Ka Leo o ka Lahui, Volume II, Number 103, 8 Ianuali 1891 — KEKAHI PULAPULA A KAAHUPAHAU. [ARTICLE]

KEKAHI PULAPULA A KAAHUPHAU.

He wahi moolelo kamaha'o kekahi i hahai ia mai e kekahi keonimana aoo i ko makou mea kakau ma ka la iho la inehinei, e pili ana i kekahi mano; a o ua keonimana la no luna o ka oneki o ka mokuahi Ocianica mamua iki iho o kona haalele ana mai i keia awa ma ka la inehinei. Mahope iho o ke kuu ana o ka heleumu iloko nei o ke awa o ka mokuahi i olelo ia ae nei maluna i ka auina la o ka Poalua nei, ua iho aku la ke aho lawaia a kekahi mau wahi kolohe iloko o ke kai me na apana io bipi momona. Aole liuliu mahope iho, ua paa mai la i ka makau a ke kanaka lawaia kekahi mano nui he ewalu kapuai a oi iki ka loa. Mahope iho o ka hiu ia ana a kau iluna, ua makaikai like ae la na mea a pau; a o ka hope loa ua iho iho la ka pahi a ke kanaka lawaia, aia hoi loaa aku la iloko o kona opu kekahi mau papale kahiko, he i'a a me na pohaku liilii, a mawaho ae o ia mau. mea a ua kupueu ala o ka hohonu i ale ai ua loaa pu aku la me kekahi ope palapala o na hotele aina o Kapalakiko, i nakinaki ia a paa pono. Aole i inoino ka mea hope loa, e waiho akoakoa ana no me ka mau o ka maikai, a ua hoikeike ia mai hoi kekahi o ia mau palapala i ko makou mea kakau ma ka la inehinei. He nui na olelo ia no keia mano ma ka la inehinei, wahi a kekahi poe, mai Kapalakiko loa mai kela mano, pela i loaa ai iaia kela puolo likiki, no ka LEO nae, aole oia e hewa ke olelo ae, no ke awa no o Kou nei ia kiai, a oia hoi kekahi o na welo a Kaahupahau ka elemakule o ka nuku o Puuloa.