakai o ka lahui. Eia kakou ke imihala ia mai nei me ke kumu ole. Eia ke hahau ia mai nei ke kuokoa o Hawaii, e ka poe kuko a nuha, mamuli o ko ka Moiwahine maliu ana aku i na leo kupinai o Kona mau ,makaainana ponoi, e haawi aku i Kumukanawai Hou. Ua waiho mai Oia i keia mawao i Kona Aha Kuhina a mahalo no i ka manao aloha o ke Alii i waiho aku ai ia lakou no keia makemake o na makaainana ponoi o
ka aina, a ua kaohi mai lakou i ke aloha alii, a hiki i kekahi wa i ike ia he kupono. No ka hiki ole ana, ua kupono no ia kakou e hoomanawanui a e hoolohe i kana i olelo mai ai, he minamina au i ke ko ole o ko oukou makemake, aka, e hoi oukou a e malama i ka maluhia, a oia aku no he wa e loaa ai he hookoia o ko oukou makemake.