Ka Leo o ka Lahui, Volume II, Number 117, 28 January 1891 — Page 4

KA LEO O KA LAHUI.

"E Mau ke Ea o ka Aina i ka Pono."

 

HE MOOLELO KAAO

— NO —

LILIA ULAULA.

 

KA MEA NANA I HOONAUEUE I NA PANI HAO HE 35 O KE

AUPUNI WANEDELA I NOHO HAKU IA HOI E KE KUPUA MASELANA.

 

            I ka ike ana mai o Bima, ka hanau mua hoi o Bawaria, i keia moku e hookomo aku ana iloko o ke awa, a me ka hae e welo haaheo ana ma na kia o ua moku nei.

            Oiai ua moku nei e hookokoke mai ana i kau wahi o ka pilipili aina; ua hoomanao koke ae la no oia i kela wa, o kona pokii no keia maluna o kela moku e hookomo mai la, a ua hiki mai oia malalo o kana kauoha.

            Nolaila, e na makamaka heluhelu a i ole o na hoa hoinainau paha o nei nanea, malia paha o ka hooko ia ana keia o ka manao lokoino i li’a mua ai e hana aku maluna o kona pokii.

            Mahope iho o ka hala ana o kekahi mau minute, ua uleu koke aku la oia e kahiko i kona aahu alii; a i ka makaukau ana, ua kauoha aku la oia i ke kahu lio, e like no hoi me ke ano mau o na posi, i ka pane ana aku penei:

            E hoomakaukau mai i ke kaa alii, i keia manawa, i holo aku ai au i kai o ka uwapo no ke kii ana i ko’u pokii.

            He manawa ole, ku ana ke kaa moi imua o ke alo o ua keiki alii Bima opu lokoino nei, a kau aku la oia iluna o ke kaa no ka uwapo ka pahu hopu.

            I ka hora a Bima i hiki aku ai i ka uwapo, o ka wa no ia i pili mai mai ai ka moku o kona pokii i ka uwapo.

            Oiai ua Bima nei i hiki aku ai i ka uwapo, ua lele iho la ua Bima nei ilalo a pii aku la no luna o ka moku, a halawai aku la me kona pokii, me kona haawi pu ana aku i kona aloha hoopunipuni, a ua panai mai la no hoi kona pokii i kona aloha i kona hanau mua me kona manao la he aloha oiaio kona hanau mua iaia, eia ka aole, he opu lokoino a ke aloha ole.

            Ua koi aku la na Bima nei e hoi pu laua i ka hale alii, oiai o ko laua home no ia o ko laua makuakane i noho ai.

            Ua ae aku la no hoi keia i ke koi a kona hanau mua, a hoi pu aku la laua no ka hale alii.

            I ko laua hiki ana aku i kauhale ua noho iho la lakou nei me ka mai kai no kekahi mau hebedoma elua, me ka wahine no hoi a laua, oia o Rose Barama.

            Ma ke kakahiaka nui o kekahi la, oiai ka hau e iniki ili o ua aina nei, e pahola ana ma na wahi a pau o ke kulanakauhale, ua ninau aku la o Rose Barama ia Bawaria i ka i ana aku penei:

            Auhea kau keiki?

            Ua hoouna ia e a’u i ke kula alii o Inia, no ko’u makemake e hoonaauao i ka’u keiki ma na ano a pau, wahi a Bawaria.

            Pehea, ua kupono no anei oia no ka hoouna ana i ke kula no ka hoonaauao ana?

            Ae, ua manao au ua kupono kona mau makahiki no ka hele ana i ke kula, wahi hou a Bawaria i hoike aku ai.

            Pela kou manao?

            Pela no ka hoi paha, pehea aku ka e hana ai.

            Ina pela, ua hiki no, no ka mea, o oe no ka mana maluna o kau hanai, wahi a Rose Barama.

            Pane hou aku la no ua Rose Barama, o ke kula au i hoouna aku nei i kau keiki, o ke kula no ia i hoouna aku nei o ka maua keiki, o kona hoahanau ponoi; eia ka mea apiki, e hoohewahewa ana paha kekahi i kekahi.

 

Aole i pau.

 

HOOLAHA A  KA PUUKU.

 

NO NA HOOKUPU NO KA LA

KUOKOA O KA LAHUI HAWAII.

            I na Hawaii a pau, ke poloai aku nei ka ea i kohoia he Puuku no ka wa, no ka malama ana i na hookupu, e loaa no oia ma ke Keena o ka LEO O KA LAHUI i na la a pau, koe ke Sabati, ka la ehiku o ka hebedoma, e lawe i na hookupu a ka poe i aloha i kona aina hanau, i makee i Kona Kuokoa o Hawaii Ponoi.

            I mea e maopopo ai ke ano o keia hookupu, ke hoike aku nei ka puuku, penei.  Ua noa ka hookupu i na Hawaii a pau, i na hookupu dala, a me ai paha.  He mau haneri dala kai hookupu ia i keia manawa, a he 10 bipi, he 20 mau puaa.  E hoike ia aku ana no ka papa inoa hookupu i ka wa e pau pono mai ai o na hookapu ma ko’u lima.

 

Ma ke Kauoha,

JNO. E. BUSH

 

KUAI HOOPOHO LOA!

 

No Ekolu Pule Wale no!

 

E HOOMAKA ANA MA KA POAKAHI LA 15 O DEKEMABA,

NO KA POMAIKAI O KUU LAHUI PONOI.

            E kipa mai i hookahi, o ka pono no o ka hele mai no a pau, i ike maka, oia hoi, e kuai hooemi loa aku ana wau i ko’u mau waiwai a pau ma ke dala kuike, oia hoi, na KALAKOA hooluu like ole.  Mai ka 12 a 20 I-a no a $1.00.

            Na KALAKOA laula, mai ka 6 a 8 I-a ko ka $1.00.

            Na KALAKOA hapa kanikau laula, he 7 I-a na ka $1.00.

            Na KINAMU, he 12 I-a $1.00.

            3 Paa KAKINI WAHINE 25 keneta.

            Na PAPALE o na opio wahine i kinohinohi la, he $1.50 a pii aku, no ka mea hookahi.

            Na LEPO-NALO mai ka 8 a 18 I-a no ka $1.00.

            Na A-I KALA KEOKEO a me hapakanikau o na wahine, 10 keneta no ka mea hookahi, a pii aku.

            Na KAMAA haahaa o na wahine, he $1.00 wale no no ka paa.

            Na KIHEI huluhulu, na HULUHULU manoanoa; na HALII moe a pela aku.

            Na PALE-ILI oluna o na kane, he 25 keneta wale no o ke ano maikai.

            Na PALE-ILI olalo, he 40 keneta wale no a pii oku.

            Na PAA LOLE o na keiki o ke KALIKIMAKA.

            Na PALULE hana o na kane mai ka 40 keneta a pii aku.

            Na PALULE huluhulu mai ke 40 keneta a pii aku.

            Na PALULE keakeo i aiana ole ia, he oluolu ke kuai ana, a he nui wale aku no koe o na waiwai e kuai @ooemi ia aku ana, mai hoohakalia i ke kipa mai iloko o keia mau Pule Ekolu wale no e loaa ai ka makepono loa o na mea kuai ma ko’u hale.

 

F. MOSES KEUMI.

ALANUI MOI.

tf.—d

 

PAPA KUHIKUHI O KA HUI

ALAHAO A ME AINA O OAHU.

 

E HOOMAKA ANA MA KA LA

25 O OKATOBA, 1890.

 

MANAWA HOLO:

                                                A.M.    A.M.    P.M.    P.M.

Haalele ia Honolulu                *6:15   8:45     1:45     4:30+

Hoea ma Honouliuli                *7:15   9:49     2:49     5:28+

Haalele ia     “                       *7:45   10:51   3:51     5:50+

Hoea i Honolulu                      *8:40   11:55   4:55     6:45+

            * Lapule wale no.

            + Poano wale no.

Oct. 21, 1890

tf—d.

 

H. P. K. Malulani.

            HE LOIO a he hookapeke olelo ma ke Kanawai.  E loaa no au mai ke kai hawanawana o Kawaihae e hoene ana me ipo la, a Hamakua au i ka la’i o Kukaiau ma ke alo o na pali.  E ohiia no hoi na aie me ke ku i ka eleu a me ka puahiohio.

 

Nov 8 ’90, d—ly.

 

Olelo Hoolaha.

            Ke hai ia aku nei ka lohe i na kanaka a pau, o ka poe e makemake ana i mau eke paakai maikai a me ona nanahu kie we maikai a makepono no hoi ke kumukuai, e loaa no au ma Haimoeipo, Hale Kaa o ka Moi, a i ole i ko’u home paha.

 

MRS. C. I. HAIRAM.

Haimoeipo, Honolulu, Oct. 8, 1890.

3ms—d.

 

Olelo Hoolaha.

            Ke kauoha ia aku nei na kanaka a pau i aie ia C. I. HIRAM i make, e hookaa koke mai i ko lakou aie ia MRS. C. I. HIRAM, a i ole ia, ia D. DAYTON.  O na poe a pau e hookaa ole mai ana a hala na la he 30 mai keia la aku, e hoopii ia no lakou e like me ke kanawai.

 

MRS. C. I. HIRAM.

Haimoeipo, Honolulu, Oct. 8, 1830.

3ms—d.

 

Hoolaha Hookapu.

            Ke papa loa ia aku nei na kanaka a pau o kela a me keia ano, aole e hele wale e kiki i na ano manu a pau ma na palena a pau o ka aina o Halekou a me Kaluapuhi ma Kaneohe, Koolaupoko, Oahu, o ka mea a mau mea paha e kue ana i keia, e hopu ia no lakou a hoopii ia @a ke kanawai.

 

MRS. C. I. HIRAM

Haimoeipo, Honolulu.  Oct. 8, 1890.

3ms—d.

 

A. J. SCHREIBER KA OLOHE.

 

HANA WATI ME NA MEA GULA.

 

      O ka hana hou ana i na wati pakeke, kau, hale, a me na mea dula o kela a me keia ano, he waipahe loa ka auhau, a pela no hoi me na mea i paa mua.  O ka mea e holo ana ia kaua oia ka’u e hana ai.

 

ALANUI HOTELE [Malalo o ka Aline tona.]

Oct. 27, 1890.

tf—d

 

Hale Kuai Wati Nui

HELU 1

No C. Ah Kau.

      KA oi o na mea Gula, na DAIMANA, na POHAKU MOMI makamae loa, na WATI GULA, na WATI DALA & C., na omau o kela a me keia ano, na lako wehi GULA a me DAIMANA, na KOMOLIMA GULA a me DAIMANA, na WATI nunui ano hou loa o kela a me ke ia ano, na PUPANAPANA a me na lako e ae e pili ana.

      E hoomanao e na makamaka, o keia AH KAU no ka mea nana i hana na WATI a me na lako GULA oi loa o keia Aupuni, a i kamaaina ma kona hale m@ i noho ai ma Alanui Nuuanu Helu 37 mamua, a oiai ua hoolilo aku oia i kona kuleana malaila, ua wehe ae nei oia he hale hou ma Alanui Moi ma Waikiki iho o ke Keena o ka nupepa Elele, a oia no hoi ke Keena oihana mua o ka Hui Alahao Hawaii.  E loaa no na mea a pau e pili ana i keia oihana me ka emi loa, a e hana hou ia na wati u me na lako gula me ka hikiwawe a me ke emi loa.  E hoouna mai i na kauoha ma ka Pahu Leta Helu 268.

      E naue nui mai, a e ike no oukou iho.  O na mea hou loa wale no i ike mua ole ia ma Hawaii nei

 

C. Ah Kau.

 

NA LAKO DALA!

HE $5,000 KA WAIWAI 10

 

MAI NA MEA ANIANI, A NA KII.

NA MEA PAANI A ME NA LAKO DALA.

 

[Kii]

 

E Haawi Makana ia aku ana.

Na Lako Dala!  Na Lako Dala!

 

$2.50—NO 30 LA WALE NO.—$2.50

      I ka Poakahi, Dekemaba la 8, 1890, ka hoomaka ana o ka makou kuai hoopau i ukali ia e na makana o na lako dala, na mea paani, na kii a na kamalii, a me na lako hoonani aniani o kela a me keia ano.

      Iloko o keia mau la he 30, e loaa no i ka poe a pau e kuai ana maloko o ko makou halekuai nei a hiki i ka $2.50 ka waiwai io mai ia makou aku, kekahi makana o na Lako Aniani like ole, na kii a me na mea Paani o kela a me keia ano.

 

A i ole, o kekahi mau Makana o na lako Wai-Dala.

 

E alawa ae ma na Pukaaniani o ko Makou Halekuai Alakai i

ike i ke Ahua nui o na Makana Makamae

a Makou i ko Makou poe kuai.

Chas. J. Fishels.

Ma ka Halekuai hoopau.

MA KA HALE ILUNA E HANA IA AI NA LOLOE.

KIHI O PAPU ME HOTELE.

Daily tf

 

Hoolaha Hou!

 

B. F. EHLERS & CO.,—Painapa.

Ua loaa mai nei ia makou he mau waiwai hou loa, oia hoi na

KAKIMIA,

KINAMU,

KEOKEO HALU’A,

CHALLI,

VIKOLIA KEOKEO

— A ME NA —

Mikilima o na ano a pau, a me na paku puka aniani o kela a me keia ano, nona kumukuai haahaa loa.

 

B. F. EHLERS & CO.

Alanui Papu, Honolulu.—25—d3m.