Ka Leo o ka Lahui, Volume II, Number 244, 24 July 1891 — Page 4

KA LEO O KA LAHUI.

"E Mau ke Ea o ka Aina i ka Pono."

 

KA LEO.

John E. Bush.

Luna Hooponopono a me Puuku.

 

POALIMA IULAI 24, 1891.

 

He Moolelo

No

KAMAPUAA.

 

 KE KEIKI PUAA A KAHIKIULA ME HINA - KA MOOPUNA PUAA A KAMAUNUANIHO - KA HOA PAIO HOI O PELE, KA WAHINE O KA LUA I KILAUEA, A HALA LOA AKU I NA KUPUNA O KUKULU O KAHIKI.

 

O oe ia e Haunuu, e Haulani

E Haalokuloku

Ka Mano e ka I'a nui

E ui, e Uilani

Ko inoa Puaa ia e o mai.

 

 Aia a pa mai ka makani moaeku o ke Koolau nei, alaila hamama aku na waha o maua i ka makani, piha ae la ka opu, a hala ae la ia la pololi.

 

 Oli aku la o Kamapuaa:

O ke kupa - o ke kee -

He opu manawahua

He umauma paakea

Ko Kekaha

He naulu ko Waianae

He kehau ko luna o Kaala

He Waikoloa ko Lihue

He hoolua kumakani

Halauulu o Waialua

He Hinakokeaai o Mokuleia

He Pe'apuea ko kaunala

He Kumumaomao ko Waialee

He pilipali ko Kahuku

He Aeku ka makani e Koolau

He Uhanui ko Hauuia

He Ahiu ko Kahana

He Holopali ko Kaaawa me Kualoa

He Poaihale ko Kahaluu,

He Aoa ko Kaneohe

He Malanai ko Kailua

He Malualua ko Waimanalo

He makani e hea ana i ka waa -e hoi -ka waa

O Haupu ma laua o Kalaihauola

Ola, ola, i kai o Waiakaaiea nei la - e-

 He Puuokona ko Maunalua

He Kaelekei ko Kuliouoa

He Kumupili ko Kekaha

He Haualialia ko Kapua

He ua Waahila ko Waikiki

He ua Kukalahale ko Honolulu

He Olaunui ko Kapalama

He Hanapepee ko Kalihi

He Komomona ko Kahauiki

He Ho'eo ko Moanalua

He A'eku ka makani o Ewa - loa -

E Kapo - e -

Ua make ia anei kuu kaikuaana

Ke paia ae la e Konoku e Konamoe

A o Kono anuhea

A o Kona o Kalaenihi

A o Kona Puuouhuki

A o Kona Kuukuua

A o Kona Puuokapolei

E make iki oe

Make nui -oe

Make lele loa oe -

 Ua haalele aku la oia i ua mau wahine nei, a haawi aku la keia i kona aloha ia laua.

 Ua hele mai o Kamapuaa ma ka lae o Makapuu a huli ma Kona nei a hiki oia i Moanalua, hele aku oia a hiki i ka piina o ka Papakolea, a i koi nei kau ana aku iluna.

 Ike aku la keia i ka uhane o ke kaikuaana, e alualu ia mai ana e ka Makaula, e Waikumailani.

 Oia hele oia nei a kahi ona i kahea ai i ka uhane o ke kaikuaana ma ke oli:

 Hoalohaloha mai ana ia'u kuu kaikuaana

 O ka pili manu kahi a kaua e haele pu ai

 I ke kula o Kahinahina

 Ia Olohemiki

 Ia elua la ke kia holomanu

 Ia'u la ke kia mahiai

 I na ke alii kaikaina

 O koko maka pehupehu i ka la - e

 E haa - e, haa ka ia haa o

 Koolina - e

 O na paakea pani ua o Waiku'i la

 Ia Waiku'i hoi o

 Hoohali i kana ia mawaho

 Maloko ka io mawaho ka iwi

 O ka pipipi kai welawela

 O Kahunaikiulalena nei la e

 O kou inoa ia e o mai oe.

 

 Huli aku la ka uhane o Kekeleiaiku hoi, e pai aku ana o Kamapuaa i ka uhane o kona hanau mua mahope.

 E hoi ka uhane a puu o Kapolei ilaila ka hoi ko uhane e waiho ai, i kahi o ko kino e waiho ala, kahi hei au i naauauwa ai, a i kaawe ai i ke aloha o ke kaikaina, e hoi e no ho, e noho me na kupunawahine o kakou, me Kamaunuaniho laua o Wahineokamao.

 Ko ia nei hele aku ia no ia a hiki i Halawa, mailaila aku a hiki i Mokuumeume, a ua noho iho la oia iloko o kekahi ana.

 A ma kela noho ana a Kamapuaa ma kela ana, ua kapaia iho la ua ana nei o Keanapuaa a hiki i keia wa.

 A ma ia ahiahi no ua holo mai la he mau waa mai uka mai o Ewa, ua piha i na umeke poi, puaa mo'a puaa ola, i'a, ko, ipu, mai'a a me na huewai.

 He ewalu ka nui o na waa, o keia mau mea ai a na kanaka e lawe nei, he mau mea ai ia ne ke alii o Oahu nei, oia hoi o Iouli a me lomea, na pani hoi o ke alii Olopana i make.

 Ua pae mai la na waa ma kahi a Kamapuaa e noho aku nei, no ke kai maloo, malaila lakou e moe ai a hiki i ke kai pii o ka wanaao, ala ila lakou holo no Kou, kahi a na alii kane e noho mai la, o Kou i oleloia o Honolulu no ia i keia manawa.

 Ia lakou i pae aku ai, ua hooaiau aku la o Kamapuaa ma kona kino puaa, ua pani pu ia iho la e na waa o lakou nei, o waho aku o Keanapuaa.

 Ua pae na waa o ua poe kanaka nei, a hoomakaukau nui iho la i wahi na lakou e hooaumoe ai ia po, ua a iho la lakou a maona, a haule nui aku la hiamoe, no ke kakali nui ana i ke kai pii o ke kakahiaka.

 Ma kela po, ua hele mai la ua puaa nei a pii aku la iluna o na waa, ua ai iho la ua puaa nei, i ka i'a ko, poi, ipu, mai'a a ka wai o loko o na hu'ewai, a koo hoi ka puaa mo'a, a me a puaa ola, aole i pau no ka mea, o kona kino no hoi ia.

    Aole i pau.

 

  I na Luna Lawe Pepa o KA LEO O KA LAHUI, ke ha'i ia'ku nei ka lohe ia oukou, ina he mau helu koe o ka la 3, 10, 20 o Aperila, a me ka la 5 o Mei nei, o ka nupepa KA LEO, ke kauoha ia aku nei e hoihoi mai ma le keena nei.

  Ma ke kauoha.

 

Kuai Kudala

- O NA -

Pa-Hale ma Kalihi, Honolulu, Oahu

 

 Ua loaa mai ke kauoha ia'u e kuai aku ma ke kuai kudala akea, ma ko'u Keena Kudala, ma Alanui Moiwahine, i ka

POAKAHI IUNE 29, 1891, HORA 12 M.

He 36 mau Paa aina Noho Nani, mawaena o alanui Moi me Beckley, he aneane hapaha mile ma Ewa aku o ke Kula Kamehameha.  Ua mahele ia keia mau apana ma kekahi ano, a me ka nunui ku pono e hiki ai ke komo mai iloko o ka li ma o kela a me keia mea ka loaa ana e like me ka makemake, kekahi home no lakou ponoi iho iloko e na palena mamao kupono i ka piko o na wahi hana o ke kulanakauhale.

 

 Ke kulana a me na pono lehulehu e ae o keia mau apana aina, ua hiki ole ke hoohalike ia me na aina e ae o keia ano i kuai ia iloko o keia kuianakauhale i na makahiki i hala e aku.

 

 O ke ano o ka waiho ana o keia mau aina, ma ka waha aku o ke awawa o Kalihi ma ke kiekiena kupono, ua loaa mau ke ea oluolu maikai a me ka maikai mao li no o ka noho ana.

 

 E huli ana keia mau aina pa-hale a pau i ke alanui Kalihi, he 55 kapuai, oia hoi ke alanui oi aku o ke akea ma na wa he e pili kokoke ana i ke kulanakauhale o Honolulu, a e holo ana hoi mai alanui Moi a puka i alanui Beckley.

 

 Aia malalo iho o ekolu minute ke hele wawae aku a loaa keia mau apana aina mai kahi o ke alanui kaahao (Tramcar) e pau ai.

 

 Ka wai.  E hoomoe ia ana he paipu kumu wai, he 8 iniha ke ana-waena e hoomoe ia ma ke alanui Moi, mai na hoo moe ana paipu o ke aupuni, e hooia ana i ka lawa i ka wai.  Ano, e loaa no ka wai mai ka pa kulu Kamehameha mai.

 

 E ike ia no kekahi palapala kii aina o keia mau hale pa hale ma ko'u Keena, kahi no hoi e loaa ai na hoike i makemake ia e ninau aku.

 

 Ke ano o ke kuai ana.  Hokahi hapa ma ke dala kuike, ke koena iloko o hookahi makahiki ma ka ukupanee o 9 keneta pa-haneri i hoopea ia ma ka moraki.

 

 O na lilo o ka palapala kuai, me ka mea no ia e kuai ana i ka aina.

  JAMES F. MORGAN,

  Luna Kudala

Honolulu Mei 29, 1891,  241 - dtf.

 

Na Lole Komo o ke Kau

  Na LoLe Komo o ke Kau

 

NA LAKO HOU LOA a me NA ANO HOU LOA!

E weheia nei ma kahi o  N. S. Sachs, 104 Alanui Papu Honolulu

 Na Ano Lihilihi o Kela a me Keia Ano.

 

  HE KUAI MAKEPONO LOA KEIA.

 Ua wehe ae nei makou i na ano LIHILIHI a pau i loaa pololei mai ia makou, mai na Hale Hana mai Europa mai, a nolaila, na hiki ia makou ke kuai aku-

NO NA KUMUKUAI HAAHAA I KO KEKAHI MAU WAHI E AE!

 Ua moakaka ke ano o na lau o ka lole , a pomaikai oe ke ike mua, mamua o ke kuai ana ma kahi e aku.

NA HOLOKU LIHILIHI no $4.50 o ka lole i kuai ia no $6.50 a $7 mamua.

 NA LOLE LIHILIHI NO KEIKI, e like ka laula me ko ka pelekoki, mai ke 60 keneta o ka i a a pii aku.

 

HE NUI NA ANO O NA LOLE KEOKEO, KINAMU, LATINA.

 

KINAMU LOLE, maka hou, he 8 i-a no ka $1.00.

 NA LOLE MAIKAI PAPAMU a kakau loloa, 20 a 25 keneta o ka i-a.

 NA LOLE oi loa aku o ka maikai he 25 keneta wale no ko ka i-a.

 NA LOLE KIKOKIKO a me LAU, (Swiss) he emi loa.

 NA PAA LOLE LIHILIHI iloko o na pahu, KEOKEO a KALAKOA, e kuai emi loa ia aku ana.

 

NA KAKINI ELEELE ADELINE.

 

 Ina oukou e makemake i KAKINI ELEELE maikai, i KAKINI mae ole a kohu ole, e ninau no ke KAKINI ELEELE ADELINE, ua hanaia keia KAKINI no makou no keia Makeke, a ua hiki ia makou ke hooiaia aku i ko lakou maikai, ua lawa no na wahine, kaikamahine, a me na keiki.

 

  Mai poina wale iho oukou i ka hele mai e ike i na ano Papale Italia hou no ke Kau, no mea, no na Papale Sila keokeo a eleele, i kahiko ia me na lipine no $1.25, $1.50 a me $2.00.

 - AIA MA-

 Ka Halekuai Kaulana.

104, Alanui Papu.  Iulai 14, 1891.  dtf.  WEHI O NA LEDE.

 

Papale! Paple!! Papale!!!

 

E Loaa no  - Papale - maikai o na

maanei na  -     - ano a pau

Na PAPALE i hoonani ia a hoonani ole ia.

 I loaa ole ka lua ma keia Pae Aina, a no na la hoomanao Kulaia, e loaa no ia oe ma na kumukuai haahaa.

 Ina oukou e kuai i na PAPALE ma ko makou halekuai nei, alaila, e loaa ne ia oe ke kaulike.

  Nolaila, e kipa mai io makou nei i hoopauia ko oukou kuhihewa

  C. J. Fishel.

 Mei. 19, 1891   196-tf-d.

 

KUAI  HOOPAU  NUI.

Mai keia manawa aku a hiki i ko Makou hoonee ana aku iloko o ko makou

 HALEKUAI  HOU

 Ma ke Alanui Papu,-(NA HALE BURUA.

E hoolilo aku ana Makou i ko Makou waiwai a pau o na ano Lole:

 NA LOLE NANI,

  NA LOLE I HUMUIA,

  KAPU A ME PAPALE

  PAHU LOLE, a pela aku

No na Uku Hooemi Loa Nae.

  Egan & Gunn.

ALANUI MOI kokoke i ke ALANUI PAPU.  tf-d

 

HOOLAHA HOU

B. F. Ehlers & Co -PAINAPA.

 

HELU 99, Alanui Papu.

 

IA OUKOU E NA MAKAMAKA A ME NA HOALOHA, OIAI HOI, UA makaukau makou i ke kuai ana aku ia oukou i na lako lole wahine o na ano @la a pau; oia hoi -

 Na Silika hou   Na Sateen hou

  Na Mikilima hou   Na Lihilihi hou

  Na Lihilihi keokeo hou   Na Lihilihi kau lole hou

  Na ano Mamalu hou loa   Na Paku Pukaaniani

  Na lole hou o na wahine   Na lole o na keiki liilii.

 Na lole o kela a me keia ano e loaa no ia oukou no na kumukuai haahaa loa.

  E kipa mai e na makamaka, i hoopau ia ai ko oukou kanaiua no ka makou kuai hoopoho aku ia oukou.  Owau me ka oiaio,

 tf    B. F. EHLERS & CO.