Ka Leo o ka Lahui, Volume II, Number 405, 8 March 1892 — Page 1

KA LEO O KA LAHUI.

"E Mau ke Ea o ka Aina i ka Pono."

 

HE MOOLELO

NO KE KEIKIALII

AWAREDA!

a me

KA UI LEILA

o Noremadi.

(Kakauia no Ka Leo.)

MOKUNA II.

Ka Olelo Wanana a ke Kahuna nui.

            I ka manawa o keia mau hana maluna o ke kahuna, he manawa ia na ka Moi Koratina a me kana keiki e kulou haahaa ana ilalo me ka pane leo ole.

            No ka mea, ua manaoio laua i na mea a laua i lohe mau ai mamua, ua haalele iho la ia manawa ka uhane kanaka o ua Kaberana nei i kona kino e waiho oni ole ana iluna o ka ili honua, a o Odina maoli a me kona mana puni ole ke hoomalu ana maluna ona ia manawa.

            Me keia kulana iho la a me keia ano ua Odina nei e launa a e hui papa-olelo pu ai me kona poe manaoio a paulele mahope ona.

            Aka, hamau! No ka mea, owaka hou ae la ka waha o ua kahuna la a puka mai la ia manawa keia mau huaolelo malalo iho nei ma ke ano mama pu e like me ka poe i noho ia e ka makani:

            Owau o Odina, ka Makua Nui o na mea ola a pau; ma ka waha o Kaberana ka'u kauwa i koho pono ia, ke hoike aku nei au i ka mea huna pohihihi e pili ana i kou nohoalii, a oia keia, a e hoolohe mai:

            "Ma keia mua aku, e lilo aku ana o Elevira, ke kaikamahine hookahi a Diana, i makuahine no kekahi alii nui mai ka po mai, a mailoko mai o kana mau pua e moe pololei mai ai ka lalani loli ole o na moi poo aupuni o Noremadi nei a kau aku ia hanauna aku ia hanauna aku."

            No kekahi manawa pokole ma hope iho o ka halii ana a ka meha ma na aoao a pau, aia hoi ike hou ia aku la ke kino o ua Kaberana nei e onioni ana, a mahope iho ala mai la oia a ku iluna, me he mea mea la akahi no oia a ala mai mailoko mai o kekahi hiamoe nui kulipolipo i piha me na moeuhane pahaohao he nui.

            O ka mea hilu loa nae i ike ia iloko o ia manawa, aole he wahi huaolelo hookahi i kamailio ia mai e ia imua o ka moi a me kana keiki mahope iho o kona ala ana ae; aka, ala ae la oia a ku iluna, puili ae la kona mau lima wiwi elua mamua pono o @na umauma, a huli hoi aku la me ka pane leo ole no kona a-na, oiai he mea maa mau i ua Kaberana nei maho o ko ke akua hoohana ana i kona mau lehelehe mamuli o kona makemake, aole e puka kona leo no kekahi mau hora loihi mahope iho.

            Mahope iho o ko ke kahuna nalowale ana aku, huli ae la o Koratina ka moi a haalele aku la i ke kuahu, i ukaliia e ke Keikialii Avareda.

            Me ka hamau a pane leo ole laua i hele mai ai ia kakahiaka mai ka halealii mai, a pela no hoi laua ma ke ala huli hoi no ka home, oiai ka moi e kaupe hele ana mamua me na kaina wawae kaumaha a ulolohi me he mea la, aole kona uhane ka ikaika o ke kino me ia ia manawa; a o ke Keikialii hoi ke hikak@ hele mai la mahope ona, me he mea la, ua pa wahi kiaha waina mai a ke kahuna nui.

            Oiai laua elua e ku ana iloko o rumi nui o ka halealii, kahi hoi a laua i hele mai ai no ka ululaau ma ia kakahiaka, huli mai la ka moi a olelo mai la i kana keiki me ka hanu kaumaha ana:

            E kuu Avareda, makemake loa au e ike aku ia oe, oiai ke ola e kamau ana iloko o'u, ua papale oe i ka papale mahiole a ua paa hoi i ke kookoo o kekahi moi mana nui a piha ikaika, e hiki ole ai i kou mau enemi ke hoonioni.

            Ua lohe maopopo anei oe i na olelo a pau o kela hoike a Odina e pili ana i ka nohoalii o kou makuakane nei ma keia mua aku;

            Aka, e kala mai oe ia'u, aole o ko'u nohoalii ka pololei—o kou; no ka mea, he mau wahi la helu wale no ko'u i koe a hoi aku au i ka opu o ka honua?

            Ea, ua lohe pono anei oe i kela leo hoanoano o ka po?

            Mawaho ae o na mea a pau, ua lohe pono anei oe i na huaolelo a pau mai ka mua a ka hope?

            Ae, ua lohe au mai kinohi a hoi ke ana, wahi a ke Keikialii

 

KA MOOLELO HOONANEA

O KA EUEU

MASANERO.

Ke Kamaha'i o Italia.

A I OLE,

O ka Lawai'a Kaulana loa o Napela.

MOKUNA VIII

Kaalo ana ma Napela—Hoea Isabela ma ka Vikaria a kuewa hele hou i ke @ me ka Waimaka.

            Ia Isabela e ku lohaloha nei, ua ninau mai la o Inesa: E ka wahine, ihea oe i nalowale iho nei?

            Aole i pane aku o Isabela i kana haina, ua pane e ae la o Dame Pede@ila

            E Inesa, mai ninau aku oe i kena kaikamahine lapuwale. Hooko koke ae la oia i o Isabela la, a me na huaolelo makona, pane ae la:

            E ke kaikamahine, ua ana au ia oe, a ua nui ko'u luhi i kau mau pauaka ana i o a i anei, ano, e hoolohe pono mai oe i ka'u olelo ao—E ku koke ae oe, a e hele aku e halawai me ka Vike@e, ke kali la oia ia oe, malia paha o hoihoi mai kou makuakane ia oe e na keiki lalau, a nana e uku mai i kou lalau ana

            Heaha kau e olelo nei? Wahi a Isabela me ka hooinaina.

            Ua pono ia'u ke olelo pela, no ka mea, ua ike lea au, ua haulehia oe me ke aloha ana no kela kanaka lawaia, a he mea pono loa, e li io ia ua Toma Anelo la a me ka poe a pau pu me ia.

            A ke hoopuka hope loa aku nei au i ko'u manao ia oe, mai keia wa aku a a mau loa, aole loa au e ae e ike hou aku i kou mau helehelena e maalo hou mai ana ma ka malu o ka Vicaria nei.

            Aole i kanamai ka nui o ka ehaeha i loaa ia Isabela, a hookahi wale no ana hana kupono o ka nuu malie iho i na kiheahea a ka waimaka, me he ao uwila la e ha@kokohi no kekahi kuaua nui.

            I ka pau ana o ka Pederila mau olelo kipaku, ua wili ae la kona poo a nalo aku la, a noho iho la o Isabela me Inesa, aka ua

            Huna i ke aloha pee maloko

            Haina ia mai e ka waimaka.

            Ulu ae la na manao o ua Isabela la, e aho no oia e huli hoi hou aku ma na aekai o Magelina a e hoop@ malie iho ai; aka iaia e nalu ana ua paee mai la o Inesa:

            E ke kaikamahine e, mai hele oe i ka po, hoomaha iki iho a ka wanaao, alaila hoala aku au ia oe, a o kaua pu no ke hele a noho aku oe i kou wahi e noho ai, alaila hoi mai no hoi au; ua i mai no nae hoi o Pederila, haalele aku no ia e noho ana no oe ma ka hale o Masanero, e aho no kaua e hoihoi ia oe ilaila, kahi hoi paha i hewa ai.

            Ua hooko koke ae la o Isabela ia mau olelo ana, hoomaha iho la oia ma na paia o ka Vicaria, a ma ka wehe ana o ke alaula o ke ao, ua hoala ae la ia Isabela, a hoomakaukau ae la laua e hele.

            O ae la na kukuna olino o ka la maluna o na wai halai malie o ke kaikuono, a o ka Isabela ia i halo hope aku ai maluna o ka iliwai oiai laua maalo ae ai ma ka aeone, no kahi pupupu hale o Masanero ka pahu hopu.

            Mamua o ko laua hiki ana aku malaila, aia hoi, ike aku la laua ma kahi mamao, ua piha pu ae la ke kahua o kahi papai hale i ka lehulehu o na kanaka e hoopuni ana i @ko@kau me na mea kaua.

            Aole keia he poe okoa e ka makamaka, o lakou nei ka ka moneka i hoohiki ai iluna o ka Baibala, i kela po ai hoi ma ka luahuna.

            Hele loa aku la no laua mawaena o ka lehulehu e ku poai ana a puni, komo loa aku la no laua iloko a ike aku la ia Iane a me Pietero wale no ko loko.

            Lele aku la o Isabela a puili ae la ma ka a i o Iane, a haawi ae la i na @i wele@ia ana, me ke noi ae e kaia mai no kona haale honua ana iho ia Iane i ke ahiahi mamua iho me kona ike ole.

            Auhea oia? Wahi a Isabela me ka leo ha ahaa.

            Mamua o ka makaukau ana o Pietero e pane mai no ka ninau a Isabela, ua lohe koke na leo hoono o ka hauoli e wawalo ana ma ka lewa, mai na kanaka ae e hoopuni ana mawaho o kahi pupupu hale:

            Ei@e o Masanero! E ola mau ko makou alakai opio!!

            Oia io no ia e huli hoi mai la a o Rosa pu no kekahi me ia, mai ka mauna o Vesuviu mai.

            E Iane, e hele aku hoi oe a e hai aku iaia, ua iini nui au e ike hou aku iaia, mamua hoi o kona nalowale hou ana aku.

            Hoolohe aku la no o Iane, a hiki aku la ma ka aoao o Masanero, a hawanawana aku la i kekahi mau huaolelo ma kona mau pepeiao. Ia wa i piona ae ai ua Masanero la, a ke ike aku nei no ua kaikamahine la ia mau hana a ua kanaka lawaia la e hoonanahua nei.

 

OHE HAWAII.

            E loaa no ma ka Halekuai Haukilima o HART & Co. na ohe kupono i ka hana ie papale a hana peahi. E kipa mai e ike nou iho, oiai he oluolu na kuka ana, a he oluelu no hoi ka ahuau.

            Honolulu, Feb. 15, 1892.

389d-3ts.

 

Kauka Yong Kam Pung.

(APANA.)

Helu 53. Alanui Maunakea.

Ke Kauka Loea o ka

Aina Pua!

Ua hiki ke hoola ia kela a me keia ano ma'i, mai ko na kane, wahine a @ na keiki liilii. O na ma'i ha-no ua hiki loa ia ke hoola ia me ka maalahi. A o na ma'i e pili ana i ka maka pau pu ia i ke ola. Ke hoike ia aku nei, eia ke ola ia nei, me ka oluolu pu o kahi auhau. Ka poe pilikia hanau keiki a hele nui paha o ke koko a paa a lohi paha ka hanau ana, pa paha o ka waiu, e hele nui mai i o'u n@

            E KIPA mai e ka poe i hool@l@u ia me na haawina pilihua a ka ma a na'u oukou e hooluolu aku.

KAUKA YONG KAM PUNG.

Honolulu Sept. 2, 1891. 272-d3m*

 

E Kuai Hoopau Ana!

Na Kaa Huila Lua

a me

Ili Kaa Malalo o ke Kumu Lilo

Ma kahi o—

S. G. Schuman.

            Alanui Hote@

Alanui Papu @ 1wd.