Ka Leo o ka Lahui, Volume I, Number 21, 16 September 1889 — He Moolelo Nanea -NOLATE MURANA. Ka Olali o na Moana Ehuehu-Ka Ouli o na Ipo Ekolu-Ka Nani Huna o Aruima-Ka Ui hoomahie o Serina, -A ME- Ka Nohea luli ole o Ratiela. [ARTICLE]

He Moolelo Nanea -NOLATE MURANA.

Ka Olali o na Moana Ehuehu-Ka Ouli o na Ipo Ekolu-Ka Nani Huna o Aruima-Ka Ui hoomahie o Serina, -A MEKa Nohea luli ole o Ratiela.

Pane iho la o Minewa: Auwe ke ala nei no ka hoi ha oe la, hoololo wale iho no oe. Pane ae la o Late Murana: Aole ua moe loa ia iho nei no au, aka no ka owe ana ae nei o ka wai ko'u mea i ala ae nei. Mino aka iho la ua kaikamahine ui la a pane mai la ia Late Murana: Alaila, ua ike anei oe i ko'u wa i auau ai. Aole paha au i ike i kela, o ka owe paha o ka wai ka'u mea i lohe, e moe ana no nae ko'u mau maka ia wa. He mau sekona loihi keia kukai olelo ana, a laua nei, ua ninau aku la ke kaikamahine: Owai la kou inoa ponoi, a mai ka aina hea mai hoi oe? Pane aku la o Late Murana: O Late Murana ko'u inoa, a aole no paha e nele kou lohe no ko'u mau makua, o laua kekahi o na makua kuonoono o ke aupuni o Italia nei; oia hoi o Murana. Ae, ua lohe au nona i na la ona e ola ana, aka, i kona make ana, ua lohe mai au ua mare kane hou kana wahine, koe nae ko'u lohe ana i ka inoa o kana keiki a me ka nui o ka laua mau keiki. Pane aku la o Late: Aohe elua a laua keiki, aka, he hookahi wale iho no. O oe hookahi wale io no anei kana keiki? Ae, owau wale no, wahi a Late Murana. Ia wa, pane mai la ua kaikamahine la, e like no ka hoi me kou hookahi a kou mau makua, pela no hoi ko'u hookahi, nolaila, ua kupono loa oe na'u, koe nae ko'u mau makua. Mai lawe oe ia'u i ipo nau, oiai, he aie nui ko'u no kou lokomaikai, a he mea hewa loa hoi no'u ka hanaino ana aku i kou maluhia e like me keia ke ano. Pane mai la ua nohea la, aole ia he mea e hewa ai nou a me a'u, aka, he mea no ia no kaua e hauoli mau ai i na la a pau o ko kaua ola ana. Aole pela, ina oe e hana mai ana ia'u e like me kau mea e manao la, alaila, he hana no ke kau mai ana maluna o'u i oi aku hoi ka poino i ko ka wa mua. He mau hora loihi wale ko keia kukai olelo ana o ua mau nohea la, a iwaena-konu o ka laua kukai olelo ana, aia hoi, lohe ae la ka nohea i kekahi mea e halulu mai ana mawaho o ka lumi. Pane aku la ka nohea ia Late Murana, me he mea la o keia mea nona na kapuai wawae a'u e lohe nei i ka nehe iluna o ka papahele, o kuu makuakane no ia. Pane aku la ua Late la, heaha la na ano o kou makuakane, he kanaka oluolu anei oia, a i ole, he kanaka huhu paha. He kanaka oluolu oia, wahi a ke kaikamahine i pane aku ai. Aole i pau pono na olelo a ke kaikamahine alii imua o Late Murana, aia hoi ku ana ka makuakane o Minewa mawaho, a pane aku la:

Ahaha! He hoa kou e noho loihi loa nei oe i ka lumi auau nei ea? Ae, he hoa noo, aka, ma kuu manao, aole au i ike i kekahi kanaka opio maikai loa e like me keia; mai ko'u mau la opio mai. Ma kona mau helehelena, he mea oiaio kau e kamailio mai nei, aka, e hoike aku au ia oe e kuu kaikamahine, aole ia he mea nona e pakele ai mai kuu inaina aku. Mai hana e like me ke kanaka aea haukae e kuu makuakane maikai, no ka mea, aole ia o ke kulana e like me kou ano au e noho nei, wahi a Minewa i pane aku ai. Aole ia oe ia wahi, aia no ia i kuu manao, no ka mea, ua loaa pono olua ia'u e kuka ana malalo o kekahi hana haumia lepo loa. Aole pela maua i kamailio iho nei, au hoi i lohe mai nei paha a lohe ole paha, aka, e hoike aku au ia oe, a i make keia kanaka hewa ole iloko o kou mau manao eleele, owau pu no kekahi e make me ia ma ia haawina hookahi, aole au e hana hookamani aku ana imua ou e kuu makuakane. Pane aku la ua makuakane la, mai hana mai oe i ka mea e hoopii mai ai i kuu inaina, no ka mea, aohe mea hiki ke hoopakele ae mai kuu inaina ae. He mau kukai olelo hahana loa kekahi i kamailio ia mawaena o ka makuakane o Minewa a me Minewa, aka nae, i ka hope loa o ka laua mau kukai olelo ana, ua hooholo iho la ka ui, e lawe ia aku o Late Murana a hoopaa ma ka hale paahao, oia hookahi wale no ka mea e maalili ai o ka huhu o keia kanaka. E hoomanao iho kaua, e ka mea heluhelu, o keia kanaka a kakou e kamailio nei, o ka moji Alapena no ia o Roma ia au, a nana a me kana wahine i hanau mai i ka nohea Minewa. Ua kaulana loa keia Minewa a puni o Italia holookoa no kona akamai luaole i ka hookani ana i na ea kani like ole, a ua kaulana pu no hoi oia no ka ui a me ka maemae o kona mau helehelena a pau mai luna a lalo. Oiai o Minewa i lohe ai no ka hoopaa ia aku o Late Murana no ka hale paahao, ua kaumaha a pilihua kona naau no ua Late la, me he mea la ua like ua nohea Minewa la i keia hora me he wahine kauwa la no Iudea, e hapai ana i kekahi huawai lepo nui kaumaha, kau a mea o ke kaumaha a luuluu i ke aloha i kana mea i aloha ai oia hoi o Late Murana. I ke ano ahiahi ana iho, ka wa hoi a na kukuna olino o ka la e haalele mai ana i ka ilikai, ia wa i hoopaa ia aku ai o Late Murana no ka hale paahao, malalo hoi o ka malama ana a na koa kiai he elima tausani. Maluna o na papa pohaku puna i uhi ole ia me kekahi wahi apana lole a kihei uhi ole iho hoi maluna i pale ia ae ai hoi i kekahi mau kikipona iniki huihui a ke anu, ma ia wahi i haule iho ai ua Late la a kakou, a hiolani hoomananui iho la i ka eha o kona io i na papa pohaku a me ke anu hoi o ke kehau e holapu ana maluna o ka ilihonua ia po. E oni wale ana no ma o a maanei i kau a mea o ka eha, hui pu ia iho hoi me ka pololi o ka ai; oi loa aku ai hoi ke ino i ko na ino a pau i ike ia. I oni wale ia no e ia a hiki wale i ke kani ana o ka leo kohaihai o ka moa mua loa. j Aole i pau.