Ka Leo o ka Lahui, Volume II, Number 302, 15 October 1891 — Page 3

KA LEO O KA LAHUI.

"E Mau ke Ea o ka Aina i ka Pono."

 

Bila Kamaa Ole.

 

            Ma ka Poalua nei i hana ia ai ka hinia o Bila Kamaaole imua o ka aha kiure, ua puka mai ka lakou olelo hooholo e hoahewa ana iaia. O Mr. Nawahi ka loio o ka mea i hoopii ia. Ua hua'i pau mai no hoi oia i na mea i hana ia e ia, malalo nae o ke kuhikuhi a kekahi mau haole o McGiffin me Hale Juen. O keia inoa hope, he kapena makai ia i hoopau ia iho nei, a i na manawa a pau ana e aihue ai e kiai ana kekahi o laua, a o na mea a pau ana e lawe mai ai, e hoike mua aku ia laua a loaa mai kona uku he elima dala, a o ke dala, ua lawe ia aku, a o na mea liilii e ae e haawi ia mai nana.

            O ke kumu ka o keia aihue ana, i mea ka e hoohaule ai i ka inoa o ko kakou Ilamuku, a o ke kumu ka o kona loaa ana, no ka hoopau ia ana ka o keia Hale Juen mai ka oihana makai mai.

            He ha'oha'o ia no paha ka loaa ole o keia aihue, eia ka auanei, na kekahi no o na makai e alakai a e kuhikuhi ana keia hana ino, i mea e waia ia ai ka inoa o ka Ilamuku. Me he la, ua manao oia, oia ke kupono ma ia wahi.

 

NUHOU KULOKO.

 

            I ko makou mau luna lawe nupepa, ke hoike ia aku nei ka lohe ia oukou a pau, o ka luna a mau luna paha he koena pepa "Ka Leo" ka lakou o ka la 2 a me ka la 6 o Okatoba nei, e hoihoi mai ma keia keena.   Ma ke Kauoha.

            E wehe ia aku ana ma ka luakini o Heremona, Kalihi, e ka "Hui Lei Ahihi Imi Pono Karistiano," ma keia Poaono ae, hora 7 pm, he aha mele hoikeike Huna Gula Baibala, no ka pomaikai o ko lakou punana hoomana. E naue ae e na makamaka ake hana maikai.    300-d4ts.

            I ka la 11 iho nei o keia mahina, mai ka puhaka mai o ka wahine a Mr. Chas. Lucas he kaikamahine mohaha.

            I keia no e haawi ai ka hui keaka Silibona i ka lakou mau hana akamai ma ka Hale Mele Hou. Aia ma kahi o L.J. Levey e loaa ai na tikiki.

            Ma keia ku ana mai a ka iwalani, ua lohe ia mai ka nui o ka ino ma kona inau awa i holo aku nei, a ua lilo aku kekahi o kona mau heleuma.

            E haawi ia he hoikeike ku'iku'i puupuu ma ka hale inu rama Commercial i ka po Poaono, mawaena o Mike McCarthy me James Barrington. Ma ka Auseteralia mai nei keia mau kaeaea hoolei puupuu.

            Ua ano poloke iho la na mea hana o ka hale hana kukui uwila ma alanui Moi i kela po aku nei, o ke kumu, ua ho-o kolohe ia e kekahi mea manao ino i ke kopa iloko o ka mea pauma mahu, a mai lilo paha keia wahi mea uuku a ke kolohe i manao ai he mea paani wale no i mea nui. He $100 ka makaua ke loaa ke kolohe.

            He eono ae nei pule i hala, ua loaa aku la kekahi Iapana ua li ia ma Paauhau, Hawaii. Ua manao ia, na kekahi mau Iapana no o lakou keia mau hana; a ka lohe pu ia mai no hoi, ua loaa aku kekahi Iapana ua make iloko o kekahi pahu wai ma Maui. Maumau-a mai nei keia hana mawaena o keia ano lahui.

            He nui na ohua kamaaina o ke kaona nei i huli hoi mai nei ma ka mokuahi o ka Poalua nei, a o Mr. L.A. Kakina kekahi i huli hoi pu mai nei.

 

HALAWAI KOMITE KUMAU

KUMAU HUI KALAIAINA.

 

            Ke poloai ia aku nei na lala a pau he 15 o ke Komite Kuwaena o ka Hui Kalaiaina, ma ke ahiahi Poakolu o ka la 20 o Okatoba, ma ka rumi Robikana, kihi o na alanui Moi a me Nuuanu, maluna. E hiki mai na hoa a pau, a ina e haule kekahi hoa, na ka Peresidena e hoopiha ia makalua, oiai, he hana ano nui loa ko ia po.           302-d5ts.

 

E HOAKOAKOA E NA MEKANIKA A ME NA PAAHANA.

 

            E malama ana ka Hui Mekanika a me na Paahana i kekahi halawai ma ka rumi halawai Robikana, kihi ewa o alanui Moi a me Nuuanu, i keia ahiahi Poaha, Oct. 15, hora 7:30. Ke poloai ia aku nei na hoa a pau e hele mai, a ke poloai pu ia aku nei no hoi ka lehulehu,

            Ma ke Kauoha.

 

Haule!  Haule!

$5.00 Makana  $5.00 Makana.

 

            E haawi ia no keia uku makana i ka mea e hoihoi mai ana i kekahi pale-noho ili noho paniolo i haule i ka piina ana mai o ka Nuku o Nuuanu. E hoihoi ia mai ma keia Keena ke loaa.          286 1w.

 

OLELO HOOLAHA.

 

            Owau o ka mea nona na aina o Makailio, Kamakalalaukaio, Kaluaopalena, ke papa akea aku nei i na mea a pau aole e hele wale maluna o ka aina, a aole hoi e kuai i na loi ai oo a me loi opiopio, me ka hele mua ole mai e kuka pu me a'u. O ka poe a pau e kue ana i keia olelo, maluna no o lakou ko lakou poho. MELE AKONI ROSE. Aug. 4, 1891.   251  3m-d*

 

NALOWALE

 

            Ua haule ka Buke Banako Hale Leta Helu 2222. E oluolu i ka mea e loaa ana e hoihoi mai ma keia keena pa'i.            247-tf.

 

NAWAHI ME HUNTSMAN

NA LOIO LAHUI!

 

            Ua makaukau maua e kokua aku i na poe o ka Lahui i loohia ia e na pilikia kiviia a hewa paha; a e koi a e hoopii aku ma kekahi o ia mau ano imua o na Aha Kanawai, mamuli o na uka i ae'ike ia. Aia no ko maua keena Loio ma ke kihi akau o na alanui Moi a me Alakea maloko o ke kulanakauhale o Honolulu. Na hora hana mau, mai ka hora 9 am, a 3 pm, ma ka Poaono nae, e pau ana i ka hora 12 m.

 

HOOLAHA KAI KONOHIKI.

 

            Ke pa leo aku nei ke Konohiki o Waialae, i kona mau hoaloha a me ua hoahina o kona Aina, ua hoolimalima aku oia i ke kai i keia manawa, a na hookapu iho oia i ka hee nona iho, a nolaila, ko poloai aku nei oia e ike a hoomaopopo i keia leo la.       Owau no, PAULO ISENBERG.       3ms-d.

 

LEI PU-PU!  LEI PU-PU!!

 

            Ua makemake ka Hui o Haka ma, i 100 Le-i Pu-pu i hakuia, mai ka elua a ekolu papa o ka lei hookahi. Ina o ka poe e loaa ana o keia mau lei, e hoike ae ia

            Haka Ma.

            Hale Aiwaihau, alanui Hotele.

            Sept. 23, 1891.  286-d3ts.

 

OLELO HOOLAHA.

 

            E ike auanei na kanaka apau, eia ma ka Pa Aupuni o Makiki nei, kekahi lio hele hewa, lio w, ulaula, 4 wawae keokeo, kikokiko keokeo ma ke kua, kiko keokeo ma ka lae hao kuni ano-e hope ak. O ka mea a mau mea nona keia lio, e pono e kii koke mai, o hala na la he 14 e kuai kudala aku no au ke hiki aku i ka la 17 o Okatoba 1891.

            D. Kaoao

            Luna Pa Aupuni.

            Honolulu, Okatoba 5, 1891.   d-3ts.

 

Hoolaha Hookapu.

 

            Ke hoike ia aku nei ka lohe i na ano kanaka a pau loa. Ua hookapu loa maua i ko maua mau Apana Aina ekolu i kapaia o Kalaheo, Kahaleula a me Puuoihala, no lakou na eka 202 e waiho la ma ka Paa, Kailua, Koolaupoko, Oahu, i hoolimalima ia e maua mai ia Keleau (w) mai. Nolaila, ke papa loa ia aku nei na holoholona o kela a me keia ano, aole e hookuu wale ia maluna o ua mau Apana Aina la, a o ka mea a mau mea paha e kue ana i keia, e hopu ia no e maua, a i ole ia, e ko maua mau hope paha, a e hooko ia e like me ke kuhikuhi a ke kanawai. O na poe a pau e makemake ana e komo iloko o keia Hui, e pono lakou e hele mai e hui pu me Mrs. C.I. HIRAM, a i ole ia, me DAVID DAYTON, a i ole ia KUKA.

            Owau no me ka haahaa,

            MRS. C.I. HIRAM.

            Honolulu, Oahu, Oct. 8, 1890.           3ms-d.

 

KALOA & WAINEE.

NA KAMANA HUI KUKOLU HALE.

(Me ka uku haaha.)

 

            O na kauoha mai na mokupuni mai, e hoauna pololei mai i na mea no laua na inoa maluna ae, a e loaa no maua i kela Hale Hou ma ke kihi o na Alanui Nuuanu me Kukui ma Honolulu.

            S.K. Kaloa. & Geo. Wainee.   w-4ts Sept 11, 1891.

 

Kauka Yong Kam Pung.

(APANA.)

Helu 53, Alanui Maunakea.

Ke Kauka Loea o ka Aina Pua!

 

Ua hiki ke hoola ia kela a me keia ano ma'i, mai ko na kane, wahine a me na keiki liilii. O na ma'i ha-no ua hiki loa ia ke hoola ia me ka maalahi. A o na ma'i e pili ana i ka maka pau pu ia i ke ola. Ke hoike ia aku nei, eia ke ola ia nei, me ka oluolu pu o kahi auhau. Ka poe pilikia hanau keiki a hele nui paha o ke koko, a paa a lohi paha ka hanau ana, paa paha o ka waiu, e hele nui mai i o'u nei.

            E KIPA mai e ka noe i hooluuluu ia me na haawina pilihua a ka ma'i, a na'u oukou e hooluolu aku.

            KAUKA YONG KAM PUNG.

Honolulu Sept. 2, 1891.          272-d3m.

 

I KA LEHULEHU HAWII

 

            Ke hooiaio aku nei ka mea nona ka inoa malalo, ua hoolaia ka'u wahine mai ka pilikia hoomailo a ka ma'i kokopaa, ka'u keiki elua makahiki hoi mai ka aneane loa ana e make i ka ma'i emi pu wale no o ke kino, oia hoi ka pilikia ai maloko o ke kino. Mai ke ola ana o ka ma'i a hiki i keia la, aole i hoea hou mai na pilikua o ia ano. Ke kono nei au i na makamaka Hawaii o'u e hele ae ia Kauka Apana (Yong Kam Pung) a e loaa no ka maha. Mai kanalua ma na ano elua -- oia ka oluolu o na pilikia ma'i a me ka haahaa o na auhau ana.            Me ka oiaio,

            P.N. AEA.

 

KUAI HOOPAU NUI.

Mai keia manawa aku a hiki i ko Makou hoonee ana aku iloko o ko makou

HALEKUAI HOU

Ma ke Alanui Papu, --(NA HALE BURUA.

E hoolilo aku ana Makou i ko Makou waiwai a pau o na ano Lole:

            NA LOLE NANI.

            NA LOLE I HUMUIA.

            KAPU A ME PAPALE.

            PAHU LOLE, a neia aka

No na Uku Hooemi Loa Nae.

            Egan & Gunn.

ALANUI MOI kokoke i ke ALANUI PAPU.          tf--d.

 

Poino i ka Wai!

POINO I KA WAI!

 

            E hoomaka ana keia mawaena o keia la a me ka Poalua a hiki mai o keia pule ae, me ka nana ole ia o na lilo.

            N.S. SACHS.

            Honolulu.        263-dtf.

 

HOOLAHA HOU

B.F. Ehlers & Co --PAINAPA

HELU 99 Alanui Papu.

 

            Ia oukou e na makamaka, a me na hoaloha, oiai hoi ua makaukau makou i ke kuai hoopono aku i na lole o na Wahine, Kane a me na Kamalii, oiai, e hoi mai ana o B.F. EHLERS me na lole hou ma keia moku mai a oia ke kumu o ko makou kuai hoopoho ana, i kaawale ai na wahi no na LOLE HOU.

            E kipa mai e na makamaka, i hoopau ia ai ko oukou kanalua no ka makou kuai hoopoho aku ia oukou.            Owau me ka oiaio,

            R.F. EHLERS & CO.