Ka Leo o ka Lahui, Volume II, Number 577, 7 November 1892 — Page 3

This text was transcribed by:	Kate Motoyama
This work is dedicated to:	my sister, the courageous lisa suguitan melnick

KA LEO O KA LAHUI.

"E Mau ke Ea o ka Aina i ka Pono."

Aia aku nei o Numana i ka aina gula i imi aku la ia Papalauahi.

He aloha no makou ia Kale, aka mamuli o kona puni wale i ka poe hoowalewale, ua lilo oia he hoakalekale no ka poe lapuwale.

NU HOU KULOKO.

Ahaolelo ko keia kakahiaka, hora 10

Nui ka ua ma Kona. Hawaii i ka pule i hala.

O Mokolii me Waimanalo na moku e holo ana i keia ahiahi.

E alawa ae i ka makou mau olelo hoolaha e puka aku nei i keia kakahiaka.

I ka Poakolu Nov ka la 16, ka la hanau hoi o ka Moi Kalakaua i make. Lihaliha wale.

No ka hewa aihue moa ua hopuia o Po a me Kalili, a i keia kakahiaka e noonoo ia ai ko laua hewa imua o ka Aha Hoomalu.

O kekahi wahine Iapana haalele wahi moe, ua hookuu ia i ke kakahiaka Poaono nei, me he kauoha pu ia mai e ka Aha e hoi hou me ke kane.

Ma ka la 15 o keia mahina, e makaukau ai o Mikahala no ka olali ponoi ana i kona mau awa o Kauai, nolaila he hookahi huakai i koe a Iwalani no ka Mokupuni Kihapai.

He nui a he lehulehu ka poe i ike i ka pouli ana o ka mahina i ka wanaao Poalima i hala. Oia hoi ka poe i oioi mua ma ke ala ana, mamau o ka lele ana o ka nalo.

He elua manawa a ka olai i hoonaueue ae ai i ka Apana o Kau, Hawaii, ma ka Poakahi o kela pule aku nei. He mea maopopo na Madam Pele keia mau kana, ka hookalakupua o ka lua.

Heaha hoi keia e lohelohe ia mai nei, he onawaliwali ko ka makamaka "Holomua" i keia mau la. Eia no hoi KA LEO la, e noke mai ka hooiloilo a ka poe hooiloilo, aole nae he ko iki no ka mea eia me makou na kakoe ana a ka lahui Hawaii.

Mea ia mai hoi, ke komite kekahi i hele aku e hui me ka Moiwahine i ka Poaono nei, no ke koho ana i ka Aha Kuhina hou i mau hoa Hawaii wale no. Eia na inoa i manao wale ia: J. A. Kahoonei, J. Alapai, Kanui, a me Kekukahiko.

I kekahi wa i hala ae nei mamua ua hopu hopu ia o Ko Kum Chung Pake a me kekahi poe e iho he elima ko lakou nui ono ka hoeha ana i kekahi Pake no ka poo wai, a ma ka noonoo ia ana o ko lakou hihia i kela la aku nei, ua hookuuia ka nui, a o Ko Kum, ka i hoopa@ia i na dala he 100.

I keia kakahiaka, puu na maka kuku ka lihilihi o ke Kahunapule Kaberana.

Pupupu ka põe on a a me ka poe hakaka ma ka Melekolauu i ka po Poaono nei.

Mawaena o na ohua a ka Malulani o ka Poalima nei, o Hon. J. K. Kauhane kekahi.

I ka la apopo e noonoo hou ia ai kela hihia laibila hoopanee pinepine ia o Daniela Logana.

Ma ka Ema Koea ke puhi ohe o keia po, e like me ka mea maa mau i na po Poakahi a pau.

Apopo ke koho balota o na Amerika maanei no ka Peresidena hou o Amerika, a i keia la e hoopaa ia ai na inoa.

Maka Poaha o ka pule i hala i hookuu ia mai ai na limahana Iapana o ka moku Gaelie mai ka pa Hoomalu mai.

Ina aohe makapaa o keia la, alaila i ka la apopo, e lohe ai kakou i ka Aha Kuhina hou, e like me kela pule aku nei.

He mau wahi la pokole wale no ko kakou kaawale mai ka la 28 mai o keia mahina, ka la hoi i haawi ia mai ai ko kakou kuokoa.

Ua ulupa ia ae e kekahi wahi keiki hoehoe waapa i kela la aku nei ma ka uwapo, kekahi luina o luna o ka mokukaua Bosetona.

E haiolelo hou ana no o Dr. Harrison iloko o ka Hale Mele Hou i keia po. E na kane, no oukou wale no keia pomaikai, nolaila mai palaka i ka naue ae.

He paio olelo hahana ka i malamaia e kekahi mau aoao oolea ma Kapuukolo maka la inehinei, a kokoke loa e awala na ia a ka ui, e ole wale no ka nui o na hoaloha a me ka leo kaukau mai a na wahine me ka waimaka.

E hoko hou ana na Mokupuni o Maui, Molokai, Lanai a me Kahoolawe, ke hiki aku i ka Poalua, la 29 keia mahina, no ka hoopiha ana i ka manawa i pau ole o eha makahiki, mamuli o ka waiho ana mai o ke Lii W. H. Konowela, a pela no hoi me ka Apana o Hilo Hema, Hawaii, ma ia la hookahi no, mamuli o ka haalele ana o ka Lunamakaainana Josepa Nawahi.

OLELO HOOLAHA!

E ike auanei na meo a pau, owau o ka mea nona ka inoa malalo nei, ke papa a ke kau leo aku nei au i na mea a pau, aole e hoaie wale mai i kuu wahine male, oia o Mrs. Julia Kaaiwaiwai. Ua haalele mai oia ia'u, mailoko o ka'u mau puili hemahema ole ana ia ia, @ ua hele aku ia e like me kona makemake, a in a e hoaie ia mai an aoia e kekahi poe, maluna o lakou ko lakou poho.

O ke kuli ka make, o ka lohe ke ola.

Owau iho no

Kou Oiaio.

MR. P. KAAIWAIWAI.

Hale Koa, Honolulu, Nov. 5, 1892.

11-7-1w.

Aole keia he @

--:AKA @E MAU:--

WAIWAI HOU WALE NO AOLE I POPOPO!

--:E LOAA NO:--

MA KE KUMUKUAI EMI LOA!!

MA KAHI O

N. S. SACHS,

Helu 104 Alanui Papu, Honolulu Helu 104.

O na Waiwai Hou Wale no ko ko Makou Halekuai

Aole o na Apa Lole Popono a Kahiko!

Aole a makou mau hana hoopuunipuni; aole a makou maunu ekaeka, oia hoi aole o makou paka@ aku i na apa lole kahiko i kumu e loaa ai he puka ma ko makou aoao, aka, haawi aku makou i na waiwai hou loa no ko makou mau makamaka a me na hoaloha, no ke

Kumukuai Emi Haalele Loa, e loaa ole ai Kon aLua ke Ukali ae!

Ua wehe ae nei makou i keia wa he laina hou o na Lihilihi a me na Lihilihi Kuuwelu i hoo@ ia mai Europea mai, ma o ko makou mau kauoha ponoi ana aku, ake hooia aku nei makou e kuai ia aku ana no me ka @ loa i oi ae ka emi mamua o kekahi mau halekuai e ae. Ua loaa pu mai no hoi ma ko makou halekuai nei he mau lako h@ o na

Apa Keokeo, na Lako Kalakoa a me na Kinihama,

A ke kuai aku nei makou ma ke kumu lilo, no ka mea na makemake makou e loaa on a wahi e hoa@ ia ai ko makou mau waiwai lako huluhulu. Ua wehe pu ae nei makou he luhiehu o na APA HULUHULU Farani, na Silika PANI'O a me na APA SILIKA LAU. He mea pono e ike ko makou makamaka a me na hoaloha i keia mau waiwai @ a nani. Emi ke Kumukuai. O na APA SILIKA ELEELE, PAPAMU, a pela aku, e loaa no ma ko kumukuai haahaa loa.

Na Papale o na wahine i humu a kinohinohiia, na Papale o na Keiki o ke ano hou loa, e keiki ia aku na @ kumukuai haahaa oa. Na Pua Papale, na Hulu Papale hou, e pela aku, e loaa no ma ko makou halekuai me ka k@ na mau hana hookinohinohinohi ana i na papale. Ua hiki ia makou ke keena ae ua oi me kona loaa mamua o na mea @ a kinohino papale o kekahi mau halekuai papale e ae.

E hoomaumao hou iho e na makamaka a me na hoaloha, o ka pono, pololei, kaulike, ko makou @, a @ o na hana poholalo, a mamua o ko oukou hele ana kau i kekahi halekuai e aku, e kipa mua mai ma ko makou halekuai E kilohi mua. E nana. E lolelole. E hooia no oukou iho.

--:N. S. SACHS:--

575-tfd. 104 Alanui Papu, Honolulu

He Kuai Hoopau Nui

MA KA

HEIAU O NA PAIKINI!

No Keia wahi Pule Hookahi wale iho no!

A HE OIAIO

E Kuai pau aku ana ka Makou mau LOLE KEOKEO a pau, oia hoi

Na Lilina, na Kalakoa a me na Lole Kilikia me na Huluhulu

Na Kinamu a mena Lole Nani o na ano a Pau.

E pau ana i kela Pule no ke Ku@uku@ hiki ole ke manaoia no ke emi loa. E hoomanao e na Lede i keia kuai kamahao e panee ia aku nei imua o oukou.

575-t61. S. EHRLICH, Ka Heiau o na @