Ka Leo o ka Lahui, Volume II, Number 340, 8 Kekemapa 1891 — Page 3
| This text was transcribed by: | Aki Astrid Dinda |
| This work is dedicated to: | This page I'd like to dedicate to my mum and my dad |
KA LEO O KA LAHUI.
"E Mau ke Ea o ka Aina i ka Pono."
Ke Aiwaiwa o ka Pukuniahi nui.
---
Aole i ike ia kekahi pukuniahi nui e like me keia a makou e hoolaha aku nei, o ka nui o keia pu he 20,000 paona, ua hana ia keia pu ma kahi i kapa ia e „Kanumakalepo“ iloko o Enelani, a o kona leo ua like ia me ka leo o kekahi hekili ku’i pamalo.
O ke a-na waena o ka waha o keia pu he 16 iniha, o ke kaumaha o kona poka he 1,800 paona, aneane hookahi tona o keia poka, he poka kila nona ka manoanoa he eha kapuai, o ka nui o ka pauda nana e hoonee i keia poka, he 900 paona; ua hiki i ka ikaika o keia poka ke wawahi i kekahi mau mea paa loa e like me keia:
Ina o ka manoanoa o kekahi hao kila he iwakalua iniha a me kekahi hao maoli he ewalu iniha, i hui pu ia me kekahi laau oka nona ka manoanoa he iwakalua kapuai, a me kekahi pa i hana ia me ka puna kemeni, nona ka manoanoa he umikumamakahi kapuai a me kekahi pa nona ka manoanoa he 6 kapuai i hana ia me ka uinihepa, ua hiki i kona ikaika ke hoolilo i kona mau mea paa a pau i ka wa hookahi i mea ole, oiai hoi, he 31½ kapuai ka manoanoa. he mea ole loa nae ia i keia pilikia.
Ua hiki loa i keia pu ke pulumi aku i na mea a pau e ku aku ana imua ona. O keia pu, oia kekahi o na pu ano hou loa iwaena o na mea kaua o Enelani, ua hana ia keia pu mailoko mai o na hao kila paa loa o ia aupuni. Ua oi aku hoi kona paa a me kona ikaika mamua o na pu e ae iloko o ia aupuni.
-----------
He Hana Hilahila ole!
---
Ma ka po Poaono nei, ua ike ia kekahi hana hilahila ole a kekahi opio wahine, malalo ae nei o Kamanuwai, ma ka aoao ma Waikiki o ka luakini o Kaumakapili. O ka hana a keia opio i hana ai, oia no ka hoonohonoho Akua, me ka apa kau ana o kana mau oleio hehena i o a ia nei, me ka hoopuka ana i kekahi mau olelo ku i ka ma-kona a me ka hilahila., e lele ana oia i o a ianei e like pu me ke ano o na hehena, a he hana kuli maoli no kana mau hana, e hoopilikia ana i ka poe e hiamoe ana.
E koi ana oia i kekahi hainaka silika e haawi ia mai iaia a he nui aku, a o ka hope o kana i hana ai oia kona lele ana aku maluna o kekahi hapauea, no na la i oi aku ma mua o ka ka Baibala i hoike ai, me kona mauao e hoeha iaia, aka, ua hoea e aku la kekahi poe naau aloha, a hoopau koke ia kela hana.
I ka wa i kaawale ai kela hapauea, ua hopu koke aku la oia i ka aahu o kona makua hanai a haehae iho la, a ua nui ka poino, aka, e like me ka naau aloha o ka makua i ke keiki, ua a’o aku la iaia, mai hana hou ia hana, oiai, he hana hilahila, oiai keia lehulehu e nana mai nei i kau hana pegana, a pela aku.
Nolaila, ke a’o ia aku nei oe e kela opio wahine hoonohonoho akua lapu, mai hana hou oe e like me keia, oiai, he opiopio kou kino, aka, ke hana nei oe i keia hana pegana o ke au o Waawaaikinaaupo ma.
A nou hoi keia a’o ana, o ka lohe hoi ko lakou ala iho, oiai, he minamina makou ia oukou, i ko oukou komo iloko o na ki’o lepo o keia ano a me na ano like me keia.
NUHOU KULOKO.
---
Ua makemake ia na Luna lawe pepa a pau o ka LEO O KA LAHUI, e hoihoi mai i na helu o na la, 19, 20, 26, 27 o Okatoba nei, mai keia keena nei; ina nae he mau helu koe ia oukou.
---
He kilihune ua ko ka la inehinei, e ole nae ia oluolu iki ai.
„E mama e kuu keiki a pa na wawae i ke kai, no ke kai ka hoi ua aina,“ wahi a Keopulupulu.
Hoololiloli mai nei na ouli o ka manawa, a na ke au e nee nei e hoike mai i ka hopena.
I keia ahiahi e holo aku ai kekahi mau mokuahi holo pili aina o kakou nei, no ko lakou mau awa maa mau, o ka eleu ae no ka pono, aole o ka nuha, o puehu auanei.
Ke ake mai nei ka poai o ka aoao hookahuli apuni, o ka ike ia e kahea ana ka Aoao Lahui Hawaii Liberala, i halawai makaainana no ke kipaku ana i kekahi mau luna aupuni.
Ke lohe ia mai nei, e hoemi ia mai ana ka nui o na makai o ke Kapitala nei, mai ka ekolu uwati, a ka elua, a ke haohao nei makou, he aha iho la ka mea o ka hoemi ana oiai he puu dala nui ko ia oihana.
Nawai oukou e kaua aku e kena poe hoohe wale? O ke kukala e ana ina o ka poe o oukou e holo ana e make no oia, a ina no holo au e holo ana e make no hoi au, Hu ka aka, he keu a ka maka’u wale a me ka hoohe wale, a-iwa paha a oani ia mai, o ka make e noia.
I ke ahiahi onehinei i koho ia ai na luna nui o ka oihana kinai ahi o Honolulu nei, oiai elua moho e holo nei, oia hoi o Asch ma kekahi aoao, a o Mr. Moore ma kekahi aoao, a i ka makou kilo ana, e lilo ana ka lanakila i ka inoa mua.
Ina e lilo ke aupuni i aupuni Repubalika, aole na Wilikoki a me Bush i hoolilo; aka, na Kaulukou laua o Akoni Rosa, oiai, o laua na kiai o ka lahui i ka 1887; aka, aole nae i hana ia, ua hoohemahema ia a hiki i ka lilo ana o ka mana ia ha’i.
---
NA LUNA NUI O KA HUI AOAO LAHUI HAWAII LIBERALA.
Hon. JNO. E. BUSH Peresidena
`` J. NAWAHI Hope ``
Mr. J. K. PRENDERGART Kakauolelo
`` C. B. MAILE Puuku.
KOMITE.
Hon. R. W. WILIKOKI
Nob. D. W. PUA
Mr. J. K. BIPIKANE
`` A.. SMITH
`` GEO. MARKHAM.
---
Aila Kuai.
E LOAA NO MA KAHI O
J. F. COLBURN.
(KEONI, KOLOBANA.)
Ma ke Kiki a na Alanui Nuuanu me Moi.
---
E loaa no no ke kumukuai haahaa loa o $2.50 o ka pahu. Hele mai hookahi, hele mai elua, hele mai no a pau.
Ko oukou hoaloha.
J. F. COLBURN
Honolulu, Iulai 8, 1891. 232 dtf
---
A. HERING. M. PAULY
Ka Hale Hana Novelty.
E lawe no laua a e hana i na ano hana kalai a hana hoonihoniho ma ka laau a ma ka niho palaoa paha; hoohinuhinu a anaanai ana a mania na pupu a me kukui, a me na pena hoonani o na kaupoku o na rumi; hooponopono hou, hoomaemae ana o na pila, na pu, na mea kaupaona a mea mama oia ano.
NA HANA MEA UWILA, NA HANA MEKINI, A ME HANA LAKA.
E hana ia no na kuui, na ana kii, a pela aku, e like me ke kauoha.
E hele mai io maua.
132 Aanui Papu, Honolulu 335-tf-d.
---
E Kuai Hoopau Ana!
Na Kaa Huila Lua
a me
Ili Kaa Malalo o ke Kumu Lilo
Ma kahi o -
S. G. Schuman.
Alanui Hotele kokoke i ke kihi o Alanui Papu. 329-1wd.
---
O kahi Emi Loa
- A ME –
Kahi Kupono loa
E PA’I AI OE I KOU
KII,
AIA NO IA MA KE
KEENA PA’I KII ALOHA!
(Alanui Nuuanu, @ ma kekahi aoao mai o Ema Hale).
---
E pa’i ia ana na Kii o na ano a pau
e laa hoi na kii puulu o ka oha-
na, na keiki, na bebe, na
hale noho, na papa-ai-
na luau, a me na
kino make.
---
Na Kii hoonuiia a hoemi ia mai paha mai na Kii e ae!
---
Nolaila, mai poina i ke pa’i ana i ko oukou mau Kii ma ke KEENA PA’I KII ALOHA, e loaa ana ia oukou na Kii maikai loa me ke emi loa ma Hawaii nei.
THEO. P. SEVERIN: ---- Kapolena.
Keena Pa’i Kii Aloha , ma alanui Nuuanu me Beritania, ma o mai o Ema Hale. 324-3md.
---
HAULE! HAULE!
$10.00 MAKANA.
Mawaena o ka halekuai pake ma ke kihi mauka o ke alanui Moi a me Puaowaina me ko’u hale ma Kalia, ma ke alanui Moi aku i kai, ma ke kua aku o ka halepule o Kawaiahao a ka hale aila mahu iho nei, a malaila, holo pololei a hiki iwaho o ko’u wahi, ua haule aku he eke lima a na wahine, me kekahi mau dala gula a me dala maoli. E uku ia no keia makana ae la ka mea oluolu e hoihoi mai ia’u a i ole, i ke Keena o ka Leo .
319-dtf. W. H. Kailima
---
HOOLAHA.
E pani ia ana ka uwapo o Waikiki e hele aku ai i Kapiolani Paka, i na kaa o na ano a pau, ma ka Poaha a me ka Poalima, Nov. 19 a me 20. H. K. Hebbard .
327-3ts. Luna Alanui, Honolulu.
---
KUAI HOOPAU NUI.
Mai keia manawa aku a hiki i ko Makou hoonee ana aku iloko o ko makou
HALEKUAI HOU
Ma ke Alanui Papu, -(NA HALE BURUA.
E hoolilo aku ana Makou i ko Makou waiwai a pau o na ano Lole:
NA LOLE NANI,
NA LOLE I HUMUIA,
KAPU A ME PAPALE
PAHU LOLE, a@ aku
No na Uku Hooemi Loa Nae.
Egan & Gunn.
ALANUI MOI kokoke i ke ALANUI PAPU. tf-d.
---
Na Paikini Hou
Na Paikini Hou
O NA ANO A PAU, E KINIKOHU AI O KE ANO AHIAHI, E LOAA NO MA KAHI
Chas. J. Fishels,
KIHI O ALANUI PAPU A ME HOTELE,
Ko makou halekuai hoopau nui ma o MR CHAS. J. FISHELS la, he mau wai wai hou loa ko makou, i loaa mai nei mai ka hikina mai, o na ano like ole he nui wale. Eia ma ko makou halekuai nei na paa lole e linohau ai o na Keonimaua, a luhiehu o na Lede, na aulii o na Kamalii---
Na KINAMU Na ALAPIA
Na KALAKOA Malina Na KIHEI Silika
NANAHE o na ano he nui. A pela wale aku.
E huea pau ia aku ana keia mau waiwai a pau imua ou, aole hoi o oe wale o na Lede kekahi, pau pu aku hoi me na keiki, nau e wae nou iho i na anoai a kou puuwai, eia ka papa lohi o Apua la, ke anapa nei ka wai liula i Mana.
E hele mai i hookahi, e hele mai no a pau loa, mai ke nui a ka liilii.
Chas. J. Fishels.
356-tfd. Halekuai alakai o na kumukuai haahaa loa.
---
Na Waiwai Hou!
Na Aulii Hou!!
NA PAIKINI HOU O KEIA KAU HOOILO
O KA MAKOU IA LA AULII KOLOMANU
KU KE PAI HANA KA HAAWE
NANI WALE KA IKE I NA MEA NANI O KA HAU OKI O KA AINA GULA O KALEPONI – MA KA HALEKUAI WAIOLU NAWE MALIE O –
N. S. Sachs.
He oia mau no ke emi o ke kumukuai o ko makou mau waiwai, a oia ke kumu e ko makou paa mau ana i ka hana – A he wahi puka iki ko makou e kaa mau nei – Eia he heluna hou o na waiwai hou, ka makou o na ano like ole – Na MAKALENA lau, a me na MAKALENA puu, o kela a me keia ano, o ke ano mai kai loa.
Mau Puiwa Oukou! Mai Puiwa Oukou!!
EIA IHO KA PAPA LOHI O APUA, NA LOLE AAHU O NA LEDE I HANA MIKIOI IA MAI A AULII.
Na Muumuu o na Lede 40 keneta; Palekoki aulii o na Lede 50 keneta; Na luhiehu o ke ano ahiahi $1.00; Na Kihei kaekae huihui 40&50 keneta; Na Kawele hoomaemae ili o na Lede 60 keneta; Na Kaliki molina maikai loa 50 keneta, Na pai kini hou o na wahine ma ka hoopaa ana ia loko 50 keneta; Na Kakini lilina pahee o na Lede, elua paa no ka 25 keneta.
NA PAIKINII AULII O NA KEIKI, NO NA KUMUKUAI HAAHAA LOA, A EMI NO HOI.
Na aahu keokeo o na keiki 75 keneta; Na lole komo o na keiki 3 paa $1.00; Na Papale aulii o na keiki 25 keneta; Na kaliki o na kaikamahine 40 keneta; Na A-i kala o na keikikane 25 keneta, na Muumuu o na pepe 25 keneta; na Papale Lilina maikai o na kaikamahine he 50 keneta, mamua he $1.00, na Papale aulii o na keikikane he 50 keneta, mamua he $1.00.
NA PAHOEHOE HULU PAHEE! NA PAHOEHOE HINUHINU!!
Ua piha u ko makou halekuai nei i na waiwai like ole o na ano a pau, o na hulu hoonani o na papale o na iwa maka onaona, eia ia ia makou nui la, ke hihi o lua nei i Moeawakea, he eleele, he ahiehie, a nau e wae e like me kou makemake, he $1.00 wale no o ka lala hookahi, mamua he $2.00. O na papale keia o na hua pala, he kau maoli no ka iwa he la makani, eia la ke ahu a lala kukui mai nei. E hele mai e ike kumaka i ka nani e alohi nei, he ole hoi ka lohe pepeiao, hele mai na makua me na keiki pu mai no, e wae oukou no oukou iho. He makepono keia i ike ole ia kona lua, oiai, o keia kuai he haawi wale no. O na ano no a pau, he aulii maoli no. O ka Papale no hoi keia o na keikikane, he pani’o ia la ke nana aku oe, eia he 50 keneta wale no ke kumukuai. E loaa no ma kahi o
-------: N. S. SACHS . -------
318-dtf. 104, Alanui Papu, Honolulu.
---
HOOLAHA HOU
B. F. Ehlers & Co-PAINAPA
Helu 99 Alanui Papu
IA OUKOU E NA MAKAMAKA A ME NA HOALOHA, OIAI HOI, UA
makaukau makou i ke kuai hoopoho aku i na lole @ Wahine, Kane a me na Kamalii, oiai, e hoi mai ana o B. F. EHLERS me na lole hou ma keia moku @ a oia ke kumu o ko makou kuai hoopoho ana, i kaawale ai na wahi no na LOLE HOU.
E kipa mai e na makamaka, i hoopau ia ai ko oukou kanal@ no ka makou kuai hoopoho aku ia oukou. Owau me ka oiaio.
tf. B. F. EHLERS & CO.