Ka Leo o ka Lahui, Volume II, Number 327, 19 Nowemapa 1891 — Page 3
| This text was transcribed by: | Holly |
| This work is dedicated to: | Awaiaulu |
KA LEO O KA LAHUI.
"E Mau ke Ea o ka Aina i ka Pono."
Halawai Makaainana Nui!!
E wehe ia ana he Halawai Makaainana nui ma ka Poaono e hiki mai ana. Novemaba 21, ma ka hora 7 o ke ahiahi, na ka Hui Kalaiaina Hawaii Liberala, maluna ae o kahi Burua ma, ma ke keena paikau o ke Aupuni.
Nolaila, ke kono ia aku nei na hoa makaainana a pau e hele nui mai ma ia halawai, mai ka poe i kakau inoa a me ka poe i kakauinoa ole, oiai hoi, ua makemake ia e hooholo mua na hana, a e hana ia hoi malu na o ke kahua o ke kaulike.
John E. Bush,
Peredina Hui Kalaiaina Hawaii Liberala. Honolulu Nov. 18, 1891.
-----
NUHOU KULOKO.
Ua makemake ia na Luna lawe pepa a pau o ka LEO O KA LAHUI, e hoihoi mai i na helu o na la, 19, 20, 26, 27 o Okatoba nei, ma keia keena nei; ina nae he mau helu koe ia oukou.
Ua makemake ia na Luna Lawe Pepa a pau o ka LEO a me ka OIAIO, e akoakoa mai ma ke keena nei, i ka hora 10 a. m. o ke kakahiaka Poalima, no ka noonoo ana i kekahi hana i manao ia.
Ua makemake ia na Luna lawe pepa a pau o ka LEO, e hoihoi mai i na helu o ka la 2, 9, 10, o Novemaba nei, ma keia Keena, ina nae he mau helu koe ia oukou.
O na hui Iwilei a me Mahinahoaka, o laua ke paani ana i keia Poaona ae.
Eia i ke kaona nei o W. H. Daniels mai na wai eha mai, he ola kino maikai kona.
O Hawaii no ka oi, he puuwai hamama, he heahea a he lokomaikai, a oia moto oia ka kakou.
Ua huli hoi mai ka Ilamuku a me ka Hope Loio Kuhina, ma ke Kinau o ke kakahiaka o nehinei.
Ua aneane makou e pahola aku imua o oukou e ka lahui i ka inoa e na moho Alii a me Lunamakaainana.
O Mr. Wythes ka ona o ka moku makaikai honua Saint George a me kana poe aikane. He poe o-lo wale no keia.
Ina e ku mai ana ka mokuahi Mariposa, e loaa mai ana na mea hou o na aina e, a o Hou Paulo Numana kekahi e huli hoi mai ana.
Pakele ke ola o kekahi lede ma ka anina la o nehinei mai poino, mamuli o ka haki ana o kekahi aoao o kona kaa; ua haule oia ilalo, aole nae i eha.
I ka Mariposa e haalele iho ai ia Kou nei, he mau kamaaina kekahi e kau aku ana maluna o kona mau keena kapu no ka ipuka gula o Kaleponi.
Ma ka Poalua nei, ua kakele ae kekahi mau opio ia laua iho ma ka mea oi o lana i ka holokaa hehihehi wawae. Ma ka nana aku ia laua, ua like no a like.
Nui ka eleu o ka luna alanui H. F. Hebbard ma kana apana hana, oiai, ua koho ia i ka Poalua ae nei, a i ole i ka Poalima paha, e paa pono loa ai kela uwapo o Waikiki.
He hoolaha ka i loaa mai ia makou e pili ana i ka hoamana Moremona, ma o ka Luna Kahiko la Hae, a e nana ae i kana hoolaha e puka aku nei ma ka pepa o keia la.
Ua lohe mai makou, o ka manao nui o kekahi poe e ake nei, oia keia, e hoomahae ka i ke aoao Lahui. Hu ka aka ia lakou nei.
Ma Haimoeipo i ka Poalua iho nei, ua lawe aku la ka Haku i ke ola o kekahi kamaiki opio, nona na malama elima, eia ka ka Haku: O Kana mea i aloha ai, lawe oia i ka wa opiopio. E hoomaikai ia ka inoa o Iehova.
Ua lohe mai makou, ua waho ia ae imua o kekahi kanaka he papainoa o na alii a me na lunamakaainana, i kakau ia e kekahi ilikea, a i aku la, eia na moho e ola ai Hawaii; nolaila, ke hoike aku nei makou ia oe, he moo nihoawa oe, hele pela.
----
HE WEHI NO KA LAHUI.
Kaulana e “Ka Leo o ka Lahui”
O ke koo wiwo ole a o Hawaii
Nana e kuekaa pau mai nei
Na mea huna pohihihi
Hilihewa na hana a ka lokoino
Ua ike ia hoi e ka lehulehu
E ala Hawaii moku o Keawe
E eu e Maui moku o Kame
Ku mai Molokai nui a Hina
Aia Lanai i ka ehuehu
Oehu Oahu Kakuhihewa
Kii’na Kauai o Kalanipo
O ka po le’a nei o Halalii
Kakou a pau i ka lokahi
Hookahi puuwai e ka Lahui
A puka i ke ao malamalama
Malama Hawaii i ka maluhia
I mau kou Hae Hawaii nani
E koho kakou me ka loahi
Na moho kaulana a ka Lahui
Hui mai kakou a pau loa
Hookahi puuwai e ka lehulehu
Kapa ia aku e ka lokoino
A na luna kolea o Kahiki
Hiki mai e ka lono i ka lahui
Hoohui aina ua hana ia
He kuikahi hou ko Hawaii
He Haawi aina ua hiki mai
E ku kakou me ka lokahi
E hopu i ka Balota Lahui
I ola Hawaii a mau loa
A ili a kau kau i ka hano
Hanohano Hawaii i ka’u ike
Ka hoku hele o ka Pakipika
Hea aku makou o mai oe
O ke koo wiwo ole o ka lahui.
Hakuia e Puaawaialoha.
-----
HOOLAHA.
E pani ia ana ka uwapo o Waikiki e hele aku ai i Kapiolani Paka, i na kaa o na ano a pau, ma ka Poaha a me ka Poalima, Nov. 19 a me 20. H. F. HEBBARD.
327-3ts. Luna Alanui, Honolulu.
-----
HOOLAHA PA AUPUNI.
E ike auanei kanaka a pau, eia ma ka pa aupuni o Makiki kekahi mau lio helehewa. Lio k melemele kikokiko keokeo ma ka lae, elua wawae keokeo hope, elua wawae eleele mua, paa na wawae i ka puai hao, hao kuni ano e ma ka aoao akau o ka a-i. Lio k elaula, 4 wawae keokeo, kiko keokeo ma ka lae, hao kuni ano e uha hope akau. O ka mea a mau mea nona keia mau lio, e pono e kii koke mai o ha la na la he 15. e kuai kudala aku no au ke hiki aku i ka la 28 o Nov. M. H. 1891. D. KAOAO.
323-dtf. Luna Pa Aupuni.
-----
ILIO NALOWALE
Ma ka po o ka Poalima la 6 o Nov., 1391, he ilio opiopio nona na mahina elima, he kalakoa kona hulu, he keokeo me ka hamelemele ano moo, ua eha ia kona uha hope akua, ua ano ola nae. A o ka mea e hoihoi mai ana i keia ilio ma Leleo, e loaa no iaia ka uku makana o $3.00. HEIL J. KAPU.
Leleo, Honolulu, Nov. 10, 1891.
321-4ts.
------
OLELO HOOLAHA
E ike auanei na kanaka a pau, eia mo ka Pa Aupuni o Makiki, kekahi mau lia hele hewa; lio k melemele, keokeo lokihi ma ka lae, huelo poemuku, 2 wawae eleele mua, 2 wawae keokeo hope; hao kuni R. H uha hope akau. Lio k eleele keokeo lokihi ma ka lae, 1 wawae keokeo hope hema. 3 wawae eleele; hao kuni D. hope akau. O ka mea a mau mea nona kela mau lio e pono e kii koke mai o hala na la he 14 kuai kukala aku no wau ke hiki aku i ka la 31 o keia malama, ma ka hora 12 o ke awakea Poaono.
David Kaoao.
Luna Pa Aupuni.
Oct. 20, 1801. 304 3td.
------
OLELO HOOLAHA HOOPAU HOPE.
E ike auanei na kanaka a pau ma keia, mai keia la aku ua hoopau loa aku au i ko H. C. Ulukou noho Hope ana no’u ma na ano a pau loa e pili ana i ka malama ana ka hooponopono ana a me ka ohi ana i na auhau o ko’u mau waiwai a pau loa maloko nei o keia aupuni. O na poe a pau loa e paa ana he mau waiwai no’u ma ko lakou lima, e hoihoi ae lakou ia’u ponoi ma ko’u wahi noho ma Honuakaha ma Honolulu, Oahu.
KAPIOLANI.
[Ma o Jos. Nawahi la.]
Honolulu Oct. 31, 1891. 314-d3m.
------
HOOLAHA KUAI AINA.
Mamuli o ke kauoha’a Hoa, ke hoike ia aku nei ka lohe i na mea a pau, ua makemake maua e kuai aku i kona kuleana aina a pau loa iloko o kela anana aina e waiho la ma Haiku, Hamakualoa, Maui, nona ka Palapala Sila Nui Helu 183. no W P. Alekanekero i lilo mai i ke kahi noe hui. E loaa no na kuka ana no ke kumukuai me maua ma Honolulu.
NAWAHI & HUNTSMAN.
323-d1m. Na Loio no Hoa.
------
HE HOOLAHA I KE AKEA.
E ike auanei na ano lahui a pau, e noho ana ma ke Aupuni Hawaii, mai na kane, wahine , a me na keiki; i loaa i na ma’i o kela a me keia ano, e nane mai i ko’u Keena hana, a na’u e hoopau aku i na ehaeha a ka ma’i maluna o oukou e na makamaka, he hiki ia’u ke lapaau i na ano ma’i a pau, ma’i iloko o ka opu, hu’i ke kino, aki iloko o ka iwi, eha o ke poo, ma’iwahine a pela aku. Mai hoololohe aku e na hoa, hele mai hookahi, hele mai elua, hele mai no a pau loa; he oluolu ka auhau, ke hui me ia ma na kuaki olelo ana; ua mokuukau wau e pulama mai i na kono ana mai mai na Mokupuni mai me ka eleu a me ka hikiwawe loa, he makamaka a he hoaloha maikai no oukou e na Hawaii.
Owou iho no,
DR. LEONG KENG PONG.
Helu 40, Huina o na alanui Kamika mo Hotele, Honolulu, Oahu. Aug. 31. 1y
------
Aila Kuai.
E LOAA NO MA KAHI O
J. F. COLBURN.
( KEONI KOLOBANA.)
Ma ke Kihi o na Alanui Nuuanu me Moi.
E loaa no no ke kumukuai haahaa loa e $2.50 o ka pahu. Hele mai hookahi, hele mai elua, hele mai no a pau.
Ko oukou hoaloha,
J. F. COLBURN.
Honolulu, Iulai 3, 1891. 282 dtf
------
KUAI HOOPAU NEE
Mai keia manawa aku a hiki i ko Makou nee ana aku iloko o ko makou
HALEKUAI HOU
Ma ke Alanui Papu,- (NA HALE BURUA.
E hoolilo aku ana Makou i ko Makou waiwai a pau o na ano Lole:
NA LOLE NANI,
NA LOLE I HUMUIA.
KAPU A ME PAPALE.
PAHU LOLE, a pela aku.
No na Uku Hooemi Loa Nae,
Egan & Gunn.
ALANUI MOI kokoke i ke ALANUI PAPU. tf-d.
-----
Na Paikini Hou
Na Paikini Hou
O NA ANO A PAU, E KINIKOHU AI O KE ANO AHIAHI, E LOAA NO MA KAHI-
Chas. J. Fishels,
KIHI O ALANUI PAPU A ME HOTELE,
Ko makou halekuai hoopau nui, ma o MR CHAS. J. FISHELS la, he mau waiwai hou loa ko makou, i loaa mai nei mai ka hikina mai, o na ano like ole he nui wale. Eia ma ko makou halekuai nei na pua lole e linohau ai o na Keonimana, a luhiehu o na Lede, na aulii o na Kamalii-
Na KINAMU Na ALAPIA
Na KALAKOA Malina Na KIHEI Silika
NANAHE o na ano he nui A pela wale aku.
E linea pau ia aku ana keia mau waiwai a pau imua ou, aole hoi o oe wale o na Lede kekahi, pau pu aku hoi me na keiki, nau e wae nou iho i na anoai a kou puuwai, eia ka papa lohi o Apua la, ke anapa nei ka wai liula i Mana.
E hele mai i hookahi, e hele mai no a pau loa, mai ke nui a ka liilii.
Chas. J. Fishels.
356-tfd. Halekuai alakai o na kumukuai haahaa loa.
-----
Na Waiwai Hou!
Na Aulii Hou!!
NA PAIKINI HOU O KEIA KAU HOOILO O KA MAKOU IA LA AULII KOLOMANU KUU KE PAI HAA KA HAAWE NANI WALE KA IKE I NA MEA NANI O KA HAU OKI O KA AINA GULA O KALEPONI- MA KA HALEKUAI WAIOLU NAWE MALIE O-
N.S. SACHS.
He oia mau no ka emi o ke kumukuai o ko makou mau waiwai, a oia ke kumu o ko makou paa mau ana i ka hana- A he wahi puka iki ko makou e kaa mau nei- Eia he heluna hou o na waiwai hou, ka makou o na ano like ole- Na MA KALENA lau, a me na MAKALENA puu, o kela a me keia ano, o ke ano maikai loa.
Mai Puiwa Oukou! Mai Puiwa Oukou!!
EIA IHO KA PAPA LOHI O APUA, NA LOLE AAHU O NA LEDE I HANA MIKIOI IA MAI A AULII.
Na Muumuu o na Lede 40 keneta; Palekoki aulii o na Lede 50 keneta; Na luhiehu o ke ano ahiahi $1.00; Na Kihei kaekae huihui 40&50 keneta; Na Kawele hoomaemae ili o na Lede 60 keneta; Na Kaliki molina maikai loa 50 keneta, Na ai kini hou o na wahine ma ka hoopaa ana ia loko 50 keneta; Na Kakini lilina pahee o na Lede, elua paa no ka 25 keneta.
NA PAIKIN AULII O NA KEIKI, NO NA KUMUKUAI HAA LOA, A EMI NO HOI.
Na aahu keokeo o na keiki 75 keneta; Na lole komo o na keiki 3 paa $1.00; Na Papale aulii o na keiki 25 keneta; Na kaliki o na kaikamahine 40 keneta; na a-i kala o na keikikane 25 keneta, na Muumuu o na pepe 25 keneta; na Papale Lilina maikai o na kaikamahine he 50 keneta, mamua he $1.00, na Papale aulii o na keikikane he e50 keneta, mamua he $1.00.
NA PAHOEHOE HULU PAHEE! NA PAHOEHOE HINUHINU!!
Ua piha u ko makou haleuai nei i na waiwai like ole o na ane a pau, o na hulu hoonani o na papale o na iwa maka onaona eia ia ia makou nei la, ke hihi o lua nei i Moeawakea, he eleele, he ahiehie, a nau e wae e like me kou makemake, he $1.00 wale no o ka lala hookahi, mamua he $2.00. O na papale kula o na hua pala, he kau maoli no ka iwa he la makani, eia la ke ahu a lala kokui mai nei. E hele mai e ike kumaka i ka nani e alohi nei, he ole hoi ka lohe pepeiao, hele mai na makua me na keiki pu mai no, e wae oukou no oukou iho. He mahopono kena i ike ole ia kona lua, oiai, o keia kuai he haawi wale no. O na ano no a pau, he aulii maoli no. O ka papale no hoi keia o na keikikane, he pani’o ia la ke nana aku oe, eia he 50 keneta wale no ke kumukuai. E loaa, no ma kahi o
--: N. S. SACHS:-
318-dtf. 104. Alanui Papu, Honolulu.
-----
HOOLAHA HOU
B.F. Ehlers & Co- PAINAPA
HELU 99 Alanui Papu.
IA OUKOU E NA MAKAMAKA A ME NA HOALOHA: OIA HOI UA makaukau makou i ke kuai hoopoho aku i na lole paa Wahine, Kane, a me na Kamalii, oiai, e hoi mai ana o B. F. Ehlers me na lole hou ma keia moku na al a oia ke kumu o ko makou kuai hoopoho ana, i kaawale ai na wahi no na LOLE HOU.
E kipa mai e na makamaka, i hoopau ia ai ko oukou kanalua no ka makou kuai hoopho aku ia oukou. Owau me ka oiaio
B. F. EHLERS & CO.