Ka Leo o ka Lahui, Volume II, Number 177, 22 April 1891 — Page 3
| This text was transcribed by: | Kahuanani Kalua-ching |
| This work is dedicated to: | Helen Maliu Chamizo |
KA LEO O KA LAHUI.
"E Mau ke Ea o ka Aina i ka Pono."
HE MOOLELO HAWAII
NO
KUALUNUIAOLA.
KE KEIKIKOA O KA MOKUPUNI O MANOKALANIPO,
KA UPAPAIOLE O KE KOA
I NA LA O KA NOHOALII
ANA O LA KE ALII O
WAIMEA, KAUAI
I ka pau ana no o keia mau olelo a ko alii me ke ano ha’uha’u o ka waha, ua moe iho la na maka o ke kahuna me ka namunamu ana iho i kekahi mau huapule, a liuliu ka laua @oho hamau ana no kekahi mau minute. akahi no a pane mai ke kahuna i ka manao o ke alii i ka pane ana mai.
Aohe kuu alii i make, no ka mea, ua paa aku la ka po i ka make, aohe he mau hoailona.
Ina pela, e hele hou oe e nana iloko o kona hale, malia, ua hoi io mai mahope iho o ko’u hiamoe ana i ka po nei.
Holo aku la ke kahuna a kiei aku la ma ka puka makani o ko Kualunuiaola hale e moe ai, ike aku la no oia i ua opio nei e moe ana no ilna o ka hu’a o ka moena na pawehe, a i kona ike ana, hoi aku la oia me ka naau hauoli a hoi ke aku la i ke alii ia mea.
I ko Ola lohe ana, ku ae la oia iluna a hele aku la e nana i ke keiki, i, kona hiki ana aku mawaho o ka puka o ka hale o kara keiki, kani aku la kana oli i ka inoa o ua opio nei a kaua, a i ka pau ana o kana heluhelu ana, komo aku la oia iloko, i ka wa a ua Kualunuiaola i kahea aku ai e komo mai.
Oiai o Ola imua o kana keiki, ua lele aku la oia e honi i ka ihu o kana keiki me ka olelo ana.
I ka manawa hea nei kou hoi ana mai e ke keiki, o i kakali aku au ia oe a hala ka waenakonu po, aohe ou wahi mea a hoi mai, kau wale aku no no maka, eia ka ua hiamoe, ike ole la au i kau hoi ana mai.
O ko’u hoohiki loa ana mai nei no ia i kauhale nei, ua ao iho nei, wahi a Kualunuiaola.
Pehea oe i lohi loa ai a kaumaha hewa ana au me ka manao ua loaa ia la oe i ka poino!
Hoi mai nei au a kahi i moe ai, a ao loa ae nei, hoi loa mai nei au.
I ka lohe ana o ka makuakane, lilo ae la kona kaumaha nui i mea ole, nolaila, ku ae la no oia a hoi aku la no kona hale.
No kaua iho nae, ua ike kaua, i kahi o ka makuahine ua opio nei a kaua kahi i hiamoe ai ia po. a o na waiwai a ua opio nei i hao mai ai o ke kaua, oia hoi na papale mahiole a pela aku. ua waiho no ua opio nei ma kahi moe o kona makuahine me ka ike ole o Kahapula.
I ke kahikole ana ae o ka la, ua iho hou aku la no o Kualunuiaola i kai o Kekaha i ke kaua a i ka hiki ana aku nae o ua opio nei, he wahi mano hookahi wale no ka nui o na kanaka i koe ma ka aoao e Kekaha e kaua ana, ua pau ka nui i ka luku ia e Pi.
O ke kumu o l ia ikaika kamahao o Pi, oia no ke kokua mau o ke akua iaia, oiai, ua haawi aku o Kualunuiaola i ke akua o laua iaia e like me na mea i hoike mua ia’ku ma na helu i hala.
Nolaila, o ke akua kona ikaika ponoi a me ka nui o kona mau koa, kokoke na kanaka o Kekaha e puehu i ka noke a ka make, aka nae, laki loa i ka hoea e ana aku o Kualunuiaola i ka manawa kupono.
I kona hiki ana aku hoomaka aku la no hoi oia e luku i na koa o ko Pi aoao, a e like no hoi me kana e hana ana, pela no hoi o Pi e noke mai ana i ka luku ma kona aoao mai.
Aole i pau
He Moolelo
No
De Atanani
Ke Koa o ka Lio
Olohe,
A I OLE
NA KIAIEKOLU
O FARANI.
Ua hoomau aku no ua kea opio nei i kana mau hailiili ana, a hiki wale i ka hoea ana mai o ka ona hotele malaila, me ka hawanawana pu ana iho i keia mau huaolelo ma pepeiao o ua opio nei:
He kanaka hoohe wale io kela e kuu hoaloha opio!
Ae! wahi a ka opio, aka, no kela lede, he lede ui maoli no kela!
O ka lede hea keia e kuu hoaloha? wahi a ka ona hotele.
Ka Milede! ka Milede! i hooho ae ai o Atanani.
Aha! o ka Milede ea? alaila, he hookahi wale iho no, ua lilo aku he elua mau malihini mai ia’u aku, aka, ua hoopiha ia ko laua makalua e ka mea a’u e haupu nei e loaa ana ia’u he unikumamakahi dala kalaunu.
Alaila e ka mea heluhelu, e hoo mauao iho kaua no ka opio Atanani ka a ona hotele la e kamailio nei, oiai, ua ike oia, o no palapu i loaa i ke koa opio, ua lawa ia nona e noho ai no kekahi mau la ma kona hotele, mamua ae o kona haalele ana mai ia Muna no ke kulanakauhale pookela o Parisa.
O kela mau huaolelo a ka ona hotele, ua hoolala mua oia me kona noonoo ana, aia iloko o na la he 11, a e loaa no iaia kela mau dala ina e averiga ia ina ka hookahi dala o ka la hookahi.
Aka e ka makamaka, o ia mau kuko ana a ua wahi ona hotele nei, ua haule pahu iho ia ilalo o ka lepo, oiai, malalo o ka mana a me ka ikaika o ka omole laau aila a ua opio nei, aia hoi, ma ia ahiahi no. ua loao ae la ka maha a me ka oluolu iaia, a ma ke kakahiaka ana’e o kekahi la, ua oluolu loa ae la ia, a hiki hoi iaia ke hele ma o a maanei.
O ka loaa koke ana ae o ka maha a me ka palekana i ua koa opio nei, hooholo iho la ia i kona manao e halele koke iho ia i kahi kauhale o Muna no ke kalanakauhale nui a pookela o Parisa. no ka hoike koke ana iaia iho imua o kapena M. de’Terevila o na koa kiai o ka moi Lui XIII o Farani.
Nolaila, me na manao ulumahiehie o ke koa, hoakoakoa mai la ia i kona mau wahi ukana, a iloko o ke pahaohao nui. aia hoi, ua nalowale iho la kana leta hoolauna ia kapena Terevila, a na ia mea i hoopihei hoi nui loa mai i ua wahi koa opio nei.
Ua haawi aku oia i na hoohuahualau ana i kahi ona hotele, a o ka ua wahi ona hotele la i pane mai ai, aole loa oia i ike i ua leta nei.
O keia hoole ana mai o ua wahi ona hotele la, ua hoopuka ae ua Atanani nei i na huaolelo hoinoino i ka mea nana i hana keia hana, a i ka wa a ua opio nei i hoopuka ae ai i kana mau huaolelo hope, e hoike aku ana oia i keia mau mea imua o kapena Terevila, ua naka haalulu ae la ua wahi ona hotele la me ka weliweli nui.
No ka mea, ua hoomaopopo iho la oia, o ke kanaka nona kela inoa i kapa ia, he kapena no na kea kiai ponoi o ka moi, he kanaka ia i weli ia kona inoa a puni o Farani.
Aole wale hoi oia, aka, o ua kanaka hookahi la no ke kanaka i lilo he punahele nui a kona moi a me ke Cadinela, a ke lohe aku paha ua kapena nei no na mea i hana ia maluna o ke kanaka Gasecona opio maloko o na palena o kona hale hotele, he mea maopopo, e kau mai no auanei na ahewa ana a ua kapena koa nei maluna ona ma na ano a pau.
Nolaila, me na manao hopohopo o ka hohe wale, huli ae la ia maluna o kana wahine a me kona kauwa, a haawi aku la i ke kauoha no ka huli ia ana o na wahi a pau o ka hotele.
A ke loaa ua leta la malalo o ka malu o kekahi mea, e hopu koke ia no oia no ka hewa he aihue a me ka powa.
O keia kauoha a ua ona hotele la ioa ka kona wahine a me ke kauwa i hooko koke aku ai, a no ka wa loi hi, hoi mai la lakou a hoole mai la i ke koa opio, wahi a ka ona hoele i pane mai ai i ka opio:
He leta waiwai nui anei keia au e ka hoaloha opio?
Ke ole au e kuhihewa pe’a, wahi a Atanani, no ka mea, aia maloko o laila ko’u pomaikai. Aole no he ano nui loa o na olelo o ua leta la, aka, e Mr. ona hotele, aole loa au e ae e lilo oia no na dala he 3,000 a oi aku paha.
HALE HANA WAI MOMONA
WAI ANIANI.
HARE MA NA ONA HELU 81, ALANUI MOI.
Ka poe wale no nana e hana nei ka WAI HOOMAEMAE KOKO KAULANA, oia hoi ka
Saseparela
a me ka
Wai Hao.
Na wai Momona Awapuhi, Saseparela, Lemi,
Wai-pipii, soda maoli, Sida Kamepena, &c.
Mutual 330 Telepona Bele 298
E hooia ia ana ka maemae o na wai a pau. E hooko ia no na kauoha a pau loa mai na Mokupuni mai a me ko ke kulanakauhale nei.
Mar. 15, 1891. 148 d tf.
KUAI HOOPAU NUI.
Mai keia manawa aku a hiki i ko Makou hoonee
ana aku iloko o ko makou
HALEKUAI HOU
Ma ke Alanui Papu, (NA HALE BURUA,
E hoolilo aku ana Makou i ko Makouwai wai a
pau o na ano Lole:
NA LOLE NANI,
NA LOLE I HUMUIA,
KAPU A ME PAPALE
PAHU LOLE, a pela aku
No na Uku Hooemi Loa Nae.
Egan & Gunn.
ALANUI MOI kokoke i ke ALANUI PAPU. tf d.
Hoolaha Hou!
B. F. EHLERS &CO,. Painapa.
Ua loaa mai nei ia makou he mau waiwai hou loa, oia hoi
KAKIMIA,
KINAMU,
KEOKEO HALU’A
CHALLI,
VIKOLIA KEOKEO
A ME NA
Mikilima o na ano a pau, a me ua paku puka aniani o keia a me keia ano, me ua kumukuai kaakaa loa.
Alanui Papu, Honolulu. 25 dsm. B.F. EHLERS & CO.