Ka Leo o ka Lahui, Volume II, Number 134, 20 February 1891 — He Moolelo No MORIWIANA. [ARTICLE]

He Moolelo No MORIWIANA.

KE KUI O NA MEA HUNA EKOLUKA UI I HOOLILO I KE KUA O NA LIO I HOME NONA- O KE KANA KA OPIO I LILO I KOA KAULANA I NA IA O KALEMANA O BOHEMIANA. O keia hookipa a hoomaikai a ua lahui la ma o ko lakou mau elele, ua ape ia aku ia e ke koa opio a hookipa ia mai la ma kona halelana aukai, a ma ka hora 12 ponoi o ua la ala, ua haalele iho la lakou i ka mokukaua a holo aku la iuka o ka aina. O na leo huro o ke ohohia nui a * me na hauoli lua ole, oia na haawina i pahola ia mai imua o ua koa opio la a me kana aliiwahine, ia. laua i lele aku ai no uka o ka aina, a ua hoomau ia pela a hiki i ko laua komo laelae ana iloko o ka pa alii malalo o na alakai ana a na elele alii. Ua hoolauna loa ia aku ua mau alii opio la imua o ke Kaelinela (ke kahu aupuni e hoomalu ana ia Italia ia wa) a o ia ka ua Kadinela la i apo mai ai i ke koa opio a me kana aliiwahine, me ka pumehana o ke aloha me he makua la i ke keiki, a o ua olelo a ua Kadinela la o ia keia. E kuu keiki, i huli hoi mai nei oe, no ka paa ana i ka hanohano o ka noho'lii o kou aupuni, kou aina makuahine hoi? Aole e ka makua; aka, i huli hoi mai nei au no ka hoomaha ana i ke koena i koe o ko'u mau la ma keia ao, wahi a Moriviana. Me keia mau kukai olelo pokole ana mawaeina o ke koa opia a me ke Kadinela, hookipa loa aku la ua kahu aupuni la i kana mau malihini alii maloko o kona keena malu, a malaila i hoohala ia ai he wa loihi no lakou ma ke kamailio ana. Ano e ka mea heluhelu, ma ka hoomaopopo ana aku ia oe i kou pohihihi no keia inoa Kadinela e hoomanao ia he inoa alii a mana nuiia a i weli nuiia e kekahi mau poo aupuni ma kona lilo anu he haku nui maluna o ka ihiihi a me ka hemolele o ka oihana laahia a a ke akua mana loa, a e ike ia nei hoi i keia wa he "Pope," iloko o ia au i hala o ka inoa "Kadinela"' ka na aupuni poo kalaunu e ike aku ai iaia ma ke ano he alii nui a he haku kiekie i like ka mana a

me ka ihiihi, a oi loa aku no paha i ko na moi nui. A oiai o kuu makamaka heluhelu ua ike kaua ma na hoikeike mua ana o keia moolelo ke kipaku a hoolilo ia ana o ka ohana alii oiaio o Italia mailuna aku o kona [Italia] noho'lii a i kuewa maluna o ka ilihonua, a me ka lilo ana o kona malu a me na hooponopono ana malalo o Rodine Huda ka pakaha, nolaila i ka wa a ke koa opio Moriviaua i hoihoi hou mai ai i ke kuokoa o Italia mailoko mai o na lima pakaha o ko Rodine Huda mana, nolaila, ua hookohu aku i ke Kadinela i kahu aupuni no ka manawa nana e hoomalu a hoopono- pono i ke aupuni a hiki i ka wa e loaa ai kekahi o na koko alii kiekie o ka ohana alii oiaio o ka moi Kale I. O keia Kadinela no hoi ka mea nana i hipuu i ke koa Morenedai a me ka ui Rolinehama malalo o ke kaula paa loa o ka noho'na mare iloko o ka hoomana Kakolika alaila e hoomanao ae kaua ua hapauea a a-lu'a na la o ua Kadinela la, e noho nei ma ke ano he kahu aupuni no Iralia. Ae ua a lu'a a hapauea na la o Kadinela; aka, o kona leo nae, he leo ia o ka mana alii piha a ka lahui e hoolohe ia me he keiki la imua o ka makua, a o kana mau lawelawe a hooponopono ana i ke aupuni, aia no ia maluna o ke kanawai o ke akua me ka aina. O keia ae la na hoomaikeike ana e pili ana i keia Kadinela, alaila e hoomau hou aku ko kaua kamailio ana ma ke kuamoo pololei o ko kaua moolelo a hele aku imua. Ua ike ae nei kaua i ke koa opio a me kana aliiwahine, ua hoolauna loa ia aku maloko o ke keena malu o ke Kadinela, a o ka lakou kukai kamailio ano nui o ia no na hoolala ana i na mea e pili ana i ka ohana alii oiaio o Italia, oiai ke Kadikela ua waiho mai i kona kulana kahu aupuni me kona haawi pu ana mai i na kokua a me na hooikaika ana no ka pono o ka noho'lii o Italia ma ka imi ana i ka hooilina oiaio. Alaila e ka mea heluhelu, iloko o ia mau kukai olelo ana, ua haawi nui ua alii opio la i na hooikaika ana a kona noonoo ma ka huli ana i ke koko alii oiaio o ka noho alii. a he mea oiaio iloko o na la ekolu, ua loaa io ke koko alii a hoo ilina oiaio o ka noho alii, a o ua mea la o ke keiki alii Kale II no ia ka mea i pakele mahunehune aku mai na lima menemene ole o Rodine Huda ma kela la i luku ia ai ko ke kulanakauhale holookoa o ua aupuni la. Aole i pau.