Ka Leo o ka Lahui, Volume II, Number 347, 17 December 1891 — Page 2
| This text was transcribed by: | Patty Mancini |
| This work is dedicated to: | In Loving Memory of Julie |
KA LEO O KA LAHUI.
"E Mau ke Ea o ka Aina i ka Pono."
MA KE KAUOHA.
I keia la i hookohu ia aku ai o DOROTHEA LAMB, i Notari no ka lehulehu no ka apana Hookolokolo Ekahi o ke Aupuni. C. N. SPENCER.
Kuhina Kalaiaina.
Keena Kalaiaiana, Dec. 3, '91. 338-3td.
KUAI O KA HOOLIMALIMA O
KA LOKO O OPU MA
PAWAA OAHU.
Ma ka Poakolu, Dek, 16, 1891, ma ka hora 12 awakea, ma ke alo komo aku ma mua o Aliiolani Hale e kuai ia aku ia ma ke kudala, ka hoolimalima o ka loko oupuni o Opu ma Pawaa, Oahu. Ka ma @awa he 15 makakiki, ke kumukuai koho mua he $50 uku makahiki, e uku ia ma ka uku hapa makahiki mamua.
C. N. SPENCER.
Kuhina Kalaiaina.
Keena Kalaiaiana, Nov. 14, '91. 324-3t sd
KUAI AINA AUPUNI MA KE KIHI
KOMOHANA O ALANUI RIKE-
KE A ME KALEPA, HONO-
LULU, OAHU.
Ma ka Poalua, Ianuari 12, 1892, ma ka hora 12 awakea ma ke alokomo ma ke alo o Aliiolani, e kuai kudala ia ai ma ke akea kekahi apana aina aupuni ma ke kuhi komohana o Alanui Kalepa a me Rikeke e pili pu ana me ka waiwai o A. D. Bolster, ma Honolulu, Oahu, a nona ka ili aina he 1142 kapuai huina oi iki aku a emi mai paha,
Kumukuai koho mua $250.
C. N. SPENCER.
Kuhina Kalaiaina.
Keena Kalaiaiana, Dec. 14, '91. 344-d3t
NA APANA AINA HOME LIILII
MA PUNA HAWAII.
Ke hoolaha ia aku nei ma keia:
1 Aia he 20 mau apana ma Nauawale, Puna, Hawaii, e loaa no he mau apana kupono no ka noho ana kuonoono, mai keia mau apana aina home liilii mai.
2 E ike ia no ke kii o keia mau apana aina, maloko o ke keena Aina o ke aupuni, ma Honolulu a i ole ma ke keena o J. E. Elderts ma Kapoho, Puna, Hawaii.
3 Na J. E. Elderts, e kuhikuhi mai i na apana i ka mea e makemake ana e ike i ua mau apana la, a no ia hana ana e loaa iaia ka uku o $1.00 mai ka mea noi aku.
4 O ka poe makemake i mau apana aina, e nonoi mai no, ma ke kakau ana mai i ke Kuhina Kalaiaina, maluna o ka pepa i pa'i hakahaka ia. a loa no ke kope oia mau palapala me ka uku ole mai a J. E l Elderts.
5 Aole e noonoo ia ko noi a kekahi mea he aina ponoi kona.
6 O kela a me kela mea nonoi e loaa iaia na makahiki oo ma ke kanawai.
7 E ae ia no ka mea nonoi i unei makahiki e uku ai noka aina ma ia manawa, e hookuu ia no ka aina mai na auhau aupun a pau.
8 Hoko o hookahi makahiki, ke kauoha ia nei oe e kukuiu i hale nou maluna o ka apana aina i lilo ia oe, a e hoomau aku oe i ka nooh ana no ke koena o na makahiki he umi.
9 Uoko o ekolu makahiki, ke kauoha ia aku nei oe e hoopuni i ua aina la me kekahi pa kupono a paa hoi.
He mea pono ia oe e hookaa mua mai i kela a me keia hapa makahiki, i ka uku panee maluna o ke kumukuai o ka aina ma ka 5 pakeneka o ke dala i ka makahiki hookahi; ua hiki no hoi ia oe ke hookaa i ke kumukuai holookoa. a o ka hapa paha, ma kela a me keia wa, he mea ia e emi mai ai ka uku panee.
11 O ka aelike mua ana. aole hiki ke hoolilo ia aku, a aole no hoi e hiki ke hoolilo ia aku ka aina, a hiki i ka hooko piha ia ana o na kumu aelike.
12 Ke haule hope ka hooko ia ia ana o kekahi o kela mau kumu i hoike ia ae la, he mea ia e loaa ole ai ka aina.
C. N. SPENCER.
Kuhina Kalaiaina.
Keena Kalaiaiana, Nov. 6, 1891.
318-4t
NA AINA HOME MA HILO, HAWAII.
Ma keia ke hoolaha ia aku nei---
1. Ua hookaawaleia he Umi (10) Pahale, ma Kaieie, Hilo, Hawaii no ka hoolilo ana aku i ka poe e makemake ana e loaa ia lakou na aina home i wahi e noho ai.
2. Ua hiki no ke ike ia na kii o keia mau apana aina ma ke Keena Aina, Keena Kalaiaina, Honolulu, a i ole ma ke Keena o Mr. A. B. Loebensteni ma Hile, Hawaii.
3. Na Mr. A. B. Loebenstein no e kuo hikuhi aku i na apana aina i kela a me keia mea e makemake ana e ike, a no ia hana ua kuleana oia e ukuia $1. mai ka mea e nonoi ana.
4. Na kanaka a pau e makemake ana i na apana aina, e ui mai no lakou ma ke kakau i ke Kuhina Kalaiaina ma kekahi palapala pa'ihakahaka, a oia mau pa'ihokahaka e loaa wale mai no mai a A. B. Loebenstein.
5. Aole kekahi nonoi mai kekahi mea e noonoo ia mai ka poe e noho ona aina nei.
6. O ka poe piha o na makahiki wa@no ke nonoi mai.
7. E haawi ia no iloko o umi makahiki e uku ia ai ka aina, a iloko oia mana wa ua kuu ia mai na auhau.
8. E kukulu hoi oia i hale noho maluna o ka aina nona iloko o hookahi ma kahiki a e hoomaka hoi e noho maloko o ia hale, a e hoomau aku no ke koena o ka manawa o umi makahiki.
9. E hoopuni hoi oia i ka aina, iloko o ekolu makahiki, me kekahi pa kupono.
10. E uku hoi oia ma ka hapaha ma kahiki mamua i ka uku panee maluna o ke koena i uku ole ia o ke kumukuai, ma ka pa 5 keneta pa haneri. Ua hiki no i ka mea kuai ke hookaa pau a i kekahi mahele paha o ka uku kumukuai i kela a me keia manawa, a i ka mea no hoi e oki ai o ka uku panee.
11. Aole e hiki ke hoolilo hou ia aku ka aelike mua, a aole no hoi ka aina e hiki ke kuai ia a pau mua na olelo aelike i ka hooko ia.
12. O ka kaule ana o ka hookoia o na kumu i aelike ia, he mea no ia e hoolilo wale ia ai o ka aina.
C. N. SPENCER.
Kuhina Kalaiaina.
Keena Kalaiaiana, Dec. 3, 1891. 4ts---d.
KUAI O NA APANA AINA AUPUNI
MA MANOA, HONOLULU, OAHU.
Ma ka Poakolu, Ianuari 13, 1892, ma ka hora 12 awakea, ma ke alo komo o Hale Aliiolani, e kuai kudala ia ai he 41 eha mau apana aina ma Manoa, Honolulu, Oahu, e like ole ana ka nui mai ka 8:36 a ka 11:10 eka.
Kumukuai hookumu like ole mai ka $200 a ka $400, no kela a me keia apana, e like me ka nui a me ke kulana o ka aina. O ke kumu a me ke ano o keia kuai ana ma ke dala kuike no ia, a i ole e like me ka makemake o ka mea kuai he uku hookahi hapa mua a o ke koena ma ka hookaa mahele like ekolu iloko o ekahi, elua a me ekolu makahiki, me ka ukupanee 7 keneta pa haneri o ka makahiki.
E hoopuni ka mea e kuai ana i ka aina ana i kuai ai i kekahi pa maikai iloko o hookahi makahiki.
E hoopuka ia aku no na Palapala Sila Nui no ka aina ma ka wa e pau loa mai ai ka hookaa ia ana o ke dala kuai.
E ike ia no ka palapala aina a e lohe ia no hoi na mea piha no keia mau aina ma ke keena aina.
C. N. SPENCER.
Kuhina Kalaiaina.
Keena Kalaiaiana, Dec. 16, '91. 346-3td.
KUAI O KEKAHI KOENA AINA AUPUNI MA WAIAKOA, KULA, MAUI.
Ma ka Poakolu, Ianuari 13, 1892, ma ka hora 12 awakea, ma ke alo komo o Aliiolani Hale, e kuai-kudala ia ai kekahi koena aina aupuni ma Waiakoa, Kula Maui nona ka ili o 3:67 eka oi aku a emi mai paha.
Kumukuai hookumu $5 no ka eka.
C. N. SPENCER.
Kuhina Kalaiaina.
Keena Kalaiaiana, Dec. 16, 1891.
846-3tsd.
KA LEO O KA LAHUI.
JNO. E. BUSH.
Lunahooponopono a me Puuku.
POAHA, DEKEMABA 17, 1891.
HALAWAI LIBERALA.
E KAMAILIO ANA KA LOEA,
C. W. AKEPOKA.
Ke keiki o ka makani ahiu o na kula anu o Kanada, ka mea i olelo he hiki no ke Kumukanawai ke hoololi ia, a e hoikeike nei i na mea huna o ka aoao hoomaemae.
E au, e hele, e huli, e lele e na hoa makaainana, e ka lahui Hawaii ma keia ahiahi, hora 7, ma ka Hale Paikau Kahiko.
PEHEA KEIA?
"He mea pono i na hoa o keia kau ae, e hoala hou i ke kanawai e laikini ia ka opiuma, i pau ke kuai malu ana, a i loaa no hoi he pomai kai i ke aupuni; a o ua laikini ala, e kuai ia ma ke kudala akea ana, e hoomaka ana mai ke $30,000 aku, a na ka mea koho kiekie nona ka laikini." Oia kekahi o na olelo maikai a C. W. Akepoka ma kana haiolelo i ka po Poalua nei, imua o ka hui Hawaii Lira.
He Ulia Poino.
Ma ke awakea o ka Poalua nei, ua loaa iho la ia Kauka Woods o ka mokukaua Kaletona i kekahi ulia pilikia kuhohonu.
Oiai oia me kekahi mau hoa alii moku o ke Kaletona i huli hoi mai ai mai ke kula mai o Punahou, ua kalaiwa aku la keia Kauka i ko lakou kaa, a lele aku la kona mau hoaloha ma ke uwapo.
Ua huli hoi mai ia no ka hoihoi ana i ke kaa ma ka Hotele, a iaia i i hoea mai ai ma ke kihi o na alanui Alakea me Moiwahine, ua puiwa ae la kona lio, a hoomaka aku la oia e aha'i. Ua hooikaika oia e koahi mai i ka holo o ka lio, a ua hemo aku la nae kekahi aoao o ke kaula kaohi mai @ lima aku. a koe hookahi aoao. no ia kumu, ua holo kapakahi aku la kalio a hooku'i i ka pou kukui uwila, a kiola ia aku la oia mailuna aku o ke kaa a haule iwaenakonu o ke alanui me ka pau o kona ike.
Ua ike mai la kekahi poe i keia pilikia. a ua manele ia aku oia no kahi o Kauka Makalu, a aia oia malaila kahi i waiho ai me ka maopopo ole o kona hopena. Ma ka nana ana a na kauka, ua haki ia he elua o kona mau iwi aoao, he mo-ku nui ma kona lae a mahope o kona poo; a ma ka hoike a Kauka Makalu, ua lua'i mai oia i ke koko ma ia po, me he mea ala, mai na iwi aoao haki mai no ia.
Aole no paha i poina ka lehulehu keia kauka Woods, oia nei no ke kauka nana i malama ko kakou Moi aloha i hala, ma kela huakai poina ole i Kaleponi, a ka Moiwahine Kanemake hoi i makana ai i kekahi mau makana.
O nehinei a me keia la na la a ke Kaletona e haalele mai ai i keia awa, aka, no keia pilikia i loaa i kona kauka. ua hookaulua iki ia kona holo, aia a maopopo ke kulana o ka mea pilikia.
O ka haiolelo a Hon. J. E. Bush i mua o ka halawai Liberala o ka Poaono aku nei i hala, e hoolaha ia aku ana i ka la apopo.
HALAWAI PAUAKA, A KA HUI KALAIAINA MUHEE.
Ma ke ahiahi o ka Poakahi nei, ua he a ia ke kukui o Robikana hale, no ka manao ia e halawai, eia ka auanei e pauaka ana ua halawai nei. Oiai hoi, o ke kumu o ka pau oka, aole he poe i hiki mai, oiai o Mr. Kaulukou a me Mr. Hoke na loio, Mr. Kanui a me Poe, na kiai loko, a me ka Peresidena.
Oi kali aku a uiha, aohe hoea mai o na makaainana, aole hoi o lakou wale, aka o na komite hoi kekahi, aneane elua hora o ke kali ana, o ka hoi nui no ia.
Eia ka mea aka, oia mau no ka a o ke kukui, a na ke kukui i hoopanee ka halawai. Hu ka aka i ka halawai a na pauaka, na ka mea leo ole ka e hoopanee ka halawai.
A oia ka makou e hoomanao ae nei i keia wahi kanaenae a Hiiaka-i-ka-poli-o-pele--
Lilo i Punae, lilo i Puna
Lilo i Puna i ke au a ka hewahewa
Hoi mai ana i kauhale
Ua piha i kini o ke Akua
Kini wale Waimea
Lehu wale Waimea
O ka hea a ke Akua wahine o Uli e
Ua wa Mahiki
Aia Mahiki la
Ke ua la no e
Aole e ua, ina he maikai ka maunu, i ua hoi paha he ninole ka mau nu la ka nana kee o keia la.
MAKE WALOHIA.
Ma ke kakahiaka nui onehinei, ua kipa ae la ka anela o ka make ma ka hale kino o Laika Holt, a kaihi aku la i ka hanu ola mai iaia aku, a waiho iho la i ka lepo no ka lepo.
He opio oia i hiki ole aku kona mau makahiki i ka elua hapakolu o ko ke kanaka ola ana, aka, o ko ka Haku la, me he aihue la ia i ka po.
Ua haalele iho oia, i na hoaloha, na kini no a pau, e paiauma aku nona ma keia kae o ka lua kupapa'u. Aloha wale oia i hele kohana aku la aohe lua, aohe nui, a aohe hoi he mau hoaloha.
A ua moe aku la oia i ka moe Kau a moe Hooilo, a hiki i ka la a ka anela nui e hookani mai ai i kana pu puhi, a oia ka wa e ala mai ai na mea a pau, mai ka lakou hiamoe ana, a o ka poe e ola ana e hoomalule ia lakou.
Nolaila, e ka ohana o ka mea i kuu mai i na inea o keia ao, o kakou pu iloko o ka luuluu kumakena ana nona; a ke komo pu aku nei ka LEO, a me kona mau paahana e kanikau pu nona ma keia ao.
E hoomaikai ia ka inoa o Iehova o na kaua, nana no i hana mai a nana @ lawe aku.
HE HANA ALOHA OLE.
Ma ke kakahiaka Poalua aku nei o ka pule i hala, mawaena o ka hora 9 a me 10, ia'u e hoi mai ana mai ke alialia mai, a ku iho la au ma ke kihi o na alanui Moiwahine a me Hema, ike aku la au i kekahi keonimana e hili aloha ole ana i kana lede me ka uwepa hili lio a ua keonimana nei.
O ke kumu ka o keia paio ana i ke alanui, ua ike pono aku kana lede iaia e ku ana oia me kana punua mua i haalele ai i ua keonimana nei, a ua piha ka wahine i na lohe he nui, a akahi no ka ike maka, a ua piha koke oia i ka inaina.
Ua eha no ua wahine nei, aole nae i kukonukonu loa, mamuli o ka loaa e ana ae iaia o ka uwepa, a pokopoko liilii.
E akahele mai e na makamaka i keia ano hana. KIU.
E na makamaka, na hoa lohe, ina oukou e makemak i Puaa momona no kala Karikimaka, a me ka nakahiki hou, eninau i ke Kelepona Helu 325.
PUAA KUAI LIILII A NUNUI.
Eia he puaa kuai ma Kapahulu he aina mahiai, ma ke alanui hou mawaena o Kapiolani Paka, a me Kamiliili.
@ Ina e makemake kekahi, o ninau ma ke Telepona Makala, Helu 325.
Dec. 16, 1891. 346-3ts.
HOOLAHA PA AUPUNI.
E ike auanei na mea a pau, eia ma ka Pa Aupuni o Makiki nei kekahi mau pipi hele hewa. Pipi w melemele ulaula, oki ano e ma ka pepeiao ak. hao kuni ano e uha hope ak. Pipi w melemele ulaula, keokeo loihi ma ke kua. hao kuni R uha hope ak. Pipi keiki eleele, kiko keokeo ma ke kikala. elua kiko keokeo ma na uha a ielua aoao ak. aole kuni. Pipi keiki w. melemele ulaula, aohe kuni. Pipi keiki w eleele, 4 wawae keokeo, keokeo ka opu, keokeo ka huelo, aohe kuni. Pipi keiki k ulaula, aohe kuni, O ka mea a mau mea nona keia mau pipi. e pono e kii koke mai e hala na la he 12, e kuai kudala aku no au ke hiki aku i ka la 26 e Dekemaba nei, 1891, Poaono. hora 12 awakea. D KAOKAO.
345-dtf. Luna Pa Aupuni.
AINA KUAI MA KAMAKELA.
He Umi Aina Pa-hale ma Kamakela.
He 50 kapuai ka laula ma ke alo, a he 150 kapuai ka averika, hohonu. Ua pili i ka Home o ka Ohana Buckle, a he oluolu ke komo ana aku. He wahi e puka aku ai ma Alanui Liliha, a ma ke Kula Nui o Sana Lui.
@ No na ninau hou aku e pili ana no keia mau aina, e u-i aku ia C. J. McCARTHY.
838-dtf. 35 Alanui Kalepa, Honolulu H. I.