Ka Leo o ka Lahui, Volume II, Number 234, 10 July 1891 — Page 4
| This text was transcribed by: | Ululani Victor |
| This work is dedicated to: | Ka Moiwahine o Liliuokalani |
KA LEO O KA LAHUI.
"E Mau ke Ea o ka Aina i ka Pono."
KA LEO.
John E. Bush.
Luna Hooponopono a me Puuku.
POALIMA, IULAI 10, 1891.
He Moolelo Nanea
NO
De Atanani.
Ke Koa o Ka Lio Olohe,
A I OLE
NA KIAI EKOLU O FARANI.
Oiai ke Duke o Bakinehama e lu ana i kana mau olelo me na kahoaka oia mau la poliuliu wale a laua i luakaha ai me ka hauoli iloko o na kihele olelo ana o ka ipo i ka ipo -- ke aloha me ke aloha -- ia wa i pane aku ai ka moiwahine me keia mau olelo, e ke Duke mai hoomanao hou no ia mau po.
Kahaha ! wahi a ke Duke, e ae mai ia'u e kamailio ae no ia mau manawa; no ka mea o ua po ala i hoohala ia ai e ka moiwahine Ane a me ke Duke o Bakinehama, he po ia na'u e poina ole ai i na la a pau o ko'u ola ana.
A e ka makane o ia po, auwe he lua ole ia o na hauoli i loaa ia'u, ua hoike mai oe i na mea huna pohihihi oloko lilo o kou puuwai. me he momi alohi ala, a'u hoi i lawe ae ai i ka hoohiki. e lilo kuu ola nei mahope ou e kuu moiwahine.
Aka. i koia po, ia oe ke haehae mai nei i kuu puuwai, a ke hookaumaha a hoehaeha mai nei hoi i kuu naau holookoa.
Ua hoomaha iho ua Duke ala o Bakinehama i kana kamailio ana. me ka haawi ana mai i na nana pono ana maluna o ka moiwahine me na maka oolea o ka mea i poho ka manaolana, a no kekahi mau sekona, pane aku la ka moiwahine Ane i ua Duke la me keia mau olelo:
E kuu haku M'loda, o ko kaua hui a halawai ana iloko o na kipona maemae o ke aloha. o kahi me kekahi, ua hoike ia aku ia e ke Cadinela imua o ka moi, me na pahi-lau o ka lili, a na ia mau olelo i hoowela ae i ka inaina o ka moi, a o keia mau minute a kaua e kamailio nei. ua kaiehu ia aku la o Madame de Vaenta mai ia'u aku, o Putenaga hoi iloko o ke kaiehu loa ia mai Farani nei aku, a o ka Madame de Caerausa hoi iloko o ka hoino a me ka hoohilahila ia, a o ka panina o na mea a pau, o oe no ia e kuu haku Duke, ua hoole ka moi i ka ike ana aku ia oe, i kou wa e hoea hou mai ai i Farani nei. ma ke ano he elele emebasekoa no kou aupuni.
Aha ! i hooho ae ai ua Duke ala me ka nana hoomau ana mai no maluna o ka moiwahine me na maka oolea:
E hoole mai ana ka ka nohoalii o Farani i ka ike ana mai ia Keoki Vilelia ko Enelani Emebaredoa i ke aloalii o Farani nei.
Alaila ma ka inoa o ko'u aupuni e koi ia mai no o Farani e uku ae no ia hoole ana a kona nohoalii maluna o ke kahua kaua hamama o na poka pukuniahi a me ka leo paapaaina o na pu kaupoohiwi.
E pani ia mai ana ko'u ike ana aku ia oe, aka. e ka madame, e lohe mau ana no nae oe nou i na la apau, aka, heaha la kou manao no keia mau hoikeike o Re a pehea hoi kela hui malu a ka poe Potesana o Racela, au i hoolala ai, no ka hanohano o ka ike ana mai ia oe.
Wahi hou a ke Duke, aohe a'u mau kamailio no ia mea, aole hoi a'u pahikaua e hapai kue ae ai no Parisa nei, aka koe wale iho no keia a'u e hoomanao ae nei.
O keia kaua, he kaua ia e ukali pu ia mai ana me ka maluhia a o ua maluhia la, e koi mai auanei ia i poo no lakou, a o ua poo la owau no ia.
Aole loa lakou e hoole mai ana no'u oiai aia he tausani o na kanaka Pelekane me na puuwai koa oiaio i hoopaa i ko lakou mau ola e lilo no ka loaa ana mai ia'u o ka hauoli.
Aka, e ka madame, e nai mai. owai ka wahine he aloha kana i oi aku kona aloha me ka oiaio, a owai hoi ka moiwahine he kauwa kana i kaakolu ia kona aloha welawela o ka hoopono.
E ke Duke ! e ke Duke ! aole anei oe i hoomanao, he mau hana ku wale no keia i ke karaima ?
Ae e ka madame, wahi a ke Duke i pane mai ai, aka, heaha la ia mea he karaima ia Vilelia ?
Ua hoole mai nei oe i ke aloha ana nona, o ka madame Caveruse au i kamailio mai nei, ua haule iho kona lokoino a me ka awahua i kou, ua aloha mai o Holani nona; aka, ua papale ae ia i kona aloha.
Alaila he moiwahine anei o madame Caverusa ? wahi a ka moiwahine Ane.
Pane mai la ke Duke me ke oolea o na olelo, aole a'u olelo moiwahine, aole hoi ma kekahi ano e ae e pili ia mea he moiwahine, e like hoi me kau ninau, a kou hanohano i ninau mai la.
Alaila e ke Duke, e kala mai ia'u ina ua kuhihewa ka'u mau olelo i hoopuka ae nei, aole no au i manao he mau olelo ku io ia, aka i hoomaoe wale ae nei no au.
Aole i pau.
AUWANA A AIHUE IA PAHA.
Ua nalowale aku mai kahi o ke Kanikela Iapana, alanui Nuuanu. kekahi lio ano hulupala hauliuli, he 8 makahiki, he 15 ana peahi lima ke kiekie, a he kiko keokeo mawaena o na maka, paa eha wawae a pau i ke kapuai hao. O kekahi mea e hoihoi mai ana, a e hoike mai ana i kahi e loaa ai, e uku ia no me ka maikai kupono, ma ka hele ana aku ma ke keena kanikela Iapana.
Mei 18, d5ts.
Kauka Pake Akamai!
DR. LEONG KANG TONG.
MAKAUKAU OIA E LAPAAU I NA MA'I A PAU O KELA A ME KEIA ANO, ME KA ELEU A ME KA HOLOMUA.
HE OLUOLU KA AUHAU.
Keena Oihana:--Aia ma ka aoao ma Ewa iho o ka halekuai Puaa, e ku nei ma ke kihi o na Alanui Kamika me Hotele.
HE PALAPALA HOOIA.
Honolulu, April 29, 1891.
Owau o Chu Sam Lan, no ke kulanakauhale o Honolulu, Mokupuni o Oahu Ko Haawaii Pae Aina. Ke hooia, a ke hooiaio aku nei au imua o ke akea, ua ike au a ua maopopo ia'u a ke haawi nei au i ko'u mahalo piha ia Kauka Leong Kang Tong e noho nei ma Alanui Hotele Honolulu, no ka mea, ua lapaau oia ia'u a ua ola au mamuli o kana mau lawelawe akahele ana, oiai o ko'u ma'i he akepau, a he popo hoi ma ka olelo kahiko. Ke noi aku nei au i ka poe a pau i loohia me kela ano ma'i, e hele ae iaia, a e loaa no ke ola. Ua loaa au i keia ma'i mai ko'u wa opio loa mai. a ua aneane he 4 makahiki o ka hoomailo ana a keia ma'i i ko'u kino, aka, ma keia wa ua loaa ia'u ke ola maikai loa. E hele ae e ka poe i luuluu a kaumaha.
Mei 12. 1891. 1m.-d.
OLELO HOOLAHA.
O ka aina o Mrs. Kapai, e waiho nei ma Kikihale, Honolulu, Oahu, i lilo mai iaia mai a Paki alii mai ma ka Palapala Kuai.
A i keia manawa, ua lilo ia aina ia'u ma ka haawi ana mai a Kameeui (k) ia'u. O na lilo o ua aina la, na'u ia i hoopau me ka'u dala ponoi, o ke duke makahiki na'u ia mau lilo no na makahiki he 21 i hala aku, a ke noho nei au i ka aina, a owau no hoi ka ona nona ka aina e noho nei.
A ina e hele aku ana o Kameeui e kuai, a morati paha ia oukou e ka poe mea dala, mai ae mai oukou i ka oukou mau dala no ia aina a haawi mai, o poho aua ne oukou, oia ka'u kauoha ia oukou e ka poe mea dala; na pake, haole, kanaka, pukiki.
Owau no o---
J. NANIANI.
Iune 23, 1891, Kikihale, Honolulu Oahu.
Hale Kuai Wati Nui
HELU 1
No C. Ah Kau.
KA oi o na mea Gula, na DAIMANA, na POHAKU MOMI makamae loa, na WATI GULA, na WATI DALA & C., na omau o kela a me keia ano, na lako wehi GULA a me DAIMANA, na KOMOLIMA GULA a me DAIMANA, na WATI nunui ano hou loa o kela a me ke ia ano, na PUPANAPANA a me na lako e ae e pili ana.
E hoomanao e na makamaka, o keia AH KAU no ka mea nana i hana na WATI a me na lako GULA oi loa o keia Aupuni, a i kamaaina ma kona hale mua i noho ai ma Alanui Nuuanu Helu 37 mamua, a oiai ua hoolilo aku oia i kona kuleana malaila, ua wehe ae nei oia he hale hou ma Alanui Moi ma Waikiki iho o ke Keena o ka nupepa Elele, a oia no hoi ke Keena oihana mua o ka Hui Alahao Hawaii. E loaa no na mea a pau e pili ana i keia oihana me ka emi loa, a e hana hou ia na wati u me na lako gula me ka hikiwawe a me ke emi loa. E hoouna mai i na kauoha ma ka Pahu Leta Helu 268
E naue nui mai, a e ike no oukou iho. O na mea hou loa wale no i ike mua ole ia ma Hawaii nei
C. Ah Kau.
LA 11 O IUNE. LA 11 O IUNE.
E! Kakou i ka Heihei!
Na Papale Wahine i hanaia.
E HOOMANAO, E HOOMANAO,
O ke Kilohana o kahi o na Papale i Hanaia
AIA MA
N. S. SACHS
(104, Alanui Papu, Honolulu.)
Eia ia makou, a e loaa mau mai ana ma na mokumahu a pau,
Na Paikini Hope a me na Ano Hou Loa.
Na Papale Poepoe i-e nani, eleele a me keokeo, i kahikoia me na pua maikai, mai ka $4.50 o ka Papale a pii aku.
Na Papale Sela i hanaia me na Lipine, $2.00 a pii aku.
Na Papale Sela Spar, i hanaia me na kahiko a me na bo, $2.50 a pii aku.
Na Papale Keiki i kahiko ia, no ke kumukuai haahaa loa.
Na Pua hou ! Na Hulu hou ! Na Lipine hou !
He mau mea kupono wale no na La Nui e hoea mai ana.
Na Lole Keokeo Lihilihi i-a loihi, ku i ka holoku, he $4.50 no ka lole holoku, Na Lihilihi laula kupono no na Lole Keiki , ma ke .60 a me .75 keneta o ka i-a. Na Lole Keokeo maikai kakauloloa a papamu paha, ma ka .20 a .25 keneta o ka i-a Aole e lawa ke kahiko lole keokeo, ke ole me kekahi KAHEI SILIKA. E loaa ana no i o makou nei o na ano waihooluu o na ano a pau, no $1.00 a me $1.25 pakahi. Na Lihilihi kekahi no na Lole Lihilihi a me na kahiko lole ma ke kumukuai haahaa loa. Ina oukou e imi ana i na ano i-e hana lole huluhulu a pulupulu keokeo, a waihooluu ia paha, eia ia makou ia ano a kupa'i, no ke kumukuai haahaa loa. Ua hilinai makou i ke kuai hoopono ana, a e pomaikai ana oukou ke kipa mua mai mamua o ke kuai ana aku i kahi e. N. S. SACHS.
"Ka Halekuai Kaulana o na Kahiko Wahine." 104, Alanui Papu
Honolulu, Iune 4 1891. 208-dtf.
Papale ! Paple !! Papale !!!
E Loaa no maanei na Papale maikai o na ano a pau
Na PAPALE i hoonani ia a hoonani ole ia.
I loaa ole ka lua ma keia Pae Aina, a no na la hoomanao Kulaia, e loaa no ia oe ma na kumukuai haahaa.
Ina oukou e kuai i na PAPALE ma ko makou halekuai nei, alaila, e loaa no ia oe ke kaulike.
Nolaila, e kipa mai io makou nei i hoopauia ko oukou kuhihew a
C. J. Fishel.
Meti, 19, 1891 196-tf-d.
KUAI HOOPAU NUI.
Mai keia manawa aku a hiki i ko Makou hoonee ana aku iloko o ko makou
HALEKUAI HOU
Ma ke Alanui Papu,--(NA HALE BURUA.
E hoolilo aku ana Makou i ko Makou waiwai a pau o na ano Lole:
NA LOLE NANI,
NA LOLE I HUMUIA,
KAPU A ME PAPALE
PAHU LOLE, a pela aku
No na Uku Hooemi Loa Nae.
Egan & Gunn.
ALANUI MOI kokoke i ke ALANUI PAPU. tf--d.
HOOLAHA HOU
B. F. Ehlers & Co. -- PAINAPA
HELU 99, Alanul Papu.
IA OUKOU E NA MAKAMAKA A ME NA HOALOHA, OIAI HOI, UA makaukau makou i ke kuai ana aku ia oukou i na lako lole wahine o na ano Steila a pau ; oia hoi--
Na Silika hou Na Sateen hou
Na Mikilima hou Na Lihilihi hou
Na Lihilhii keokeo hou Na Lihilihi kau lole hou
Na ano Mamalu hou loa Na Paku Pukaaniani
Na lole hou o na wahine Na lole o na keiki liilii.
Na lole o kela a me keia ano e loaa no ia oukou no na kumukuai haahaa loa.
E kipa mai e na makamaka, i hoopau ia ai ko oukou kanalua no ka makoku kuai hoopoho aku ia oukou. Owau me ka oiaio,
tf B. F. EHLERS & CO.