Ka Leo o ka Lahui, Volume I, Number 19, 12 September 1889 — MAKEMAKE E PANE IA MAI. [ARTICLE]

MAKEMAKE E PANE IA MAI.

Pehea la i ikaika loa ai o Kawainui i ka huli, ka noii, a hopuhopu wale i kela a me keia hoakanaka i lohe wale ia ana he hui kipi a hoopaa ia ma ka halepaahao, a hoolaha ae ma kana nupepa i ko lakou mau inoa? Pehea hoi ua Kawainui la i huli ole ai, a noii hoi a hoolaha ae ma kana nupepa i na haole nana i ki pu na kanaka Hawaii, oiwi ponoi ma ka la 30 i hala aku la? He aoao aupunl anei, a he luna aupuni paha, a he waha aupuni anei, a heaha kana hana ina he aoao aupuni oia a luna a waha olelo aupuni paha, i hana ole ia ai a hopu ole ia kela poe pepehi kanaka me na mea kaua a pilikia ka ohana e ola nei me ka hune i ka manao pono. J. T. WAILANI. Aia ma ka hale pa'i kii o J. J. Williams e ike ia ai kekahi kii kaha lima oi loa o ka maikai oia hoi ke kii o ka mokuahi Mikahala e ku ana ma ke awa ku moku o Nawiliwili Kauai. He opio Hawaii ka mea nana i kaha ua kii la oia hoi o C. Pooloa, nona na makahiki he 18 wale no, a he mea maopopo loa, ina e hoomau keia opio Hawaii ma keia talena maikai alaila, aohe mea e kanalua ai no kona lilo ana i kanaka makaukau loa ma ia lala o ka ike. Ke haawi nei ka LEO O KA LAHUI i kona leo mahalo, a ke kau leo aku nei. E hoomau aku.