Ka Leo o ka Lahui, Volume I, Number 16, 9 September 1889 — HE MOEUHANE PAHAOHAO. [ARTICLE]

HE MOEUHANE PAHAOHAO.

Mr. Lunahooponopono o KA LEO O KA LAHUI; Aloha oe: I ka po o ka la ekahi, a ao ae la 2 o keia mahina, ua loaa iho la ia'u ka hihio moeuhane, ua hala aku la ka noonoo maikai mai ko'u lolo ae, a e waiho oni ole ana au maluna o kahi moe, ua ike aku la au, i ke aka o ko'u wahi uhane e okuu ana ma kae kahawai, e hana ana i kekahi aho lawaia, elua aho, elua makau. Ua hoolei aku la au i ka'u aho iloko o ka wai, aia nae ma kahi mamao aku, e lana mai ana he kiowai nui a hohonu i loa no a haule, paa mai la no ka i'a, o ko'u huki mai la no ia, a kau i kuia, elua i'a, hoolei hou aku la no au, a paa hou no, a pela aku. Aia nae i ka'u aho hope, ike aku la au ua moku. Ua houluulu ae la au i ka'u mau i'a, he umikumamakahi i'a. He anae ka i'a. Ua haalele aku la au ia wahi, a huli aku la au, no ke komohana akau, ia'u e ku ana ma kahakai, ike aku la au he umi punohu uakoko, e nee malie mai ana i ka moana, emi mai la au ihope no ka maka'u, aia nae ua ike hou au elua anuenue e pio ana, mamua pono mai o na uakoko, o na anuenue 2 ua komo aku ko laua mau welelau i ke aouli, ua pae mai la lakou a pau i kahaone, oia no ko'u wa, i holo aku ai a ku ana i kahakai, he 20 kapuai ke kaawale. Me ku'u manao e lohe pono mai i na mea hou, eia nae, ua oili mai la he luahine i hele a uhi ka alu; oia no ka wa a'u i ninau aku ai, heaha ka huakai nui, o kou hiki ana mai nei, ua pane mai la kela i kii mai la au i ko'u kuleana aina iloko nei o ka aina a oukou e noho nei.

Hoole aku la au, aole ou aina, a mai noho oe mahope o hai, o kuewa auanei oe. Iloko o kela wa ua nalowale na punohu uakoko, ua hooponopono iho la au me ua luahine ala i kona wahi e noho ai, aia makai ae o Kuloloia, i Honolulu. A puiwa ae la au, eia he moeuhane. KUKALAULA.