Ka Leo o ka Lahui, Volume II, Number 164, 3 April 1891 — Page 3

KA LEO O KA LAHUI.

"E Mau ke Ea o ka Aina i ka Pono."

 

Ke Kokua Manawale'a

            Ua hoouna ia mai mai Ladana, Enelani mai e na hoaloha o kela kaikuahine o ke aloha, oia o Rose Gertrude i noho kokua ai ma Kalihi i ka wa o Kauka Luzt, he $1500, i mea kukulu hale no na ma'i lepera ma Kalihi, i mea hoomanao no ke aloha i na poe mai i noho pu ai me ia i na la o ka pilikia. Nui no ke aloha o ka au ana mai i na kai loa.

 

Ka Himeni a ke Kahuli Leo Le'a

Miss Mouri

            Ua loaa he wa kupono i ka aoao Hawaii ke hele e ike i ka u'i a Kahuli le'a o Nu Ioka, Miss Mouri, ma ka po Poakahi ae nei. E haawi ana oia i keia Aha Himeni, mamuli o ke nonoi ana aku a kekahi poe wahine maka hanohano Hawaii, i anoi i ka le'a o kona leo, a i ake hoi e lohe ko lakou lahui ponoi i keia leo kamahao. E himeni ano oia i na mele Hawaii kaulana o kakou, i kokua pu ia hoi e na Pupu kanioe o ka Hui Himeni Na Lani Ehiku. O ka hoike hope ana keia a huli hoi aku oia no ka hauoki o Kaleponi, kona aina hanau. Hele mai hookahi, hele mai no a pau loa; e ole ka lohe pepeiao i ka ha'i kukaliki mai. He oluolu ka uku komo.

 

E Kokua Aloha Mai

            Ke poloai aku nei makou i ka Lahui Hawaii ponoi, no lakou na puuwai hamama, a me na umauma i piha i ke aloha hoa kanaka, e haawi mai i na kokua aloha ana no ka hapai ana aku i kela hihia nui loa e waiho hemahema wale ia mai nei no e ka poe ia lakou ia hana, oia hoi kela kanaka o Kalaniwahine ka inoa, i pepehi maoli ia ai no ma Hamakua Hawaii, a makou i hoolaha aku ai. A i mea e hiki ai ke hoolimalima aku i ka loio nana e lawelawe ia hana ma ka aoao o ka lahui, oia ka makou e poloai aku nei ia oukou e pahola mai i na kokua ana e like me ka mea i pono i kela a me keia; a e lawe mai a hooili mai paha a loaa i ka Hon. J. E. Bush, ka puuku nana e malama a makaukau, o ka hapai koke aku no ia e hana i ua hana la. Ua loaa mai la i keia la 2 o Aperila, na W. H. Daniela mai o Wailuku, $5.00; na ka Leo, $5.00; Hon J. Nawahi, $2.00, D. M. Punini Jr., $1.00.

            Hookahi no manao nui iloko o keia hapai ana, o ke aloha i ke kanaka i pepehi maoli ia, a o ke aloha ka mea i oi ae mamua o na mea a pau.

KA LEO O KA LAHUI.

Aperila 2, '91, Alanui Pa'i Palapala.

 

KA WAHINE POINO!

            Mamuli o na hana heleuluulu a na agena o ka Papa Ola ma na Kona o Hawaii, ua laweia mai la kekahi wahine opio ma'i ole, a ua hoopaaia ma kahi hoopaa lepera ma Kalihi ae nei, Maraki 30, ua hookuu loa ia oia e na kauka o ka Papa Ola, aohe he ma'i.

            O kona pilikia a me kona poino nui, oia no ka lilo ana o kona aina a me kana mau bipi i ke kuai ia aku ia hai, mamuli o kona hopuia ana e kela poe agena ino o ka Papa Ola, na anela nana e kiloi ana i kela wahine no ka make mau loa ma Molokai. Ua manao keia wahine o kona ike hope loa ana keia i kona one hanau, alila, hele no Kalawao. Oia kona mea i hoolili puapuahulu ai i kona mau waiwai.

            He mea kanalua ole, aia no kekahi poe kuko ino, e ake ana e loaa ia lakou na aina a me na waiwai e ae o ka poe e hopuhopuia ana; nolaila, ua hanaia keia mau mea e like me ka hana a Ahaba ke 'Lii o ka Iseraela i kuko ai e lilo ka malawaina a Nabata iaia.

            He oiaio, ua lilo io no ua malawaina la, aka, ua make mainoino o Ahaba. Pelea auanei keia poe.

 

MA MILILANI HALE

            E malama ia ana he haiolelo maloko o Mililani Hale ma ka auinala o ka Lapule Apr. 5. hora 2 me hapa no na Hawaii, a ma ka hora 7:30 P.M. oia la no, no na haole, e kekahi aoao o ka hoomana o Iesu ka poe hoano, e like me ka hana maa mau.

 

KA HOOMANAO O IESU KARISTO.

            I na makamaka a me na hoalauna a pau ma ko Hawaii Paeaina, aloha nui oukou:

            Ua makaukau ka hale o keia Hoomana, no ka hoakoakoa ana e hoomana aku i ka Haku ke Akua, e like me kana kuhikuhi maloko o kana olelo Hemolele; a ke kono ia aku nei na mea a pau i makemake i ka pololei a me ka oiaio, o na nana e hana aku ai imua o ke Akua, oiai keia ola ana; e hele mai no maanei, ma na manawa i hai ia malalo iho nei. Aia ma Alanui Pa'ipalapala ka Halepule, e kokoke ana me ka pa o ka hale kula kaikamahine o Kawaiahao. Na manawa halawai; Poaono (Poalima ka helu hoololi) ma ka hora 7:30 A. M. La Sabati (Poaono o ka helu hoololi) hora 10:30 A. M. He wehewehe a me na ninau Baibala, hoomaopopo ana i na wanana, pule, himeni.

 

 O MISS KAMAKALEALEA, AUHEA OIA?

            Ua makemakeia e keia Keena, ka mea nona ka inoa maluna ae, no kekahi pono ona e waiho nei me makou, a no ko makou ike ole i kona wahi i noho ai o Honolulu nei, nolaila ke kahea ia aku nei oia e hele mai i keia Keena.

            Keena o KA LEO O KA LAHUI.

Honolulu, Mar. 31, 1891.

 

HOOLAHA I KA POE MAKEMAKE I KA "LEO."

            Ma keia hope aku ke hoolaha ia aku nei, e kii aku ka poe makemake i ka nupepa KA LEO- i na Luna e lawe nei i ka nupepa, oia hoi o J. Kahaleluhi, Geo. Kanikau, T. Kapualei, J. Kaneaiakala, Parao, John Samoa, Jno. E. Bush

Luna Hooponopono.

 

            Ua lohe mai makou, ma ke alanui ka e pio kupanaha ai ke kukui uwila, aia malaila e kalewa ia ai na kini opiuma; o ka poe kokua i keia hana, o lakou ma ia alaloa. Ina he oiaio kela, alaila e pono oukou e na kiai o ke aupuni e makaala loa ma keia hana kue kanawai.

 

Olelo Hoolaha

            Ke hai ia aku nei ka lohe i na kanaka a pau, o ka poe e makemake ana i mau eke paakai maikai a me ona nanahu kiewe maikai a makepono no hoi ke kumukuai, e loaa no au ma Haimoeipo, Hale Kaa o ka Moi, a i ole i ko'u home paha.

MRS. C. I. HAIRAM.

Haimoeipo, Honolulu, Oct. 8, 1890.

@@@

 

H.P.K. Malulani.

            HE LOIO a he hookapeke olelo ma ke Kanawai. E loaa no au mai ke kai hawanawana o Kawaihae e hoene ana me ipo la, a Hamakua au i ka la'i o Kukaiai ma ke alo o na pali. E ohiia no hoi na aie me ke ku i ka eleu a me ka puahiehie.

Nov 8 '90, d-ly.

 

Olelo Hoolaha.

            Ke kauoha ia aku nei na kanaka a pau i aie ia C. I. HIRAM i make, e hookaa koke mai i ko lakou aie ia MRS. C. I. HIRAM, a i ole ia, ia D. DAYTON. O na poe a pau e hookaa ole mai ana a hala na la he 30 mai keia la aku, e hoopii ia no lakou e like me ke kanawai.

MRS. C. I. HIRAM

Haimoeipo, Honolulu, Oct. 8, 1830.

3ms-d.

 

$5.00 MAKANA.

            E loaa no ka Makana maluna ae i ka mea nana e hoihoi pololei mai i kuu Lio kane hulupala, lae kea, he keokeo kona mau kapuai a pau i hoailona ia ma ka uha hope akau H. E loaa no au ma ke Alanui Liliha.

WM. KAAUWAI.

Honolulu, Mar. 26. 1891.

5ts.-d.

 

OLELO HOOLAHA.

            E ike auanei na mea a pau. owau o Mr. Wiwi, ka mea nana i ka ka upena a Mr. Kaulahea. Ua kali au iaia i na pule eha i hala aku, mai ka paa ana a hiki i keia la. Ke kauoha aku nei au e kii koke mai i keia upena, iloko o na la he 15 mai keia la aku. A ina e hala ka manawa i haiia maluna ae, alaila, e lilo loa ia'u keia waiwai ma ke ano he uku no ko'u hana ana. O na lilo hoolaha nupepa a pau, maluna no ia o ka mea nana ka upena, ke kii mai i ka la i ha'i ia ae la maluna. Me ka oiaio.

MR. WIWI.

Honolulu Iwilei 30. '91 160-d3t

 

PAPA KUHIKUHI

O

KA HUI ALAHAO A ME AINA O OAHU.

 

E HOOMAKA ANA MA KA LA 25 O OKATOBA, 1890.

 

MANAWA HOLO:

A.M. A.M P.M P.M.

Haalele ia Honolulu *6:15 8:45 1:45 4:30t

Hoea ma Honouliuli *7:15 9:49 2:49 5:28t

Haalele ia " *7:45 10:51 3:51 5:50t

Hoea i Honolulu *8:40 11:55 4:55 6:45t

* Lapule wale no.

t Poaono wale no.

Oct. 21, 1890 tf-d.

 

Keaka Hana Mana!

Nui ka ike, Nui ka Mana, Nui ka Eleu.

            Ma keia kua ana mai nei o ka Mokuahi Auseteralia i hoea mai ai he- Elua Pake i na Hana Keaka Loea a Palamimo loa. O kekahi o laua he Keiki wale no o 13 makahiki a oia aku no ka lana oi. I keia po Poaono iho a me ka po Poakahi ae laua e huai pau mai ai ma ka- Hale Keaka Pake. NA HANA MANA. NA HANA PALAMIMO. NA HANA PALANEHE.NA HANA POOKELA. E hele nui mai. He hapalua dala wale no ka uku komo, alaila, ike i ka Po Le'a o Halalii. Mai poina aia ma ka- Hale Keaka Pake 2ts-d. ALANUI MOI.

 

HALE HANA WAI MOMONA WAI ANIANI.

HARE MA NA ONA..........HELU 81, ALANUI MOI.

            Ka poe wale no nana e hana nei ka WAI OOMAEMAE KOKO KAULANA, oia hoi ka

SASEPARELA a me ka WAI-HAO.

Na Wai Momona Awapuhi, Saseparela, Lemi, Wai-pipii, Soda maoli, Sida Kamepena, &c.

Mutual-Telepona-Bele 298

            E hooia ia ana ka maemae o na wai a pau. E hooko ia no na kauoha a pau loa mai na Mokupuni mai a me ko ke kulanakauhale nei.

Mar. 15, 1891. 148 d-tf.

 

KA HUI KAA ENTERPRISE.

            Ua kukulu ae nei au i kekahi HUI HAA Eleu ma ka aoao iho o KALAKAUA HALE ma Alanui Kalepa.

Ma ka Huina Hoolulu Kaapio Helu 13.

O na kauoha a pau e hoouna ia mai ana ma ke TELEPONA mai na makemake mai ma na wahi a pau o ke kulanakauhale nei, e hooko koke ia no me ka piha eleu o ka uwila.

E Hoao i pau Kuhihewa.

WALLACE JACKSON,

Luna Nui,

TELEPONA BELE HELU....113

MATALA...690.

 

Hoolaha Hookapu.

            Ke hoike ia aku nei ka lohe i na ano kanaka a pau loa. Ua hookapu loa maua i ko maua mau Apana Aina ekolu i kapaia o Kalaheo, Kahaleula a me Puuoihala, no lakou na eka 202 e waiho la ma ka Paa, Kailua, Koolaupoko, Oahu, i hoolimalima ia e maua mai ia Keleau (w) mai. Nolaila, ke papa loa ia aku nei na holoholona o kela a me keia ano, aole e hookuu wale ia maluna o ua mau Apana Aina la, a o ka mea a mau mea paha e kue ana i keia, e hopu ia no e maua, a i ole ia, e ko maua mau hope paha, a e hooko ia e like me ke kuhikuhi a ke kanawai. O na poe a pau e makemake ana e komo iloko o keia Hui, e pono lakou e hele mai e hui pu me Mrs. C. I. HIRAM, a i ole ia, me DAVID DAYTON, a i ole ia KUKA.

Owau no me ka haahaa,

MRS. C. I. HIRAM.

Honolulu, Oahu, Oct. 8, 1890. 3ms-d.

NO KA POE MAKAIKAI MA KA O.R. & L. Co. MA KA I'A HAMAULEO O EWA.

            O KA POAONO KA LA KUPONO no ka hele ana, oiai e haalele ana ke kaa i kahi hoolulu ma Kuwili, Honolulu, i ka hora 1:45 P.M. o na Poaono a pau.

            No ka auhau, aohe olelo ana, he hookahi wai o ka like, mai ka liko a ka laele.

            OIA HOI, HE-50 keneta, hiki i Manana a hoi hou mai-75 keneta, hiki i Honouliuli a hoi mai.

            O keia ka manawa pono e la'i ai ka holoholo hoohala manawa me ka hanu ana i na ea oluolu maikai, no elua wahi keneta wale no o ka mile.

1-ni-d Oct. 8 1890.

 

Ka Hui Uwati Kaleponi.

            Na uwati gula o waho, hoopiha ia, me na mea hana o loko, o ka hana uwati kaulana WALTHAM, no $30 o ka uwati hookai, ma ka uku paluadala o ka pule hookahi. E kipa ae io-

A.J. SCHREIBER- Agena

Alanui Hotele, malalo iho o ka Hotele Alonetona.

 

Waiwai Haule.

            Ma ka la 23 o keia malama, ua haule ia kuu EKE ILI paalima, mawaena o ke Alanui Likelike a me Waikiki, he eke eleele.

            Aia iloko o keia eke, he wahi eke uuku kekahi, me na waiwai makamae, a pela pu me ke eke Ili nui, aia iloko o na eke ia he mau holoku kekahi.

            O ka mea e loaa ai a hoihoi mai ia'u e loaa no ka uku makana kupono mai a'u aku, E loaa no au ma Haimoeipo.

MRS. ALOALOAUA.

Mar. 27, 1891. 1w-d.

 

Olelo Hoolaha.

            Ua makaukau ka mea nona ka inoa malalo iho, e hana i na POHAKU PUNA ELEELE a me na pohaku e ae no na pa kupapau a me na kahua kukulu kia-hoomanao. O ka poe makemake e waiho mai i ka lakou mau kauoha me Ioane Akina.

J. BOWLER.

Sept. 22, 1890, d-ly