Ka Leo o ka Lahui, Volume II, Number 297, 8 October 1891 — Page 2

KA LEO O KA LAHUI.

"E Mau ke Ea o ka Aina i ka Pono."

 

MA KE KAUOHA.

            Ua hookohu ia i keia la o Mr. S.E. Kaiue i Komisina Ala Liilii a me pono wai no ka Apana o Wailuku, Mokupuni o Maui. ma kahi o Eugene Bal i waiho mai.

            C. N. SPENCER, Kuhina Kalaiaina. Keena Kalaiaina, Sept. 30, 1891. 293 3tsd.

 

            I kulike ai me ka Pauku 1, Mokuna XXXV o ke kanawai o ka makahiki 1888. Ua loaa ia ke kuleana e mahele i na Pa Aupuni o Kekaha i elua apana, o kekahi apana aina aupuni makai o ke alanui aupuni o Kamanamana ma Kaloa Kona Akau, Hawaii.

            I kulike ai me ka Pauku 2, Mokuna XXXV o ke kanawai o ka makahiki 1888. I keia la, ke hookuhu ia aku nei o Mr. C.K. Kapa, i Luna Pa Aupuni no Kamanamana, Koloa, Kona Akau Hawaii.

            C. N. SPENCER. Kuhina Kalaiaina. Keena Kalaiana, Sept. 29, 1891. 291 3tsd.

 

KA LEO O KA LAHUI

JNO. E. BUSH.

Lunahooponopono a me Puuku

 

POAHA, OKATOBA 8, 1891.

HALAWAI HUI KALAIAINA

            E halawai ana ka Hui Kalaiaina ma na ahiahi Poalima a pau o kela pule keia pule, ma ka hora 7:30 P.M., maluna ae o kahi o Robikana, ma ke kihi o na Alanui Moi a me Nuuanu.

KEKAHI JIURE

            O keia inoa maluna ae, oia kekahi o na jiure i hoohiki ia no ka noo noo ana i ka hihia laibila o ka Hon J. E. Bush. Mahope o ka hoohiki ia ana, ua ninau ia aku e ka loio o ka mea i hoopii ia, ua ike no anei oe he kaikoeke o Wanabaga no Soper, ua nana pololei aku la ia i ka mea nana ka ninau, a hoole aku la, aole au i ike, ninau hou ia aku la ina ua ike a i ole, lohe paha ia ua hoopii ia o J. E. Bush no ka laihila, ua nana pololei aku la kona mau maka me ke kuoo a hoole aku la no, aole ia i lohe. Ea, heaha la ke ano o keia kanaka, he kuli paha a he makapo paha, pehea la e hoohalike ae ai. Ua loihi kona noho ana me Mr. Soper, o kona lohe ole iho la no ka ia he pili o Wanabaga ia Soper, a eia no hoi, ke lawe nei ia keena he 15 kope o ka LEO, a o ka ike ole iho la no ka ia no ka mea e pili ana i ka hihia o ka Hon. J. E. Bush, me he la no hoi he wahi mea uuku ae nei, oiai ua hoolaha ai aku ma keia pepa, ka haiolelo a ka Loio Akepoku i ke Kau Jiure i hala a ua lohe na kuaaina a ua komo ma na nupepa haole, a o keia keiki hookahi paha kai lohe ole, haohao makou o keia mea, o ke ano kanaka e like me keia nohea, aole ia i kupono e koho hou ia ma ka papa kiure, oiai aole ia i ike i kana mea e olelo ai, a he hoopoino wale iho no ka ae ia ana o keia ano kaaka e noho ma kahi o ka poe i hanau piha ia.

 

NO HILO MAI

            Ma ka po Poakahi, Sept. 28, haule iho la ka uwapo o Honolii ilalo, mamuli o ka popopo o ka kaola a me na iwikaele, a o na holoholona, aole e hiki ke hele aku a hele mai, he hiki no nae ke kanaka.

            O kekahi mau luna aupuni o Iliolo taona nei, no lakou na uku malama pokeokeo, aohe lawe i ka wai o ke aupuni mai na paipu mai; aia no ke kii la ka waieinu i Waikapu, a mai na pahu wai mai no hoi. O ka nui o ka poe lawe wai, he poe e ae, a he poe hoopukapuka ka imi pono, na lakou e kokua aku nei i ke aupuni; ma ka haawi ana i uku wai i ka makahiki.

            I ka la 3 o keia mahina i ku mai ai ka Hon. S. L. Austin mai Amerika mai; oia pu no me ka ohana; ua hele wale no hoi a, puuoo, i ke kilihune mau a ke anu o Omaha. Oia nei kekahi o na Lunakanawai kaapuni o keia Mokupuni; he mau malama aku nei i Amerika i ka hooluolu, a o ka pe ana kai Hawaii aloha.

            I ka hoike ia ana aku o kekahi pepa Komite i pa'i ia, i kahi luna aupuni o Hilo nei, no ka nonoi ana i na kokua aloha a ka lehulehu, no ke kukulu ana i halepule no ka Ekalesia Moremona, pinana mua ae la ka ihu o ua luna aupuni nei, a hemo iho la na huaolelo makona mai na lehelehe iho.

            Ma ke ku ana mai a ke Kalaudine i ka la mua o keia malama, i hoi mai ai ke Kahu o ka Ekalesia o Haili, Mr. S. L. Desh mai Honolulu  mai. Ua mehameha loa ia oia. Ua hala loa ka wahine ma o; ua noho aku nei kana wahi kamalei i ke Kula Kamehameha, a ua koe hookahi wale iho no oia. Owai o na lede i oluolu e hoolaukanaka i kona alo neoneo, a e kokua aku hoi iaia ma ka oihana pookela o ke ao nei?

            Ma ka po Lapule nei, ua haiolelo ae maloko o Haili, he haole malihini, he haolo kaulana i ka hakaka no kekahi mau makahiki; a ua kalole ae kona manao, mai na hana ino ae a i na hana maikai. Piha ka halepule i ka poe hoolohe i kana mau olelo, a o kahi hemahema hoi, oia kona haiolelo a loihi loa, alaila, unuhi ia mai la, he uuku wale no ka mea loaa mai i na pepeiao Hawaii.

            Ma ia po hookahi no, i ka wa a kela haole e haiolelo ana, ua ike ia aku la kekahi mau luna aupuni, e hele ana iwaho; eia ka e hele ana e hoomakaukau i upena no kekahi Kepani hana dala hoopunipuni a ua hopu ia a paa.

 

NA MEA HOU O HILO-WAENA

            Mr. Lunahooponopono;

                        Aloha oe:

            E ae moi kou hanohano, no ka'u mau wahi mea hou, kekahi wahi o kau nupepa.

            Eia ma Papa'ikou kekahi Kauka o Kauka T. C. Wiggins kona inoa, ke hana nei oia ma kana hana, o ka malama i ka Hui o Onomea Sugar Co. Ma kana lawelawe apa, ua hapa loa ka make o na Iapana o keia hui, aole peia i ku wa o Kauka J. William, e noho nei ma ke kulanakauhale o Hilo, he 2 a 3 make iloko o 4 malama.

            O ka poe maloko o keia hui, aole aole hana, a he 10 a oi makahiki i kau ia ai e ka ma'i, iaia nei, hookahi no malama i ai ai i ka laau. Ua kaawale ia haawina mai ia lakou aku, a ke hana nei lakou i ano liko ka ikaika me mamua.

            A ke puana ae nei keia makakila, ua ola makou, ua loaa ke kanaka makaukau a makee i keola o ke kanaka.

            O ke ano o kana laau, he hiki loa i na keiki omo waiu ke ai, me ka ike ole ia he mulea laau, he mikomiko kopaa wale no, a o kana mau olelo hoolana manao, oia keia:

            He hiki no i kekahi mau kauka i hiki ma Hawaii nei ke lapaau a ola ka ma'i lepera, ina ma ka ma'i ka uku o ke kauka, aole e uku ke aupuni, ke ola ole nae ka ma'i.

            O Kauka Luka, wahi a ia mai, oia kekahi kauka kuokoa me kana oihana, oiai lakou e noho ana ma ke kula ao kauka ma Nu Ioka, a he makaukau i hiki ole ke kulai ia ma Hawaii holookoa nei, a ke kii mai nei na haole o ke taona, a me na kuaaina aku nei ia Kauka T. C. Wiggins e lapaau ia lakou.

            Na Lunamakaainana holo balota o Hilo-waena nei, he umi ko lakou nui, aole paha oia ka huina, ei aku paha imua, o ka huina nae keia i lohe ia a e liki mai nei i ka lakou pala, ke hele i'o. Elua Lewi, a he ake inoa kekahi poe, a heaha la kekahi poe, aka, na ka Poakolu mua o Feberuari e hoike mai, a e hoike aku no wau i ko lakou mau inoa oakahi ma keia mua aku.

                        Kou oiaio,

                        J. Kahaina.

 

NUHOU KULOKO.

            I keia Poalua ae, e ku mai ai ka mokuahi Ausetaralia mai ka aina gula mai o Kaleponi.

            O ka hihia o Lui Self no ka hihia pili waiwai cifa, ua hoahewa ia e na kiure ka mea i hoopii ia.

            He onawaliwali ko ke Kuhina Kalaiaina i keia mau la, a aole oia i hoea ae ma kona keena oihana.

            He paina manawalea hou ana no ke haowi ia ana e ka hui kaa ahi ma keia Poaono iho, no ka pomaikai o na mea a pau.

            Ua ku aku ka mokukaua Kaletona ma lokohama, i ka ia 21 o Sepatemaba. He 18 o na lo holo mai Honolulu aku nei.

            Ua ku mai ka mokupe'a S. G. Wilder mai Kaleponi mai, a maluna mai nei ona i loaa mai ai na nupepa, a ike ia iho ai hoi na mea hou o na aina mamao.

            Ma ke ahiahi Poaono, ma ka Y.M.C.A., e haawi aku ana ka Hawaiian Camera Club, i kekahi o na hoikeike kii hooleleaka. He hapalua ka uku komo.

            I ke kakahiaka o nehinei, i ku mai ai ka mokuahi Kelaudine mai Hilo Hanakahi mai, a i keia Poalima iho no, e holo aku ai oia no kona mau awa maa mau.

            Iluna o ka manuwa Penesecola ke Kuhina Nui me ke Kuhina Waiwai i ke kakahiaka Poalua nei; a i ko laua huli hoi ana mai, ua ki ia mai he 17 pu no ko laua hanohano.

            O ka hihia o Mrs K. Lazarus no kona hoeha ana i kana kaue, ua lawe ia ae imua o ka Aha i ka Poalua nei, a ua puka mai ka olelo hooholo a na kiure, e hookuu ana i ka mea i hoopii ia.

            Pakele mai halawai he kolo ihu o kekahi wahine me na paia hoanoano o Kalakaua Hale ma ke ahiahi Poalua nei, e ole na lima kokua o ka naau aloha, pakele ai. Ma Kamanuwai ae nei no keia mau hana hoopauha.

            Ua lohe mai makou, ua hookuukuu puna iki iho la kekahi mau opio, oiai laua e koele wawae ana ma ko laua alahele no ka home.

            Nui ka haunaele ma Kamanuwai ma ka auina la Poalua nei, ma ka aoao ma ewa o ke alanui Nuuanu, o ka hele ia o ka haunaele a hu ma waho o ka palena kupono.

            E hoololi ia ana na moku kaua e kiai la i na pono lawaia o na Panalaau o Enelani ma Amerika, e kiai ana ma Halafax. He mau moku ikaika aku, a ano hou ke hoihoi ia aku ana ma kahi o na moku kahiko.

            O Balmaceda, ka Peresidena mua o Kili i pio mai nei, ua lawe ae ia i kona ola, no kona ike no, aole ia e ola ke loaa mai i kona poe enemi, oiai hoi, e imi ia ana na wahi a pau no kona loaa, nolaila, ua lawe ponoi ae ia i kona ola ma ka poho o kona luna. O ka leta kana i waiho iho mahope na kona makuahine a me kana wahine, e hoike ana i kona aloha me ke kumu o kona make.

            Ma ka Poalua nei, ua kahea ia aku la o Bila Kamaaole e ka aha, a ua ninau ia aku ina he loio kona e pale mai ai ma kona aoao, a ua hoole aku la ia. Aole anei ou mau hoaloha? wahi a ka ninau; he mau hoaloha no kona a o ke kumu, wahi ana, i loaa ole ai kkona loio no ka manawa ole. A ua lohe ia aku la kekahi loio e hawanawana ae ana i ka mahele olelo ina he makemake ia i loio, a ua hoole mai ia oia ponoi ana no ke kupale aku ana no kona hihia.

 

He Kuai Nui Hoopau aku.

E HOOMAKA ANA I KEIA

POAONO, AUGATE 1, 1891.

Ua Lilo ko makou Waiwai he mea Mehai wale!

 

Ua Hoemiia ke Kumukuai ilalo, aole i ko Makou Pono, aka nou no-

 

Papa Kumukuai no 30 La wale no:

 

200 paa lihilihi keokeo puka aniani……………………………………………………………………………………………….$            .90

20 i-a Kalakoa maikai…………………………………………………………………………………………………………….                                                                                                                                                                                               1.00

12 keokeo 1 i-a laula………………………………………………………………………………………………………………     1.00

8 keokeo 1 i-a laula………………………………………………………………………………………………………………..   2.00

@ kakini lakeke o na Kamalii huluhulu……………………………………………………………………………………………  .45

93 kakini ka'e waihooluu o na wahine…………………………………………………………………………………………….    .05

Huluhulu no na paa lole kupono, .25 koneta o ka i a, e kuai no makou i keia

            mau la no 7 i-a no…………………………………………………………………………………………………………    1.00

Papale Kula o na Kamalii………………………………………………………………………………………………………….       .25

Na Kawele aunui, 2 no…………………………………………………………………………………………………………….           .25

Kakini eleele maikai………………………………………………………………………………………………………………. .25

Na Papale i kahiko maikai ia………………………………………………………………………………………………………         2.50

 

RUMI HANA LOLE MALUNA, HOLOKU etc., HANA IA ME KA OLUOLU LOA.

E HOOPAA AKU NO MAKOU NO NA KUMUKUAI MALUNA

NO 30 LA. NO KE DALA KUIKE WALE NO KEIA KUAI ANA.

 

C. J. FIshel

            Ka makamua o na Hale lako o na Wahine, oia hoi ma alanui Pepa a me Ilotele. kahi i hanau ia ai kuai hoopono a ano nui no hoi.