Ka Leo o ka Lahui, Volume II, Number 221, 23 June 1891 — Page 4

KA LEO O KA LAHUI.

"E Mau ke Ea o ka Aina i ka Pono."

 

 

KA LEO.

 

John E. Bush.

 

Luna Hooponopono a me Puaku.

 

POALUA, IUNE 23, 1891.

 

He Molelo Kaao

 

No

 

KAMAPUAA.

 

KE KEIKI PUAA A KAHIKIULA ME HINA - KA MOOPUNA PUAA A KAMAUNUANIHO - KA HOA PAIO HOI O PELE, KA WAHINE O KA LUA I KILAUEA, A HALALOA AKU I NA KUPUNA O KUKULU O KAHIKI.

 

O oe ia e Haunuu, e Haulani

E Haalokuloku

Ka Mano e ka I'a nui

E ui, e Uilani

Ko inoa Puaa ia e o mai.

 

            I aku la o Kamaunuaniho i kona mau kaikunane:  Pehea la ko kakou pono, ke hiki hou na luna a ke alii, a lawe ia aku kakou imua o Olopana.

            I mai la o Kuliaikekaua, aohe pilikia, a mai hopohopo oe no makou; e holo loa no makou no Kauai, aia ke ao aina la ke kau mai la ilalo, o ke awa ka hoi ia. papae aku makou, he mea ai ia kalo mo'a.

            Ia manawa i ae aku ai ko lakou kaikuahine, a haawi ae la lakou i ke aloha hope loa.

            E hoohuli ae ke kakou alanuihele ma ke kuamoo pololei o ko kaua moolelo.

            I ka manawa a na luna i hoea aku ai imua o ke alii, oiai oia, e noho ana ma Puha, ua kauoha ko ke aku la ke alii i kona kahuna, ia Kuikui, a o ka inoa o kana wahina, o Pahonu.

            I ka wa a ua kahuna nei i hoea aku ai imua o Olopana ke alii, ua ninau aku la oia: Ma ke ola ana o ke alii, heaha ka huaolelo i kauoha ia ae nei ke kanaka?

            Eia ka huaolelo, wahi a ke alii: I kauoha ia aku nei oe, e hele mai imua o'u i keia la; no ka mea, ua pae mai nei kekahi waa mai Maui mai, ma ka la inehinei, a he elua ka mau wahine oluna o ka waa.  Heaha la ka pono no kela mau wahine, e hoike mai oe i kou ike kahuna?

            E maka kela mau wahine e pono ai, a oia wale no ka'u hoike imua ou e ke alii.

            Ua kuloou ihe la na maka o ke alii ilalo, a liuliu aea ae la na maka iluna, a nana pono mai la imua o Kuikui kana kahuna, a pane mai la:  Aole e make, e hoola i kela mau wahine na ke alii.

            E noho ae au i na la kapu Heiau a noa ae, alaila, kii aku au i mau wahine na'u.  E kauoha aku i na kanaka, e kukulu i halelau no a'u mau wahine e noho ai.

            Ua hooko ia ka leo alii, ua pupukahi ae la na makaainana o Koolaupoko no ke kukulu ana i ka hale.

            A ua hoi aku la ke kahuna i kona hale, me ka haawi pu ana aku i kana mau huaolelo hope loa i ke alii:

            Aohe no hoi he wa a puni ae ka aina, loaa e iho nei hoi keia mau wahine hou au.

            Aohe hoolohe aku o ke alii i na olelo a ke kahuna ona, no ka mea, o ka mea mau no ia i na alii; elike no hoi paha la me ke alii, me Kahahana: aole i hoolohe aku i ka olelo ae a Kaopulupulu kona kahuna.

            A ke waiho nei ka olelo kaulana a Kaopulupulu, a hiki ia kakou i keia wa:  I nui ke aho a pa ka ili i ke kai, no ke kai hoi ua aina.

            I ka paa ana o ua halelau nei, ua hoonoho ia aku laua nei iloko o ua hale nei, no ke kali o Olopana a hiki i ka wa e noa ai kona Heiau, alaila ike aku i ke kaikamahine o Maui.

            Aka, i ka wa i lohe aku ai o Kahikiula, ke kaikaina o Olopana, i keia mau wahine ui, no ka hookapu ana i na kino o keia mau wahine, na kona hanau mua, ua naulani ae la kona pokii, ma ka wehe ana i ka maluhia o Hina.

            Ma kekahi ahiahi hula ua iho aku la o Kahikiula me kona kahu, i kai o Oneawa, e halawai malihini pu me Hina ma, me ka manaolaua no o Kahikiula e aki ia mai ana no kana mauna.

            A pela io no, ua hele io aku la no oia a halawai me Hina ma, me na manao aloha, a ku no hoi i ka iini oloko.

            A ua hui ae la laua ma ia po, he kane a he wahine, a pela laua i noho kane a wahine ai a hala na po he ekolu, a i ka eha o na po o ko laua'nei moe pu ana, ua ka loa ia o Kahikiula e ka hiamoe, a i ke ala ana ae, aia ka la iluna.

            Ua hoi aku la oia no kona hale, a ua ike ia mai la oia e kekahi kaikamahine, a nana hai aku ia Olopana, ua huipu o Kahikiula me Hina.

            I kela wa i lohe ai o Olopana i ka hana pono ole a kona pokii, nolaila, ua pii ino ae la kona huhu me ka manao la hoi o Olopana, nana ia wahine o ka hoomalu ana, a hala ae la hoi na la kapu o kona Heiau: alaila, ike aku iana maka o ka wahine, eia ka auanei e puehu e ana ia Kahikiula.

            Nolaila, ua kipaku ia aku la e Kahikiula me kana wahine me kona makuahonowai wahine.

            Ua hele aku la o Kahikiula ma ma ia la no a hiki lakou i Kaawa, a ua hala ia lakou na la he elima malaila.

            A lohe ae la ke alii Olopana, i ka noho kokoke mai no o kona kaikaina ana i huhu ai me ka wahine hoi a laua.

            Ua kauoha koke aku la oia i na luna, e hele aku a kipaku loa aku ia Kahikiula ma, a ma kahi mamao loa aku lakou e noho ai; a ua hooko ia ia leo kauoha o ke alii.

            A ua hoomaka hou aku la lakoou e hele a hiki i Kaluanui, a ua kokua mai na kamaaina, ma ke kukulu ana i hale no lakou nei, a ua pau ae la ko lakou nei pilikia hale, a ua lawelawe aku o Kahikiula ma na mea e lako ai ko lakou noho ohana ana.

            Ua hapai ae la o Hina i ka laua keiki makahiapo, a i ka hanau ana mai he keiki kane, a ua kapa ia kona inoa o Kahikihonuakele.

            Mahope iho hapai hou iho la o Hina, a i ka hanau ana mai he keiki kane, ua kapa ia iho la kona inoa e Kekeleiaiku; a hapai hou ne o Hina, o ka ekolu ia o na keiki, a hanau mai la he keiki puaa, oia hoi ka mea nona keia moolelo a kaua e heluhelu nei, a o ka eha o na keiki i hanau mai ai. he kaikamahine, oia hoi o Leialoha.

            A i ka manawa i nui ae ai oia kaikamahine, ua lele aku la oia i ka lani, a lilo kona kino he kino ua, a ua kapa ia o Kauanaulu.

            A e ike aku ana kakouo ma keia hope aku o ko kaua moolelo nei, i ka hoolohe a kokua hoi o ke kaikuahine o Kamapuaa iaia.

            Ma keia wahi e hoopoina loa aku kakou i ke kaikuahine kino ua o Kamapuaa, a hiki i ka wa e pai ai o ke oolea oia kaikamahine eepa, a Hina laua o Kahikiula.

            Ua noho o Kamaunuaniho me kana mau keiki a me na moopuna; a ua nunui na moopuna kanaka a Kamaunuaniho i kela manawa, oia hoi o Kahikihonuakele a me Kekeleiaiku.

            Ua hanai iho la o Kahikihonuakele, he ilio kana hanai, a o ka Kekeleaiku hoi he puu kana hanai, a oia puaa aole ia he puaa okoa, aka, o ko laua pokii no ia i hanau puaa ia ai.

            Ua haku iho la o Kamaunuaniho he mele inoa no ka moopuna puaa ana, a oia iho keia:

Hanau ae no

Oili ana i ka hau anu e ka mauna

O Hiwahiwa oe,

O Hamohame,

O ka maka o ka opua

I hanau ia i ka uka o Kaliuwaa

O kou inoa ia, e o mai -

            A hu ae la ua wahi puaa kino lau nei.

            O ka noho ana o Kahikiula ma me ka laua mau keiki kanaka, o ka pii i ke kapili manu iuka o ke kuahiwi, a o ka inoa o ia kuahiwi o Kahinahina, aia ia wahi i ka uka o Kaliuwaa.

            Ua hoohalaia ko laua mau la opio ma ia hana, oia au kahiko, a i ka wa e loaa ai ka laua manu, ua hoi laua i kai; me ko laua mau makua, a me ke kupunawahine, a me na holoholona hoi a laua, a ua hala hoi na la makapehu i'a o lakou ia mau la.

            Ua hanai noehoi o Kahikihonuakele, i kana ilio me kahi ia manu, a pela no hoi o Kekeleiaiku; ua haawi no hoi ia i io manu, na kona wahi pokii puaa.

            A pela mau ko lakou nei noho ana, a hiki i ka wa a ua mau keiki nei, i pii ai i ka mahiai, i ka uka o Kaliuwaa, ua hoomakaukau o Kahikihonuakele i kana haawe huli, no ka pii ana i ke kanu huli iuka e Kaliuwaa. a ua hoomakaukau iho la no hoi o Kekeleiaiku, i kana haawe huli.

            A e alualu pu ana no hoi ka laua nei mau wahi holoholona ke pii laua nei i uka i ka mahiai.

            A ua hoomaka aku o Kahikiho nuakele e pii me kana haawe huli, a mahope aku no hoi o Kekeleiaiku pii ana me kana wahi puaa.

            A ua olelo mai la ke kupunawahine o laua nei:  E hana kaua i ko haawe huli a paa, alaila, hoouka aku iluna o ko wahi puaa, i ole ce e kaumaha.

            No ka mea, heaha hoi ka waiwai o ka hanai wale iho no i na wahi puaa, o ka waiwai hoi paha ia o kou luhi ana iaia.

            I mai la o Kekeleiaiku:  Aole na'u no e haawe ae ka haawe huli a maua, he minamina au i kuu wahi puaa.

            Ua maopopo no la Kamaunuaniho, ua hiki no i kana moopuna puaa ke lawe i kela haawe hali nui maluna o kona wahi kino uuku.

            Aole i hoolohe aku o Kamaunuaniho i na olelo a Kekeleiaiku; aka, ua hauhoa iho la oia i na haawe huli a paa, hoouka aku la iluna o kahi puaa, me ka hoopaa ana a paa ma na aoao o kahi puaa.

            Aohe i emo ia pii ana aku a Kekeleiaiku me kona wahi pokii puaa, hoea aku la laua ma ka laua nei mahina ai.

            A ua hoomaka aku la keia e hele e nana i ke kanu huli ana a kona hanau mua; aka, ua olelo mai la kona hanau mua iaia nei:

            Kai no hoi e kanu ana oe i kau mau haawe huli; eia ka kau o ka hele mai e nana i ka'u kanu huli ana.

            Pane aku la o Kekeleiaiku:  E alu pu hoi paha kaua i kau mahina ai a puni, alaila kanu pu aku hoi kaua i ka'u a pau, uhoi aku kaua i kauhale?

           

NAWAHI ME HUNTSMAN!

 

NA LOIO LAHUI!

 

            Ua makaukau maua e kokua aku i na poe o ka Lahui i loohia ia e na pilikia kivila a hewa paha; a e koi a e hoopiii aku ma kekahi o ia mau ano imua o ua Ahia Kanawai, mamuli o na uku i selike ia.  Aia no ko maua keena Loio ma ke kihi akau o na alanui Moi a me Alakea maloko o ke kulanakauhale o Honolulu. Nahora hana mau, mai ka hora 9 am, a 3 pm., ma ka Poaono nae, e pau ana i ka hora 12 m.

            O na hana a na aina, maheleaina a me ke kaha ana o na kii a me na palapala aina a pau, ua waiho aku mana na ka Loea Ana Aina a Civila Enekinia kaulna R. W. WILIKOKI e lawelawe, a e hooko me ka eleu.

            No na mea i koa, e kipa mei no ma ho maua keena nei e kuka pu ai.  O maua no me ke aloha.

            J. NAWAHI me D. L. HUNTSMAN.

Honolulu, Iune 3, 1891.                      208 - dtf.

 

Ka Hui Uwati Kaleponi.

 

            Na uwati gula o waho, hoopiha ia, me na mea hana o loko. o ka hana uwati kaulana WALTHAM, no $30 o ka uwati hookahi, ma ka uku palua dala o ka pule hoakahi.  E kipa ae io -

                        A. J. SCHREIBER - A           gena Alanui Hotele, malalo iho o ka Hotele Aloneiona.

 

OLELO HOOLAHA.

 

            E ike auanei na mea a pau, eia ma ka Pa Aupuni o Makiki nei, kekahi mau lio i lio kane ulaula lae kea, wawae keokeo hope hema, hoailona kuni (I) ma ka uha hope akau; 2 lio puakea aole kuni.  Nolaila o ka mea a mau mea paha no lakou keia mau lio, e pono e kii koke mai iloko o na la he 15.  E hoomaka ana ka helu ia ana o keia mau la mai ka la aku e puka ai keia olelo hoolaha; a i ole paia alaila, e kuai kudala aku ana au ma ka la 4 o Iulai ae nei 1891.  J. KALEI.

Iune 16, 1891.  3 ts - d.  Luna Pa Aupuni.

 

AUWANA A AIHUE IA PAHA.

 

            Ua nalowale aku mai kahi o ke Kanikela Iapana, alanui Nuuanu. kekahi lio ano hulupala hauliuli, he 8 makahiki, he 15 ana peahi lima ke kiekie, a he kiko keokeo mawaena o na maka, paa eha wawae a pau i ke kapuai hao.  O kekahi mea e hoihoi mai ana, a e hoikemai ana i kahi e loaa ai, e uku ia no me ka maikai kupono, ma ka hele ana aku ma ke keena kanikela Iapana.                        Mei 18. d5ts.

 

OLELO HOOLAHA.

 

            E ike auanei na mea a pau, eia ma ka Pa Aupuni lio o Makiki kekahi mau lio; hookahi ho kane, hao kuni [d] O F, akau, lae kea wawae keokeo 4; hookahi lio wahihe, lae kea ulaula wawae keokeo hope hema kiko keokeo hope akau hao kuni JK.  Ua komo mai keia mau lio i ka la 11 o Mei, makahiki 1891, a ina aole e kii mai ka poe nona keia poe lio alaila e kuai kudala ia aku no keia mau lio ma ka la 28 o Mei.

                                    J. KALEI,

Mei 19, 3ts-d.              Luna Pa Aupuni.

 

I ka Poe Lawe Nupepa.

 

            Ke poloai aku nei makou i ka poe heluhelu e lawe nei i ko kakou nupepa e makaala mai i ka hookaa ana i ka uku o ka Nupepa ma ka hebedoma, a e malama i na palapala hookaa mai na luna aku nona na inoa i hoike ia ma ke poo o keia Nupepa.  No ke paewaewa o ka hookaia ia ana o ke dala, a me ka hoohiki loa ana mai i ke keena nei, ua hoohoio makou ma ka hebedoma ka hookaa, i mama ai ka hookaa ana a ka mea e lawe ana, a i maopopo mau - ai ia makou, i kela a me keia hebedoma, ka poe i hookaa mai a me ka poe i hookaa ole mai, a ina ua hookaa me ka loaa aku o ka Palapala hookaa, he mea hoi e maopopo ai, ke alu ae ka nele o ka mea heluhelu, ke okila aku ka nupepa no ke kaa ole ma o na luna ae, alaila, no na luna ka hewa, aole no ka mea heluhelu. a ina aole io maoli no na luna ka hewa. alaila, e kala ia makou no ke oki ana aku i ka poe hookaa ole mai i ka lakou nupepa.

                                    J. E. BUSH.

 

Hale Kuai Wati Nui

HELU 1

No C. Ah Kau.

 

KA oi o na mea Gula, na DAIMANA, na POHAKU MOMI makamae loa, na WATI GULA, na WATI DALA & C., na amau e kela a me keia ano, na lako wehi GULA a me DAIMANA, na KOMOLIMA GULA a me DAIMANA, na WATI nunui ano hou loa o kela a me ko ia ano, na PUPANAPANA a me na lako e ae e pili ana.

            E hoomamao e na makamaka, o keia AH KAU no ka mea nana i haina ma WATI a me na lako GULA oi loa o keia Aupuni, a i kamaaina ma koma hele mua i noho ai ma Alanui Nuuanu, Helu 37 manoua, a oiai ua hoolilo aku oia i koma kuleana malaila, ua wehe ae nei ola ho hale hou ma Alanui Mei ma Waikiki iho o ke Keena o ka nupepa Elelo, a oia no hoi ke Keana oihana mua o ka Hui Alahao Hawaii.  E loaa no na mea a pau e pili ana i keia oihana me ka onai loa, a e hana hou ia na wati u me na lako gula me ka hikiwawe a me ke elai loa.  E hoouna mai i na kauoha ma ka Pahu Leta Helu 388.

            E mane nui mai, a e ike no oukoa iho.  O na mea hou loa wale no i ike mea ele ia ma Hawaii nei

            C. Ah Kau.