Ka Leo o ka Lahui, Volume II, Number 615, 4 Ianuali 1893 — Page 1

KA LEO O KA LAHUI.

"E Mau ke Ea o ka Aina i ka Pono."

Buke II.     HONOLULU  IANUARI 4, 1893.     HELU 615

HE MOOLELO KAILI PUUWAI

---NO---

SENIA LUTERA

Ka Ui Puuwai Mabala

---:O:---

ENELANI KAHIKO.

 A I OLE

He Nanea Hooheno

no kekahi Kauna

Wahine Opio me

kana mau Aloha

Ekolu.

(Kakauia no Ka Leo.)

MOKUNA XXVI.

E kuu Lede Senia nani, ua kokoke

mai ka wa ou e hoopaiia aku

ai, no ka lawe ana i ke ola

o kau kane!---E hai-

luku ia oe i ka

pohaku a hiki

i kou wa e make ai!

E aha @na la oia i keia po, wahi ana?  Kana aloha, ka nani, ka ui ana i lomi a pepe kona puuwai, a lilo i mea nana i hiipoi ai i oi aku mamua o ke aloha, i hoomana ia hoi e ia.  E hoomanao mai ana paha oai me ka naau alii, a e huikala mai ana paha ia ia me na hoomanao aloha ana i kona hewa, ma ka hoomanao ana hoi, ua hana hewa hoi oia, mamuli o kona nui aloha ia ia.

I keia mau manao e honaku ana iloko o kona naau, alawa malu aku la oia ia Heneri, a ia wa ana i ike aku ai i kona helehelena ua ulu koke mai la na manao powa e lawe i ke ola o keia Heneri.  Heaha no la hoi ke kuleana o keia kanaka e komo iho e akeakea mawaena ona a me kana aloha, ka mea nana i hooulu ae i na ma naolana a me na hoohauoli no keia noho ana?  He kaikamahine opio wale no oia, i ike ole i ke ano o ka noho ana mawaho aku o ka pohai kuewa, i kona wa i nonoi ia mai ai e lilo i wahine mare na keia kanaka.  Ua hoohala ia kona mau la opio ma na awawa, ma kela a me keia wahi, a ka poe nana oia i hanai e auwana hele ai

He mea haohao anei, malalo o keia mau loina, kona hoomaopopo ole i keia mea he kane, a he aloha, ia ia i haawi kuhihewa ai i kona ae e mare i ke kane kuewa oiai oia aole i ike aku i ka nui o kanaka o keia ao mawaho o ko lakou noho ana?  Ia wa, e pohala ae ana kona ano, i ke kulana opio, e ake ana e aloha ia, e loaa hoi he koolua, he mea aloha, a me ka maopopo pono, ua haawi aku la oia i kona ae e lilo i wahine mare, me kona manao kuhihewa ua pomaikai oia i kona mare ana, a he aloha io la kona no keia kane, a ia wa no hoi aia ka auanei iloko ona ke koko o kekahi o na mamo alii o Enelani, a oia ka hoi ka hooilina o kekahi waiwai nui mai kona makuakane mai.  Aole nae keia mau mea i maopopo ia ia.  E noho kuhihewa ana oia, a me ia no hoi a hiki i keia mare ana me ke keiki kuewa, Heneri.

A ua ulu koke aela na hoomanao ana iloko ona, no@ kana ipo aloha Laionela.  Ua hoohala ia e a'u na pula a'u i launa mua ai me ia, iloko o ka hauoli nui, a na kela kupuino lapuwale e ku maila ma o, i mawehe ae i ka mana pili aloha ana.

Nawai no hoi e ole ke komo o ka manaoino, a ake pepehi kanaka iloko o ka puuwai o ke kaikamahine opio.  Ua ala maila na hoomanao ana iloko o kona puuwai no kona mau ehaeha a me ka hoopoino ia o kona ola opio, a ua ake aela oloko ona ia manawa o ka loaa i kona lima kekahi pahi hou puuwai a hou aku i ka puuwai o ke kanaka nana i kaupale ae i kona mau lealae a noho hauoli ana.

Ua huli hou aku la kona alo i ka pukaaniani, a nana aku la iwaho iloko o ke konouli o ka po, e noonoo nui ana oia i kona wahi e pakele ae ai, mai na maka hulili inaina aku o na poe kuewa ekolu e haka pono aku ana iaia, a ua makehewa nae ia mau kuko ana.

Oiai ka lolo opio o kona poo e hoolaia ana i alanui nona e pakele ae ai, mai kona poe enemi mai, ua hoopuiwa ia aola oia i ka hoopa ana aku a kekahi mea ma kona kipoohiwi a i kona huli ino ana ae, ua ike koke maila oia ia Heneri e ku ana ma kona aoao, a e kahiko ana hoi kona maju papalina i ka ula ohelohelo ana hauliuli, a e anapa ana hoi kona mau onohi maka poniponi iaia i nana pono mai ai i na helehelena o Senia.

E hele mai i ou nei, wahi a Heneri i hawanawana mai ai, me ka puliki ika ka ana iho a kona maju manamanalima i ka lima o Senia kona niho, a hou aku la i ka maka oilua o ua pahi la iloko o ka umauma no ekolu manawa.

A iloko o ka manawa pokole loa, ua hooko ia iho la kona makemake.  Ua kunewa aku la ke kuewa a hina aku la ilalo, me ke koko e heleawai ana mai kona umauma mai, a ua kiola ino aku la ua Senia nei i ka pahi hou puuwai mai kona lima aku, me kona leo e uwe ana me ka piha i ka ukiuki.

Ua hai mua aku au la oe e lawe ana au i kou ola, ina oe e hoano e hoopa iho i kou mau lehelehe lapuwale i ko'u, a ua malama au i ka'u i olelo ai, a ua hooko ia.

E like me kekahi ihohae makuahine i kaili ia kana keiki mai iaia mai, pela ke kaikamahinealii Enora i lele mai ai maluna ona, a paa maila kona mau lima i ka a-i nani o ka ui Senia, a hoopuka aela he mau huaolelo o ka mea i ulupuni i ka huhu, a pane mai la.

Ae, ua pepehi aku la oe iaia a make, nolaila, na'u hoi oe e umi aku a hiki i kou make ana, e keia ino! wahi a Enora, me ka nau ana iho o kona kui.

He mea oiaio, mai hooko ia no ka olelo a ua Enora nei, ina aole ka moiwahine i kii koke mai a kulai aku la Enora ma kekahi aoao, me ka i ana aku:

E ka naaupo, e waiho malie iaia Na'u oia e lawelawe malie aku! me keia mau huaolelo, ua hapai aela oia he wahi uiili dala uuku, a hoopili aela i kona lehelehe, a kani kapalili aku la ka leo o ua wahi ulili ia.

Aole i pau.

 Kela a me Keia.

E haawi ia ana he anaina mele maloko o ka Halepule o Kaumakapili i keia po Poaono ae e hiki mai ana,

Ua manao ia e malama ia aku ana he halawai po, i keia mau po e na hoa o ka Ahaolelo i pau koke ai na hana iloko o keia pule.

Ua hookohu ia aku la o Mr. Achi Mahaulu  i kapena makai, ma kahi o W. Kamana, i hoopauia, a o Mr Albert McGunn hoi ma kahi o Kapena D. Kamakaila.

U lohe ia ae ua hoole ka Moiwahine i ke kakauinoa ana i ka palapala hookohu o Mr. J. Poepoe, no ka lilo ana i Lunakanawai no ka Aha Hoomalu.  Ke lohe hou ia mai nei e lilo aku ana ka ia Hon. J. Rikikini ia wahi.

I ka la onehinei i hui hou ae ai na hoa o ka Ahaolelo.

M nehinei i hoomaka hou ai ke kula o na halekula o ke kulanakauhale nei.

Aole he nui o ka poe i hopu ia ma ka la makahiki kon iho nei, aole e like aku me ka ia karisimaka.

He nui na hana aihue e hoomaka mai nei i keia mau po, a he @ pono ina kiai o ka halewai e makaala.

Ua wehe ae nei ka Lunakanawai mua iho nei o ka Aha Hoomalu i @rena oihana ponoi nona, ma Alanui Papu.

I keia Poalua ae e ku mai ai ka mokuahi Ocianica, mai Kaleponi mai, a maluna ona e lohe mai ai na mea hou o na Aina mamao.

Ua hoao ae kekahi piko pau i ka ole e komo iloko o ka hale kuai Hawaiian News Co., ma o kona wehe ana i ka laka o ka puka ma ke alo mai o ka halekuai, a ua hoopuiwa e ia paha, nolaila holo pono loa ole ai kana apana hana.

Ua haawi ae ka Hon. C. W. Akipoka he paina ma kona home i ke ahiahi Poakahi nei, a malaila ae kekahi mau hoa hanohano o ka Hale Ahaolelo.  Ua inu ia ke ola o ke alii Mr. Williams oiai oia e kaawale aku ana no Sekotia ma ka mokuahi o keia la.

 

Kauka Yong Kam

Pung.

(APANA.)

Helu 81, Alanui Maunakea.

Ke Kauka Loea o ka

Aina Pua!

Ua hiki ke hoola ia kela a me keia ane

ma'i, mai ko na kane, wahine a  me

na keiki liilii.  O na ma'i ha-no

ua hiki loa ia ke hoola ia me

ka maalahi.  A o na ma'i

e pili ana i ka maka

pau pu ia i ke

ola.  Ke ho-

ike ia aku nei.

eia ke ola ia nei, me

ka oluolu pu o kahi au-

hau.  Ka poe pilikia hanau

keiki a hele nui paha o ke koko

a pau a lohi paha ka hanau ana, pa

paha o ka waiu, e hele nui mai i o'u nei.

E KIPA mai e ka poe i hooluu

lau ia me an haawina pilihana a ka ma'i,

a na'u oukou e hooluolu aku.

KAUKA YONG KAM PUNG.

Honolulu, Dec. 2, 1892.