Ka Leo o ka Lahui, Volume II, Number 172, 15 April 1891 — Page 3

KA LEO O KA LAHUI.

"E Mau ke Ea o ka Aina i ka Pono."

 

HE MOOLELO HAWAII

-NO-

KUALUNUIAOLA.

 

KE KEIKIKOA O KA MOKUPUNI O MANOKALANIPO.-KA HI'APAIOLE O KE KOA I NA LA O KA NOHOALII ANA O OLA, KE ALII O WAIMEA, KAUAI.

 

            Nolaila, ua manao io loa no oia ua make io no, no ia mea, ala mai la kona huhu i na kanaka o Kekaha a me ko lakou alii, a pela iho la e pau nei na kanaka o Kekaha i ka puhee imua o Pi a me kona mau kanaka.

            I ka loaa ana aku o keia lono i ke alii, ua noho koke iho la ka lakou ahakuka no ka mea pon oe hana ai me na kahuna, a ma ka lakou noonoo ana, ua hooholo iho la lakou i na mea a ke kahuna Pokii i wanana mua ai.

            I ko Ola lohe ana, huli mai la oia a olelo mai la ia Pokii, pehea la kou manao ia kaua a me ka aina?

            Eia ko'u manao, aohe e pono ia kaua, no ka mea, aohe e paa na kanaka o Kekaha ia kaua he hemahema, hookahi no mea e pono ai o ke kaiki ke kanaka ikaika, a oiai, ke a'o nei oia i ke koa, alaila, he manawa kupono loa keia nona e hoike ae ai i kona makaukau ma na mea i aʻo ia iaia e kanaka kumu a'o.

            Ina o kaua, aohe a kaua wahi pono e hana aku ai, oiai, ua haawi pio aku la kekahi poe o Kekaha ia lakou iho malalo o ka enemi, pela ka hoike a ke Akua ia'u, aka, aia wale no ia ia oe, i i mai no oe, ia kaua no, ho-a kaua imua.

            Aka nae, ua hoike mua aku nei au i ka pilikia, o noho auanei kaua a mahope aku, lohe au i ka leo, ua ike no hoi paha o Pokii ke pilikia, aohe no hoi he olelo mua mai, nolaila au e hoike mua aku nei i na mea a pau, aia no nae i kau mea e koho mai ai.

            Pane mai la ke alii, he maikai kau mau hoakaka a pau, aka nae, aia a hui mua au me ke kumu aʻo a kuu keiki, no ka mea, aohe o'u kuleana i koe i ke keiki i keia manawa, oiai, ua haawi aku au nana ke a'o ana, a hiki i ka wa ana e ike ai ua kupono oia no ka paa ana i ka aina.

            Me keia mau huaolelo, kauoha aku la ke 'lii i kekahi o na kahuna e kii aku ia Kaiolani e hele mai imua; ua hooko ia aku la keia kauoha a ke 'lii, a aohe no hoi i liuliu komo mai la ua kumu a'o nei a ke alii opio.

            Mahope iho o ko ke alii hoakaka ana i na mea a pau imua o Kaiolani, ua pane mai la ua aoo poohina nei:

            Heaha auanei hoi, e hoao kuu alii i kona ike a maua i a'o iho nei, a o kona manawa a'e nae, e hooioli i ka po ina e hiki ana.

            Ua hooholo like mai la na kahuna a pau i keia manao o ke alii, nolaila, ma ke ahiahi o ia la hookahi no, ua hookuu ia kau la o Kualunuiaola no ka iho ana aku no kai o Kekaha e hoao ai i kona ikaika ina e hiki ana.

            I ka hookuu ia ana o ua opio nei, kahiko iho la oia iaia iho me na pono o ka hele ana i ke kaua, e laa ka laau ihe, ka laau palau a me ke kahi mau mea kaua e ae e hana ia ana iloko o ia au.

            I ka makaukau ana o keia mau mea a pau, lele aku la oia honi i ka ihu o kona makuakane, a i ka pau ana o ka haawi aloha ana mawaena ona a me kona makuakane, olelo aku la oia:

            Ei au ke hele nei o kaua, nolaila, e noho oe me ka hoomanao, malia paha o ko kaua hui hope loa ana keia, oiai, aia o kekaha la ke waiho mai la iloko o ke kupikipiki-o, pela mai nei kuu kumu.

 

He Moolelo

NO

De Atanani.

 

Ke Koa o ka Lio

Olohe,

-A I OLE-

NA KIAI EKOLU

O FARANI.

 

            Aka, e malama oe iaia me ke aloha me he kauwa la i noho loihi ma lalo ou a hiki i kona make kupapau ana; ua hoomaha hou iho la ua hapauea nei i kana kamaiho ana, a liuliu, hoomau hou mai la oia i ke kamailio ana:

            E Atanani, ia oe e hiki aku ai imua o ke aloalii o kou moi, e lawe oe i ke kulana o ka hoopono a me ka pololei, oia kou kahua e ku ai, e pale i na hoowalewale ia mai, a e haawi i na kue ana me kou ikaika a pau ma ka aoao o kou moi a me ke Cadinela.

            He opio  wale iho no oe, aka @ Atanani kuu keiki, e koa oe ma ka wiwo ole malalo o keia mau kumu elua, ka mua, he kanaka Gasecona oe, a o ka lua, o oe ka M-de-la Atanani keiki.

            Mai maka'u no na hoino ia mai, aole hoi i ka hoohenehene ia; aka e ku maluna o kela mau kahua elua, a hoike aku imua o na miliona kanaka o Farani, ua hoohua ia mai i keia ao malamalama, mai loko mai o ka ohana a M-de-la Atanani, he koa opio e hiki ole ai i ko lakou ma na ke kuai i kona puuwai me na makana o ke kipi.

            Ua a'o aku au ia oe i ka oniu ana o ka pahikaua ma na ike a pau, a mawaho ae o ia mau mea, he pu-li-ma hao kila kou a me na olona uaua e like me ka hao paakiki.

            A ano e Atanani kuu keiki, no ka panina o ka'u mau olelo, e lawe aku i keia palapala no ke aloalii o ka haku M-de Perevila, ke kapena o ko ka moi XIII mau koa kiai ponoi, a nana e haawi mai ia oe i ke alahele o ke koa a me ka wiwo ole no ka make me ke ola.

            Me keia mau huaolelo a ua hapauea nei, kaei mai la ia i kana pahikaua ma ka puhaka o kana keiki me ka haawi pu ana iho i na honi ana ma na papalina o ua opio nei, a huli ae la ua Atanani opio nei maluna o kona mau kapuai a hele aku la ma ke keena o kona luaui makuahine.

            Ua haawi mai la kona makuahine i na puili aloha ana maluna o kana keiki me na waimaka e kiheahea ana mai kona mau lihilihi mai me ka panai pu ana mai hoi i na huaolelo kaukau o ke aloha keiki, a o ua mau huaolelo nei, ua lawe mai ua opio la o ka lio olohe a hoopaa iho la iloko lilo o kona puuwai me he kia hoomanao la imua o kona mau onohi make.

            Me keia mau hui aloha ana o na makua me ke keiki, haalele iho la ua koa opio la i ka malumalu hale o kona mau makua a kamoe aku la i kona alahele no ke kulanakauhale pookela o Parisa, ma ke alahele aku o kahi kauhale uuku o Muna, e like me ka kaua mea i ike mua ae nei ma ka hoomaka ana o keia moolelo.

            Nolaila, i ka wa a ua koa opio la o ka lio olohe i lele iho ai mailuna iho o kona lio, ma ka puka pa o ka hotele Farini Muna, ua haawi mua ae oia i na hakilo ana a kona mau maka ma kekahi o na puka aniani o ua hotele ala, aia hoi, ua halawai mai la me ko lakou mau lena ike he ekolu mau kanaka, e hehe ana na aka haalo'ulo'u ana me ka nana pu ana mai iaia nei, a oia ka ua koa nei o ka lio olohe i koho koke iho ai, e kamailio ana lakou i kekahi mea e pili ana iaia.

            Me ka puuwai i hoowela ia me ka inaina no kela mau hana ano keonimana ole a kela poe kanaka, hele pololei aku la oia imua o lakou me na maka e haka pono ana maluna o kekahi o na kanaka, ka mea hoi a ua Atanani la i koho iho ai, he kanaka oia o ke kulana hanohano malalo o kekahi misiona malu.

            No ka nana pololei loa aku o Atanani maluna o ua kanaka nei, ua huli hou ae la oia maluna o kona mau kokoolua a haawi hou ae la i na olelo hoohenehene, me ka leo nui e hiki ai ia Atanani ke lohe aku, a na ia mau olelo hoohenehene haahaa loa i kono koke mai i ke koa opio o ka lio olohe, e hiki koke aku oia imua o kona enemi mamua koke iho o ka pau pono ana ae o ka na kamailio ana.

            Nolaila, e like me ke ano mau o na kanaka koa, ka makaukau e ana ia lakou iho mamua o ka hui ana ae me kona hoa paio, pela ua koa opio nei o ka lio olohe i lawe koke ae ai i kona kulana makaukau, ma ka paa ana iho i ke kuau o kana pahikaua, a huki kapakahi iho la i ka lala o kona papale kapu ilalo.

 

HALE HANA WAI MOMONA

WAI ANIANI.

 

HARE MA NA ONA……………HELU 81, ALANUI MOI.

 

            Ka poe wale no nana e hana nei ka WAI OOMAEMAE KOKO KAULANA, oia hoi ka

Saseparela

            -a me ka-

            Wai-Hao.

 

Na Wai Momona Awapuhi, Saseparela, Le-

mi, Wai-pipii, Soda maoli, Si-

da, Kamepena, &c.

 

Mutual 330-Telepona-Bele 298

            E hooia ia ana ka maemae o na wai a pau. E hooko ia no na kauoha a pau loa mai na Mokupuni mai a me ko ke kulanakauhale nei.

Mar. 15, 1891. 148 d-tf.

 

KUAI HOOPAU NUI.

Mai keia manawa aku a hiki i ko Makou hoonee

ana aku iloko o ko makou

HALEKUAI HOU

Ma ke Alanui Papu,-(NA HALE BURUA.

E hoolilo aku ana Makou i ko Makou waiwai a

pau o na ano Lole:

NA LOLE NANI,

NA LOLE I HUMUIA,

KAPU A ME PAPALE

PAHU LOLE, a pela aku

No na Uku Hooemi Loa Nae.

            Egan & Gunn.

ALANUI MOI kokoke i ke ALANUI PAPU. tf-d.

 

Hoolaha Hou!

B.F. EHLERS &CO.,-Painapa.

 

Ua loaa mai nei ia makou he mau waiwai hou loa, oia hoi

KAKIMIA,

KINAMU,

KEOKEO HALU'A

CHALLI,

VIKOLIA KEOKEO

-A ME NA-

Mikilima o na ano a pau, a me na paku paka aniani o kela a me keia ano, no na kumukuai haahaa loa.

Alanui Papu, Honolulu.-25-d3m. B.F. EHLERS & CO.