Ka Leo o ka Lahui, Volume I, Number 19, 12 September 1889 — NU HOU KULOKO. [ARTICLE]

NU HOU KULOKO.

Halawai Hui Kinipopo hora 2 o keia auina la. Ua hoonanea ia na hehena o Kalaepohaku e ka Bana i nehinei. Ku a ua kamumu kai hiolo iho i ka po a ao ae nehinei, ke hele la a ukele na alaloa. Ua hoopanee ia ke kuai o na mahele o ka aina hanai holoholona o Kawailoa no hookahi pule paha. E hoomaka ana na kukui uwila e ho-a ia mai ka molehulehu ana iho a hoea i ka puka'na mahina. He mau kauna helu wale no na leta a ka moku kalepa S. G. Waila i lawe aku no na aina e. Eia na lala o ka poai Kinipopo ke noii nei i ke kumu o kekahi mea a lakou i makemake ole ai. He palapala kai loaa mai la makou nona ke poo: lke pono loa ia me ka inoa kapakapa: ua kapae ia. Ke kapena a me ke kupakako o ka Waialeale, aia aku la iluna o ka Mikahaia; a owai auanei la ko ua Kuahiwi la? Elua lalani pou uwea e moe la i Waialae, hookahi lalani no ke keiki momona, a o kekahi hoi no ka uwea moe moana popopo. Nui na leta kauoha i na nupepa KA LEO O KA LAHUI mai na mokupuni mai. A oia ka makou e haawi aku nei i ka lima akau o ke aloha. He hookahi ogana a me vaiolina ke hoonanea hoolealea ia ana no kekahi poe maloko o ka luakini o Kaumakapili i keia aluna ahiahi iho, hora 7 paha a oi. | Aneane pau loa na kaa Alahao Hawaii i ka hoailona ia me na hua palapala moakaka e hoike ana i kahi e holo ai, i mea e kuhihewa ole ai ka poe holo. He 64 ka nui o ka poe i hoomalu ia no keia kau kiure ae, mai ka poe wale no o ka la o lulai iho nei. He 8 no ke kipi, 21 no ka ohumu, a he 35 no ka hoohaunele. Elua wale no loio o ka papa loio i holo aku no ke kau kiure o Kau: O Hon. Paul Neumann a me W. C. Achi; a he 30 paha ka nui o na hihia o ia wahi. O ka poe a pau i makemake e hookomo ia ko lakou mau manao iloko o ka pepa me na inoa kapakapa, e pono e kakau mai me ko lakou inoa ponoi. Ua kaa hou no ke eo i ke kaikamahine o Kauakanilehua, Miss M. Keaomakani, ma ka lilo ana he Agena no keia pepa no ia Apana holookoa, a nona hoi kekahi heluna kiekie loa i lawe ia ma na apana kuaaina. Ke hapai mau nei keia lede i ka hana e kaulana ai o ka Apana o Hilo. Eo no ia Hilo. Mai ka "Lei Ahihi" mai o Kalihi i loaa mai ai ia makou ka lono e hoohui ia aku ana o Chas. G. Kauli me Miss Anakalea Kahakalau; he mau opio like no keia a elua; a o ko laua lawe ana a hoohiki iho e hoopaa malalo o ke kaula gula laahia o ka mare, o kekahi ia o na mea makamae loa i ko ke kanaka wa e ola ana, a e malama ia ana hoi ka maluhia o kahi moe. O ka la Sabati ae nei, Sepatemaba 15, ko laua laua la e mare ai. Mahalo.

Ua hookuu ia aku o Jimmy Hopu ka mea loaa i ka aihue a wehe i na pahuhao dala, mai loko aku o ka hale paahao o Auburn, New York; a aia oia i ke kulanakauhale o New York i keia wa holaila he mea pono i ko New York poe makai kiu e kaakaa pono na maka a e hana hou hoi i na poe mea baneko i ka lakou mau pahu hao me na lako hou.