Ka Leo o ka Lahui, Volume II, Number 333, 27 Nowemapa 1891 — Page 3
| This text was transcribed by: | Holly |
| This work is dedicated to: | Kai Markell |
KA LEO O KA LAHUI.
"E Mau ke Ea o ka Aina i ka Pono."
He Hoomaikai a he Hoalohaloha.
Ua noi ia mai makou e hoike akea aku i ka hoomaikai ana a ka wahine kanemake, Mrs Hanai Parker a me ka ohana o ka Hon J. Parker i make, ma o ka hoomanao ana a Mrs Samuel Parker, i ka poe i hui mai me lakou ma ke kanikau pu ana, a ma o ka hoolawa ana mai i na mohai pu hoomanao no ka Makua o ka ohana i moe aku la no ka moe lolii a ke kino wailua. Ke hui aku nei no hoi ka ohana a pau e hoomaikai i na Moiwahine a me na ‘Lii Hanau o ka iana, no na kipa hoomanao ana i ko lakou makamaka a kanaka o na la loihi i kaa hope aku, e helu ana mai ke au Kuakolu o na Kamehameha. Aloha wale ia leo haahaa a puuwai hoomanawanui i ka ha’oha’o ia mai e na kini o Waimea, e ka piha a Kawaihae, e ka noho’na ikuwa leo o ka piha ohana. Me oe pu ko makou aloha.
Ke poloai aku nei ka LEO, e hui pu aku na kini o Kakuhihewa me ka Moku Nui a Keawe, e na makamaka o na hono kapu a Piilani a me Mana-o-ka-lanipo, e ike ia kakou hoa kanaka, eia la he malihini ka kakou, o ka hoolaukanaka ae ka paha la, e aho no ia aloha.
A keia auina la Poalua ae e lawe ia aku ai ke kino honua o ka mea make no ka mokuahi nana e manele aku i kona kino no ka ilina o ka ohana ma Waimea. Ilaila oia e waiho ae, e kakali, a hiki i ka la a ka leo o ka anela nui e hooho iho ai i ko ke ao e moe ana e ala mai e like me ia i ala mai ai mai ka make, a lanakila hoi he hua mua o ka hoopono a he hoailona no ka poe i manaoio i kona make a ola hou ana. E u kakou, a e manaolana e loaa iaia ka apono mai ke ‘Lii o na ‘Lii, a e kiai ai hoi kakaou a makaala i ka enemi o ke kanaka- ka he wa nona mai ka make i ike pu ai kakou i ka nani o ka makou, ke aloha i ke Keiki, a me ke alakai pauaho ole a ka Uhane Hemolele.
-----
HALAWAI A NA ELELE MOKUPUNI, ME KE KOMITE KU MAU O KA HUI KALAIAINA.
Ua malamaia ka halawai a na Elele o ka Hui Kalaiaina, i ka hora 12 a.m. o ka Poakahi nei Nov. 23, 1891. He 7 Elele ka nui i hiki mai mai na Mokupuni mai. no lakou na inoa pakahi malalo iho:
1 Moseman-Hilo-waena Hawaii
2 S. D. Kapono- Honuaula, Maui
3 J. L. Pahulama-Koloa, Kauai
4 Kawailiula-Kamalo, Molokai
5 J. W. Naehu-Kaupo, Hana. M.
6 D. Ai-Maui
7 M. K. Nuuanu-Pauwela, Maui.
Peresidena J. A. Kahoonei ma ka noho Hoomalu. Pule kekahi Elele nona ka inoa o Naehu; John boy ku mai oia a olelo mai; o kela hoolaha maloko o ka nupepa “Elele,” a ka Peresidena J. A. Kahoonei i hoolaha ai, e akoakoa mai i Honolulu nei i ka Poakahi, Nov. 23, 1891, na kue i na rula a me ke Kumukanawai.
Mr. Morsman, ku mai oia a kamailio mai la: ke ku aku nei au maluna o kau hoolaha akea ana e akoakoa mai na Elele Mokupuni a pau maanei, pela makou i hiki mai nei malalo oia leo kono, aka, wahi a kekahi o ke Komite Ku-waena i olelo iho nei ua koe keia hoolaha i ke Kumukanawai a me na Rula, nolaila, he mea haohao nui keia i ka hoole ana mai, aole kuleana o kela hoolaha. no’u iho, a ina o na halawai Aha Elele nui keia, pono no e oluolu mai na hoa kuleana ole i keia halawai e hookaawale aku.
Peresidena- he halawai keia no ke akea.
J. S. Pahulama, noi mai oia e heluhelu ia mai ke Kumukanawai a me na Rula o ka Hui, apono ia.
Peresidena- Ke manao nei au ua loaa ka mana i keia hoolaha akea ana, i kulike ai me na olelo o ka Pauku 4, o ke Kumukanawai o keia Ahahui; a penei e heluhelu ia ai ia Pauku:
O ka Peresidena ka Luna Hooko nui o keia Ahahui, a me na Ahahui lala a pau o keia aupuni.
Mr. W. Moseman Jr.- Peresidena, ua lohe iho nei kakou a pau i ka heluhelu ia ana mai nei e ka Kakauolelo Kaleiopu, o ke Kumukanawai a me na Rula, nolaila, aia ma kekahi o ko oukou Pauku 2 ke Kumukanawai e ku nei, ua ike maopopo ia ke kuleana ole o na hipa eleele, a lakou e manao nei e ala kai i ka Peresidena J. A. Kahoonei, no’u iho, aole loa au i makemake a me ko’u mau hoa Elele, i hiki mai nei mai na Mokupuni mai, e alakai ia e keia poe lalau.
Pauku 4- O ka Peresidena ka Luna Hooko nui o keia Ahahui a me na Ahahui lala a pau o keia aupuni.
Pauku 2- Ua ae ia na kanaka Hawaii a pau, e lilo i poe lala no keia Ahahui, ke hoohiki mua nae malalo o na kanawaai me na rula o keia Ahahui.
W. Moseman- Peresidena. E ninau aku ana au imua o kou hanoheno i kulike ai me na olelo o ka Pauku 2 o ke Kumukanawai o ka Hui i hoike ia maluna ae, ua kakau inoa anei keia poe hipa eleele, ina aole i kakau inoa, e pono no kou hanohano e hookaawale aku i keia poe mawaho, no ka mea, aole keia he halawai no ka Hui, aka he halawai keia no na Elele o na Mopuni mai na Komite Kuwaena.
Kaulia- Peresidena, na’u no e pane pololei aku i keia Elele o Hilo-waena, no ka mea, aole i maopopo i ka Peresidena, na kakau inoa au, a he halawi akea keia; a ua kamailio aku oia a hele i ka nui loa mawaho o na rula.
W. Mossman- Peresidena, e rula aku oe i ke keonimana e noho iho ilalo, no ka mea, ua halahu kana mau olelo mawaho o ka ninau apono ia.
W. Mossman- peresidena, e noi aku ana au e hoopanee keia halawai a noho hou i keia ahiahi, ma Robikana hale ma ka hora 7:30 p.m. no na Elele Mokupuni a me na Komite kuwaena wale no.
------
NA LUNA NUI O KA HUI AOAO LAHUI HAWAII LIBERALA.
Hon. JNO. E. BUSH PEresidena
“ J. NAWAHI Hope “
Mr. J. K, PRENDERGART Kakauolelo
“ C. B. MAILE Puuku.
KOMITE.
Hon. R. W. WILIKOKI
Nob. D. W. PUA
Mr. J. K. BIPIKANE
“ A. SMITH
“ GEO. MARKHAM.
-----
NUHOU KULOKO.
Ua makemake ia na Luna lawe pepa a pau o ka LEO O KA LAHUI, e hoihoi mai i na helu o na la, 19, 20, 26, 27 o Okatoba nei. ma keia keena nei; ina nae he mau helu koe ia oukou.
Ua makemake ia na Luna Lawe Pepa a pau o ka LEO a me ka OIAIO, e akoakoa mai ma ke keena nei, i ka hora 10 a. m. o ke kakahiaka Poalima, no ka noonoo ana i kekahi hana i manao ia
Komo pono no ka La Kuokoa ou e Hawaii i ka po o Kane. Ola no Hawaii i ke Akua.
E malama ia ana he anaina wehewehe Baibala, ma Brito Hall i keia po e ka Lunakahiki Haws.
Ma ka la apopo, he paina luau ka na Keikialiii e haawi ana ma Waikiki, no ka hoomanao ana i ka la Kuokoa.
He nui na lealea La Kuokoa e malama ia ana ma na wahi like ole o ke kapitala nei i ka la apopo. I Ewa ana kekahi mau lealea.
He mau kipu aloha aina ko ka hora 12 o ka la apopo, no ka hoomanao ana i ka La Kuokoa o Hawaii nei, mai ka batari mai o Kakaako, ka mokukaua Penasecola a me ka moku makaikai honua St. George.
Ma ke ahiahi Lapule ma ka Briton Hall, ma ke kihi o ke alanui Ka mika me Moi, oia kahi a Lunakahiko Haws, e haiolelo mai ana oia no na mea e pili ana i ko ke kanaka noho ana ma keia ao, a me ko ke Keiki a ke Akua hoola ana ia kakou.
-----
E Kuai Hoopau Ana!
Na Kaa Huila Lua
a me
Ili Kaa Malalo o ke Kumu Lilo
Ma kahi o-
S. G. Schuman.
Alanui Hotele kokoke i ke kihi o Alanui Papu. 329-1wd.
-----
Aila Kuai.
E LOAA NO MA KAHI O
J. F. COLBURN.
(Keoni KOLOHANA.)
Ma ke Kihi o na Alanui Nuuanu me Moi.
E Loaa no no ke kumukuai haahaa loa o $2.50 o ka pahu. Hele mai hookahi, hele mai elua, hele mai no a pau.
Ko oukou hoaloha
J. F. COLBURN.
Honolulu, Iulai 8, 1891. 281. d&t
-----
KUAI HOOPAU NUI
Mai keia manawa aku a hiki i ko Makou nee ana aku iloko o ko makou
HALEKUAI HOU
Ma ke Alanui Papu,- (NA HALE BURUA.
E hoolilo aku ana Makou i ko Makou waiwai a pau o na ano Lole:
NA LOLE NANI,
NA LOLE I HUMUIA.
KAPU A ME PAPALE.
PAHU LOLE, a pela aku.
No na Uku Hooemi Loa Nae,
Egan & Gunn.
ALANUI MOI kokoke i ke ALANUI PAPU. tf-d.
-----
Na Paikini Hou
Na Paikini Hou
O NA ANO A PAU, E KINIKOHU AI O KE ANO AHIAHI, E LOAA NO MA KAHI-
Chas. J. Fishels,
KIHI O ALANUI PAPU A ME HOTELE,
Ko makou halekuai hoopau nui, ma o MR CHAS. J. FISHELS la, he mau waiwai hou loa ko makou, i loaa mai nei mai ka hikina mai, o na ano like ole he nui wale. Eia ma ko makou halekuai nei na paa lole e linohau ai o na Keoniana, a luhiehu o na Lede, na aulii o na Kamalii-
Na KINAMU Na ALAPIA
Na KALAKOA Malina Na KIHEI Silika
NANAHE o na ano he nui A pela wale aku.
E huea pau ia aku ana keia mau waiwai a pau imua ou, aole hoi o oe wale o na Lede kekahi, pau pu aku hoi e na keiki, nau e wae nou iho i na anoai a kou puuwai, eia ka papa lohi o Apua la, ke anapa nei ka wai liula i Mana.
E hele mai i hookahi, e hele mai no a pau loa, mai ke nui a ka liilii.
Chas. J. Fishels.
356-tfd. Halekuai alakai o na kumukuai haahaa loa.
-----
Na Waiwai Hou!
Na Aulii Hou!!
NA PAIKINI HOU O KEIA KAU HOOILO O KA MAKOU IA LA AULII KOLOMANU KUU KE PAI HAA KA HAAWE NANI WALE KA IKE I NA MEA NANI O KA HAU OKI O KA AINA GULA O KALEPONI- MA KA HALEKUAI WAIOLU NAWE MALIE O-
N.S. SACHS.
He oia mau no ka emi o ke kumukuai o ko makou mau waiwai, a oia ke kumu o ko makou paa mau ana i ka hana- A he wahi puka iki ko makou e kaa mau nei- Eia he heluna hou o na waiwai hou, ka makou o na ano like ole- Na MA KALENA lau, a me na MAKALENA puu, o kela a me keia ano, o ke ano maikai loa.
Mai Puiwa Oukou! Mai Puiwa Oukou!!
EIA IHO KA PAPA LOHI O APUA, NA LOLE AAHU O NA LEDE I HANA MIKIOI IA MAI A AULII.
Na Muumuu o na Lede 40 keneta; Palekoki aulii o na Lede 50 keneta; Na luhiehu o ke ano ahiahi $1.00; Na Kihei kaekae huihui 40&50 keneta; Na Kawele hoomaemae ili o na Lede 60 keneta; Na Kaliki molina maikai loa 50 keneta, Na ai kini hou o na wahine ma ka hoopaa ana ia loko 50 keneta; Na Kakini lilina pahee o na Lede, elua paa no ka 25 keneta.
NA PAKINI AULII O NA KEIKI, NO NA KUMUKUAI HAA LOA, A EMI NO HOI.
Na aahu keokeo o na keiki 75 keneta; Na lole komo o na keiki 3 paa $1.00; Na Papale aulii o na keiki 25 keneta; Na kaliki o na kaikamahine 40 keneta; na a-i kala o na keikikane 25 keneta, na Muumuu o na pepe 25 keneta; na Papale Lilina maikai o na kaikamahine he 50 keneta, mamua he $1.00, na Papale aulii o na keikikane he e50 keneta, mamua he $1.00.
NA PAHOEHOE HULU PAHEE! NA PAHOEHOE HINUHINU!!
Ua piha u ko makou haleuai nei i na waiwai like ole o na ane a pau, o na hulu hoonani o na papale o na iwa maka onaona eia ia ia makou nei la, ke hihi o lua nei i Moeawakea, he eleele, he ahiehie, a nau e wae e like me kou makemake, he $1.00 wale no o ka lala hookahi, mamua he $2.00. O na papale kula o na hua pala, he kau maoli no ka iwa he la makani, eia la ke ahu a lala kokui mai nei. E hele mai e ike kumaka i ka nani e alohi nei, he ole hoi ka lohe pepeiao, hele mai na makua me na keiki pu mai no, e wae oukou no oukou iho. He mahopono kena i ike ole ia kona lua, oiai, o keia kuai he haawi wale no. O na ano no a pau, he aulii maoli no. O ka papale no hoi keia o na keikikane, he pani’o ia la ke nana aku oe, eia he 50 keneta wale no ke kumukuai. E loaa, no ma kahi o
--: N. S. SACHS:-
318-dtf. 104. Alanui Papu, Honolulu.
-----
HOOLAHA HOU
B.F. Ehlers & Co- PAINAPA
HELU 99 Alanui Papu.
IA OUKOU E NA MAKAMAKA A ME NA HOALOHA: OIA HOI UA makaukau makou i ke kuai hoopoho aku i na lole paa Wahine, Kane, a me na Kamalii, oiai, e hoi mai ana o B. F. Ehlers me na lole hou ma keia moku na al a oia ke kumu o ko makou kuai hoopoho ana, i kaawale ai na wahi no na LOLE HOU.
E kipa mai e na makamaka, i hoopau ia ai ko oukou kanalua no ka makou kuai hoopho aku ia oukou. Owau me ka oiaio
B. F. EHLERS & CO.