Ka Leo o ka Lahui, Volume II, Number 221, 23 June 1891 — Page 1

KA LEO O KA LAHUI.

"E Mau ke Ea o ka Aina i ka Pono."

 

Buke II.           HONOLULU, IUNE 23, 1891.         Helu 221

 

He Moolelo Kaao

-NO-

KANA.

 

KE AHI KANANA - KA HIAPAIOLE - KA MOOPUNA A ULI - KA MEA NANA I HOOHIOLO O HAUPUKELE KA PUU KAUA I MO

 

            Pane mai la na makua me ke ano kuoo:  Owai keia mawaho e kikeke mai nei o ke kakahiaka poniponi ?

            Olelo aku la ka laua keiki:  Owau no nei e kikeke aku nei mawaho nei; no ko olua moe loihi loa mai hoi paha kekahi, oia ke kumu o ko'u hoala koke ana aku nei ia olua, ua ike no hoi olua, i keia la au e pii ai i ke kuahiwi, e like no hoi me ka olua ae ana mai ia'u i ka la inehinei; nolailai, mai lolelua hou olua i ka olua mea i ae like mai ai ia'u, a e hoomakaukau mai hoi olua i wahi mea ai na kakou no keia kakahiaka, aia a pau ka kakou paina kakahiaka ana; alaila, o ko'u pii no hoi ia no ke kuahiwi, i ike aku hoi i na mea hou o ka uka waonahele, he ole loa hoi ko kakou noho wale iho no i kai nei.

            Ma ia hoakaka ana aku a ka laua nei, aohe he mea i koe ma ko laua aoao, a laua e hoopauaka mai ai i ka laua keiki.

            Mahope o ka pau ana o ka lakou paina ana, ua ae aku la na makua i ka makemake o ka laua keiki no kana huakai koele wawae i ka uka o Paliuli, me ka maopopo ole ia laua kahi a ka laua wahi keiki uuku e auwana hele aku ai i ka nahelehele.

            Nolaila, ua hoomakaukau iho la laua i wahi pono kino no ka laua keiki, no ke kueo hele ana i ke ala me ka waimaka.

            A makaukau ia mau mea, ua kau kau aku la laua me na leo i ku i ka walania a ke aloha keiki -

            E ka maua keiki aloha, ke pii la oe a hiki i ka uka nahele loloa, aia no i uka olaila ko kupunawahine; malia o hiki oe ilaila, a ike oe i ko kupunawahine, a nana hoi ia e haawi mai i wahi ai nau e paina @o ai a paa ka houpo lewalewa o kamahele.

            Lele aku la ka makuahine e honi i ka ihu o ka laua keiki, a kulu iho la na kulu waimaka; a pela pu no hoi me ka makuakane, ua lawa like ia haawina ia laua, oia hoi ke aloha.

            Ninau aku la na makua i ka laua keiki:  A ehia ou la e hele ai i ke kuahiwi, alaila, hoi mai oe i kai nei, a e halawai pu hou ai hoi me maua kou mau makua aloha ?

            I hookahi a'u anahulu e hele ai i ke kuahiwi, alaila, huli hoi mai au i kai nei.

            A ina ka hoi i kali ae olua ia'u, a hala na anahulu elua, a i hoi ole mai wau, manao ae olua ua poino wau ma ko'u alanui-hele i hele ai, he nani poino ana no hoi ia mamuli no o ko'u makemake; aole i pili ia hewa ia olua i na makua, ua hala ole olua ma ia mea, ua pili no ia hewa ia'u, ma ko'u ano hoopaakiki; nolaila, ua hala ole olua e na makua aloha o'u.

            Nolaila, ua hookuu aku la laua i ke keiki e pii hookahi i kahi ana i makemake ai; a ua haawi hou aku la na makua i ko laua aloha hope loa i ka laua keiki; a hoomaka aku la oia e pii me na kaina wawae o ka hoihoi, no kona ae ia ana mai e kona mau makua.

            Ua hele aku la oia a komo iloko o ka hihipe'a o na lala ohi'a loloa o ka uka o Panaewa, a hala hope aku la iaia ia wahi, ua hoomau aku la no oia i ka hele auwana ana a hiki i ka lawe ana o Lehua i ka la.

            A oiai hoi ka la e aumeume ana me Lehua, ua hoohiki loa aku la ka ia nei huakai malalo o kekahi kumu laau kahiko, a malalo o kona puha laau; hoomakaukau iho la oia i wahi @ona e moe ai ma ia po, aia ka pono o ke ao ae, alaila, ike pono ia ka laau maka a me ka laau maloo; malia paha o ninau mai ko'u mea heluhelu:  Pehea aku la la ka hi keiki o ka moe ana me ka pololi ma kela po ?

            Aole oiala noonoo ae no ka pololi aka, ua kamau wahi maia kuahiwi iho la no keia ma ia la, aua e auwana hele ana no ia la okoa, a hiki i ka po ana.

            Nolaila, ua paa aku la no ka hou po, a ua haule aku la no ka kakou wahi kamaeu hiolani; no ka mea, ua hele koi nei mau wahi au, a maopaopa.

            I kei nei ala ana ae ma kakahiaka, aia ka la iluna lilo, a hoomaka aku la no keia e hele, ma ke alanui i maopopo ole iaia.

            Ak@ ka hele no hoi paha a ka eueu hookolohe, aohe i ae e - he ma ka'u, he mehameha; he pono wale no kai nei i ka hele iloko oia ulunahele kanaka ole, hookahi no leo lohe ia, o ka leo hone o ka Pupuka@ioe, a me ka leo kani kuamauna o ka manu Oo.

            Ua hele oia ma ia la a hiki i ke awakea, a noho iho la oia malalo o kekahi malumalu o ka lau laau, e hoomaha ana no kona noonoo ana i kana wahi e hele ai, i ka pono a me ka pono ole.

            I ke kuu ana iho o ka nae, ua hoomaka aku la no koi nei hele ana a hiki i ka loaa ana iaia nei kekahi mau hua laau, a laau aku la oia a ai iho la; a ua hele hou aku la no oia, aole i liuliu ka ia nei hele ana aku, lo@e aku la keia i ke kani mai o ka ia kuku kapa a kona kupunawahine, oia hoi o Uli.

 

He Moolelo Nanea.

NO

De Atanani.

 

Ke@Koa o ka Lio Olohe.

- A I OLE -

NA KIAI EKOLU O FARANI.

 

            A e ae ia no oe e ko@o aku iloko, e kamailio ae me keia mau olelo, - "Gemaine," - a e hooko ia no kou makemake e kekahi kanaka.

            Ma o ua kanaka la, e ha'i aku oe i kou makemake o ka hiki ana aku, a e ike no oe i ka hooko ia iloko o ka manawa pokole.

            I ka wa e hoea mai ai o Lapota, e ha'i aku oe na'u oe i hooun@ aku i ona la, a e makemake ana e ike iaia ma keia wahi.

            Me keia mau olelo a ka madame Bonacio, haawi aku la ka opio i na kunou haahaa ana imua o ua lede la, a huli ae la ia maluna o kona mau kapuai a kamoe aku la no ka halealii.

            O ka hora 10 ia wa a ua k@a opio nei i hoea aku ai mawaho e ka puka pa, a e like me na olelo a ka madame i a'oa'o mai ai i ua opio nei, ua weho ia mai la ka p@ka nona me ke ke'ake'a ole ia.

            Iaia i komo aku ai, hoopuka ae la oia i ka huaolelo Gemaine, a ia wa koke no i kalele koke iho ai kekahi lima ma kona mau kipoohiwi, a ninau mai la no kona makemake o ka hiki ana aku.

            Ua ha'i aku la ua koa opio nei, a ia wa i huli ae ai ua kanaka la maluna o kona mau kapuai a haalele mai la iaia.

            No kekahi mau minute pokole, aia e ku ana imua o ke alo o ua koa opio la, he kanaka i aahu ia me kekahi lole nani, a na ka ninau ana aku a ua kanaka la i hoike aku i ke koa opio mai ke alo alii mai o ka moiwahine Ane @a kanaka @ei me ka aahu nani.

            E ka Monasiua, owau anei kau i makemake ai e ike ? wahi a ua kanaka la.

            O oe anei o Monasiua Lapota, ko ka moiwahine Ane kanaka lawelawe ? wahi a ke koa opio i ninau aku ai.

            Ae e ka Monasiua, owau no ia, wahi a ka pane.

            Alaila, e Lapota, ma ke ola ana o ka moiwahine, ua makemake ia oe e ike e ka madame Bonacio, ka lede hookomo kapa o ua moiwahine la.

            Ahe ! na ua madame la oe i hoouna mai nei ea ?  A ! ke ike ala au, a aia la oia ihea i keia manawa e ka opio ?

            E ukali mai mahope o'u, a na'u no e alakai aku ia oe no kahi o ua madame la e noho nei.

            Me keia mau huaolelo a ua opio nei, huli ae la laua a puka aku la iwaho o ka pa alii, a no kekahi mau minute helu wale no, hoea aku la laua no ke keena o La Fere.

            Oiai laua ma ke alahele, ua pane aku la o Lapota ia Atanani:

            E ke kanaka opio, o kou ola, aia no ia ma ka waha o na pu kaupoohiwi ke ku ka hewa ia oe he kipi, oiai, o kou komo ana ae nei, ua ike ia e na koa kiai, a he mea kanalua ole no'u ka olelo ae, e hoike ia aku ana keia mau mea imua o ka moi, nolaila, i mea neu e alo ae, ai mai keia make ae, e haalele koke iho oe ia'u mahope iho o ko kaua hoea ana aku no kahi a ka madame Bonacio e noho nei -

            A pehea aku ?

            Alaila, e hele oe ma kekahi wahi au i ike ai he mau hoaloha lakou nou -

            Alaila, pehea hou aku ?

            E hoea aku oe ma kahi o ua mau hoaloha la ou, i loaa ai he mau hoike ma kou aoao me oe i kei po, a e hoomanao oe o ka hora 9:30 kou wa i komo ae ai no ka pa alii, a pela oe e makaala ai no ka manawa o ka wati ma ka hale o ua hoaloha la ou.

            Na keia pane a Lapota na ia mea i hoike aku i ke koa opio, aia ka make a me ke ola ma ka papa huahelu o ka wati, a ke nele oia me ke kahi o ia mau hoike, alaila, he mea maopopo, e hopu ia ana oia ma ke ano @e ki@ a he hoohalua i ka mana a me ke kapu o ka hale alii Louvre.

            Nolaila, me na manao olino o ke koa e lalapa ana i kona umauma, hooholo iho la oia i kona manao, e aa oia me kona puuwai holookoa e apuka a e kolohe i ke Kapena Terevila.

 

HE ANAINA HOOMANA MA ARIONA HALE.

            Ma na Lapule a pau, e hoomaka ana ke anaina haipule i ka hora 9 a hiki i ka hora 10:30 a.m., no na kanaka Hawaii, a ma ke ahiahi hora 7:30 p.m. no na haole, a me ka poe e makemake ana e helo.

Lunakahiko A. Hawa.

 

Na Hui Kinipopo.

Iune 13 Kamehameha vs Honolulu

  "    20 Hawaii                     vs Honolulu

  "    27 Kamehameha           vs Hawaii

Iulai  4 Kamehameha vs Honolulu

  "    11 Honolulu      vs Hawaii

  "    18 Kamehameha           vs Hawaii

  "    25 Kamehameha           vs Honolulu

Aug 1 Hawaii              vs Honolulu

  "    8 Kamehameha vs Hawaii

  "   15 Kamehameha            vs Honolulu

  "   22 Honolulu       vs Hawaii

  "   29 Kamehameha            vs Hawaii

 

OLELO HOOLAHA.

            Ua nalowale aku kuu Lio [w] hulupala lae kea loihi a he ma@ wawae keokeo a pau kona eha, i kuni ole ia i ka hae, a e loaa no ka uku makapa o $5.00.  E loaa no au ma kahi o T. C. Polikapa.

JNO H. POLIHALE.

Auwaiolimn, Honolulu, Apr. 30.        3t@-d.

 

Olelo Hoolaha.

            Ua makaukau ka mea nona Oinoa malalo iho, e hana i na P@a HAKU PUNA ELEELE a me ka pohaku e ae no na pa kupapau, a me na kahua kukulu kia-hoomanao.  O ka poe makemake e waiho mai i ka lakou mau kauoha me Ioane Akina

J. BOWLER.

Sept. 22, '90, d-ly *

 

H. P. K. Malulani.

            HE LOIO a he hookapeke olelo ma ke Ka@.  E loaa @ ke kai hawanawana o Kawaihae e hoene ana me ipo la, a Hamakua au i ka la'i o Kukaiau ma ke alo o na pali.  E ohiia no hoi na aie me ke ku i ka eleu a me ka puahiohio                        Nov 8 '90, d-ly.

 

HOOLAHA KAI KONOHIKI.

            Ke pa leo aku nei ke Konohiki o Waialae, i kona mau hoaloha a me na hoaaina o kona Aina, ua hoolimalima aku oia i ke kai i keia manawa, a ua hookapu iho oia i ka @ee-nona iho, a nolaila, k@ poloai aku nei oia e ike a hoomaopopo i keia leo la.       Owau no,

3ms-d. PAULO ISENBERG.

 

HE KOKUA!!

NO KA POE PILIKIA, E HELE AKU I K KEENA O

R. W. WILIKOKI MA.

            HE KOKUA ma ke KANAWAI, a no ka Hooponopono ana i na kuleana Aina a me na palena Aina.  Ua makaukau oia e ha@a i na Palapala Kanawai o na ano a pau, a ua lawa oia no ka hana aha imua o na Aha Hookolokolo a pau o ke aupuni, ma o kona hoa, kekahi o ua Loea Kaulana o keia mau la.

            Keena Helu 15, Alanui Kaahumanu.  195-dly.

 

Hoolaha Hookap@

            Ke hoike ia ak@ nei ka lohe i @a ano kanaka a pau loa.  Ua hookapu loa maua i ko maua mau Apana Aina ekolu i kapaia o Kalaheo, Kahaluu@ a me Puuoihala, no lakou na eka @ e waiho la ma ka Paa, Kailua, Koolaupok@, Oahu, i hoolimalima ia e maua me@ ia K@leau (w) mai.  Nolaila, ke papa @ ia aku nei na holoholona o kela a me keia ano, aole e hookuu wale ia maluna o ua mau Apana Aina la, a e  ka mea a mau mea paha e kue ana i keia , e hopu ia @ e maua, a i ole ia, e ko maua mau hope paha, a e hooko ia e like me ke kuhikuhi a ke kanawai.  O na poe a pau e makemake ana e komo iloko o keia Hui, e pono lakou e hele mai e hui pu me Mrs. C. I. HIRAM, a i ole ia, me DAVID DAYTON, a i ole ia KUKA.

Owau no me ka h@

MRS. C. I. HIRAM.

Honolulu, Oahu, Oct. 8, 1890.           @me-d.