Ka Leo o ka Lahui, Volume II, Number 350, 22 December 1891 — Page 1

KA LEO O KA LAHUI.

"E Mau ke Ea o ka Aina i ka Pono."

 

 

KA LEO O KA LAHUI

"E Mau ke Ea o ka Aina i ka Pono."

Buke II.                       HONOLULU DEKEMABA 22, 1891.                     Helu 350

 

He Moolelo Nanea.

 

NO

 

De Atanani.

 

Ke Koa o ka Lio Olohe,

 

---- A I OLE ----

 

NA KIAIEKOLU

O FARANI.

 

            A e La Eere, he tiga wahine oia, he hae ahiu e ilke me ka hiena ke piha oia me na kuakoko o ka inaina, a ke hopohopo nei au, o loaa like ia oe na haawaina e like me a'u.

            Me keia pane a Atani, hoike aku la oia i na mea a pau, e pili ana iaia a me ka lede Calarika ma ia kakahiaka, a oia ka La Fere i hoolohe malie mai ai me ka pane leo ole.

            A pau ka Atanani hoike ana i na mea e pili ana iaia a me ka lede Calarika, alaila pane mai la o La Fere me keia mau olelo:

            He oiaio ia e kuu haoloha opio ma o kuu uhane la, e haawi no au i kuu ola a pau no ke oho hookahi o kela lede; nolaila, i ka la mahope aku o ka la apopo, e haalele iho ai kakou ia Parisa nei no ke kahua o ka kakou hana ma kahi kauha le La Fere. ua pane e aku la o Atanani, me keia mau olelo:

            E ukali no kela lede ia oe a hiki i ka hopena o keia ao ke lohe aku oia eia oe ma ke kulana like me ko Atanani nei; nolaila e La Fere kuu hoaloha, e hookuu mai ia'u e auamo hookahi i na hoino ana a kela lede.

            Alaila e Atanani kuu hoaloha, heaha hoi ka;u e mamina iho ai ia mea he ola ina oia e hoao mai ana e hana pela? Ua manao anei oe e loaa ana ia'u he waiwai nui no ia mea he ola?

            Alaila e La Fere kuu hoaloha, aia he mea huna pohihihi e pili ana ia oe a me keia lede kamahao, ka lede hoi au e hoonaauao hou aku nei ia oe he kiu wahike oia na ke Cadinela pakaha a limanui o Farani nei.

            Ina oia kau kahua e kamilio nei e Atanani, alaila e ae mai ia La Fere e hoonaauao aku ia oe me keia mau olelo:

            E makaala oe nou iho i keia a me keia minute. no ka mea o kau huakai hoohaahaa i ka mana o ke Cadinela i Ladana oia auanei ka olelo ahewa e kipoka ia ai ko poo me ke kauoha he kipi oe.

            Alaila, heaha hoi ia mea au e hooponhopo ai. a heaha hoi kela kipoka a'u e hoohe aku ai, e ku ana au ma na ano a pau a aa aku imua o ka mana o kela Cadinela. a hiki i ko'u haule make ana no ka haaheo o ka hae aupuni kaha-holu o Farani nei.

            Aka e La Fere, o ke komo o kela lede i haawi mai ai ia'u, ke hoihoi hou aku nei au ia mea ia oe, e like me kau i hai mai ai, he waiwai hooilina ohana ia, a nou hoi na komo la.

            Ae e Atanani, no'u io ua komo la a ua haawi aku hoi au iloko o ka lima o keia wahine ino, aka, o kau noi no ko'u lawe hou ana mai i ua komo la mahope iho o kona paumaele ana iloko o na lima o kela wahine lapuwale, aole loa e Atanani; e like me ko'u hoowahawaha ana i kela wahine, pela no au no kena komo.

            Alaila e kuai a hoolilo aku i keia komo ina ua hoowahawaha oe: no'u iho e La Fere kuu hoaloha, aole loa au e ae e lawe hou mai i keia komo malalo o ko'u malu.

            Alaila e hoolilo, aku i kena komo, a o ka hapalua o kona waiwai ia, nau ia e Atanani kuu hoaloha.

            Aole, aole loa pela e La Fere kuu hoaloha, aole loa a i e lawe i hookahi kebeta no ka waiwai e loaa mai ana no keia komo; oia mau mea a pau nou no ia, a owau la ea, ua lawa no au me ko'u wahi uku o ka noho koa ana.

            Alaila e haele kaua no ka hale o ka Iudaio hana gula, wahi a La Fere.

            Ae, e haele kaua. wahi a Atanani, me ka eu like ana ae e hele, a iloko o kekahi mau minute pokole aia laua e ku ana ma ke alo o ke pakaukau o ke kanaka Iudaio hana gula.

            Halo e na keonimana, wahi a ka Iudaio: heaha ko olua makemake a'u e hana aku ai?

            O ke kumukuai o keia komo oia ka'u i makemake ai, heaha la kau i manao ai? wahi a La Fere, me ka haawi ana aku i ke komo.

            Ua lalau mai ka Iudaio i ke komo, a haawi iho la i na nana pono ana me kona mau maka anani nunui, a liuliu nana mai la oia maluna o La Fere, alaila. pane mai la oia:

            He elima heneri pisetole ka'u haawi no keia komo, pehea, ua makemake anei oe no kela kumukuai?

            Ha! he elima haneri pisetole; i hooho ae ai o La Fere. nui kela, ho mai, auhea?

 

He Moolelo

 

NO

 

MASEPA.

 

 

Ka Olalio Denemada!

 

A I OLE

 

Ke Kaulio Keokeo!!

 

            Aole ua haku Kasela la i hoomaha iho i kana huakai hookolo ma ka meheu o ka leo aoa o kana ilio, a na ka pouli aaki i hooki mai i kona nee ana aku imua.

            Huli a la ia mao a maanei, he pouli wale no a o ka leo aoa hoi o kana ilio, ua meha iho la ia.

            Alaila, i kela wa ala mai la iloko o na hoomanao ana o ua haku Kasela nei na holoholona hae ahiu o ia waonahele, nolaila, hoomakaukau ae la ia nona iho no ka wa e halawai aku ai me ia mau kupueu a iloko e na minute @ aia ke leo poha paapaaina o ka o le a ua haku la e haehae ana i na eheu meha e uhi la maluna o na ululaau.

            O keia o-le a ka haku Kasela e puhi nei, oia no kona haawi ana aku i hoailona no kana ilio i mea e maopopo ai iaia, aia la ihea kana ilio.

            No ekolu a eha manawa a ua haku la i puhi aku ai i kana o-le, aole loa he hoailona mai kana ilio mai, a oia ka ua haku nei i namunamu iho ai i kekahi mau olelo, alaila kau hou ae la ia i kana o-le iluna o kona mau lehelehe, a puhi hoomau aku la me ka ikaika; a iloko o ka hapalua hora, hoea mai la kana ilio ua nui ka hanu.

            E Duke, wahi a ua haku la i pane aku ai i kana ilio, ua loaa anei kuu enemi ia oe?

            O keia ninau a ka haku Kasela i kana ilio, oia ka ua ilio i aoa ae ai me ka leo ikaika e hoopaiakuli ana i na paia anoano o ua ululaau la, a oia leo aoa ikaika o ka ilio oia ka Kasele i hoomaopopo iho ai ua loaa io ka meheu o kona enemi i kana ilio, a o kana wahi i noho ai aia la ihea.

            Ua ninau hou aku, ina paha ua ike ua ilio nei i kahi i noho ai o ke kau lio keokeo, a oia hou ka ua ilio la i haawi mai ai i ka ae e like me ka wa mua, me ke konini ana o kona huelo.

            Na keia mau hoailona a ua haku Kasela nei e ike la ma o kana ilio. na ia mea i hoohauoli mai i na manao o ua haku la. a oia kana i hoopuka ae ai i kekahi mau huaolelo malalo iho nei:

            Mamua ae o ka o ana mai o ka malamalama o ka la apopo, he pio kela kaulio keokeo na Kasela.

            E hopu pio aku ana au iaia a me kona lio, a lawe aku ia laua imua o ke alo o kuu moi ma ke ano o ka'u makana ia iaia.

            O keia ae la na olelo kaena mua a keia kanaka koa me kona halawai mua ole me ua mea la ana e kama lio nei, aka nae, e ka mea heluhelu e ike aku ana kaua i ua haku la a me ke kaulio keokeo e like me ka mea i olelo ia ma ke poo o ko kakou mokuna.

 

            Ma ke anaina haipule i Kaumapili i ka la kapule nei, ua ike ia aku kekahi koa o ka moiwahine me kona aahu piha a haawi aku la he leta ike kahu oia hale. He $100 makana karikimaka aku na ka Moiwahine Liliuokalani.

 

NA LUNA NUI A ME NA KOMITE

O KA HUI AOAO LA

HUI LIBERALA.

 

Hon. JNO. E. BUSH              Peresidena

"     J. NAWAHI      Hope       "

Mr. J. K. PRENDERGAST Kakauolelo

@

 

        KOMITE.

Hon. R. W. WILIKOKI

Nob. D. W. PUA

Mr. J.K. BIPIKANE

"   A. SMITH

"   GEO. MARKHAM

"   D. W. KAHUAKAI

"   M.A. PAOA.

 

       KOMITE WAIWAI.

Mr. J. K. PRENDERGAST

"   C. B. MAILE

"   J. ALAPAI

"   J.W. KUALAKU

"   SAM. KEKUKAHIKO

 

     KOMITE AHAOLELO.

Hon. J. E. BUSH

"    J. NAWAHI

"    R.W. WILIKOKI

"    W.P. KANEALII

Nob. D.W. PUA

Mr.  J. ALAPAI

"    D.M. PUNINI

 

  KOMITE ELELE.

 

     APANA I.

Hon. J.E. BUSH

Mr. J.W. KAHALEWAI

"   D. K. KAMAKAUWILA

 

     APANA II.

Mr.      J.W. BIPIKANE

"           D.K. KAHUAKAI

"           J. KAHAHAWAI.

 

     APANA III.

Mr.      J.K. PRENDERGAST

"           SAM. KEKUKAHIKO

"           J. AULD.

 

     APANA IV

Mr.      C. B. MAILE

"           G.W. KUALAKU

"           R. PALAU

 

     APANA V

Nob.    D.W. PUA

Mr       W. KALAEHAO

"           J.B. KANOA.

 

KUMUKANAWAI O KA HUI AOAO LAHUI HAWAII LIBERALA.

 

            Ua hookumuia keia Hui, i kulana no ke kukulu ana i na manao aloha Aina a aloha Lahui. A i mea hoi e hoomau aku ai i ka noho ana kuokoa o Hawaii nei. A e hoopaa loa ai hoi i na hooponopono aupuni kaulike no ka lehulehu.

 

KA INOA.

 

PAUKU I--E kapaia ka inoa o ka Hui Ka Aoao Lahui Hawaii Liberala.

 

NA LALA.

 

            PAUKU II--O na Lala o keia Hui, oia no ka poe a pau i komo mai, a kakau inoa malalo o keia Kumukanawai.

 

NA LUNA NUI.

 

            PAUKU III--Eia na Luna Nui o ka Hui He Peresidena, Hope Peresidena, Kakauolelo, Puuku. E noho no lakou ma ka oihana no ka manawa, elua makahiki, mai ko lakou la i koho ia ai; eia nae, e hakahaka no ka make, a haalele, a hoopau ia paha no kekahi hewa. E paniia ia hakahaka e ka mea i koho ia no ka manawa wale no i koe e piha ai na makahiki elua.

 

NA HANA A NA LUNA NUI.

 

            PAUKU IV--Na ka Peresidena, a i ole ia o kona hope paha, e noho hoomalu i na halawai a pau o ka Hui, a nana no e hooia i na kauoha a pau o ka Hui.

            Na ke Kakauolelo e malama i na Buke, Pepa a me na moolelo o na halawai a pau o ka Hui, a e hoopaa hoi i na huina dala i loaa mai a i hoolilo ia aku

            Na ka Puuku e malama i na dala a mena waiwai a pau o ka Hui. a e hoike i na loaa mai a me na hoolilo ana imua o ka Hui, i na manawa a pau e makemake ia ai. Aole nae e hiki iaia ke hoolilo i kekahi dala o ka Hui me ka ae ole e ka Hui, a me ka apono ole hoi o ka Peresidena.

 

PAPA KOMITE HOOKO.

 

            PAUKU V--E koho ia ehiku lala mai loko mai o na Hoa o ka Hui i Papa Hooko. A ina ia Papa e imi a e waiho mai @ nao ia no ka Hui.

 

KOMITE KUMAU.

 

            PAUKU VI--E koho ia mai waena mai o na lala o ka Hui i elima Hoa i Komite Waiwai. Ehiku Hoa Komite Ahaolelo, umikumamalima Hoa Komite Elele, i wakalua kumamakahi Hoa Komite Lahui or Kuwaena.

            A--Na kekahi Komite Waiwai e hooponopono no na me pili i ka ohi dala ana.

            B--Na ke Komite Ahaolelo e hooko na mea pili i ka Ahaolelo.

            C--Na ke Komite Elele, e noonoo a hoike mai i na inoa o na poe i manao ia i mau moho balota no ka Aoao Lahui, no ke kau ahaolelo e hiki mai ana, a na ka Hui e hooko loa.

            D--O ke Komite Lahui, oia no ke Komite Kuwaena iloko o keia Pae Aina holookoa. Na ia Komite no e hoolaha aku ma ke akea, no na poe a pau loa i apono ia, no ka holo moho ana iloko o keia au puni ma ka Aoao Lahui. A na ia Komite no e poloai aku i na Komite e na apana Mokupuni no na hana ano nui a ka Hui i manao ai e halawai.

 

NA HUI MA NA MOKUPUNI.

 

            PAUKU VIII--O na Hui p ka Aoao La hui Hawaii Liberala e ku nei, a e kukulu ia aku ana ma keia mua aku ma na apana Mokupuni. i ku like na manao Kalaiaina no ka pono o ka Aeae Lahui o lakou no na Aha Hui Lala no keia Hui

 

NA HOOLOLI ANA.

 

            PAUKU IX--E hiki no ke hoo@ kui mai a hoopau loa paha i keia Kumu kanawai mamuli o ka hooholo ana a kahapanui o na Hoa o ka Hui. i hiki mai ma ia halawai, i kahea ia no ia hana.

 

PUAA KUAI LIILII A NUNUI.

 

            Eia he puaa kuai ma Kapahulu he aina mahiai, ma ke alanui hou mawaena o Kapiolani Paka a me Kamailiili.

            @ Ina @ makemake kekahi, e ninau ma ke Telepona Makala, Helu 325.                  Dec. 16, 1891.  346-3ts.