Ka Leo o ka Lahui, Volume II, Number 129, 13 February 1891 — Page 1

KA LEO O KA LAHUI.

"E Mau ke Ea o ka Aina i ka Pono."

BUKE II. HONOLULU. FEBERUARI 13, 1891. Helu 129.

 

He Moolelo

NO

MORIWIANA

-----

KE KIU O NA MEA HUNA EKOLU - KA UI I HOOLILO I KE KUA O NA LIO I HOME NONA - O KE KANA KA PIO I LILO I KOA KAULANA I NA IO O KALEMANA O BOHEMIANA.

-----

        Me keia mau kukai olelo ana mawaena o laua, haalele mai la ka moi Mikaela i ke koa opio, a hoi aku la o ia no lalo o ka moku, a o ke koa opio hoi huli ae la o ia a kauoha aku la i ke kapena no ka hookomo malie ana aku o ka moku iloko o ke awa.

        E like me ka makemake o ua koa opio la, pela ke kapena i lawe ae ai i ka mana o ka hooko kauoha a hookomo aku la i ka moku iloko o ke awa.

        Aka no ka hapalua minute mahope iho o ka haawi ia ana aku o kela kauoha, aia hoi ua haawi ia mai la ka lohe a ke kanaka kiai, aia he moku Adimarala ke hoolulu ala iloko o ke awa lai o ke aupuni Helene.

        O ka loaa ana aku o keia lono, oia ka ke koa opio Moriviana i haawi koke ae ai i ke kauoha i ke alii huki hae no ka huki ana ae i ka huki ana ae i ka hae hoailona ninau owai la ua alihikaua la.

        Emoole aia ka hae hoailona e pii ana iluna a ilalo no ekolu manawa alaila huki loa ia aku la iluna malalo iho o ka hae adimarala o ke koa opio.

        He mau minute pokole mahope iho o ka haawi ia ana aku o ka ninau mai ka hae hoailona aku o ka mokukaua o ke koa opio, aia hoi ua pane ia mai la ia maloko o ka hae.

        O Sir Hugo ka alihikaua o na wai o ke kaiwaenahonua a me ka moana Iniana, a e kali a hoolulu ana iloko o Helene, me ka makaukau e haalele iho i ko laua mau palena o ka mana alihikaua malalo o ka hooko kauoha, i ka wa a Sir Monetala ko na puali aina alihikaua e hiki mai ana ma ka oneki o kona moku.

        O keia pane ma ka aoao o kela alihikaua, alaila e hoomanao iho kaua e ka mea heluhelu, o Hugo io ua alihikaua la, a o ua pane la, oia ka ke koa kaulana o ka mokukaua Hae Eleele i haawi hou ae ai i ke kauoha i ke aliihuki hae, no ka haawi hou ana aku i ka hoailona maloko o ka hae me keia mau olelo ua makemake ia oe e Sir Hugo e hiki koke aku me kou moku kaua imua o ka haku alihi kaua kiekie o Bohemia me ka hoahakalia ole.

        O keia kauoha a ke koa opio; oia ka ke alii huki hae i hooko aku ai me ka hanohano o kana oihana, a iloko o na sekona pokole, aia ka hae kauoha ia Hugo e welo haaheo ana imua o ka welelau makani.

        I ka wa a ka hae kahea e welo haaheo ana, haawi hou ae la ua koa opio nei i ke kauoha ia kapena Kamadoa no ke kalewa hou ana ae o ko lakou moku ma ia wahi, alaila haalele mai la ia i ka oneki o ka moku, a huli hou aku la ilalo.

        O ka loaa hou ana aku o keia kauoha ia kapena Kamedoa, oia ka ua kapena la i huli ae ai i ke kanaka ku hoe a luai aku la i keia mau olelo:

        E paa ae i ka hoe i ka makani, i loaa ai ia kakou he kulana maikai no ka hoololi ana i ko kakou ihu no ke kalewa ana ma keia wahi.

        Ae, wahi a ke ku hoe, a ia wa no hoi i hooho pu mai ai ke kanaka kiai, ei ae ka moku o alihikaua Hugo ke hoopii mai nei.

        O keia wa a ka moku o ka alihikaua e pii mai la no ka halawai ana me ko kona haku opio moku, oia no ka wa a na pe'a o ka moku kaua Hae Eleele i o'pai ae ai, a iloko o kekahi mau minute, e lola ana ia imua o na ale o ka moana.

        O ka hora 10 o ua kakahiaka ala oia ka manawa a ka moku alihikaua o Sir Hugo i pili mai ai ma ka aoao o ka Hae Eleele, a iloko o na kukai aloha e like me ka rula maa mau o ka oihana koa, pii aku la ka alihikaua Hugo no luna o ka moku kaua Hae Eleele, a malalo o na hookipa ana a ke kapena, ua lawe loa ia aku la ua Hugo nei no lalo o ka moku, a imua o ke koa opio i hoolauna loa ia aku ai ua Hugo la.

        Me na puili aloha ana o na hoaloha, hui ae la ua koa opio nei me ka alihikaua Hugo, alaila hoolauna loa ia aku la oia imua o ke kamaaliiwahine Rowena a me ka moi Mikale.

        Mahope iho o na ike alii ana, ua haawi ia na kukai olelo ana mawaena o ke koa opio a me ka alihikaua Hugo a no ka hapalua hora ka loihi hookuu maila ke koa opio ia Hugo me keia mau olelo:

        E Sir Hugo, wahi a ua opio nei, e huli hoi hou aku no ke awa kumoku o Helene, no ke kali ana ia Sir Monetala a hiki aku au, a oiai oe ma kau huakai o ka hooko kauoha, a e lawe pu aku i keia palapala no ke alo'lii o Helene, a e hai mai i ka laeou pane imua o'u nei maloko o kau hae hoailona.

 

He Moolelo Nanea.

No ke

Kamaliiwahine Laulie.

A i ole

HE NANEA KAMAHAO NO KA HULU GULA O KIBERIANA.

-----

MOKUNA VII.

-----

        Ua hoomau aku la no ua opio nei i kana hele ana i ka halealii a hiki wale i ke kahi-ku ana o ka la, hoea pono aku la oia me ka palekana ma ka puka-pa o ka halealii, a oiai oia e hookomo ana i ke ki iloko o ka pukaki, ua haule iho la mai kona mau lehelehe iho keia mau huaolelo:

        Alaa wale no ka hoi oe la, o ko nalowale honua iho no ka hoi ia ia'u i ke ahiahi nei, nolaila ina he maikai ka mea e hana ia mai ana ia'u he maikai no hoi kau e haawi aku ai, aka i hanuia mai au i ke ino hookahi ke ka like ana i ke ano.

        Wehe malie ae la ua opio nei i ka puka a hemo komo aku la oia iloko me ka nana ana o kona mau maka ma o a maanei, a oiai o keia manawa a ka opio i komo aku ai he manawa ia no ka moi e hoike ana i ka makaukau o kona mau koa ma ke kuea nei mamua iho o ka halealii, nolaila ua komo aku la oia me ka ike ole ia mai e kekahi mea ola uhane.

        Ia Kolana e hele ana malalo o ke punonohu o na laau o ka malapua ma ke kua o ka halealii, ua lohe koli'uli'u aku la oia i ka leo himeni o kekahi mau wahine, nolaila ua hoomaopopo iho la oia o ke kihapaipua ia o Mainepa e like me kana i lohe mai ai mai a Opera mai, kahi hoi a ka ui Aromeda a me kana aikane ka Nohea Kaliope e himeni mau ai i ke kakahiaka a me ke ahiahi.

        O ka ono o ko laua mau leo iloko o ia mau hora poniponi o ke kakahiakanui i ka pepeiao o ka mea e lohe aku ana, ua like me ka meli a me ka waiu, a i ole me he ulili la no ke kahakai ko kekahi o laua, a o ko kekahi oi me he kahuli leo le'a la no ka uka pili kuahiwi ka uwe hone i ka pili o ke ao.

        Nolaila, ku iki iho la ua opio nei e hoolohe i ka himeni ana a ua mau ui la e palahe ai ka palu o ka aoao oolea, eia nae ka mea apiki a pauaka, aohe he maopopo ia Kolana o ke ano o ka laua mea e himeni ana e like no me kana i lohe wale ai, aole e hiki i kekahi kanaka ke hoomaopopo mamua aku ona a pela no hoi mahope mai ona no kekahi mau haneri makahiki.

        No kekahi mau minute kana hoolono ana hookokoke loa ahu la oia i kahi a ua mau ui nei e himeni ana malalo o kekahi kumulaau nui elemakule i luluu pono me na hua gula he nui me kona ike ole ia mai e laua.

        Ike aku la na opio nei e moe ana malalo o ua kumulaau la kekahi moe deragona nui he eiwa anana kona loa, a o ka inoa o ua moo la o Lii o, a o ke kaikunane hoi ia o ka moo nana e malama ana ka hulu gula o Kiberiana ka aina kaulana i ka eepa a me na mea kupanaha he nui.

        E moe ana ua Lino nei iluna o na uha o Kaliope me ka hoolohe ana i ka himeni, a o kona huelo hoi e kaweleka ana ia ma o a maanei me ka -lalama ana iluna o ke kumulaau, a o kona mau wahi maka liilii hoi e oleha ana a nalowale ka onohi eleele i ka nanea.

        Ku iki iho la ua opio nei me ka nana pono ana no kekahi mau minute, aole no ka maka'u i ka moo keia ku ana o Kolana, no ka mea ua ike kaua aole ia mea iloko ona, aka no ka nana ana i ka mili mai a me ka hamo ana a ua mau ui la i ke poo o ua moo la, a oiai oia e nana ana lena  mai la kekahi maka o ua moo la me ke ano huhu, a na ia mea i kono ae ia Aromeda ka wahine a Peria a me kana aikane ka nohea Kaliope e nana mai ma kahi a ua moo la e nana huhu ana, aia hoi ua ike mai la laua i kekahi kanaka ui e ku ana, nolaila ua puiwa like ae la laua me ka hikilele nui, a pane mai la penei:

        E ke kanaka ui, mahea mai nei oe? wahi a Kaliope me ka puliki ana i ka alualu o ka a-i o ka moo, O oe anei kekahi o na keiki mai ke aupuni mai o Helene, ka poe hoi i kii mai nei e kaili i ka hul-gula?

        He oiaio, owau kekahi oia poe; aka nae, aole na makou ka makemake, na ka uhane o Peria ke koi ia makou e kii mai na hulu-gula, oia ko makou mea i hiki mai ai i keia aina he mau tausani mile ka mamao mai Helene mai, wahi a ka opio.

        I ka lohe hou ana o ka ui Aromeda o ka papaku o ke Kai Eleele i ka inoa o kana kane i make, a nona hoi na hoomanao ana kokoke e palaka loa iaia, ua kulu iho la kona waimaka i ke aloha i kona hoa paumeume o ka wa heu ole, a haupu pu ae la no hoi oia i na helehelena o kona hoa o ke aupuni hoopoina noonoo ua ane like loa no ia me ko Kolana ano, na wahi maka oia okoa no a eo a pela no hoi me ka lauoho, nolaila ua kiani mai la ka lima o ua Aromeda la imua me ka olelo ana mai -

        E hoi e ka opio ma kahi au i hele mai nei, ua oi aku ia mamua o kou make opiopio ana. O ka'u keia o ka ka wahine a Peria, no ka mea he nui ka make e halawai mai ana me eo mamua o ke ko ana o ko oukou makemake.

        Aole i pau.

 

He Ohohia Nui,

-----

O ka leo o ka Lahui aia iloko o ka lokahi. O ka hookuee ana oia kona enemi. Eia ka poe i hookaa mai ma ka lima o na Luna.

Ian. 4 Princess Liliu Haimoeipo 1

        Mrs. C. L. Hinano 5

        C W. Ashford Merchant St. 3

        Chas. Hopkins

        Chas. Gulick 1

        W. C. Achi 1

        Wm. Kamana Kawaiahao 1

        Jas. Quinn King St. 1

        Wm. Rice Merchant Ss. 1

        M. L. Wailele School St. 1

        L. Kahiapo Leleo 1

        Puakinamu Kakaako 1

        J. W. Okuu Kawaiahao 1

        Kaauwai Liliha St. 1

        Wahinelili Kunawai 1

        Ma o George Kanikau ka Luna eleu.

Ian. 1 Kaelele Kalihi 1

        Kaui Kapalama 1

        Lokalia Koiuiu 1

        Kakai Leleo 1

        Kaluhimoku Iionokaupu 1

        H. Dolo Niupaipai 1

        Kumukahi Waikiki 1

        Elemakule Moiliili 1

        Kahue Puahia 1

        Kahailiopua Kamanuwai 1

        Kanakaole Waikiki 1

        Keala Leleo 1

        S. M. Mahoe, Leleo 1

        Meheula Auwaiolimu 1

Feb. 1 Kahuna Puunui 1

        S. Poni Kaumakapili 1

        Kaluhimoku Honokaupu 1

        M. Awa Kukulu-aeo 1

        Kaui Kapalama 1

        Kakai Leleo 1

        Lokalia Kalia 1

        J. Hapa 1

        Ma o J. W. H. Keana Ka Luna

Feb. 10 Meleholeko 1

        Haalo'u 1

        Kalehua Puukolo 1

        Lahapa 1

        Kaui 1

        Makalii Makeke 1

        Keumi 1

        Kamoku Auwaiolimu 1

        Palakiko 1

        Haleakala 1

        Keaweiwi Koleaka 1

        Kahoiwai Kaakopua 1

        Kewiki 1

        Ane Pelekane 1

        C. Spencer 1

        Mano 1

        Mahi Kikihale 1

        Kaalele Kamanuwai 1

        Mio Kulaokahua 1

        Kamiano 1

        Kaaina 1

        Kahiwalani 1

        Nakanealoha 1

        Kanoaiakala, Ka Luna Eleu.

 

I ka Poe Lawe Nupepa.

        Ke poloai aku nei makou i ka poe heluhelu e lawe nei i ko kakou nupepa, makaala mai i ka hookaa ana i ka uku o ka Nupepa ma ka hebedoma, a e malama i na palapala hookaa mai na luna aku nona ka inoa i hoike ia ma ke poo o keia Nupepa. No ke paewaewa o ka hookaa ia ana o ke dala, a me ka hoohiki loa ana mai i ke keena nei, ua hooholo makou ma ka hebedoma ka hookaa, i mama ai maopopo mau ai ia makou, i kela a me keia hebedoma, ka poe i hookaa mai a me ka poe i hookaa ole mai, a ina ua hookaa me ka loaa aku o ka Palapala hookaa, he mea hoi e maopopo ai, ke ulu ae ka nele o ka mea heluhelu, ke okiia aku ka nupepa no ke kaa ole ma o na luna ae, alaila, no na luna ka hewa, aole no ka mea heluhelu, a ina aole io maoli no na luna ka hewa, alaila, e kala ia makou no ke oki ana aku i ka poe hookaa ole mai i ka lakou nupepa.

J. E. BUSH

 

Olelo Hoolaha.

        Ua makaukau ka mea nona ka inoa malalo iho, e hana i na POHAKU PUNA ELEELE a me na pohaku e ae no na pa kupapau, a me na kahua kukulu kia-hoomanao, O ka poe makemake e waiho mai i ka lakou mau kauoha me Ioane Akina.

J. BOWLER.

Sept. 22 90, d-1y*