Ka Leo o ka Lahui, Volume II, Number 605, 16 Kekemapa 1892 — Page 3
| This text was transcribed by: | Kawena Komeiji |
| This work is dedicated to: | No na kikohua o Na Mea Hawai'i |
Noonoo ana i ka bila banako imua o ke Komite o ka hale, Waipuilani ma ka noho.
Noi o Kamika e aponoia ka hoike a ka hapanui o ke Komite, a o ka bila 215 ke noonooia.
Kue o Hona i ka luna o Lihue.
Kokua o Wiliama i ka luna o Lihue, hoopauia ke Komite.
Heluheluia ka pane a ka Moi, a lilo i hana no Dec. 20.
Noho hou ka hale iloko o ke Komite o ka hale, aohe mea i hanaia.
Hoopanee ka hale.
HOOHENO O KA AHAOLELO.
-----
Ma ka aoao o na Kuhina o ke Aupuni he elua Kuhina i kue i ka bila alahao a Hona, a oia ka Hona i olelo ae ai, moowini kahi ike i loaa ia lakou, a i na aole e hiki i keia poe Kuhina ke hana i keia hana, no ka pomaikai o ke Aupuni, alaila, e pono no lakou e hoopau ia, a noho a'e i poe i ike i ka hana.
-----
Ua hoohalike ae ke Alii Hona i kekahi poe o ka Ahaolelo me ke kekake ka hoolohe ma ke kae o ka auwai a ua huli aku oia a hoike aku imua o na hoa hanohano Hawaii, me ka olelo aku, e noonoo pono mai oukou i mea e holomua ai ko kakou Aina, a e loaa ai ka pomaikai i ka AIna, a nolaila, i na kakou e koho, he pono ke hooholo ia.
-----
Ua olelo ae ka Luna Hanohano o Waialua, o ka luna hooia o ke Aupuni Hawaii nei, aole oia he Pope ka mea i olelo ia aole ona hewa, nolaila ke hoike nei au i kou manao ponoi, he mea pono e hooholo loa ia keia kanawai a ka Loio Kuhina i lawe mai nei, e pili ana i keia luna Hooia.
-----
Ua olelo ae hoi ka mea hanohano o Hana, o ka luna hooia o ke Aupuni oia ka nalo alii, a o na kuhina hoi o ke aupuni, he poe nalo liilii lakou, e hele ana e huii momona, a hoihoi mai a na keia nalo Alii e ai ka momona, nolaila ke olelo nei au, o keia kanawai a ka Loio Kuhina i lawe mai nei he mea pono ke hooholo loa ia.
-----
Mahope iho o ka pau ana o ka pule ana a ke Alii Hoapili, ua kaa ke kahea ana ina inoa o na hoa hanohano o ka hale i ka makai o ka hale F J Testa, oiai ua haule hope ke Kakauolelo.
-----
He nui ka eleu o ke Alii Kakina i hakalia no a holo ka $12,000, no ka ana o ka Bana no Chicago, o ko i ala hiu aku nei no ia noho ana i Kapalakiko.
Hananee ke kikala o ko Hawaii kini ua ku ke pai o ka bila haawina o keia kau hoonui lilo nui wale.
-----
Ua komo ae ka Elele a puuku o ka Moiwahe' iloko o ka Hale Ahaolelo me ke kau no o kona papale.
-----
Wahi a ka Mea Hanohano C.W. Ashford i kona manao kue i keia komo ana mai o ka Puuku a Elele o ka Moiwahine i ke kau no o kona papale.
-----
Ua olelo ae ka Loio Kuhina, o keia bila kanawai a ke Alii Hona e pili ana i keia dala pepa, ua kue no ia i ka pauku 36 o ke Kumukanawai.
-----
Ino luna ke lele ino nei ke ao, wahi a kekahi alii ahaolelo i puana ae ai, a wahi ana o ka bila kanawai paha auanei keia, nana e hoonaueue i ka Aha Kuhina. Aloha wale.
-----
Ma ka noho ana o ke komite o ka Hale i ka la inehinei ua ike ia aohe mea i hana ia a hiki wale i ka hoomaha ana.
NU HOU KULOKO.
-----
Ahaolelo ko keia kakahiaka, hora 9.
-----
He kuai kudala Karisimaka ko ka ponei, ma kahi o Kimo Mokana.
-----
Piha kui ka Hale Ahaolelo i na poe makaikai, no ke ake e lohe ina olelo noeau a ke Alii Hona.
-----
Mai ka puhaka mai o Mrs. Tabita Akana he kaikamahine nui nepunepu, ma Kaakopua ae nei.
-----
Ua hoopaiia kekahi wahine o Kaweolani ka inoa, he hookahi haneri dala no ke che-fa.
-----
Ua hoopaiia kela makai kiai o ka Halemai Pupule, no ka pepehi ana i kekahi pupule i keia mau la iho nei, he 10 la hoopaahao.
-----
I keia la ekolu makou e hoea aku ana i ka ihona, me na kohi kelekele a ka puu moniai, o na anoai like ole o kela a me keia ano, a me ka moolelo piha o ka Ahaolelo.
-----
I keia auina la e haulani mai ai ka Malulani i ke awa lai o kou nei a maluna ona e lohe hou mai ai no ka madame Pele mau hana hookalakupua.
-----
He 1474 eke kopaa a ka mokuahi Maki i halihali mai ai i keia awa, ma ka Poakolu nei, a ma ka auina la onehinei i haalele hou mai ai i keia awa no Kapaa, Kauai.
-----
Ma ka hoi ana mai nei a ka Waialeale, i lohea mai ai ka nui o ka ino o ka moana, ua lilo aku kekahi o kona waapa ma Hamakua, a pakele mai lilo pu me ke ola o kekahi sela.
-----
Mai poina i ka hele ana ae e ikemaka i na hana noeau a ka Moi o ke kaa hehi wawae, ma ka auina la a me ke ahiahi o ka la apopo, ma ka hale holohau ma Manamana ae nei.
Aole keia he Mau Hana Hoohoka!
- AKA HE MAU -
MA KE KUMUKUAI EMI LOA!!
MA KAHI O
N.S. SACHS.
Helu 104 Alanui Papu, Honolulu Helu 104.
-----
O na Waiwai Hou Wale no ko ko Makou Halekuai
Aole o na Apa Lole Popopo a Kahiko!
Aole a makou mau hana hoopuunipuni; aole a makou maunu ekaeka, oia hoi, aole o makou paali aka i na apa lole kahiko i kumu e loaa ai he puka ma ko makou aoao, aka, haawi aku makou i na waiwai hou loa no ko makou mau makamaka a me na hoaloha, no ke
Kumukuai Emi Haalele Loa, e loaa ole ai Kona Luna ke Ukali ae!
Ua wehe ae nei makou i keia wa he laina hou o na Lihilihi a me na Lihilihi Kuuwelu i hoouma pololei ia mai Europa mai, ma o ko makou mau kauoha ponoi ana aku, a ke hooia aku nei makou e kuai ia aku ana no me ka emi loa i oi ae ka emi mamua o kekahi mau halekuai e ae. Ua loaa pu mai no hoi ma ko makou halekuai nei, he mau lako hou o na
Apa Keokeo, na Lako Kalakoa a me na Kinihama,
A ke kuai aku nei makou ma ke kumu lilo, no ka mea ua makemake makou e loaa ona wahi e hoahu ia ai ko makou mau waiwai lako huluhulu. Ua wehe pu ae nei makou he luhiehu o na APA HULUHULU Farani, na Silika PANI'O a me na APA SILIKA LAU. He mea pono e ike ko makou makamaka a me na hoaloha i keia mau waiwai hou a nani. Emi ke Kumukuai. O na APA SILIKA ELEELE, PAPAMU, a pela aku, e loaa no ma ko kumukuai haahaa loa.
Na Papale o na Wahine i humu a kinohinohiia, na Papale o na Keiki o ke ano hou loa, e kuai ia aku no ma ke kumukuai haahaa loa. Na Pua Papale, na Hulu Papale hou, e pela aku, e loaa no ma ko makou halekuai me ke kumukuai na mau hana hookinohinohi ana i na papale. Ua hiki ia makou ke kaena ae ua oi ae kona loea mamua o na mea hana kinohino papale o kekahi mau halekuai papale e ae.
E hoomanao hou iho e na makamaka a me na hoaloha, o ka pono, pololei, kaulike, ko mkkou moto, a aole o na hana poholalo, a mamua o ko oukou hele ana aku i kekahi halekuai e aku, e kipa mua mai ma ko makou halekuai. E kilohi mua. E nana. E lolelole. E hooia no oukou iho.
N.S. SACHS
575-tfd 104 Alanui Papu, Honolulu.
He Kuai Hoopau Nui
MA KA
HEIAU O NA PAIKINI!
-----
No Keia wahi Pule Hookahi Wale iho no!
-----
A HE OIAIO
E kuai pau aku ana ka Makou mau LOLE KEOKEO a pau, oia hoi Na Lilina, na Kalakoa a me na Lole Kilikia me na Hulu
Na Kinamu a me na Lole Nani onaano a Pau.
-----
E pau ana i keia Pule no ke Kumukuai hiki ole ke manaoia no ke mi loa. E hoomanao e na Lede i keia kuai kamahao e panee ia aku nei imua o oukou.
S. EHRLICH. Ka Heiau o na Paikini.
575 tfd