Ka Leo o ka Lahui, Volume II, Number 401, 2 March 1892 — Page 1

KA LEO O KA LAHUI.

"E Mau ke Ea o ka Aina i ka Pono."

 

HE MOOLELO

NO KE KEIKIALII:

AWAREDA!

a me

KA UI LEILA

o Noremadi.

(Kakauia no Ka Leo.)

MOKUNA I.

Ka Mea Huna Pohihihi.

            E wehe me kona ikaika a pau i kona mau lima, a he mea oiaio, ua hookoia kona makemake me ka ike ole iho o ua mau kanaka nei ua ano alualu a poholoholo ka paa a laua i nakiikii ai i na lima o ua Leila nei.

            Nolaiia, i ka hemo ana ae o kekahi lima o ua paahao nei, lalau koke ae la oia i ka mea i umoki ia ma kona waha, a huki aku la a hemo.

            A no na sekona pokole wale no, aia hoi, ua kupinai koke ae la ka ululaau me kona leo e kahea ana i na kokua e wawalo hele ana ma o a maanei e wawahi ana i ka pohu lai-ku hoanoano e hoalii ana maloko o ka ululaau holookoa ia manawa o ka po.

            Aole i liuliu mahope iho o keia manawa a ua Leila poino nei i kahea ai no na kokua ia mai.

            Aia hoi, lohe koke ia aku la ke pahupahu mai o kekahi mau kapuai wawae oolea me ka ikaika ma kahi kokoke loa i kahi o ka mea i poino, i ukaliia e ka leo nui halulu kohu kapena, i ka ninau ana mai penei:

            Owai ka mea i kahea ae nei i kokua?

            O!—ma ka inoa o Satana! Wahi a kekahi o na piko pau iole nei i kamailio aku ai i kona hoahele o ke aumoe.

            Aole keia o ko kaua haku, ka mea a kaua e kali nei

            Owai ka mea i makemake @ kokua ana?

            Wahi hou a @ ka leo @ i ninau mai ai

            No Leila nae i kela wa, ua hoomaopopo aku la oia i ka mea nona ua leo la.

            Nolaila, me ka manaolana no kona palekana mai kona mau enemi mai oiai ua hiki mai ka anela hoopakele o ke ola, kahea hou aku la oia:

            E Olefa! e Olefa!—O, owau no kai kahea aku nei.

            E kokua mai oe ia'u a mai kali!

            He oiaio, o keia kanaka leo halulu i hoea mai la, o Olefa no ia ke kauwa aloha a Kamila, a o kona huli hoi ana mai no ia mai kana hu kai mai i haalele ai ia ahiahi no ke kulanakauhale.

            @ i kona wa i lohe ai i kona inoa a me ka leo o kona haku wahine opio.

            @ koke mai la oia imua a puke ae a i ke poo o ua mau kanaka la, me ka paluku ana i ko laua maa maka, me kona mau puupuu lima elua a hiki i ko laua hina ana iluna o ka ilihonua puanuanu.

            Mawaho ae o kona mau lima 2, aole ana mau mea eha e ae iloko o keia hakaka ana.

            A ina he mau mea e ae kekahi o e pa ana ma kona lima ia manawa, ina ua make loa ua mau kanaka la maluna o kahi a ko laua mau kapuai e ku ana ia Olefa iloko oia po.

            E Olefa—o oe io no anei keia, a i ole, ua moeuhane au?

            Wahi a Leila i pane mai ai me ka pihoihoi nui.

            Aole, aole, owau no keia mailuna a lalo e kuu haku wahine opio aloha.

            Nolaila, mai makau oe a hopohopo

            Ua eha anei oe e kuu haku wahine opio?

            Aole—O! aole.

            Aka, e kii mai oe ia'u.

            Nani ka lokomaikai o na lani i kona hoouna ana mai ia oe i ka manawa kupono no ka hoopakele ana ae ia'u mai keia mau iliohae mai.

            E ka lede onaona, ma ka inoa o ko'u mau kupuna i hala e aku i ka make, he mea pono ia Olefa ke pepehi mua ae i keia mau kanaka 2, a e make hoi au mamua o ka hiki ole ana ia'u ke hana.

            Ha! malama olua elua, oiai, ke @ nei au i ka lima o kuu lole iluna

            E kii mua mai oe e wehe ia'u a hemo.

            No ka mea ina oe e haalele @ e loaa hou mai ana au i ke kanaka a keia mau kanaka i kakali iho nei, a hiki wale i ko makou loaa ana mai nei ia oe e noho ana ma keia wahi.

            No keia koi paakiki a ua Leila nei, hamare iho la ua Olefa nei i ke kui a kamumu ke kua o kekahi o ua mau kanaka la.

            Alaila, huli ae la oia a hele aku la me kahi a kona haku wahine e puauu ana i ka paa o na kaula i hauhoa ia ma kona mau wawae, me ka manaolana aia a pau kana hana me Leila, alaila pelukua hou mai oia no ka hoomake loa ana i ua mau kanaka la.

            Aka nae aole pela ka mea i ikeia no ka mea, aiai no e kaawale mai, ala ae la kekahi kanaka a holo aku la.

            A o ka lua hoi, oia hoi ke kanaka nona ke kua i hookani pahu mai ia e ua Olefa nei i na minute mamua iho, mahope iho o kona kua hananee ana no kekahi mau sekona pokole.

            Ala ae la no hoi oia a ukali aku la mahope o kona kokoolua e ahai la ka pupuhi mamua

            Mahope iho o ka palekana ana o na wawae o Laulie, huli ae la laua a hoi aku la me na kaina wawae kiauau a awiwi hoi.

            No kekahi manawa loihi o ko laua peki wawae ana, hoea hou aku la laua i ka hale me ka palekana me ka halawai ole me kekahi mau kuia ma ko laua ala huli i ka home makua.

            I ko laua puka ana aku nae i ka hale, loaa aku la ia laua o Kamila iloko o ka rumi nui o ka hale e makaukau ana no ka huli mai mahope, a he mau nanaina hakumakuma ke hoopoluluhi ana maluna ona, oiai oia a me kana kaikamahine e puliki ana kekahi i kekahi me ka haalulu.

            E kuu makuahine aloha, ina aole o Olefa i hoopakele ia'u ina la mamua o ka oili ana mai o ka la i ke kakahiaka, he luahine kama ole mamuli o ke kaili ia ana aku e na lima huluhulu o ka make kou io hookahi e ola nei.

            Heaha keia e kuu kaikamahine aloha?

            I ninau mai ai o Kamila me ka piha pahaohao no keia hele honua ana o kana lei ma ia po.

            Oiai i na minute mamua iho, ua manao oia ua mahuka ua Leila ne i ka nahelehele.

            A pela i lilo ai n@ olelo maluna a@ a kana kaikamahine i mea ole i kona manao.

            Heaha mai ka hoi kau? Mai make au i keia po, a e ole o Olefa nei, ike hou oe i na maka o kau kaikamaihine.

            Pela io ka hoi.

            Aole i maopopo ia'u ke kumu nana i kono mai ia'u e hele aku e nana ma kou rumi mahope iho o ko'u ala ana ae, wahi a Kamila me ka leo kaumaha.

            I ko'u hiki ana nae ma ka aoao o kou moe, aole oe.

            A i ko'u ike ana i kekahi mau lala waina ma ka puka aniani ua pau i ka haihai, ua komo mai la ka hopohopo nui iloko o'u nou e kuu kaikamahine, a haupu wale ae la no oloko o'u ua loohia oe me kekahi poino.

            Me keia mau olelo a ka makuahine, hoike aku la o Leila i ka moolelo a pau e pili ana i kona aihueia ana elike me kana i hoomaopopo ai, a oiai oia e hahai ana imua o kona makuahine.

            Na ko Kamila mau waimaka no e helelei, a i ka pau ana, he nui na mea pohihihi i ka hoomaopopo iho, a ua hiki ole maole ia Kamila ke mawehewehe pono me ka moakaka lea i na mea a pau.

            Aka, ua like lakou a pau me ka poe i haalele ia iwaho o ke pouliuli o ka po.

            He nui na ninau a Kamila i ninau mai ai, aka nae, aole he hiki ia Leila ke pane pololei aku, a o ka ua nohea nei wale no i manao ai, ina o Avareda e lohe ana i kekahi la a@ i na mea i hanaia maluna ona ma ia po.

            He manaolana kona e loaa ana iaia ua mau kanaka la nana oia i aihue.

            A no ka manawa kupono mahope iho, hoi aku la oia, kona makuahine a me Olefa no ka hooluolu ana i ko lakou mau maka no ke koena ia po me ka makaala ana no lakou iho.

            Oiai o Olefa me kana laau kakaka a me ka laau ihe ma kona aoao, e moe ana ma kahi kokoke i ka puka komo.

            Ua hiki mai la kaua e kuu mea heluhalu aloha i ka pewa hiu i keia mokuna, nolaila, no na mea aku i koe, e nana ma keia mokuna elua aku, a malaila e hookuu pau aku i ke akea i na ono k@i-koi a ka makemake.

 

            Aohe a kakou Masanero o keia la no ka mea, aohe i pau na hinai kihene i-a a ua kanaka lawaia la i ka maauaua, a me he mea la, o ka la apopo paha kona manawa e oili aku ai, alia nae hoi oukou e pulale e mai.

 

OHE HAWAII.

            E loaa no ma ka Halekuai Haukilima o HART & Co. na ohe kupono i ka hana ie papale a hana peahi. E kipa mai e ike nou iho, oiai he oluolu na kuka ana, a he oluelu no hoi ka auhau.

            Honolulu. Feb. 15, 1892.

389d-3ts.

 

Kauka Yong Kam Pung.

APANA.)

Helu @, Alanui Maunakea.

Ke Kauka Loea o ka

Aina Pua!

Ua hiki ke hoola ia kela a me keia ano ma'i, mai ko na kane, wahine a @ na keiki liilii. O na m 'i ha-no ua hiki loa ia ke hoola ia me ka maalahi. A o na ma'i e pili ana i ka maka pau pu ia i ke ola. Ke hoike ia aku nei eia ke ola ia nei, me ka oluolu pu o kahi auhau. Ka poe pilikia hanau keiki a hele nui paha o ke koke a paa a lohi paha ka hanau ana, pa paha o ka waiu, e hele nui mai i o'u ne

            E KIPA mai e ka poe i hooluuluu ia me na haawina pilihua a ka ma' a na'u oukou e hooluolu aku.

KAUKA YONG KAM PUNG.

Honolulu Sept. 2, 1891. 272-d3@

 

E Kuai Hoopau Ana!

Na Kaa Huila Lua

a me

Ili Kaa Malalo o ke Kumu Lilo

Ma kahi o—

S. G. Schuman.

            Alanui Hotele kokoke i ke kihi o Alanui Papu. @2@-1wd.