Ka Leo o ka Lahui, Volume II, Number 616, 5 January 1893 — Page 1

KA LEO O KA LAHUI.

"E Mau ke Ea o ka Aina i ka Pono."

Buke II.     HONOLULU  IANUARI 5, 1893.     HELU 616

HE MOOLELO KAILI PUUWAI

---NO---

SENIA LUTERA

Ka Ui Puuwai Mabala

---:O:---

ENELANI KAHIKO.

 A I OLE

He Nanea Hooheno

no kekahi Kauna

Wahine Opio me

kana mau Aloha

Ekolu.

(Kakauia no Ka Leo.)

MOKUNA XXVI.

E kuu Lede Senia nani, ua kokoke

mai ka wa ou e hoopaiia aku

ai, no ka lawe ana i ke ola

o kau kane!---E hai-

luku ia oe i ka

pohaku a hiki

i kou wa e make ai!

 

I ke kani ana aku o ka leo o ka ulili a ka Moiwahine, ua piha koke mai la oloko o ka rumi a Senia ma e noho ana, i ka poe kuewa a huli koke aku la kekahi o lakou a ninau aku la i ka moiwahine, heaha ka makemake a ua haku wahine la o lakou.

ua kuhikuhi aku la ka lima o ka moiwahine i ka ui Senia e ku mai ana me kona oiwi nani kilakila ma ka pukaaniani o ua wahi rumi la, a pae aku la ka leo o ka moiwahine me ke ano kuakaweli:

E hopu aku iaia, e o'u poe kanaka, no ka mea, he wahine pepehi kanaka oia!  E kuu Lede Senia nani, ua kokoke mai ka wa ou e hoopaiia aku ai, no ka lawe ana i ke oia o kau kane--e hailuku ia oe i ka pohaku a hiki i kou wa e make ai!

Ua hiki mai la kakou i ka mahina o Olepau, a ua ike hoi kakou i na mea i hanaia ma keia mokuna e pauaho nei, i ke komo kino ana o ka mea nona keia nanea iloko o kekahi kiko eleele o ka pepehi kanaka, ka mea hoi a kona puuwai i ae ai e mare malu me ka ike ole ia.

MOKUNA XXVII.

No keaha kou mea a pepehi ole mai ai ia'u a make i keia manawa i pau ko'u mau ehaeha?  Ai ole ua oi aku anei ka hauoli o kou puuwai lokoino i ka nana mai i ko'u hoehaeha ia?

I ka ui @na e ku nei a nana mai la i ka poe kuewa helehelena hauliuli e piha nei iloko o ka rumi, ua kahuli ano e ae la kona helehelena a haikea, no ka mea, he oiaio paha, aole he keiki i lohe mua i kekahi mau mamalaolelo awahua, e puka mai ana mai ka lehelehe ponoi mai o kekahi makuahine, elike la me ia.

A iaia e nana pono ana iloko o na maka lokoino e haka mai ana iaia, ua ike koke iho la no oia, aole he wahi manaolana ana ae i ka pakele ana mai ia lakou mai.

Ua nahu iho la kona mau niho, a hoopaa iho la i kona mau lehelehe, a hoopaa iho la i kona manao, aole e nonoi aku i keia poe lapuwale e aloha mai, a hoopakele ae paha iaia.  Ua hiki no, aia no i ka lakou hana ana, e hoomanawanui no au i ka lakou mau hoehaeha ana a pau, e hookau mai ai maluna o kou kino.

E na kanaka he pepehi kanaka maopopo oia! wahi a ka leo o ka moiwahine e kalahea nei, a e hoopai ia oia e pono ai!  Ua lohe pono mai la anei oukou i ka'u olelo?

Ua kunou malie like mai la ke poo o na kuewa a pau, a huli aku la ua Moiwahine la i ke kaikamahine helehelena haikea e ku mai ana me ke kokua ola, a pane aku la me ka puupuu ana aku o kona mau lima, a e hulili ana hoi kona maju maka uliuli elike me ka enaena o ke ahi:

Mai manao mai oe e aloha ia aku ana oe, e Lede Senia Lutera, no ka mea aole he hookahi o makou i komo ia e ke aloha hou.  O ka wahine e lawe ana i ke ola o kana kane elike la me oe i hana iho nei, e hoopai kiekie ia no oia, elike me ka eleele o kana karaima i hana ai!

Aole no au i manao e loaa na aloha ia ana mai a oukou mai, wahi a ka ui Senia i pane aku ai me kona leo haahaa moakaka, a me kona hapai ana ae hoi i kona poo a kiekie, a haki@o pono aku la i an onohi maka e hulili mai ana mamua ona, a o ka mea nona ua mau maka enaena la o ka inaina, na ke Akua e aloha mai iaia, oia no kona makuahine ponoi.

 

KA MOOLELO

---O---

HIIAKAIKAPOLI-

OPELE.

I HOOPONOPONOIA

MAI KA POE KAHIKO MAI A

ME KA POE I HOOPAA I NA MOOLELO A ME NA

KAAO KAHIKO O

HAWAII NEI E

JNO. E. BUSH A ME S. PAALUHI.

OLELO HOAKAKA.

O keia kekahi o na moolelo hoopahaohao ka noonoo o ka mea heluhelu, a makou e panee aku nei imua o na makamaka heluhelu o ka lahui o keia Paemoku.  Ua haku ia keia moolelo e ka poe kahiko e pili ana i ka huakai imi kane a kekahi a ko Pele kaikaina punahele a aloha nui oia hoi o Hiiakaikapoliopele.

Ma ka moolelo maoli, ua oleloia he ohana nui o Pele a me kona mau kaikaina a me kona maju kaikunane.  ua pe ae lakou ma ka Mokupuni o Hawaii i ka wa kahiko, o Pele ke alii a pau o keia ohana a me na kanaka malalo ona, a ua hookahua iho ko lakou noho ana ma ke alo o Maunaloa.  Ua kuee aku na kamaaina, aka, no ka ikaika o keia poe ua lanakila lakou maluna o na kamaaina, a mamuli o ka ui o na wahine o keia lahui a me na kane, ua hooki pu iho l ake kue o na kamaaina i ka poe malihini.  Ua noho iho la o Pele ma kahi e kokoke ana i kahi o ka Pele e hu mau ana, a mamuli o ke ano pouli o kanaka o ia wa, a me ke ano hookapukapu ia o ke Aliiwahine Pele e kona ohana a me na kini o ka pae ana mai me ia mai ka lakou huakai moana, ma ke ala mai o Kahiki, ua hoolilo ia aku la nana na hana ano e o ka honua i ike ia ma na olai a me ka a ana o ka lua ahi, a me ke kahe ana o ke aa a lilo he pohaku i kapa ia ma kona inoa a hiki i keia la, he pahoehoe.  No ka nalo a hapu loa o k@a Aliiwahine mai ka maka o na makaainaan na hoakua ia aku la oia, mamuli o ke kuko wale, me ka maopopo ole, nana na hana kupaianaha e ikea ana i kela a me keia manawa a ka honua e naueue ai, a me ka luai ana mai hoi i ke aa, a me ka lilo ana o ka pohaku i mea a ia a enaena a kohu wai.

Iloko o keia noho ana, he mau kaikaina kekahi o Pele, a o kekahi o keia mau wahine ui, oia hoi o Hiiaka-i-ka-poli-o-Pele.

Ua noho keia ohana me ka mana ma ko lakou aina-uka i hookahua ai a hiki i ka wa a ke Aliiwahine Pele i kuko ai e hooipo me keia kanaka, ana i lohe maju ai i ke kulana i ka ui, oia hoi o Lohiau, ke keiki hanu ala o na pali o Haena.  No keia uilani o ka naau hooipo, i hooulu ia e ke kuko a aloha wale, me ka ike maka ole, ua imi o Pele i wahi e hiki ai ke maliu mai keia kanaka ui a lilo hoi he kane hoopalau nana.  No keia kumu, ua wae ia o Hiiakaikapoliopele, e kii i ke kane a lakou, me ka lana o ka manao o ke kaikuaana, na ka ui o kona pokii aloha e ko mai i k amea a kona po i ii'a ai, a na ke aloha kaikuaana hoi e hoomalu i ke kino o ke kane a noa i kona mau alii, ia Pele, ka mea nona ka anoai hooni puuwai.

E like me ke ano mau o na moolelo o ka wa kahiko, i haawi waha ia mai kahi hanauna mai a kekahi hanauna, ua lilo mau ke ano o ka moolelo, a ua hookikepakepa ia iho hoi i kela a me keia manawa e ka poe malama mookuauhau moolelo. a mai ia wa i kuakaao a ka moolelo io maoli o keia ohana a hiki i keia la, a lilo ai hoi na hana i hookuiia me ka huakai imi kane a Hiiaka i hele ai, he mau hana hookalakupua.

Me ia iho la ke ano o na moolelo i hoopaa waha ia, aole wale ma keia aina, aka, me ia no hoi e nalo a e haule aku nei kekahi hapa nui o ka olelo Hawaii.

He nani no hoi a he nanea maoli no na moolelo a me na kaao o ka wa kahiko o ko kakou aina, a he mea no hoi a ka Hawaii e hiipoi ai e like me ka hialaai o kela a me keia lahui i na moolelo, na kaao, a me na mele o ko lakou aina hanau.  O keia hauleule ana o na moolelo oia kekahi ouli a ke kilo e nana ai me ka naau i piha i na manao hopohopo no ka mau ana o kona lahui maluna o ka aina o kona mau kupuna no ka moe e hoike mau ana ka moolelo io maoli o na aina i kakau ia na moolelo.

Aole i pau.

 HOOLAHA PA AUPUNI.

E ike auanei na kanaka a pau eia ma ka Pa Aupuni o Makiki nei kekaki mau lio helehewa,

lio w puakea melemele keokeo lokihi ma ka lae, 2 wawae keokeo aka hema 2 wawae eleele ak. a hema hae JOS kuni hope akau ke kuni malalo o keia mau kuni ekolu, aole ike ponoia powehiwehi.

Lio keiki p puakea kekehi o keia lio, aole kuni.  Lio w ahinahina keokeo eleele ka hulu o keia lio hao JOS kuni hope ak.  Lio k keokeo 2 wawae mua paa i kapuai hao, hao N kuni hope ak.  Lio w ulaula kiko keokeo ma ka lae 2 wawae eleele mua 2 wawae keokeo hope hao H kuni hope hema keia mau hua JH ua hui i kahi hookahi, ua hookaawaleia i kulike me ke kuni.

Lio k. eleele 2 waewae keokeo mua kikokiko keokeo ma ka kua he mau pohaka keokeo ma ka opu aoao ak. a hema hao >3P kuni hope ak. 3P

>P maluna P malalo a ia mau kuni, lio k. lokia ulaula keokeo lokihi m aka lae  1 wawae keokeo hope ak hao III kuni hope hema

O ka mea a mau mea nona keia mau lio, e pono e kii koke mai, e hala na la he 15 e kuai kudala akea ia aku ke hiki aku i ka la 7 o Ianuari, 1893.

D. KAOAO

Luna Pa Aupuni

Honolulu, Dec. 27, 1892.

Kauka Yong Kam

Pung.

(APANA.)

Helu 81, Alanui Maunakea.

Ke Kauka Loea o ka

Aina Pua!

Ua hiki ke hoola ia kela a me keia ane

ma'i, mai ko na kane, wahine a  me

na keiki liilii.  O na ma'i ha-no

ua hiki loa ia ke hoola ia me

ka maalahi.  A o na ma'i

e pili ana i ka maka

pau pu ia i ke

ola.  Ke ho-

ike ia aku nei.

eia ke ola ia nei, me

ka oluolu pu o kahi au-

hau.  Ka poe pilikia hanau

keiki a hele nui paha o ke koko

a pau a lohi paha ka hanau ana, pa

paha o ka waiu, e hele nui mai i o'u nei.

E KIPA mai e ka poe i hooluu

lau ia me an haawina pilihana a ka ma'i,

a na'u oukou e hooluolu aku.

KAUKA YONG KAM PUNG.

Honolulu, Dec. 2, 1892.