Ka Leo o ka Lahui, Volume II, Number 296, 7 October 1891 — Page 1
| This text was transcribed by: | Presley Ah Mook Sang |
| This work is dedicated to: | Awaiaulu |
KA LEO O KA LAHUI.
"E Mau ke Ea o ka Aina i ka Pono."
Buke II. HONOLULU, OKATOBA 7, 1891 Helu 296.
----
He Moolelo Nanea
NO
De Atanani
---
Ke Koa o ka Lio Olohe.
-A I OLE-
NA KIAI EKOLU O FARANI.
----
Huli hoi awiwi aku la ia no kona wahi keena, no ka hoomakaukau ana iaia iho no kona kulana iloko o ka puali, ma ka halealii Louvre.
Ma ke kakahiaka o kekahi la ae, aohe mea nui e ae ma ka waha o na kanaka o Parisa, he hookahi wale iho no, o kela aha hulahula e haawi ia aku ana, no ka hanohano o ka moiwahine ma ua ahiahi la, oiai ua holo ae ka lohe a puni o Parisa, no na mea e pili ana i ua aha hulahula nei.
O ka mea a ka lahui i anoi loa ai e ike oia no ko lakou lohe ana, e haawi ana na moi i ko laua hoau mua loa ana me kela hula haaheo o La Melaisona, ka hula hoi i lilo he punahele na ka moi Lui.
Ma ka hora 10 o ua kakahiaka la, ua hoea mai la he mahele koa malalo o ke inoa. Sieur de la Coste no ke kiai a hoomalu ana i ka Hotele de Ville, kahi a malama ia ai o ua aha hulahula nei.
O keia mahale koa o Sieur de la Coste, ua hoouna ia e ke Cadinela malalo o ka noho alii ana a kekahi kanaka apio a ua Cadinela la i hilinai ai.
Ma ka hora 11, ua huli ae la kona manawa a na kapena Duhelia i lawe ae i kona kulana, me kona puali o 50 koa ka ikaika piha.
Ua lawe ae ua kapena Duhelia la i ka mana o ka hoomalu ana i ka hotele malalo o ka ikaika o kona puali, a paniku ae la ia i na wahi a pau o ka Hotele de Ville mai ka hookeke ia ana aku e na kanaka.
Ma ka hora 3 o ka auina la, ua hoopaipai hou ia mai la ka ikaika kiai o kapena Duhelia e elua mau komapani koa, oia hoi, he komapani Farani, a he komapani olelo e.
O ka puali o na koa Farani, he hapa o lakou mai loko mai o kapena Duhelia, a o kekahi hapa, oia no ka puali kavalia o kapena Desesarata.
I ka uhi ana mai o na eheu o ka po, ua hoomalamalama ia ae la na pipa alanui a me na wahi a pau e hoopuni ana i ka Hotele de Ville me na kukui like ole o kela a me keia ano, a o na paia o ua hotele nei, ua kauluwela pu ia me-
Malamalama Puna
I ke ahi a ka wahine
Ma ka olelo pokole ana ae hoi, aohe kui pine nalowale i kau a mea o ka malamalama launa ole o na kukui.
I ke kani ana o ka hora 9 o ua po la, ua hoea ae la ka Madame Peremere, kekahi hoi o na lede hanohano loa o ke aloalii o Farani, a ua lilo hoi iaia ka hanohano o ka hoau mua loa ana i na nani i hoohiluhilu ia ai o ua hotele la, ua hookipa ia aku oia e ka puuku nui o ua po le'a la o Halalii, alaila, ua hoomake liilii aku la ke komo ana o na hoa hanohano i kono ia ai.
Hala ae la ka hora 10, aole i ea aku na moi, a i ka manawa o ka wati e hookokoke aku ana i na hora liilii o ke kuluaumoe, aia hoi, haehae ia ae la na eheu meha o ua po la e ka leo hooho o na kanaka, a ilko o na minute pokole, ike ia aku la o ka moi Lui ka keia a na kanaka e huro nei.
Ua kahiko ia ua moi la me kona kahiko piha, a e ukali ia ana oia e na mea kiekie, ke Kauna Sisona, ke Duke Lanavile, ke Duke Eleba, ke Kanna Harecota, Kauna Roceiona, Linacota, Baradosa, Suvera, a me ke Kauna de Caramaila.
He hapalua hora mahope iho o ko ka moi hoea ana aku, aia hoi, haehae hou ia ae la ka lewa me ka leo huro o na kanaka, a na ia mea i hoike aku i ko ka hale aha hulahula; eia ae ka moiwahine ma kona ala e hoea mai ai no ke de Ville nei.
I ka moiwahine i komo aku ai, ua hookipa loa ia aku la oia maloko o kekahi wahi keena uuku, a maloko o ua keena la, e noho ana ke Cadinela.
Ua hohola ae la na minoaka haaheo ana maluna o ua Cadinela la, iaia i ike mai ai, aole na pihi daimana maluna o ko ka moiwahine aahu, a oia kana i huli ae ai a hawanawana aku la i na pepeiao o ka moi:
Alaila, e like me ke ao hakumakuma e uhola ana maluna o na paia lewa ma kekahi la malie, pela na helehelena o ka moi i kahuli ae ai mai ka ula ohelohelo a i ka haikea.
Naka haalulu ae la kona kino, ma ke kalele ana iho o kona mau lima maluna o ke kuau o kana pahikaua, alaila, me na keehina wawae mama, hele pololei aku la oia imua o ka moiwahine, a kamailio aku la i keia mau huaolelo o ke kauoha penei:
E ka Madame, wahi a ua moi la me ka leo kakana; no ke aha la oe i kahiko pu ole ai maluna o kou aahu i kela mau pihi daimana a'u i kauoha aku ai ia oe?
----
He Moolelo
-NO-
MASEBA,
---
Ka Olali o Denemada!
-A I OLE-
Ke Kaulio Keokeo!!
---
Kakauia no KA LEO O KA LAHUI.
----
A o keia wa ana e hoao nei, he mea maopopo, e hele mai ana ua haku Moneka nei no ka pono e kana olelo hoohiki, oia hoi, no ke kuokoa a me ka ihiihi o kona noho kalaunu.
Nolaila, o ke kahua kaua kahi a laua e halawai aku ai, he kahua ka ua ia e kiola ia aku ana ilalo o ka lepo he lehulehu wale o na kanaka koa a kaulana o Denemaka, oiai lakou e haawi ana me ko lakou ikaika a pau no ka pono o ka nohoalii a me ka pono o ko lakou aina.
E hoomanao pu ia no hoi e ka mea heluhelu o haku Moneka, oia ka weli o Denemaka nana e hoonaueue nei ka nohoalii o ka moi Denemaka.
No ka pono a me ke ola o kona makuakane i oki ia ai ke poo e ka moi Carlo, maloko o kekahi o na pauaua o Denemaka, oia hoi o Edewada Moneda, ke kanaka hookahi iloko o kona mau la i ike ia ke koa a me ka wiwo ole iloko o na hana puhipuhiahi o ka makakila.
Nolaila, i ko kaua hookuu ana aku i keia mokuna, e nana aku kaua no kekahi mokuna, a me kona mau kuhinia.
"Hooni ka opua,
Hoohae i ka naulu."
----
Na Kula laula o Denemaka - Ka hui ana ho alo a he alo.
O ka hora 5 o ka wehena kaiao, oia ka wa o ka leo o ka ole i poha paapaaina ae ai maluna o ke kahua hoolulu o na koa Denemaka, no ka hoike ana aku ia lakou, ua hiki mai ka manawa o lakou e haalele iho ai i na palena o ko lakou kapitala aloha, a ma-ki aku no luna o na kula laula o Denemaka, no ka molia ana ia lakou iho e make no ka pono o ko lakou noho moi a me ka aina.
E po-ha ana ka leo haawi kauoha o na alii o ka puali, e holoke ana hoi na alakai i o a ia nei me ka lakou mau pahikaua e nakeke hele ana ma ka aoao i ko lakou mau lio.
A o na kaa batari pukuniahi, e halulu ana ia me ka ikaika like me kona koa kaua lio.
Ae, he kakahiaka ia no ka weliweli, a he la hoi e hookaawale ia ai o ka makua mai ke keiki, ke kane hoi mai ka wahine mai;
No ka mea, e hele ana lakou e paio no ke kuokoa o ko lakou noho moi a me ka aina, a o ko lakou maka ana maluna o ua kahua kaua nei, he make hanohano ana ia no ka aina a lakou i aloha ai.
O ka huaolelo-ima maki- oia ka huaolelo nana i hoouna aku i ua pualikoa Denemaka la ma ke alahele e hoea aku ai i na kula laula e waiho mai ana he mau ile ka mamao mai ke kulanakauhale alii mai o Kopenahegano.
Mamua loa o ka puali ka moi Caslo a me kona mau ukali, alaila, o ke kenerala Herewada aku a me ka pualikoa.
Ua pailaka ia ua puali ala o ke Deragona Ulaula e kanaka kiu i hoouna ia ai ma ka la i hala, a ma ka hora 4 o ua kakahiaka ala, hoolulu iho la ka pualikaua Denemaka ma kahi he hapalua mile ka mamao mai ua kula laula nei o Denemaka.
Alaila, malalo o na kuhikuhi ana a me na alakai ana a ke kanaka kiu i kaha ai no ke kulana kahi a na koa a me ke kahua hoolulu o ka haku Moneka, ua hoouna ia ake la na mahele koa me ko lakou mau alakai pakahi, no ka puu ana aku a lawe ae i ke kulana hoopuni i na palena a pau o ua kula laula nei a ka enemi e hoolulu ana.
E like me ka holo mama ana a ka makani imua, pela na mahele koa lehulehu o ka aoao Denemaka i pii like aku ai malalo o ka hooko kauoha me ko lakou ikaika piha o ka wiwo ole.
A iloko o kekahi mau minute lehulehu, aia ua kula laula nei, ua paa i ka hoopuni ia e na koa Denemaka.
E haliu pono ana ka waha o ka lakou mau pukuniahi iluna o na kula nei.
O na regimana koa kaua lio a hiki i na koa helewawae, aia mau lakou me ka makaukau mau i na wa a pau iloko o ka lakou mau mea kaua, me na maka e haka pono ana imua no na minute a pau o ka hooko kauoha.
E holoholo hoomau ana na alii o na pukuniahi o kela a me keia mahele ma ka aoao o ka lakou mau pukuniahi.
Aole i pau.
----
HE HOOLAHA I KA AKEA.
E ike auanei na ano lahui a pau e noho ana ma ke Aupuni Hawaii, mai na kane, wahine, a me na keiki, i loaa i na ma'i o kela a me keia ano, e nana mai i ko'u Keena hana, a na'u e hoopau aku i na ehaeha a ka ma'i maluna o oukou a na makamaka, he hiki ia'u ke lapaau i na ano ma'i a pau, ma'i iloko o ka opu, hu'i ke kino, aki iloko o ka iwi, eha o ke poo, ma'iwahine a pela aku. Mai hoololohe ake e na hoa, hele mai hookahi, hele mai elua, hele mai na a pau loa; e oluolu ka auhau, ke hui me ia ma na kukai olelo ana; ua makaukau wau e pulama mai i na kono ana mai mai na Mokupuni mai, me ka eleu a me ka hikawawe loa, he makamaka a he hoaloha maikai no oukou e na Hawaii.
Owau iho no,
DR. LEONG KENG PONG.
Helu 40, Huina o na alanui Kamika me Hotele, Honolulu, Oahu, Aug. 31. 1y.
----
OLELO HOOLAHA
Ua makaukau ka mea nona Oinoa malalo iho, e hana i na Pua HAKU PUNA ELEELE a me ka pohaku e ae no na pa kupapau, a me na kahua kukulu kia-hoomanao. O ka poe makemake e waiho mai i ka lakou mau kauoha me Ioane Akina.
J. BOWLER.
Sept. 22, '90, d-1y*
----
Aila Kuai.
---
E LOAA NO MA KAHI O
J.F. COLBURN.
(KEONI KOLOBANA.)
Ma ke Kihi o na Alanui Nuuani me Moi.
---
E loaa no no ke kumukuai haahaa loa o $2.50 o ka pahu. Hele mai hookahi, hele mai elua, hele mai no a pau.
Ko oukou hoaloha,
J. F. COLBURN.
Honolulu, Iulai 3, 1891. 232 dtf
----
Hale Hana Wai Momona
WAI-ANIANI
---
Sam Lad me John Grace na Ona.
---
Ka poe wale no na lakou e hana mai NA WAI HOOMAEMAE KOKO KAULANA oia hoi ka
SASEPARILA
-A ME KA-
WAI-HAO.
----
NA WAI MOMONA AWAPUHI, SASEPARELA, LEMI, WAI PIPII SODAMAOLI, SIDA, KAMEPENA, @.
----
MUTUAL 330-TELEPONA-@@@