Ka Leo o ka Lahui, Volume II, Number 338, 4 Kekemapa 1891 — Page 2
| This text was transcribed by: | Carol Abe |
| This work is dedicated to: | Awaiaulu |
KA LEO O KA LAHUI.
"E Mau ke Ea o ka Aina i ka Pono."
MA KE KAUOHA.
-----
KUAIO KA HOOLIMALIMA O
KA LOKO O OPU. MA
PAWAA, OAHU.
Ma ka Poakolu, Dek, 16, 1891, ma ka hora 12 awakea, make alo komo aku ma mua o Aliiolani Hale e kuai ia aku ia ma ke kudala , ka hoolimalima o ka loko aupuni o Opu ma Pawaa, Oahu. Ka ma nawa he 15 makakiki, ke kumukuai koho mua he $50 uku makahiki, e uku ia ma ka uku hapa makahiki mamua.
C. N. SPENCER.
Kuhina Kalaiaina
Keena Kalaiaina Nov. 14, ’91. 324 3t sd
-----
KUAI O ELUA APANA AINA
AUPUNI MA KAAUWAELOA, PALOLO, OAHU.
Ma ka Po akolu Dek. 19, 1891. ma ka hora 12 awakea, ma ke alo o Aliiolani Hale, e kuai ia aku ai ma ke kudala elua apana aina aupuni ma Kaauwaeloa Palolo, Oahu, oia hoi: Apana 1. Nona ka ili he 18 eka a oi a emi mai paha, kumuku ai koho mua he $500. Apana 2. Nona ka ili aina he 18 eka a oi a emi mai paha, kumukuai koho mua $500.
C. N. SPENCER.
Kuhina Kalaiaina.
Keena Kalaiaina, Nov. 13, ’91. 324 3tsd
-----
O ka Poaono la 28 o Novemaba nei, ka la hoi i loaa mai ai ke Kuokoa o Hawaii nei mai na Aupuni mai o Enelani a me Farani, he La Kulaia Aupuni ia, a e paniku ia hoi na Keena Oihana Aupuni a pau o ke aupuni ma ia la.
C. N. SPENCER.
Kuhina Kalaiaina.
Keena Kalaiaina, Nov. 12, ’91. 324 4tsd.
-----
NA APANA AINA HOME LIILII
MA PUNA HAWAII.
Ke heolaha ia aku nei ma keia :
1 Aia he 20 mau apana ma Nauawale, Puna, Hawaii, e loaa no he mau apana kupono no ka noho ana kuonoono, mai keia mau apana aina home liilii mai.
2 E ike ia no ke kii o keia mau apana aina, maloko o ke keena Aina o ke aupuni, ma Honolulu a i ole ma ke keena o J. E. Elderts ma Kapoho, Puna, Hawaii.
3 Na J. E. Elderts, e kuhikuhi mai i na apana i ka mea e makemake ana e ike i ua mau apana Ia, a no ia hana ana e loaa iaia ka uku o $1.00 mai ka mea noi aku.
4 O ka poe makemake i mau apana aina, e nonoi mai no, ma ke kakau ana mai i ke Kuhina Kalaiaina, maluna o ka pepa i pa’i hakahaka ia, a loa no ke kope oia mau palapala me ka uku ole mai a J. E. Elderts.
5 Aole e noonoo ia ke noi a kekahi mea he aina ponoi kona.
6 O kela a me keia mea nonoi e loaa iaia na makahiki oo ma ke kanawai.
7 E ae ia no ka mea nonoi i umi makahiki e uku ai noka aina ma ia manawa, e hookuu ia no ka aina mai na auhau aupun a pau.
8 Iloko o hookahi makahiki, ke kauoha ia nei oe e kukulu i hale nou m@luna o ka apana aina i lilo ia oe, a e hoomau aku oe i ka noho ana no ke koena o na makahiki he umi.
9 Iloko o ekolu makahiki, ke kauoha ia aku nei oe e hoopuni i ua aina la me kekahi pa kupono a paa hoi.
He mea pono ia oe e hookaa mua mai i kela a me keia hapa makahiki, i ka uku panee maluna o ke kumukuai o ka aina ma ka 5 pakeneka o ke dala i ka makahiki hookahi, ua hiki no hoi ia oe ke hookaa i ke kumukuai holookoa, a o ka hapa paha, ma kela a me keia wa, he mea ia e emi mai ai ka uku panee.
11 O ka aelike mua ana, aole hiki ke hoolilo ia aku, a aole no hoi e hiki ke hoolilo ia aku ka aina, a hiki i ka hooko piha ia ana o na kumu aelike.
12 Ke haule hope ka hooko i a ia ana o kekahi o kela mau kumu i hoike ia ae la, he mea ia e loaa ole ai ka aina.
C. N. SPENCER.
Kuhina Kalaiaina.
Keena Kalaiaina, Nov. 6, 1891.
318-4t.
-----
NA KOHO ANA I SILA IA.
E lawe ia ana ma ke keena Kalaiaina a hiki i ka Poalua, Novemaba 17, 1891, ma ka hora 12 awakea, no ke kukulu ana i hale laau noho ma kahi hooulu laau o ke aupuni, kihi o alanui Moi a me Keaumoku, Honolulu.
O na kii a me na hoolala ana no ka hana e ike ia no ma ka ninau ana ma ke keena o ko Luna Hana Aupuni.
E kakau ia na palapala koho me na olelo mawaho o ka palapala, “ Palapala Koho no ke Kukulu ana, Kahua Hooulu Mea Kanu.”
Aole e hoopaa ana ke Kuhina Kalaiaina iaia iho e lawe i ke koho haahaa loa a i kekahi koho e ae paha. C. N . SPENCER,
Kuhina Kalaiaina.
Keena Kalaiaina, Nov. 11, 1891-3ts
-----
I keia la i hookohu ia aku ai o DOROTHEA LAMB, i Notari no ka lehulehu no ka apana Hookolokolo Ekahi o ke Aupuni. C. N. SPENCER.
Kuhina Kalaiaina.
Keena Kalaiaina, Dec. 3, ’91. 338-3td.
-----
I keia la i hookohu ia aku ai o CARMEN E. VIDA, i Notari no ka lehulehu no ka apana Hookolokolo Ekahi o ke Aupuni. C. N. SPENCER.
Kuhina Kalaiaina.
Keena Kalaiaina, Dec. 3, ’91. 338-3td.
-----
KA LEO O KA LAHUI.
JNO. E. BUSH.
Lunahooponopono a me Puuku.
-----
POALIMA, DEKEMABA 4, 1891.
-----
NA POE KUPONO I KE KOHO BALOTA A PUNI
KA PAE AINA
E na makaainana o ke Alii ka Moiwahine Liliu, e noho ana ma kela a me keia apana koho balota a puni ka Pae Aina;
Aloha oukou:
Ke hoike aku nei makou i ke kanawai koho balota o ka 1890; a i mea hoi e ike ai, a e hoomaopopo ai kela kanaka keia kanaka i ke ano o kela kanawai o ke koho balota ana. Oiai hoi, o keia kanawai, ua ku kaokoa oe mai na haku hana mai, a me na konohiki a pela aku.
A i mea e maopopo lea ai i na mea a pau, nolaila ke pahola aku nei ka LEO, i ke kino holookoa o ua kanawai la, a ma keia kanawai, ua loaa ia oe e ke kanaka Hawaii oiaio ka mana oi kelakela, i ike ole ia mai kahiko mai, a nolaila, e na hea leha, e wae pono, e heluhelu akahele, a e hoomaopopo i na loina a pau e like me ia i kuhikuhi ia ma ka mahele 3 o ka Pauku 108.
Nolaila, e na puuwai Hawaii oiaio a pau, eia mai ka lamaku o ke ola, e lanakila ai kakou; aka, ina kakou e hoohemahema, alaila, ua makehewa na hoikeike ana.
NA OLELO HOAKAKA I NA POE KOHO BALOTA.
PAUKU 108. 1—E koho ka mea koho balota no hookahi moho holo balots no ka Lunamakaainana. E koho ka mea koho balota no na moho holo balota no na Alii Ahaolelo.
2—O ka mea koho mahope koke iho o kona komo ana iloko o kahi koho balot o hele aku a hiki i ke pakaukau a ka Luna Nana Koho a malaila oia e hoike ae ai i kona kuleana koho. Alaila e loaa iaia mai ka Lunahoomalu mai kona balota a mau balota paha i ope ia ina he kuleana koho Alii kona.
3—Ma ka manawa e loaa mai ai i ka mea koho balota i kana balota a mau balota paha mai ka Lunahoomalu mai o ke koho balota, e komo koke aku ka mea koho iloko o kekahi keena i hookaawaleia a me ka penikala i hoolakoia ma ia wahi i hookaawaleia, e kaha iho i kaha pe a ma ka aoao akau o ka pepa balota e kupono ana ma kela aoao mai o ka moho ana i makemake ai e koho ma kahi e kahi ai no ia mea: penei: (X)
4—Ma ia wa e ope hou ae ka mea koho i ka balota e like me ia i loaa mai ai iaia mai ka Lunahoomalu mai o ka Papa Nana a e like no hoi me ia i opiia, e haawi aku i ka Luna Nana o ke Koho Balota, ka mea hoi iaia ka malama ana o na Pahu Balota. Nolaila, ma ka pau ana o ia, e haalele iho ka mea koho i kahi koho balota ano.
5—Ina malalo o ka ulia ua poino ka pepa balota i kahi mea koho, ua hiki no iaia ke hoihoi hou aku i ua pepa balota la i ka Lunahoomalu o ke koho balota, a nana hoi e haawi hou mai iaia i balota hou. Aole e hiki i kekahi mea koho balota ke hoihoi aku i ka Lunahoomalu a oi aku mamua o elua mau balota i poino.
6— Ina i kaha kekahi mea koho balota maluna o kana balota a oi aku mamua o hookahi moho Lunamakaainana, a i ole; oi aku mamua @ moho Alii Ahaolelo, a i ole hana paha i kekahi hoailona e hiki ai ke hoomaopopo ia e lilo no kana koho ana i mea ole, a aole hoi e heluia ia balota.
7— Aole e ae ia kekahi mea koho balota e lawe i kekahi balota mawaho aku o na wahi malalo iho.
8— Ina i haawi aku ka mea koho balota i ka Luna Nana nana hoi e malama ana na pahu balota e ae mawaho o ka mea i haawi ia aku iaia mai ka Lunahoomalu e lilo kana balota i mea ole. Mahope koke iho o ke komo ana o ka mea koho balota maloko o kahi koho, e hele koke oia a hoea ma ke pakaukau o ka Lunahoomalu o ke koho balota. Ma ia wa e loaa mai ai iaia mai ka Lunahoomalu mai he balota i opiia, a i ole, he mau balota paha ina nae he kuleana kona no ke koho ana i na Alii Ahaolelo.
9—Ua hiki no i ke Kuhina Kalaiaina ke pakui hou mai i mau olelo hoakaka hou mahope mai o keia, ke ike oia he kupono a ua makemake nui ia paha.
-----
NUHOU KULOKO.
Ua makemake ia na Luna lawe pepa a pau o ka LEO O KA KAHUI, e hoihoi mai i na helu o na la, 19, 20, 26, 27 o Okatoba nei, ma keia keena nei; ina nae he mau helu koe ia oukou.
Ua makemake ia na Luna Lawe Pepa a pau o ka LEO a me ka OIAIO, e akoakoa mai ma ke keena nei, i ka hora 10 a.m., o ke kakahiaka Poalima, no ka noonoo ana i kekahi hana i manao ia.
Ua manao ia i ka Lapule ae nei, e malama ia ai ka hoolewa o Kuhi- H. A. P. Kaaka.
Ke mahanahana mai nei ke koho balota o ka oihana kinai ahi, e malama ia ana i ke ahiahi Poakahi ae nei.
Ma ka huakai ak nei a ka Malulani i lawe ia aku nei kekahi piano o ka hotele o ka Luapele.
O na moku kuna Liholiho me Mele Poka na halihali lanahu no ka mokukaua Pelekane Garnet i ka Poakolu nei.
Ua hoohauoli ia ke kihapai o Mr J. M. Dowest, ma o ka mohala ana mai o kekahi pua kane, oia hoi he keikikane nui mohaha.
E hoomaha ana ka mokuahi Likelike no kekahi manawa aia a hiki i ka wa wili o ke ko e hoomaka hou ia ai kona mau mea hana.
I ka la 17 o keia mahina e halulu mai ai ka Monowai mai ka hema mai no Kaleponi, a o Mariposa hoi mai Kaleponi mai no ka hema.
O ka lunakanawai Foster ma ka noho o ka Aha Hoomalu i ka Poakolu nei; mai kona kaawale ana aku nei no na aina e no kekahi mau mahina.
Ma ke anaina a na mikanele i malama ai ma ka halepule o Kaukeano i ka po Poakolu nei, i heluhelu ia mai ai kekahi mau leta, mai a Mr. P. C. Jones mai.
Ma ka Poalua nei, i hoihoi ia aku ai ke kino make o Hon. J. P. Paka, no ke kanu ana ma Waimea, Hawaii. Ua ukali aku ka hapanui o ka ohana ma keia huakai.
Ma ka po Poalua nei, ua komo ae la ke kolohe iloko o ka hale hana gula o Wikimana, ma alanui Papu, a palamimo aku la i na dala elima e waiho ana iloko o ka pahu ume.
Ua manao ia e hiki ole ana i na hui kinipopo ke paani me ka hui Sana Jose e manao ia nei e hiki mai ana ia nei iloko o ka malama o Ianuari; no ka mea he wa ua ia oia ke kumu o ke kanalua ia.
-----
UA HALA.
Ma ka hora 9:45 o ka po Poakolu nei, ua make hikiwawe iho la o Mrs J. T. Walakahauki makua. Ua haalele iho oia he ohana nui o na keiki mahope nei, e kanikau aku nona. He mai ma ka puuwai ke kumu o kona make hikiwawe ana. Aloha wale oia. I ka hora 4 o ka la inehinei i hoolewa ia aku ai kona kino wailua, no kahi mau o na mea a pau, a malaila oia e moe ai a hiki i ke kani ana o ka leo o ka pu a ka Anela nui.
-----
MALCOLM BROWN!
(Palaunu.)
NOTARI O KA LEHULEHU, Aliiolani Hale, Honolulu H.1. 337-tf.
-----
HOOLAHA PILIKOKO.
E ike auanei na mea a pau ma keia, oiai, ma ka la 13 o Novemaba nei, 1891, ua make o Luka Kahului w, no Lahaina Maui, a i kona wa i make ai, ua waiho mai oia ma ko’u lima he palapala Sila no kona aina ma Lahaina Maui, a ua kuhikuhi mai hoi ia’u he mau palapala e ae kekahi no kona mau aina e ae ma Lahaina a me Waikapu, ma Maui. Nolaila ke hoike ia aku nei ka lohe i na mea pau loa i pilikoko i ka mea ia make e hele mai a hui me a’u ma Honolulu Oahu, no ka hoomaopopo ana i keia waiwai o ka mea i make a’u e paa nei, a na ka poe i kuleana e hana aku no lakou.
Owau no o KELUIA [w]
Ma o Nawahi a me Huntsman.
Honolulu Nov. 19, 1891. 328-1md.
-----
HOOLAHA KUAI AINA.
Mamuli o ke kauoha a Hoa, ke ho ike ia aku nei ka lohe i na mea a pau, ua makemake maua e kuai aku i kona kuleana aina a pau loa iloko o kela apana aina e waiho la ma Haiku, Hamakualoa, Maui, nona ka Palapala Sila Nui Helu 183, no W P. Alekanekero i lilo mai i ke kahi poe hui. E loaa no na kuka ana no ke kumukuai me maua ma Honolulu.
NAWAHI & HUNTSMAN.
323-dlm. Na Loio no Hoa
-----
“PONO KAULIKE!”
NA MOHO no na Luna Nui o ka Oihana Kinai Ahi i waeia e na Hui Kaawai malalo iho, e koho ia ana ma ka la 7 o Dekemaba, 1891, no na wahi pakahi e pili ana ia lakou:
“Holokahana.” — HUI KUI KAAWAI HAWAII HELU 4.
“Ka Makou Akenui, ka Pomaikai o ka Lehulehu.” — HUI KAAWAI MEKANIKA HELU 2.
“Ma kahi a ka hana e hea ai, malaila makou e loaa ai.” — HUIHOOPAKELE PALAHUKI A ME ALAPII HELU 1.
“Lanakila.” — HUI KAAWAI AINA PUA HELU 5.
Luna Nui: JULIUS ASCH.
Kokua Ekahi: JAS. H. HUNT.
Kokua Elua: D. L. KALAWAIA.
328-12td.
-----
AINA KUAIMA
KAMAKELA.
He Umi Aina Pa-hale ma Kamakela.
He 50 kapuai ka laula ma ke aio, a he 150 kapuai ka averika hohonu. Ua pili i ka Home o ka Ohana Buckle, a he oluolu ke komo ana aku. He wahi e puka aku ai ma Alanui Liliha, a ma ke Kula Nui o Sana Lui.
No na ninau hou aku e pili ana no keia mau aina, e u i aku ia C. J. McCARTHY.
338-dtf. 35 Alanui Kalepa, Honolulu H. I.