Ka Leo o ka Lahui, Volume II, Number 161, 31 Malaki 1891 — Page 1

KA LEO O KA LAHUI.

"E Mau ke Ea o ka Aina i ka Pono."

 

Buke II.                              HONOLULU.  MARAKI 31, 1891                              Helu 161

 

HE NANEA PAHAOHAO

- NO -

TAUSANI

- A ME -

Saribano.

Ka wiwo ole hoi o na wiwo ole - Ka Poai honua kunukunu ole -

Ka mea hoi nona na lima i aie ai ke ao holookoa.

     I KE AU O KA NOHO MOI ANA o ke alii Maroi ma Inia, ua hanau mai nana a me kana wahine na keiki he 13, a i ka nunui ana o keia poe keiki, ua pane aku la ua moi ala i ka laua hanau mua:

     E kuu keiki Oliva:  Ua hilinai au maluna ou, a he kanaka ikaika hoi oe, a ua akamai hoi ma na mea kaua, he wiwo a he hopo ole hoi ma na ano a pau.

     Nolaila, e pii aku oe a hiki i ka mauna o Morano a lawe mai i kekahi lio nani o ko'u poe lio e malama ia ala e kuu kanaka.

     Ae aku la ke keiki mua, a pii aku la oia, ma kona alahele nae i hele ai me kekahi mau kauwa, aole oia i hoi hou mai a hala ka makahiki hookahi.

     Ua kanikau iho la ka moi no kana keiki, oiai ma kona hoomaopopo ana, ua make kana keiki, a oiai oia e kanikau ana, hoea mai la kekahi kauwa a hoike mai la:

     E ka moi, mai kanikau oe no kau keiki, no ka mea, aia oia ke noho ala iloko o kekahi hale nani i i uhi ia kona mau paia me ke gila a me ke dala.

     A he moi no hoi oia i keia wa no ia aupuni, a na oi panini aku kona hanohano i keia wa i ko ka wa mamua ana e noho ana me oe.

     O kou waiwai, he like ia me ka waiwai o ke kuke a ua keiki ala au e noho ala, poina ka noonoo o ke kanaka ke ike aku iaia i keia wa.

     Mai noho aku nei no au ilaila, aka, ua kauoha mai nei ke keiki alii e hoi mai au a hahai aku ia oe i keia mea i ole ai e kaumaha kou manao.

     I ka lohe ana o ka moi, akahi no a hauoli kona naau no keia mea, pau ke pihoihoi, a lana malie ka uluku ana o ka manao hoi a like me mamua.

     No ia mea.  noi aku la ka elua o ke keiki e kii oia i lio iloko o ke kuahiwi, malia o loaa iaia ia hanohano e like me kona mua.

     Ae, wahi a ka makuakane i pane aku ai, ke hookuu aku nei au ia oe e hele, ua nui a ua mama i ka hele, a e ku a maloeloe a hele ma ke ala o ka pomaikai.

     Iaia i pii ai, ua like no a like me ka mua, aole no i hoi mai, a oiai no ka makua e kanikau ana, hoea ana no ke kauwa, iwaho no oia owa ana - o ko keiki alii Satina, aia oia iloko o ka hale momi a me ke daimana kahi i noho ai, he oi aku kona nani a hanohano lua ole.

     Ma keia ano hookahi na keiki a pau a ka moi Maroi i hele aku ai a hiki i ke keiki hope loa, oia hoi ka mea nona kekahi hapa o keia nanea oia o Saribano.

     I ke koe ana o keia wahi keiki akahi no a hookaakaa ia na maka o ka moi a noonoo ae la oia no kona mau la mamua, ka lehulehu o na keiki, aka i keia hora aole ka nui, he hookahi wale iho no.

     Nolaila, lalau aku la oia i kana keiki hope puliki ae la iaia a uwe iho la; me ka pane pu iho i keia mau huaolelo penei:

     E kuu keiki, ua hala aku kou mau hanau mua ma ke alahele i maopopo ole, a o oe hookahi wale iho no koe.

     E aho e noho mai no oe, ua lawa no oe i keia aupuni nui o Inia nei, a me na kanaka he nui aia a make au, alaila, e lilo no ka noho moi ia oe.   

     Nana aku la ke keiki opio i ka helehelena o kona makua a pane aku la:  Ehia ou makahiki i koe e ola ai alaila oe make?

     Pane mai la kona luaui me ka minoaka ana, aole i maopopo ia mea, he umi paha, a i ole he kanakolu paha.

     Kohoho, alaila, manao oe e kali a'i a hala kela mau makahiki, alaila au noho moi, aole au e ae ana i kou manao.

     E nana oe e papa i ko'u mau hanau nima, aole oe i make, ua noho mei lakou ala, nui ka waiwai a me ka hanohano, me ka hoike pu ia mai no hoi ia oe:

     O kou mau waiwai a pua loa, aole e lawa ke kuke a o'u mau hanau mua ke ai, he uuku loa kau dala a me kou waiwai; pehea oe i kela?

     Aka nae, e kuu makuakane, e noho ana no au me oe a hala ae keia mau mahina, alaila haalele iho au ia oe, e hele ana au e imi aupuni no'u.

     I ka lohe ana o ua makuakane nei ona no keia mau huaolelo, ua hoomaka aku la oia e uwe me ka hoopuka ana i na huaolelo kaukau i wahi no kana keiki e aloha mai ai iaia, aka, he ole ka maliu mai.

     Ia wa, noonoo hou iho la ka moi, a hooholo iho la oia e hahao aku oia i kana keiki muli no ka hale paahae i wahi nona e maka'u ai, a ae mai i ka makemake o kona makua.

     Nolaila, ua hoopaa ia aku la ua keiki ala, me ka olelo paa a kona makuakane, aia wale no ka hemo o ua keiki ala, a ae oia e noho me ka makuakane.

     Aole i pau.

 

He Moolelo Nanea.

No ke

Kamaliiwahine Laulie.

Aiole

HE NANEA KAMAHAO NO KA HULU GULA O KIBERIANA.

He Kaao kahiko no Helene.

 

MOKUNA VIII.

     I ka ike ana o ua nohea nei ua hooko ia kona makemake maluna o ke kino o Kolana, lalau mai la oia i ua manu nei me na huaolelo hailiili i kona mau lehelehe a kiola aku la no kekahi pali kahakai.

     A oiai o Kolana manu e pailaka ana no laila, ua kamailio mai la ua ui nei mahope:

     O kou wahi ia e kuewa ai iloko o ka pololi a me ka makewai no na la he nui, malia he hiki i ko wahine ke hele mai e hoopakele ia oe mai kena pilikia ae.

     He oiaio ua auwana hele aku la ua Kolana nei a kaua mawaena o na mawae a me na kiokio-pohaku me ke komo ai ole, a oia hoi ka hoo ko ia ana o na olelo a Laulie i wanana mua mai ai iaia oiai ko laua po mua loa o ka hui ana.

     O keia poino o ua moi opio nei, he poino kimopo ia i hiki ole iaia ke alo ae, aka nae o ka mea kupanaha ma keia lilo ana ona i manu, he oia mau no ka noonoo kanaka iloko ona.

     Mahope iho o ka hala ana aku o ua ui hanakupanaha nei maluna o kona kaa he huila-ha, ua pae mai la o Guolo ma i kahaone ma kahi no a Kolana i pae mai ai.

     Ike iho la lakou i na kapuai wawae o ko lakou hoaloha e waiho ana iluna o kahaone, a ike pu iho la no hoi lakou i na huiia kaa a no ko Kolana nele ma ia wahi ua hooholo lakou ua kau oia maluna o ke kaa nona na huila a lakou e ike ana.

     I ka hoea ana mai o ke ahiahi, pii mai la ke kai, a i ke kokua pu aku hoi a ka makani kamaaina e pale ana mai ka aina aku, hemo hou iho la ka moku o na keiki alii.

     A oiai ka la e hookaawale ana iaia iho no ka pii mai o na kini olalo, ua hoi aku la na keiki alii no ko lakou mau wahi pakahi me ka haalele ana ia Kolana ma kona kino manu i kahi mokupuni papapa o Seredina.

     Kaalo ae nei na la, na hebedoma a me na malama e ko Kolana auwana hele ana ma na kela panoa a me kapakai kuninihi o ua wahi mokupuni la iloko o ka pololi a me ka makewai, i ahona i na hunahuna helelei a me na i'a make a ka lokomaikai o ke kai e panee mai ai i kahakai, pela iho la i kamau iki ai kona ola iloko o keia mau la popilikia.

     A oiai eia kaua i ka pewa-hi'u o keia mokuna, nolaila he mea pono ia kaua ke ahewa iki ae i ke kaikamahine Amelia.

     Mahope iho o kona ike ana ua hooko oia i kekahi hapa o kana apana hana ua haalele iho la oia i kahi mokupuni o Saredina ma ia la no ka huli hoi ana i Kiberiana.

     I ka hiki ana aku o ua nohea nei i ka aina o ka mea nona keia nanea, na hele aku la oia a hoike aku la ia Morana i ka lono hauoli e pili ana i ko Kolana make ana iaia.

     A oia hoi ka ua moi nei i hoonaaikola mai ai, me ka olelo ana; lilo ia.  i manu a pono he aihue i kuu kaikamahine a me ka hulu gula a maua, a mamuli hoi o kana mau hana ua pau he hapa nui o ko'u mau makaainana i ka make i ke deragona, a o ka ululaau neia o ke akua o na kaua ua lilo i mea ole.

     A no kuu Kaliope aohe a'u hana i koe maluna ona, e nalo no hoi ke keiki nana a aloha makua e ku ana a hoi mai, nolaila e like me ka'u i lelo mua aku ai ia oe ina e make ua lapuwale la alaila o oe ka'u wahine.

     Ke hooko nei au ia olelo a'u oiai ua ko ko'u makemake, a pela iho la i lilo ai o Amelia o ka aina o Dalina i moiwahine no Kiberiana.

     A oiai ua ike ae ia kai a o ka mea nana i hoolilo ia Kolana i manu he kaikamahine oia no Dalina, aka nae ua hoolimalima ia oia e Morana i ka nohoalii o Kiberiana no ka hele ana e pepehi a make o Kolana.

     A mamuli o ka minamina o ua ui la i na helehelena ui o Kolana, pela oia i hoopakele ai iaia mai ka make ae, a hoolilo aku la iaia i manu korata.

     Nolaila e haalele iho kaua i keia mokuna ma keia wahi, a e nana aku kaua ia Laulie mahope iho o ko Kolana ma haalele ana aku ia Ilecosa.

     Aole i pau.

 

HOOLAHA A KA PUUKU.

NO NA HOOKUPU NO KA LA KUOKOA O KA LAHUI HAWAII.

     I na Hawaii a pau, ke poloai aku nei ka mea i kohoia he Puuku no ka wa, no ka malama ana i na hookupu, e loaa no oia ma ke Keena o ka LEO O KA LAHUI i na la a pau, koe ke Sabati, ka la ehiku o ka hebedoma, e lawe i na hookupu a ka poe i aloha i kona aina hanau, i makee i Kona Kuokoa o Hawaii Ponoi.

     I mea e maopopo ai ke ano o keia hookupu ke hoike aku nei ka puuku, penei.  Ua noa ka hookupu i na Hawaii a pau, i na hookupu dala, a me ai paha.  He mau haneri dala kai hookupu ia i keia manawa, a he 10 bipi, he 20 mau puae.  E hoike ia aku ana no ka papa inoa hookupu i ka wa e pau pono mai ai o na hookupu ma ko'u lima.

                                    Ma ke Kauoha,

                                    JNO. E. BUSH.

 

He Ohohia Nui,

O ka Leo o ka Lahui aia iloko o ka lokahi O ka hookuee ana oia kona enemi.

Eia ka poe i hookaa mai ma ka lima o na Luna:

                                                                                    Ian.      1          Princess Lilia Haimoeipo                    1

                                                                                                            C. W. Ashford Merhant St                 5

                                                                                                            Chas. Hopkins

                                                                                                            Chas. Gulick                                       1

                                                                                                            W. C. Achi                                          1

                                                                                                            Wm. Kamana Kawaiahao                   1

                                                                                                            Jas. Quinn King St.                            1

                                                                                                            Wm. Rice Merchant St.                      1

                                                                                                            M. L. Wailele School St.                     1

                                                                                                            I. Kahiapo Leleo                                 1

                                                                                                            Puakinamu Kakaako                           1

                                                                                                            J. W. Okuu Kawaiahao                       1

                                                                                                            Kaauwai Liliha St.

                                                                                                            Wahineiili Kunawai                            1

                                                                                    Ma o George Kanikau ka Luna eleu.

 

                                                                                    Mar. 10 Mrs. C. I. Hiram                                            5

                                                                                                            Makanoe                                             1

                                                                                                            Mahi                                                    1

                                                                                                            Hakalaau                                             1

                                                                                                            Kalehua Puukolo                                1

                                                                                                            Lahapa                                                            1

                                                                                                            C. Spencer                                           1

                                                                                                            Mio Kulaokahua                                 1

                                                                                                            Kahiwalani                                          1

                                                                                                            Moku Pauahi                                       1

                                                                                                            Lama Kikihale                                     1

                                                                                                            Halekala Auwaiolimu                         1

                                                                                                            Nakanealoha Pauoa                             1

                                                                                                            Polikopu Auwaiolimu                         1

                                                                                                            Kapika Pauahi                                     1

                                                                                                            Piipii Kauluwela                                  1

                                                                                    Kaneaiakala, Ka Luna Eleu.

 

                                                                                    Mar. 1 A. S. Cleghorn                                                 1

                                                                                                            Kaulili                                                 1

                                                                                                            Kaua                                                    1

                                                                                                            Poni                                                     1

                                                                                                            Kekula                                                 1

                                                                                                            Hopoe                                                 1

                                                                                    John Samoa ka Luna.

 

I ka Poe Lawe Nupepa.

     Ke poloai aku nei makou i ka poe heluhelu e lawe nei i ko kakou nupepa, makaala mai i ka hookaa ana i ka uku o ka Nupepa ma ka hebedoma, ae malama i na palapala hookaa mai na luna aku nona na inoa i hoike ia ma ke poo o kela Nupepa. No ke paewaewa o ka hookaa ia ana o ke dala, a me ka hoohiki loa ana mai i ke keena nei, ua hooholo makou ma ka hebedoma ka hookaa i mama ai ka hookaa ana a ka mea e lawe ana, a i keia hebedoma, ka poe i hookaa mai a me ka poe i hooaa ole mai, a ina ua hookaa me ka loaa aku o ka Palapala hookaa, he mea hoi e maopopo ai, ke ulu ae ka nele o ka mea heluhelu, ke okiia aku ka nupepa no ke kaa ola ma o na luna ae, alaila, no na luna ka hewa, aole no ka mea heluhelu, a ina aole io maoli no na luna ka hewa, alaila, e kala ia makou no ke oki ana aku i ka poe hookaa ole mai i ka lakou nupepa.

                                    J. E. BUSH.

 

Hale Kuai Wati Nui

HELU 1

No C. Ah Kau.

     KA oi o na mea Gula, na DAIMANA, na POHAU MOMI makamae loa, na WATI GULA, na WATI DALA & C., na omau o kela a me keia ano, na lako wehi GULA a me DAIMANA, na KOMOLIMA GULA a me DAIMANA, na WATI nunui ano hou loa o kela a me ke ia ano, na PUPANAPANA a me na lako e ae e pili ana.

     E hoomanao e na makamaka, o keia AH KAU no ka mea nana i hana na WATI a me na lako GUKLA oi loa o keia Aupuni, a i kamaaina ma kona hale mua i noho ai ma Alanui Nuuanu Helu 37 mamua, a oiai ua hoolilo aku oia i kona kuleana malaila, na wehe ae nei oia he hale hou ma Alanui Moi ma Waikiki ihbo o ke Keena o ka nupepa Elele, a oia no hoi ke Keena oihana mua o ka Hui Alahao Hawaii.  E loaa no na mea a pau e pili ana i keia oihana me ka emi loa a e hana hou ia na wati u me na lakou gula me ka hikiwawe a me ke emi loa.  E hoouna mai i na kauoha ma ka Pahu Leta Helu 268

     E naue nui mai, a e ike no oukou iho.  O na mea hoa loa wale no i ike mua ole ia ma Hawaii nei.

                                   C. Ah Kau.