Ka Leo o ka Lahui, Volume II, Number 539, 8 September 1892 — NUHOU KULOKO. [ARTICLE]

NUHOU KULOKO.

Ahaolelo ko keia la. hora 10. Ua hopua kekahi mea ma ka inoa o Thomas Spencer i ka Poalua nei, no ka aihue lio. Eia i ke kulanakauhale nei o Rev. S. L Kiwini ma ke Kinau o ka Poakolu nei. I keia Poakahi ae la 12 o keia mahina, e hoomaka hou ai ke kula o ke Kula Nui o Sana Lui. He wahi kilikilihune kai hoohelelei iho ma ka la Poakolu nei, e aho ia he oki loa hoi ka pamalo loa. Maluna o ka Mikahala o ka Poalua nei, i huli hoi aku ai ka Mea Mahaloaia ke Kiaaina W. H. Raiki o Kauai Ma ka Poakolu nei i malanaia ai kela hakaka kui puupuu mawaena o Salivana me Corbett, ma Nu Oliana, Aamerika Huipuia. Ua hai ia mai makou e hoike aku e kekahi poe. ua ike hou ia no ka hoku Mars ma ke awakea o ka Poakolu nei, ua ano au iki ma ke komohana o ka ponaha-lani. Ua kapalulu mai ma ka Poakolu nei ka mokuahi Auseteralia. mai ka hau oki mai o Kapalakiko, a e niau aku ana no oia ma ia alahele hookahi i ka Poakolu o keia pule ae. Mamua ae o ka ikaika loa ana o ka wela a ka la ma ke kakahiaka Poakolu nei, ua hooku'i e mai la ka pou-ihu o ka mokuahi Kinau me kona uwapo. He hookahi kauna ka nui o na mele hou i puhi ia e ka Bana Hawaii ma ka Poakolu nei ma ka Hotele Hawaii, a ua nui ka mahalo mai a na ohua malihini o ka Austeralia onehinei. Ua ike a ua lulu-lima pu maua me ka nupepa Liberala ma ke ahiahi o ka Poakolu nei, he nupepa hoi o iwakalua aoao, e kamailio ana ma na olelo elua, oia hoi ka olelo Beritania me ka olelo Hawaii. He lei poniponi ka'u makana ia oe e kaina i keia kakahiaka.