Ka Leo o ka Lahui, Volume II, Number 241, 21 Iulai 1891 — Page 1

KA LEO O KA LAHUI.

"E Mau ke Ea o ka Aina i ka Pono."

Buke II.  HONOLULU, IULAI 21, 1891  Helu 24l

 

He Moolelo Kaao NO KANA.

            KE AHI KANANA—KA HIAPAIOLE—KA MOOPUNA A ULI—KA MEA NANA I HOOHIOLO O HAUPUKELE KA PUU KAUA I MOLOKAI.

 

            Ua make aku la ia kupua ino o ka moana ia Niheu, malalo o ke kuhikahi a kona kaikaina a Kana.

            Nolaila, ua malaelae ke ala holo moana no lakou i kela mana; a hoomau mai la no lakou nei i ka holo ana imua.

            Ke hala hope aku la ka moku o Kau ia lakou nei mahope, o ka aina i olelo ia, “O Kau Kuamakahi,” a e ka aina no hoi keia i holo i ke mele ia e ka poe o ka wa kahiko.

            Me he ipukai pohina la Kau, na Keaelo`a.

            Eia lakou nei ke eku nei na ihu o na waa i ke kai maokioki o Kona, oia hoi, ka lai malino a Ehu; o ka pa nahenahe iho a ka makani he eka, me he mea la e hoolaau pu mai ana i ka huakai au moana a Kana ma, o lakou pu kekahi, e lilo i mau ohua waa, no ka holo pu ana aku e ike i ka lealea, a ke keiki a Hoakalani laua o Hakalanileo.

            Nolaila, eia lakou ke holo nei, me ka puahi nui, a ke kiei hooheno mai la o Hualalai mahope o lakou nei.

            Me he mea la, e peahi mai ana no ia lakou nei, pia pu kekahi, e like paha me keia e hooheno ae nei—        

            Ani peahi na lima o Hualalai

            Ke kahoaka i Mailehahei

            Iho ka hau kiliopu i kai o Kona

            Iho no i ke kula pili o Moeauloa

            He alaniakea ke kai o Kailua.

            Eia lakou i kela wa mawaho po no o Kaelehuluhulu, kahi hoi a Keona Puahuula i olelo ae ai, iaia maluna o ka waa: “Makani uka, ke lele ino nei ke ao.”  Walohia wale ia leo alii.

            Ke hoomau mai la no lakou nei i ka holo ana, a hiki ma Mahukona, ka aina i oleloia, “a waho makou o Mahukona, hana io ka ua ia Kohala.

            Eia ka makani apaapaa o Kohala, ke pa la ma na aoao o ko lakou nei mau waa, a aia hoi na waa ke holo la me ka mamanui, ke oni ae la ka lae o Upolu mauka o lakou nei, ke waiho kahelahela mai la hoi o Mookini iluna.

            Aka, aole nae e hiki ia ohua ke kau; no ka mea, no ka waa no kela olelo ana:  Haule i ka hope waa.

            Ke haulani nei ka ihu o na mau waa nei o Kana ma, ma na ale kualoloa o Alenuihaha, eia lakou iwaena moana, ua naha na moku.

            A ke ku haaheo mai la o Haleaka la me  kona kilakila nui; a ke au mai la o Kauiki i ke kai me he manu kaupu la no ka moana.

            Iloko o keia manawa a lakou nei e holo ana, ua hoaui ia ae la na ihu o na waa o lakou nei ma ke Koolau o Maui; no ka mea, oia ka ihu o na waa o lakou nei e holo ai.

            Oiai no lakou nei e nanea ana i ka holo o ko lakou mau waa, ua halawai hou aku la no na waa o lakou nei, me ia kupua o ka moana oia hoi, ke Kahala-Mokuleia, aole e hiki i na waa o lakou nei ke holo imua.

            Me ia manaolani o lakou nei i ka holo o ko lakou nei mau waa, eia ka hoi, he lilo ka holo i mea ole i keia kae`ae`a.

            Nolaila, ua ku iho la na waa o lakou nei i kahi hookahi, me he la ua lukau na pe`a a ka malama moku.

            Kahea aku la o Hakalanileo me ka leo nui, ua ili paha na waa o kakou, eia la ke ula pu ae nei mawaena o na waa o kakou.

            A pehea auanei la ko kakou pono?  o ka ili o na waa o kakou, a pau ae i ka nahaha, a au paha auanei ka auwae kahi uuku, oiai, eia kakou i ka moana kai uli kai hohonu.

            Ia manawa i pae mai ai ka leo o Kana—Aole ia he moku puko`a a olua e ike la malalo ae o na waa o kakou, aka, he kupua iho na he ihu pani no keia moana, he kiai makalae no keia huli pali Koolau.

            Nolaila, ua inaina ua kae`ae`a la ia kakou, oia ke kumu o kona ke`ake`a i ko kakou mau waa; no ka mea, o Keoloewa, oia no ka lakou hanai alii, ke lokahi nei, na kupua o ka moana nei, no ka hakaka pu mai me kakou.

            Nolaila e Niheu, ae lalau iho ou mau lima a ma ka pili mahamaha, malaila oe e uhae ae ai i kona pihapiha, a hahae pu ae no hoi i kona kino a liilii.

Ua hooko aku la no hoi o Niheu i ke kauoha a kona pokii, a iloko o ka manawa pokole, ua lilo ae la ia kupua o ka moana i mea ole ia lakou nei, malalo o ke alakai a me ke kuhikuhi ana a Kana.

            Pela i loaa mau ai ia lakou ka lanakila ana, mamuli no o ke kuhikuhi a Kana i kona hoahanau ia Kana.

            A make aku la ia kupua, ua hoomau mai la no na waa o lakou nei i ka holo ana no mua kahi hoi o ka hana.

            Aole i loihi ia holo ana aku o lakou nei, ua halawai hou aku la no lakou nei me kekahi kupua noho moana, me Honu Kua Wakawaka.  Aole i pau.

 

He Moolelo Nanea NO De Atanani.

Ke Koa o ka Lio Olohe, A I OLE NA KIAIEKOLU O FARANI.

            Nolaila, ukali aku la oia mahope o na kapuai o ke koa kiai me ka hakanu, a iloko o kekahi mau minute pokole, hoea aku la laua no kahi a kekahi kaa e au ana, a e hoopuni ia ana ua kaa nei e eha mau koa kau lio.

            Kau aku la ua Bonacio nei ma ke kaa me ke koa kiai nana oia i lawe aku, a haawi ia ae la ke kauoha no ka holo ana aku o ke kaa no Sana Paulo.

            O keia wahi Sana Paulo, he wahi ia e malama mau ia ai na hana oki poo no ka poe a pau e ahewa ia ana e make, a he wahi hoi i weliweli loa ia e ka poe a pau i paa he pio na ka papu kaua o Basetile, i ka wa a ko lakou mau lena ike e halawai mai ai me na puoa o ke towela o Sana Paulo.

            I ka wa i ike ia aku ai, o na puoa o ke towela o Sana Paulo, ua naka haalulu ae la o Bonacio me ka weliweli nui a kau mai la imua o kona mau hoomanao ana no kona hopena.

            Aka, i ka wa i maalo hope ae ai o ke towela weliweli o Sana Paulo, me ka hoomau ana no o ke kaa ma kona alahele, akahi no a akakuu iki mai na pilihua ana o na manao o kahi Bonacio.

            Aka, no ka manawa wale iho no nae ia, oiai, aole i liuliu loa, maalo ae la lakou ma ke alo iho o ka ilina o Sana Jena, ka ilina make hoi i ka hakaha ia me keia mau olelo:

            “O kahi hoomaha hope loa keia o na kino lepo o ka poe kipi a pukaha.”

            Aka, hala hope aku la nae ua ili na hooweliweli la, a eia ke kaa o ua wahi Bonacio nei ke hoomau la no ma ke ala e hoea aku ai i La Geva, a hala ae la he mau minute ike ia aku la ka puoa o ka hotele de Vile e okuku ae ana maluna ae o na kaupoku hale o La Geva.

            Ma keia wahi i holo puanuanu hou ae ai na aakoko o kahi Bonacio, a naka haalulu e ae la kona kino, iaia i hoomanao ae ai no kana mau mea i lohe ai no La Geva, oia hoi, ua oi aku ka weliweli a me ka manoanoa o na hana oki poo malaiia mamua o ko Sana Paulo.

            Me ka hoomaha a ku ole iho ke kaa malaila, hoomau aku la no ma ke alahele, a no ka hope loa o keia huakai hele loihi, hoomaha iho la lakou ma Caroika du Tarahea, ua wehe ia ae la ka puka o ke kaa, a lawe ia aku la o Bonacia mawaena o na koa, oiai hoi na kanaka e hookeke ana ma kela a me keia aoao o na koa me na uluaoa walaae ano ole ana o kela a me keia ano.

            Alaila, e ka mea heluhelu, me ke ia ano ae la, lawe ia aku la o Bonacio no kahi i maopopo ole ia kaua, aka, na ke aa o ka manawa e hoike mai ia mau mea, oiai, aia iloko o na minute pokole i koe e ike hou aku no auanei kaua no ua Bonacio la.

 

Ke Kanaka o Muna,

            Aia maloko o kekahi o na hale kakela o Tarahea, ma kekahi o na ruini o ua hale la, e noho ana he wahi kanaka poupou me na helehelena kunahihi, a e kulou ana kona poo ilalo.

            Oiai ua wahi kanaka poupou la e noho ana me na haawina kai maha a me ka ehaeha; ia wa i hemo mai ai ka puka a kiei mai la kekahi kanaka me ka huli hou ana`ku ihope, a kamailio aku la i kekahi mau huaolelo a ua wahi kanaka poupou la i lohe ole aku ai, alaila, ua huli hou mai la ua kanaka nei a pane mai la:

            O oe anei o Bonacio?

            Ae e monasiua aliikoa, owau no ia a kou hanohano e kamailio mai la, wahi a ua wahi Bonacio nei i pane aku ai.

            Alaila e monasiua, o oe ka mea i makemake ia e komo mai maloko nei o keia keena, wahi a ua aliikoa nei i pane mai me ke kunihi ana`e, i loaa ai he kowa no ua Bonacio la e komo aku ai.

            O ke keena kahi a ua wahi Bonacio la i komo hou aku ai, ua hoolako wale ia no ia me na mea make, a e kaka-u ana hoi lakou maluna o ka paia.

            E a ana he ahi hoopumehana ma ke kapuahi, a iwaena konu o ua keena nei e ku ana kekahi pakaukau me na buke lehulehu e kau ana maluna iho, a me ka aoao o ua pakaukau nei, e ku ana kekahi kanaka maioheohe loihi me na helehelena o ka piha haaheo.  Aole i pau.

 

Na Hui Kinipopo.

Iulai 25            Kamehameha vs Honolulu

Aug 1              Hawaii             vs Honolulu

“    8              Kamehameha  vs Hawaii

“    15            Kamehameha  vs Honolulu

“    22            Honolulu         vs Hawaii

“    29            Kamehameha  vs Hawaii

 

Olelo Hoolaha.

            Ua makaukau ka mea nona O- inoa malalo iho, e hana i na P@ HAKU PUNA ELEELE a me ka pohaku e ae no na ua kupapau, a me na kahua kukulu kia-hoomanao.  O ke poe makemake e waiho mai i ka lakou mau kauoha me Ioane Akina.  J.    BOWLER.  Sept. 22, ’90, d—ly

 

H.P.K. Malulani.

            HE LOIO a he hookepeke olelo ma ke Kanawai.  E loaa no au mai ke kai hawanawana o Kawaihae e hoene ano me ipo la, a Hamakua au i ka la`i o Kukaiau ma ke alo o na pali.  E ohiia no hoi na aie me ke ku i ka ehu a me ka puahiohio.  Nov. 8, ’90.  d—ly.

 

HOOLAHA KAI KONOHIKI.

            Ke pa leo aku nei ke Konohiki o Waialae, i loaa mau hoaloha a me na hoaaina o kona Afria, ua hoolimalima aku oia i ke kai i keia manawa, a ua hookapu iho oia i ka hee noua iho, a nolaila, ke poloai aku nei oia e ike a hoomaopopo i keia leo la.  Owau no.  Paulo Isenberg.  3ms-d.

 

Ua Makemakeia

            KEKAHI keikikane e hana ma kekahi hale kuni, he ohi i ke dala ka hana.  I ike i ka olelo a me ke kakau Beritania.  E ninau ma kahi o N.S. SACHS, 104 Alanui Papu.  3t-d 227.

 

OLELO HOOLAHA.

            Ma keia, ke haawi nei au i ka mana ia George H. McLane, e uhi i na aie a pau o ka poe aie i ka waiwai o George H. McLane, o Nawiliwili, Kauai, a e haawi i na likiki ma ko`u inoa. June 29, ’91.  lwd.  K. PODEYN.

 

Hoolaha Hookapa.

            Ke hoike ia aku nei ka lohe i na ano kanaka a pau loa.  Ua hookapu loa maua i ko maua mau Apana Aina ekolu i kapaia o Kalaheo, Kahaleula a me Puuoihala, no lakou na eka 202 e waiho la ma ka Paa, Kailua, Koolaupoko, Oahu, i hoolimalima ia e maua mai ia Keleau (w) mai.  Nolaila, ke papa loa ia aku nei na holoholona o kela a me keia ano, aole e hookuu wale ia maluna o ua mau Apana Aina la, a o ka mea a mau mea paha e kue ana i keia, e hopu ia no e maua, a i ole ia, e ko maua mau hope paha, a e hooko ia e like me ke kuhikuhi a ke kanawai.  O na poe a pau e makemake ana e komo iloko k keia Hui, e pono lakou e hele mai e hui pu me Mrs. C.I. HIRAM, a i ole ia, me DAVID DAYTON, a i ole ia KUKA.  Owau no me ke haahaa,  MRS. C.I. HIRAM.  Honolulu, Oahu. Oct. 8, 1890.  3ms-d.

 

OLELO HOOLAHA.

1.       E ike auanei na mea a pau eia ma ka Pa Aupuni o Makiki nei kekahi lio k, keokeo

kikokiko kua nalu huelo poomuku hoailona kuni ano-e ak. uha hope.

2.       Lio k. ulaula hauliuli kiko keokeo ma ka lae e 2 wawae keokeo hope hookahi wawae

keokeo mua hema kiko keokeo ma ke kua aole hoailona kuni.

3.       Lio k. ulaula lae-kea elua wawae keokeo hope 2 wawae eleele mua hoailona kuni

ano-e ak. uha hope.

4.       Lio w. ulaula kiko keokeo ma ka lae kikokiko keokeo ma ke kua 4 wawae eleele

hoailona kuni C.J. ak. aia ma ka aoao akau o ka ai.

5.       Lio w. ulaula lae-kea 4 wawae eleele huelo poomuku hoailona kuni ano-e ak. uha

hope.

            O ka mea a mau mea paha nona keia mau lio e pono e kii koke mai ina aole e kii koke mai a hala na laho 15, alaila, e juai kudala aku nowau ma ka la 18 o Iulai N.H. 1891 awakea Poaono hola 12.  David Kaoao.  Luna Pa Aupuni.  231 6ts-d*